Read idege 2 ỊSAMWẸLỤ 5 Bible Online

2 ỊSAMWẸLỤ 5 - idege bible

2 ỊSAMWẸLỤ 5

¹Ọọwa lẹ, alimwawụ ọnyị myị ọnyị nya Isirẹlụ a wẹ ẹga nya iDevid wẹ iHebirọn kaka byoo yẹkẹẹ, “Ahị wuu ri angịnyị nyang lẹ.

²Bwu ẹkpẹ-ẹkpẹ, ụka ká ịSọlụ ri adịrahụ nyahị ri lẹ, ahụ à kaa ji ịlahị kpa ala Isirẹlụ ka ẹwụ lẹ. Amkpaa tị myị ọnụ hang nyọka kpẹhị rịrị angịnyị nyamwụ bala ọ-ka ri adịrahụ nyaa.”

³Lẹẹlẹ, ụka ká alegbeju nya ala Isirẹlụ wuu wẹ ẹga nya iDevidi Adịrahụ i-iHebirọn, ọ nwa iro taa ụ-ụwa. Ọọwa, ị ya ida hwọọ lẹ, ọ ri adịrahụ nya Isirẹlụ lẹlẹ.

⁴IDevidi gu ẹka iwo ịta ụka kọ dọmwụ nya adịrahụ oriri, ọ tị ri adịrahụ ẹka iwo ine gbẹgbịlẹ.

⁵Ọ hụ i-iHebirọn ri adịrahụ nya ala iJuda ẹka irwiye ba ẹhya. Ọ hụ i-iJerusalẹm ri adịrahụ nya Isirẹlụ wuu tụ iJuda ẹ-ẹpwụ nya ẹka iwo ịta kụrụ ịta gbẹgbịlẹ.

⁶Ụka ọhẹ ká iDevidi kpa angịdẹwụ nyamwụ jẹ yahị da iJerusalẹm nyọka mwẹla ta alụwa Ala iJebusi ịlẹ kị kụ ụwa, me ká iDevidi-í ka kụrụ epweji nyaa myị ka. Ọọwa, ị chọọ ụkwa yẹkẹẹ, “Á ka jụ wẹ ịnyahị myị ka. Ó-ri alidu-alidu bala ikuku-ikuku kem, ị́ ka tụụnụ kịnyaa myị.”

⁷Tị kpọkpọọkpọ, iDevidi nu ịSayọn ẹga ọ-chị àjẹ ju nyaa ọwẹ. Ọọwa, ị dọmwụ nyọka wụrụ ụwa “Epweji nya iDevidi lẹlẹ”.

⁸Ẹnụ ọọwa, iDevidi byi angịnyị nyamwụ yẹkẹẹ, “Anụ angị ka nwụ myị lẹ, anụ tụ ụgbụ nya enyi da kpehe, kanụ nwụ alidu bala ikuku aluji nyam i-ri ala iJebusi ịwẹ mẹ, chajị ị wụm ẹjẹ lụmẹ.” Ọọwa-à du kị kaa kpa ya yẹkẹẹ, “Alidu bala ikuku-ú ka ka ẹpwa nya Amkpaa ka” lẹ.

⁹Ụka ká iDevidi nu ẹga ọ-chị àjẹ ju ọwẹ, ọ kụ ẹpwa ụ-ụwa. Ọọwa, ọ wụrụ ụwa “Epweji nya iDevidi” lẹlẹ. Ọ nwụ ẹpwa ị-chị ajẹ ju ịkịla dagaga jwoo dọmwụ bwu ẹga kị kpa ịpyị chị ikpirigidi ọlọmwẹnụ-ụtụrụ nya ikiti.

¹⁰IDevidi juwa nwa ẹ-ẹpwụ nya ọngịrị ọlala kịlahị-ịlahị, chajị Amkpaa Agụgụ hụ tọọ.

¹¹Ụka ọọwa, iHiram Adịrahụ nya ala ịTaya du alẹrụ ịhyẹ tọ iDevidi. Ị kpa ekeji nya isida ba ịlaa. Ọ chụ ikebenta bala angị be ajwọ du kele, chajị kị ka nwụ ẹpwa ha Adịrahụ iDevidi.

