Read idege 2 ỊSAMWẸLỤ 9 Bible Online

2 ỊSAMWẸLỤ 9 - idege bible

2 ỊSAMWẸLỤ 9

¹Ẹnẹhẹ lẹ, iDevidi à tịtọ wo yẹkẹẹ, “Ọngọngọhẹ bwu ugbiyegu nya ịSọlụ hi lọhịhị lẹẹ wẹẹ-ẹ́? M̀ tịtọ kam ka họọ ọnahị ọọ-lajị nya iJonatan.”

²Ọọwa, ị wụrụ iSiba ọlẹ kọ ri ọngọhẹ nya anchẹ ilugbiyegu nya ịSọlụ warị wẹ ẹga nya iDevidi lẹlẹ. Adịrahụ iDevidi à tọọ wo yẹkẹẹ, “Ahụ à ri iSiba lẹ-ẹ́?” Ọ wẹ byoo yẹkẹẹ, “Ee, am ọnchẹ nyang à ri ịnyị lẹ.”

³Ọọwa, iDevidi à tọọ wo yẹkẹẹ, “Ọngọngọhẹ bwu ugbiyegu nya ịSọlụ hi jam lọhịhị lẹẹ wẹẹ-ẹ́? M̀ tịtọ kam ka họ ọngọọwa ọnahị, dọọ ụbwọ jaabwọ kam myị ọnụ.” ISiba wẹ yẹkẹẹ, “Ọnyị ọlẹng nya iJonatan ọhẹ hi jam wẹ-ẹ̀. Ọ ri okuku.”

⁴IDevidi tọọ wo yẹkẹẹ, “Ale ọ tị́ ji-i-ì?” ISiba wọọ yẹkẹẹ, “Ọ juwa ẹ-ẹpwa nya ịMakii ọnyị nya Amyẹlụ i-iLodebaa.”

⁵Ọọwa, Adịrahụ iDevidi à du ẹrụ ka kpọọ wẹ ẹga nya ịlọmwụ lẹlẹ.

⁶Ẹnyị nyamwụ à ri iMefibochẹtị lẹ. IJonatan ọnyị nya ịSọlụ a mọọ lẹ. Ụka kọ warị wẹ ẹga nya iDevidi, ọ hirikpẹẹ ju iDevidi ihi. Ọọwa, iDevidi à be ẹkọ wụrwọọ yẹkẹẹ, “IMefibochẹtị ee.” IMefibochẹtị myị yẹkẹẹ, “Am ọnchẹ nyang lẹẹ, adịrahụ.”

⁷IDevidi byoo yẹkẹẹ, “A ju uhi ka. M̀ ka họng ọnahị ọọ-la iJonatan adang. M̀ ka pẹhi ọpyị ọlẹ wuu kọ ri nya ịSọlụ adang ọgbahị tịrẹkpẹ hang. Ọ́ ba ọọwẹ kem ka, iwe da hang ká ka ri ang tam ụka wuu.”

⁸Ọọwa, iMefibochẹtị à hirikpẹẹ họọ myịmyị lẹ, ọ byi iDevidi yẹkẹẹ, “Áhyu! Am ọngọ kpụ ịngịngịhyẹ ka lala ogu nya ebwu ọlẹ ā wẹẹ họ ọnahị ọlịịwẹ lẹ-ẹ́?”

⁹Ọọwa, iDevidi à wụrụ iSiba ọnchẹ nya ịSọlụ lẹ, ọ byoo yẹkẹẹ, “M̀ tụụbwọ hi ang myị ang ịlẹ wuu kị ri nya ịSọlụ ayịbang ha iMefibochẹtị ọnyị ọtụma nyamwụ lẹ.

¹⁰Ahụ bala anyị nyang bala anchẹ nyang ka kpa ọpyị ọlẹ wu ẹrụ ha ugbiyegu nya iMefibochẹtị ọnyị nya ayịbang chajị kị ka ye ang ri. IMefibochẹtị ayịdang lẹ, ọ ka juwa ri ang tam ụka wuu.” Ụka ọwẹ, iSiba ma anyị alẹng angị iwo kụrụ ịrụ. Ọ la anchẹ angị iwo imiiye.

¹¹Ọọwa, iSiba à wẹ byi iDevidi yẹkẹẹ, “M̀ ka họ ang myị ang ọlẹ kaahụ adịrahụ byim ya am nyị họ.” Ọọwa, iMefibochẹtị à kaa ri ang ẹ-ẹpwa nya iDevidi lala anyị alẹng nya iDevidi ịkịla lẹlẹ.

¹²IMefibochẹtị ma ọnyị ọlẹng ọhẹ ọlẹ kọ ri onjwo lụka ọọwa. Alẹpwa nya iSiba wuu ri anchẹ nya iMefibochẹtị ụka ọọwa.

¹³Lẹẹlẹ, iMefibochẹtị kọọwa ri okuku a-ata iye ata iye kụ i-iJerusalẹm kaa ri ang ta Adịrahụ iDevidi.