Read idege 1 Ịdịrịhụ 1 Bible Online

1 Ịdịrịhụ 1 - idege bible

1 Ịdịrịhụ 1

¹Ụka ọọwa, iDevidi Adịrahụ chị okwirichi kụnyẹ-kụnyẹ. Ịnọ anchẹ nyamwụ kaa ya ịpwụ dakụrwọọ, ịnyịrọ-ọ́ tị lọọ gbigbiigbi myị kaka.

²Ọọwa, alụkụrwọ nyamwụ à byoo yẹkẹẹ, “Agaba Idu ee, āhị tịtọ nya onjwo ịyang ọhẹ warị wang, kọ kpẹhị rịrịng mẹ. Ọwa-à ka nọ bala ahụ wung ju ẹjẹ chajị ká ịnyịrọ ka lang gbigbiigbi lẹlẹ.”

³Ọọwa, ị tịtọ nya onjwo ịyang kekeeke tụ ọpyị nya Isirẹlụ wuu gbee kị ye ọhẹ e-epweji nya iChunẹm lẹlẹ. Ẹnyị nyamwụ ri Abichagị.

⁴Ọ há ụhị. Ọ myị ẹrụ ha adịrahụ, ma adịrahụ-ụ́ tị ka ẹga nyamwụ ka.

⁵Ọọwa, Adonija ọlẹ ká ịHagiti ahụ nya iDevidi ma họọ à hi ọnyị ọlẹng ọgbahị ọlẹ kọ juwa hịhị nya anyị alẹng nya iDevidi lẹ. Abụsalọm ọlẹ kị mọọ hile lẹẹ gbu lẹ. Adonija ọwẹ há ụhị lụmẹ. IDevidi-í kaa yalibyi lọọ chajị nya ịngịngịhyẹ ịlẹ kọọ họ ka. Ọwa lịlọmwụ tịtọ kọọwa à ka ri adịrahụ. Ọ go ang ịrụnyẹ ịlẹ ká anyịrẹ bala angị kụ anyịrẹ bala alẹng angị iwo ịrụ kị ka kpọọ chị.

⁶

⁷Ọ me ẹlẹwẹ ta iJowabụ ọlẹ ká ẹnyị nya ịnamwụ ri iSeruya bala Abiyata ọngọkiliya lẹ, ị myị jwọọ lẹlẹ.

⁸ỊSadọkọ ọngọkiliya bala iBenaya ọnyị nya iJehoyada bala ịNatan bala iChimeyi bala iReyi bala angị gbe iDevidi-í tị myị ju Adonija ka.

⁹Ẹnẹhẹ, Adonija kele ka ẹga nya Ẹjwọ iSohẹlẹtị ọlẹ kọ ju Ụ́gbụ nya enyi nya Ẹnrogẹlụ chwẹẹ lẹ, ọ ya ịkpịlọ bala ịna bala ịna i-ju eyo kịla iya lẹlẹ. Ọ wụrụ anyịnamwụ anyị ịkịla nya iDevidi wuu tụ alụkụrwọ nya iDevidi ịla iJuda ẹpwa ka ọhụhụ nya iya ọkịlaakịla ọọwa.

¹⁰Ọ́ tị wụrụ iSolomọn ọnyadamwụ lee ịNatan lee iBenaya lee angị gbe Adịrahụ iDevidi ka.

¹¹Ọọwa, ịNatan à kele ka byi ịBatịchẹba ịnịna nya iSolomọn yẹkẹẹ, “Ọọwa ri á wo nyọlẹ ká Adonija hu ịlọmwụ adịrahụ lẹka-á? Adịrahụ iDevidi-í tị jẹ ịngịngịhyẹ chajị nya ẹlẹwẹ koo.

¹²Ba irya ojuju nyam ọlẹ jẹ chajị ká ka kpa ọhịhị nyang bala ịnya iSolomọn ọnyị nyang be mẹ.

¹³Kele ka ẹga nya iDevidi ka byoo yẹkẹẹ, ‘Aahụ à myị ọnụ ham lẹẹ ya iSolomọn ọnyị nyam nyị ka rị adịrahụ ku iwa nyang ka-á? Ee lẹ, ọ tị lanyị tị tị̄ ká Adonija ri adịrahụ-ụ̀ wẹ mẹ?’

¹⁴Ụka ká ka juwa kpa ẹla ya tọọ lẹ, m̄ ka jụ warị kaka byọọ ya ma ẹla nya ịlẹhị a wẹẹ ya lẹ lẹlẹ.”

¹⁵Ọọwa, ịBatịchẹba à kele ka yẹ adịrahụ lẹlẹ. Ọwa ayịdang chị okwirichi. Abichagị ọla iChunẹm juwa kpẹhị rịrọọ.

¹⁶ỊBatịchẹba hirikpẹẹ họọ lẹ, adịrahụ à tọọ wo yẹkẹẹ, “Ịyẹ m tị́ ka họ hang?”

