Read idege 2 ỊSAMWẸLỤ 6 Bible Online

2 ỊSAMWẸLỤ 6 - idege bible

2 ỊSAMWẸLỤ 6

¹Ọọwa, iDevid à tụ angịdẹwụ ịlahịchịng nya ala Isirẹlụ wuu guru lẹlẹ. Ịwa wuu la angị ụnọ iwo ịta (30,000).

²Ọwa bala angịwẹ wuu bajẹ kele ka ịBaala i-iJuda nyọka hu Akpa nya Iro kpa nyà. Ị da ẹnyị nya Amkpaa Agụgụ ọlẹ kọ hụhụ apewa nya alegu-icherubu ba Akpa ọọwa.

³Ọọwa, ị hu Akpa nya Iro bwu ẹpwa nya Abinadabụ ọlẹ kọ kụ ikiti lẹ, ị ya rịrị u-uhye nya ang ọrụnyẹ onyeewe-onyeewe ọlẹ ká ịna kaa gbile lẹlẹ. Usa bala Ahiyo anyị alẹng nya Abinadabụ à juwa kpa ang ọrụnyẹ ọọwa ụgbẹyị lẹ.

⁴Ahiyo à juwa jẹdịyẹ jịlahị nya ang ọrụnyẹ ọwẹ kọ kpa Akpa nya Iro nya Ohe Oluhye lẹ.

⁵IDevidi bala ala Isirẹlụ ịkịla wuu chewo bala o-mwu eje lọngịrị nyaa wuu nyọka chihi ju Amkpaa. Ị juwa du ogum̀ bala ẹnwụ bala eba bala ịchẹchẹ bala ọkangga.

⁶Ụka kị jẹ ka pwụ ẹga o-ru ịrayịsị iwiiti nya ịNakọn, ang ọrụnyẹ ọwẹ chụchụụ. Ọọwa, Usa à nịra ụbwọ kpaaa kaka wu Akpa nya Iro kpa lẹlẹ.

⁷Agbama nya Amkpaa Ohe Oluhye à wuru jahị da Usa lẹ, ọ nwụ Usa chajị nyọlẹ kọ yụbwọ nyamwụ gu Akpa nya Iro lẹlẹ. Ọ gbu dụwa ịkịka nya Akpa nya Iro.

⁸IDevidi wụ ẹjẹ chajị nyọlẹ ká Amkpaa yẹ Usa akama ọlịịwẹ. Ọọwa, ị wụrụ ẹnyị nya ẹgẹwẹ “Akama ọyẹyẹ nya Usa”[5] bwu ụka ọwẹ lẹlẹ.

⁹Ọọwa, iDevidi à ju uhi nya Amkpaa lẹ, ọ yẹkẹẹ, “Ányị m̄ tị ka bwu kpa Akpa nya Iro wẹ ka rịrị ẹ-ẹga nya ịlọm tị̀ tị̄ mẹ?”

¹⁰Lẹẹlẹ, iDevidi cheje nyọka kpa Akpa nya Iro kele ka iJerusalẹm kaka. Ma, ọ kpọọ pẹ kaka rịrị ẹ-ẹpwa nya Ọbẹdị-ẹdọm ọla ịGaatị.

¹¹Akpa nya Iro rịrị ẹgẹwẹ ịya ịta gbẹgbịlẹ. Amkpaa wahị kụrụ Ọbẹdị-ẹdọm bala alugbiyegu nyamwụ wuu.

¹²Ụka ọọwa, iDevidi wo oja ya Amkpaa nyị wahị kụrụ ugbiyegu nya Ọbẹdị-ẹdọm bala ang ịlẹ kọ la wuu ọọ-la ọlẹ ká Akpa nya Iro rịrị ẹ-ẹpwa nyamwụ. Ọọwa, ọ kele kaka hu Akpa nya Iro bwu ụwa kpa kele ka iJerusalẹm lọkẹkẹnị ọtụka-ọtụka lẹlẹ.

¹³Ụka ká angịlẹ kị kpa olo nya Akpa nya Iro yegiri kị jẹ apatẹ ịrwọnyẹ lẹ, ị godayị ụka ká iDevidi juwa ya ẹna bala ụgba nya ẹna o-ju eyo kịla iya lẹlẹ.

¹⁴Ọọwa, iDevidi à chewo chihi ju Amkpaa lọngịrị nyamwụ wuu lẹlẹ. Ụka ọwẹ, awụrụ opente kem ọ ya kụrụ lẹ.

¹⁵IDevidi bala ala Isirẹlụ wuu kpa Akpa nya Iro nyà wẹ iJerusalẹm liwuru ọdada bala ẹkụrwẹ ọchịchị.

¹⁶Ụka kị juwa kpa Akpa nya Iro pwụ eji wẹ iJerusalẹm, iMikalụ ọnyị ọnyang nya ịSọlụ chẹhị bwu iwindo kaka yẹ iDevidi jaabwọ kọ juwa gbajị bala o-chewo ha Amkpaa. Ọhọhọ nya iDevidi ọọwa, lọọ nya ẹla ohideeji.

¹⁷Ị kpa Akpa nya Iro warị lẹ, ị ya rịrị ẹ-ẹpwang nya ọdụ ọlẹ ká iDevidi ya yeji chajị nyamwụ lẹlẹ. Ọọwa, iDevidi à kịla iya ọ-rụ ila bala iya nya ọhọlawụlẹ ha Amkpaa lẹlẹ.

¹⁸Ụka kọ kịla iya ịịwa kpá lẹ, ọ wahị kụrụ angịnyị wuu lẹnyị nya Amkpaa Agụgụ lẹlẹ.

¹⁹Ọ ga ang oriri ha ọng myị ọng nyaa. Ọ ya ẹbẹ nya ịkaa ookpokpo bala ebwo nya iyo ookpokpo bala ịkama ha ọngọngọọng nya alẹng bala anyang ịla Isirẹlụ. Ọọwa, ịwa wuu à rụ ka ẹpwa nya ịlaa lẹlẹ.

²⁰Ụka ká iDevidi nyà tịrẹkpẹ ka ẹpwa kọ ka dọnụ chị alugbiyegu nyamwụ, iMikalụ kpehe kaka tọọ ụ-ụgbẹyị. Ọọwa, ọ ya ẹla ta iDevidi yẹkẹẹ, “Ahụ adịrahụ nya ala Isirẹlụ à hu oyoyi ju ịlọng alẹ lẹẹ-ẹ́! A ya ịnyịrọ nyang da ha anchẹ anyang nya alụkụrwọ nyang yẹ lala oluchi!”

²¹IDevidi wọọ yẹkẹẹ, “Amkpaa m̄ chewo chihi ju lẹ. Ọwa-à chụm ku ọmwakpa nya adang bala ugbiyegu nyamwụ nyọka ri olegbeju nya ala Isirẹlụ angịnyị nyamwụ lẹ. Ḿ ka hịnyọ la o-chewo chihi ju Amkpaa ka.

²²M̀ ka chị oyoyi ju ịlọm gụ ọlẹ wẹẹ. M̀ tị ka tụng ànyị gụ ọwẹ wẹẹ. Anchẹ anyang ịlẹ ká ya ẹla rụ-ụ̀ wẹ tị ka chihi ọtụka-ọtụka jum.”

²³IMikalụ ayịdang á ma ọnyị ọhẹ-lọhẹ ka.