Read idege 2 ỊSAMWẸLỤ 7 Bible Online

2 ỊSAMWẸLỤ 7 - idege bible

2 ỊSAMWẸLỤ 7

¹Ụka ọọwa, Amkpaa chị iDevidi da bwu ẹga nya aluji nyamwụ wuu. Ọ hụhụ lokpunyi ẹ-ẹpwa nyamwụ.

²Ọọwa, iDevidi à byi ịNatan ọlọmwụ yẹkẹẹ, “Yẹ wẹẹ, am kụ ám̀ ẹ-ẹpwa ọlẹ kị kpa ekeji nya isida ịnyịịla-ịnyịịla nwụ. Ẹ-ẹpwụ nya ọdụ ọlam-ọlam ọlẹ Akpa nya Iro nya Ohe Oluhye à tị rịrị-ị̀ wẹ lẹ!”

³Ọọwa, ịNatan à wọọ yẹkẹẹ, “Ang myị ang ọlẹ kọ bang i-irya nyang lẹ, à họ mẹ, chajị Amkpaa juwa tang.”

⁴Ma, ẹnẹwẹ lodu, Amkpaa byi ịNatan yẹkẹẹ,

⁵“Kele ká byi iDevidi ọnchẹ nyam mẹ, ọ́ọ̀wa-à ka nwụ ube ẹpwa ọlẹ kam ka kụ ka.

⁶Mwiiji nyọlẹ kam gba ala Isirẹlụ kpehe bwu ọpyị nya Ijipiti gbee daalẹ lẹ, ḿ kụ ẹ-ẹpwang ọhẹ lẹka. Ẹpwang nya ọdụ à ri ẹga kam kaa kụ nyọlẹ kam lẹẹ-ẹ̀ bwu ẹgẹhẹ ka ẹga ọkịla lẹ.

⁷Ẹ-ẹga ịlẹ wuu kam lẹẹ-ẹ̀ jẹ bwu bala ala Isirẹlụ lẹ, ḿ tọ ọngọngọhẹ nya alegbeju ịlẹ kam chụ ang odudu kị nwụ ẹpwa la isida ham ka lẹ ka.

⁸“Lẹẹlẹ, aa byi iDevidi ọnchẹ nyam ịịlẹ: ‘M̀ kpang rụ bwu ẹpwamẹ ẹga ká juwa kpẹhị rịrị ịkpịlọ, hung ri olegbeju nya ala Isirẹlụ angịnyị nyam.

⁹M̀ juwa tang ẹga myị ẹga ká ka. M̀ ku aluji nyang wuu hi ẹga da hang. Bwu ọlẹẹlẹẹ kịlahị, m̀ ka họ ká ka ri olegbeju olehe lala alegbeju ịgụgụ wuu odehe.

¹⁰M̀ chụ ẹga ha ala Isirẹlụ angịnyị nyam, kpụ m̄ yaa kụ ụwa nya ọpyị nya ịlaa lụbwọ-lẹta lẹ. Ọngọngọhẹ-ẹ́ ka taa pyịpyị kaka. Alọkwọ-ọ̄ ka mwẹla taa jaabwọ kịị họ ene-ene kaka. M̀ ka keenu hi aluji nyanụ wuu. M̀ ka ya anyị ịmama hanụ.

¹²Ụka ká ka gbu, kị kpang kaka tọ adang anyị kpá, m̀ ka họ ká ọnyị-ọnyị nya ịlọng ọhẹ ka ri adịrahụ. M̀ ka yoo hụhụ giri-giri.

¹³Ọwa-à ka nwụ ube ham lẹ. M̀ ka họ ká ẹchị-adịrahụ ka ji ugbiyegu nyamwụ pyịyọọ.

¹⁴M̀ ka ri adamwụ. Ọ ka ri ọnyị nyam. Ó-ri kọ họ ang ọtịpyọ, m̀ ka yalibyi lọọ jaabwọ ká adịda kaa yalibyi la ọnyị nyamwụ.

¹⁵Ḿ tị ka tụ ọháha o-gbu enyi-ka nyam kịnyaa hyoo jaabwọ kam họ ẹ-ẹga nya ịSọlụ ene ká wẹẹ ri adịrahụ ka.

