Read idege 2 ỊSAMWẸLỤ 4 Bible Online

2 ỊSAMWẸLỤ 4 - idege bible

2 ỊSAMWẸLỤ 4

¹Ụka ká Ichibochẹtị ọnyị nya ịSọlụ wo ya nyị nwụ Abụnẹẹ i-iHebirọn, uhi jwoo lụmẹ. Ala Isirẹlụ wuu kpa igbeene a-abwabwọ.

²Ichibochẹtị la angịdẹwụ angị imiiye ịhyẹ ịlẹ kị ri alegbeju ị-kaa kpa angịdẹwụ be epweji ẹpwa. Ẹnyị nyaa ri ịBaana bala iRekabụ anyị nya iRimọn ọlẹ kọ bwu iBiyẹrotu i-imwawụ nya iBenjamịn. Ị wa epweji nya iBiyerotu ọwẹ ha imwawụ nya iBenjamịn.

³Angị kụ iBiyẹrotu ene-ene rụnyẹ rụ ka iGitayim lẹ̀. Ụ-ụwa ị tị kụ pyịyọọ lẹlẹ.

⁴IJonatan ọnyị nya ịSọlụ ma ọnyị ọlẹng ọhẹ ọlẹ ká ẹnyị nyamwụ ri iMefibochẹtị. Ọ gu ẹka ịrụ ụka ká ịSọlụ bala iJonatan adamwụ anyị gbu. Ụka kị wo oja bwu iJesiryẹlụ chajị nya igu nyaa, ọnyang ọkpẹhị rịrị iMefibochẹtị à hyaa lọọ juwa kpọọ rụnyẹ rụ lẹlẹ. Ụka kọ juwa rụnyẹ lagaga lẹ, iMefibochẹtị à gwọọ mileji lẹ, ọ chokuku lẹlẹ.

⁵Ụka ọọwa, iRekabụ bala ịBaana anyị nya iRimọn ọla iBiyẹrotu hu ang kele ka ẹpwa nya Ichibochẹtị. Ị pwụ ụwa ụka kọ juwa mwụ ịnyọ lụka nya ẹnụ ọ-rịrị ẹ-ẹpwayịrẹtẹ.

⁶Ụka ọọwa, ọnyang o-gbe ọnang juwa rúune ụka kọ juwa kpa ịrayịsị iwiiti hịrị gbee lẹ, ọ nune lẹlẹ. Ịnyị, iRekabụ bala ịBaana ọnyịnamwụ à gba kwẹkẹrẹ da ka ẹpwang lẹlẹ.

⁷Ụka kị pwụ ube onune nya Ichibochẹtị kọ juwa kpa une nọ, ị gwoo ẹma ẹ-ẹpwụ hurum-m lẹ, ọ gbu lẹlẹ. Ị chọọ egbeju kpa bịlaa lẹ, ị jẹdịyẹ tụ Ọkpọọ nya ịJọdan da rụ lodu-odu ọọwa lẹlẹ.

⁸Ị kpa egbeju nyamwụ wẹ iDevidi i-iHebirọn lẹ, ị byoo yẹkẹẹ, “Egbeju nya Ichibochẹtị ọnyị nya ịSọlụ oluji nyang ọlẹ kọ lẹẹ tịtọ nyọka nwụng nwụ à lẹẹ lẹlẹ. Amkpaa họ ịSọlụ bala ugbiyegu nyamwụ kwiwa hang ahụ adịrahụ alẹ lẹ.”

⁹IDevidi tị wẹ byi iRekabụ bala ịBaana yẹkẹẹ, “M̀ jam kpa ẹnyị nya Amkpaa ọlẹ kọ juwa hịhị, kọ chịm da bwu ẹpwụ nya akama nyam wuu ya ẹla nya ịlẹhị jenu lẹ!

¹⁰Ọngọhẹ ọlẹ kọ wẹ ka ya jem lẹẹ i-iSikilagị ya ịSọlụ nyị gbu lẹ lẹẹ, ọ me ká oja ọnyịịla ọ wẹẹ jam. M̀ tị woo pyẹẹ, nwọọ ụ-ụwa. Ọwẹ à ri uri nya oja nyamwụ ọọwa lẹ!

¹¹Ányị ịnya angị ịtịpyọ ịlẹ kị ba pyeee ka ẹpwa nya ọngọ-dẹla kpong-kpong ka kaka nwụ à tị́ tị̀ tị̄ ka la-à? M̀ ka họnụ kwiwa nyọlẹ kanụ nwọọ. M̀ ka tanụ ayịreji bwu odehe ọlẹ!”

¹²Ọọwa, iDevid à byị angịdẹwụ nyamwụ ịhyẹ nyị nwụ iRekabụ bala ịBaana mẹ lẹ, ị nwaa lẹlẹ. Ị chaa abwọ bala ata eku, ya pịlẹ u-uhye ba ẹmwụ-enyi ọla iHebirọn ba. Ị tị hu egbeju nya Ichibochẹtị kpa kaka ju eji i-iworu nya Abụnẹẹ ụ-ụwa i-iHebirọn.