¹²Ụka ọọwa, iDevidi ayịdang jẹ ká Amkpaa yọọ hụhụ giri-giri lala adịrahụ nya Isirẹlụ lẹ. Ọ jẹ ịnyịnyị ká Amkpaa họ ká ọpyị nyamwụ juwa nwa pwụụpwụụ ịnyịnyị chajị nya ala Isirẹlụ angịnyị nyamwụ lẹ.

¹³Ụka ká iDevidi mwụ bwu iHebirọn ka iJerusalẹm kpá, ọ ye ịhụ-anchẹ bala ihụ ịlam ịkịla myịmyị. Ọ ma anyị alẹng bala anyị anyang ịkịla myịmyị ịnyịnyị.

¹⁴Ẹnyị nya anyị alẹng ịlẹ kọ ma i-iJerusalẹm ri ịChamuwa bala iChobabụ bala ịNatan bala iSolomọn.

¹⁵Anyị alẹng nyamwụ ịkịla ri Ibuha bala Elichuwa bala ịNẹfẹgị bala ịJafiya bala

¹⁶Elichama bala Eliyada bala Elifẹlẹtị.

¹⁷Ala iFilisitiya wo oja ya nyị hu iDevidi Adịrahụ nya Isirẹlụ. Ọọwa, angịdẹwụ nyaa à dọmwụ nyọka pịlahị nyamwụ chajị kị ka woo lẹlẹ. Ụka ká IDevidi wo ẹlẹwẹ, ọ rụ ka ẹga ọ-ch àjẹ ju ọhẹ.

¹⁸Ala iFilisitiya pwụ eji lẹ, ị chịkụ tụ Ọkpọọ nya iRefayim wuu da lẹlẹ.

¹⁹Ọọwa, iDevidi à tọ Amkpaa wo yẹkẹẹ, “M̄ kele ka mwẹla ta ala iFilisitiya ịwẹ mẹ-ẹ́? À ka ya ọkụrụ-kụrụ ham-ḿ?” Amkpaa wẹ byoo yẹkẹẹ, “Ee, kele mẹ. M̀ ka ya ọkụrụ-kụrụ hang pyií.”

²⁰Ọọwa lẹ, iDevidi à kele ka ịBaalụ-ịpẹrasim lẹ, ọ kụrụ ala iFilisitiya ụ-ụwa lẹlẹ. Lẹ, iDevidi à yẹkẹẹ, “Áhyu, Amkpaa-à be bwụụụ bwu ẹpwụ nya aluji nyam lala enyi ọmyị̀myị wẹ lẹ-ẹ́?” Ịnyị à du kọ wụrụ ẹnyị nya ẹgẹwẹ ịBaalụ-ịpẹrasim[4] lẹ.

²¹Ala iFilisitiya rụnyẹ rụ, pẹhi ekpeku nya ijiga nyaa chị ụ-ụwa lẹ, iDevidi bala angịdẹwụ nyamwụ à nwụlaa kpa rụ lẹlẹ.

²²Ụka kọ nọ chẹẹ, ala iFilisitiya myịmyị tịrẹkpẹ kele kaka chịkụ tụ Ọkpọọ nya iRefayim da wuu.

²³Ọọwa, iDevidi à tọ Amkpaa wo myịmyị jaabwọ kọ ka họ lẹ, ọ wẹ byi iDevidi yẹkẹẹ, “Ā mwẹla taa bwu ịlahị ịịwẹ ka. Jẹ dọgịlẹ jwaa bwu ẹkpẹ, ká gba mịlaa bwu ẹga nya ịmwụ nya ekeji ịbalụsam mẹ.

²⁴Ụka ká wo ikwata nya ẹwụ ọchịchị u-uhye nya ekeji ịwẹ lẹ, anụ gba mịlaa ahyaahị mẹ. Ọwẹ à ri ang-ẹjẹẹ nyori am Amkpaa juwa jịlahị nyanụ kaka kụrụ angịdẹwụ nya ala iFilisitiya hanụ lẹlẹ.”

²⁵IDevidi họ jaabwọ ká Amkpaa byoo. Lẹẹlẹ, ọ ku ala iFilisitiya ịwẹ tịrẹkpẹ lalaala bwu ịGẹba ka ju ka ịGẹsẹẹ.