¹⁶A ka la anyị ịtụma kịlahị-ịlahị pyịyọọ. Ẹchị-adịrahụ nyang ka yeji pyịyọọ.’ ”

¹⁷Ọọwa, ịNatan à kele kaka ya je iDevidi ẹla myị ẹla ọlẹ ká Amkpaa chị ehe ya jọọ lẹlẹ.

¹⁸Ọọwa, Adịrahụ iDevidi à kele ka Ọdụ nya Amkpaa lẹ, ọ hụhụ juwa raabwọ yẹkẹẹ, “Ọngọlahị Amkpaa ee, oowo am lee ugbiyegu nyam à tị́ ri ene, du ká họ ang ịlẹ wuu ham lẹ-ẹ̀?

¹⁹Ọ́ myịmyị ba ịịwẹ ka, Ọngọlahị Amkpaa. À myị ọnụ lụmẹ-lụmẹ ha anyị ịtụma nyam ju ka oyi ọlịlahị. Ọọwa ri ịịwẹ ā kaa họ ẹla ọlẹga nya ọngịnyị ehe lẹ-ẹ́?[6]

²⁰Ọnụ him pyeee lẹ! À jẹm am ọnchẹ nyang yẹẹyẹẹ.

²¹Ahụ à me lịlọng cheje nyọka họ ang ịtụka ịlẹ wuu jaabwọ ká myị ọnụ bala ọ-maa jẹm lẹ.

²²À la ụmụmẹ Ọngọlahị Amkpaa! Ọngọngọhẹ-ẹ́ lala ahụ kaka. Ahụ ụbwọng āhị jẹ ká ri Ohe Oluhye kẹnẹ-kẹnẹ lẹ.

²³Ẹpwụma ọkịla ọhẹ-lọhẹ ám̀ odehe-é lala ala Isirẹlụ angịnyị nyang kaka. À gbaa kpehe bwu ẹpwụ nya ọnyọhị oriri kaka ri angịnyị nya ịlọng. Ang ịtụka ịlẹbyẹbyị ịlẹ ká họ haa du ká ẹnyị nyang ru ohi ju ka ẹga myị ẹga wuu. À ku alẹpwụma ịkịla bala ihye nyaa hi ẹga da ha angịlẹ ká gba kpehe bwu Ijipiti kaka ri angịnyị nyang.

²⁴À hu ala Isirẹlụ nya angịnyị nyang gbe oyi myị oyi. Ahụ Amkpaa-à ri Ohe Oluhye nyaa lẹ.

²⁵“Lẹẹlẹ, Amkpaa Ohe Oluhye ee, aa họ ọnụ ọlẹ ka myị ham bala anyị ịtụma nyam jịra gbe oyi myị oyi, ká họ ang ịlẹ ká ya ọwa nyị ka họ mẹ.

²⁶Ọọwa, ohi oruru nyang à ka lụmẹ lẹlẹ. Angịnyị ka juwa kpa ya gbe oyi myị oyi yẹkẹẹ, ‘Amkpaa Agụgụ à ri Ohe Oluhye nya ala Isirẹlụ lẹ.’ Ẹchị-adịrahụ olugbiyegu nyam am iDevidi tị ka yeji pyịyọọ.

²⁷Amkpaa Agụgụ, Ohe Oluhye nya ala Isirẹlụ ee, m̀ ju ugbodu jam raabwọ ọlẹ hang chajị nyọlẹ ká wụrụ mẹjẹm ya ọwa nyị ka họ ká anyị ịtụma nyam nyị ka ri ịdịrịhụ pyịyọọ.

²⁸Ahụ kpakpakpa à ri Ohe Oluhye lẹ, Ọngọlahị Amkpaa. Ẹla ọlọnụ nyang ri nya ịlẹhị. À tị myị ọnụ nya ang ịnyịịla ham am ọnchẹ nyang lẹ.

²⁹Lẹẹlẹ, wahị kụrụ ugbiyegu nyam chajị kọ ka yeji pyịyọọ ị-ịlahị nyang ahụ Ọngọlahị Amkpaa mẹ. Ahụ à ya ịnyị lẹ. Ahị ọwawa nyang ọọwa ka hụ ta anyị ịtụma nyam pyịyọọ.”