Read idege 2 ỊSAMWẸLỤ 8 Bible Online

2 ỊSAMWẸLỤ 8 - idege bible

2 ỊSAMWẸLỤ 8

¹Ụka kọ nọ chẹẹ, iDevidi dẹwụ ta ala iFilisitiya myịmyị. Ọ kụrwaa, ye ọngịrị nya ẹhị ọ-kpa rịrị ọpyị ọọwa bwu ẹpwụtụbwọ nyaa[7].

²IDevidi kụrụ ala iMowabụ ịnyịnyị. Ọ byi angịlẹ kọ wu bwu ẹwụ wuu nyị hị nọnọ ị-ịpyị ịgba ịta. Ọ go alọgba imiiye nyaa kpa kaka nwụ. Ọ pẹhi alọgba ọhata nyaa rụ. Ọọwa, ala iMowabụ à yẹ ri anchẹ nya iDevidi juwa nyẹ ẹpwa họọ lẹlẹ.

³Ọ kụrụ adịrahụ nya ala iSoba ọlọpyị nya iSiriya ọlẹ ká ẹnyị nyamwụ ri ịHadadẹsẹẹ ọnyị nya iRehọbụ ịnyịnyị. Ụka ọwẹ ri ụka ká ịHadadẹsẹẹ juwa jẹ kaka ye ọpyị oloye oluhye nya Ihu iYufuretisi jubwọ.

⁴IDevidi wu angị kpa anyịrẹ dẹwụ angị ụnọ da angị ohu irwiye (1,700) bala angị ụnọ iwo imiiye (20,000) nya angịdẹwụ ịkịla. Ọ mwụ anyịrẹ i-gbile ang ịrụnyẹ nyaa wuu kụnyà-kụnyà kẹnẹ-kẹnẹ ka hi ịlẹ kị ka meme la o-gbile ang ịrụnyẹ ohu ookpokpo (100).

⁵Ụka ká ala iSiriya ịla ịDamasịkọsị du angịdẹwụ kaka da ịHadadẹsẹẹ Adịrahụ nya ala iSoba ọwẹ ụbwọ, iDevidi nwụ angị ụnọ iwo imiiye da ụnọ imiiye (22,000) nyaa.

⁶Ọọwa, iDevidi à nwụ ịkampụ nya angịdẹwụ nyamwụ ọ-ọpyị nyaa lẹ, ala iSiriya ịwẹ à yẹ ri anchẹ nyamwụ juwa nyẹ ẹpwa họọ lẹlẹ. Amkpaa họ iDevidi kụrụ ẹ-ẹga myị ẹga kọ dẹwụ.

⁷IDevidi nu ọkụmada nya okpoko ịgọm ịlẹ ká alegbeju ịtụkụ yi ịHadadẹsẹẹ kpa lẹ, ọ gyaa kpa rụ ka iJerusalẹm lẹlẹ.

⁸IDevidi go iru nya ije ịnyịmịla lụmẹ-lụmẹ bwu epweji nya ịBẹta bala iBerotayị ịlẹ kị ji ekpeleji nya ịHadadẹsẹẹ.

⁹Ụka ọọwa, ịTọyị Adịrahụ nya ala ịHamatị wo oja ya iDevidi nyị kụrụ angịdẹwụ nya ịHadadẹsẹẹ wuu.

¹⁰Ọọwa, ọ du iJoram ọnyị ọlẹng nyamwụ kaka da ọnụ chị iDevidi bala ọ-dọọ ọlẹẹkwaa nyọlẹ kọ kụrụ ịHadadẹsẹẹ lẹlẹ. Adịrahụ ịTọyị ọwẹ bala ịHadadẹsẹẹ ayịdang ri alẹwụ nya awụlẹ kpụ ị dawụlẹ ẹwụ ụka lụmẹ-lụmẹ. IJoram kpa ang-ahị nya okpoko ịgọm bala okpoko onyoowuru bala oje ọnyọmịla kịla Adịrahụ iDevidi.

¹¹IDevidi go ang-ahị ịwẹ wuu ha Amkpaa nya ọ-kpa họ ụkụrwọ họọ. Ang ịkịla ịlẹ kọ ya ha Amkpaa ịnyịnyị ri okpoko ịgọm bala okpoko onyoowuru ịlẹ kọ go bwu

¹²ọpyị nya Ẹdọm bala iMowabụ bala iFilisitiya bala Amalẹkị bala ẹga nya adịrahụ ịHadadẹsẹẹ.

¹³IDevidi ru ohi ọtụka-ọtụka ụka kọ nyà bwu ẹwụ ọlẹ kọ da ta ala ịSiriya kpá, kọ nwụ ala Ẹdọm angị ụnọ iwo kụrụ ineku (18,000) ọ-Ọkpọọ nya Ịma.

¹⁴Ọ nwụ ịkampụ ha angịdẹwụ nyamwụ tụ ọpyị nya Ẹdọm wuu da. Ọọwa, ala Ẹdọm à yẹ ri anchẹ nya iDevidi lẹlẹ. Amkpaa họ iDevidi kụrụ ẹ-ẹga myị ẹga kọ dẹwụ.

¹⁵IDevidi ri adịrahụ nya ala Isirẹlụ wuu gu ọka gu ọka. Ọ kpẹhị rịrị angịnyị nyamwụ kpẹẹkpẹẹ la ọ-jẹ oye-oye ka.

¹⁶IJowabụ ọlẹ ká ẹnyị nya ịnamwụ ri iSeruya à ri ọgẹwụ nya angịdẹwụ nya iDevidi lẹ. IJehochafatị ọnyị nya Ahiludu à ri ọngọ kaa da ego ju lẹ.

¹⁷ỊSadọkọ ọnyị nya Ahitubu bala Ahimẹlẹkị ọnyị nya Abiyata ri angịkiliya. ISeraya ri akịraa.

¹⁸IBenaya ọnyị nya iJehoyada ri olegbeju nya angị gbe Adịrahụ iDevidi. Anyị alẹng nya iDevidi à ri angịkiliya lẹ.