¹⁷Ọ byoo yẹkẹẹ, “Agaba Idu, à tị́ myị ọnụ nya ịlẹhị-ịlẹhị lẹnyị nya Amkpaa Ohe Oluhye nyang ham ya iSolomọn ọnyị nyam nyị ka ri adịrahụ ku iwa nyang-ǹg.

¹⁸Adonija tị ri adịrahụ lẹ, á tị jẹjẹ kpong-kpong ka.

¹⁹Ọ ya ịna lụmẹ-lụmẹ bala iru nya ịkpịlọ bala ịna i-ju eyo kịla iya kpụ ọ wụrụ anyị alẹng nyang wuu bala Abiyata ọngọkiliya bala iJowabụ olegbeju nya angịdẹwụ nyang ẹpwa ka ọhụhụ ọọwa. Ọ́ tị wụrụ iSolomọn ọnyị nyang kpịlọ ka.

²⁰Agaba Idu ee, ala Isirẹlụ wuu jam ya ẹhị nọ gbeng ká ka ya jaa ọngọ ka ri adịrahụ ku iwa nyang lẹ.

²¹Ó-ri ká họ abwọhẹ ka aalẹ, ụka ká ka jam ka, ị ka hum bala iSolomọn ọnyị nyang lala aluji.”

²²Ụka kọ wẹẹ kpa ẹla ya ta adịrahụ wẹẹ lẹ, ịNatan ọlọmwụ à pwụ eji lẹlẹ.

²³Ụka ọọwa, ị ya je adịrahụ ya ịNatan nyị warị nyọka yọọ yẹ. Ọọwa, ịNatan à jụ kele lẹ, ọ hirikpẹẹ ha adịrahụ lẹlẹ.

²⁴Ọọwa, ịNatan à tọ adịrahụ wo yẹkẹẹ, “Agaba Idu ee, à chụ Adonija nya adịrahụ lẹ-ẹ́?

²⁵Alẹ oleeri ọlẹ, ọ kele kaka kịla iya la iru nya ịna bala ịkpịlọ bala ịna i-ju eyo. Ọ wụrụ anyị alẹng nyang wuu bala iJowabụ olegbeju nya angịdẹwụ nyang bala Abiyata ọngọkiliya. Ị lalẹẹ ri ang bala ọ-nwa ere bala o-juwa dọọ iwuru ya Adịrahụ Adonija nyị ka pyẹẹẹ.

²⁶Ọ́ tị wụrụm lee ịSadọkọ ọngọkiliya lee iBenaya lee iSolomọn ka.

²⁷Ahụ ayịdang à myị ju ẹlẹwẹ la o-ya jehi ahị alụkụrwọ nyang ọngọlẹ kọ ka ri adịrahụ ku iwa nyang ka lẹ-ẹ́?”

²⁸Ọọwa, iDevidi à ya nyị wụrụ ịBatịchẹba tịrẹkpẹ wẹẹ. Lẹ, ọ warị kaka godayị ị-ịlahị nya iDevidi lẹlẹ.

²⁹Ọọwa, Adịrahụ iDevidi à yẹkẹẹ, “M̀ kpa ẹnyị nya Amkpaa ọlẹ kọ juwa hịhị, kọ gbam kpehe bwu ẹpwụ nya akama nyam wuu nwa iro ya

³⁰alẹ ọlẹ m̀ ka họ ọnụ ọlẹ kam myị hang lẹnyị nya Amkpaa Ohe Oluhye nya ala Isirẹlụ jịra lẹ. ISolomọn ọnyị nyang à ka ri adịrahụ ku iwa nyam lẹ.”

³¹ỊBatịchẹba à hirikpẹẹ họọ lẹ, ọ byọọ yẹkẹẹ, “Ayịbam adịrahụ, à ka hịhị pwụ ụka myị ụka!”

³²Ọọwa, Adịrahụ iDevidi à du ẹrụ kaka wụrụ ịSadọkọ ọngọkiliya bala ịNatan ọlọmwụ bala iBenaya ọnyị nya iJehoyada lẹ, ị wẹ ẹga nya adịrahụ lẹlẹ.

³³Ọọwa, ọ byaa yẹkẹẹ, “Anụ kpa alụkụrwọ nyam ba ịlọnụ, ká iSolomọn ọnyị nyam ā kụ ụnyịrẹ ọlẹ kọ ri nya ịlọm kpangga kele ka ụ́gbụ nya enyi ọla iGihọn

³⁴ká ịSadọkọ bala ịNatan ā ya ida hwọọ ụ-ụwa kọ ri adịrahụ nya Isirẹlụ. Ọọwa lẹ, kanụ chị ẹkụrwẹ bala ọ-da iwuru ya ‘Adịrahụ iSolomọn ka pyẹẹẹ! ISolomọn Adịrahụ ka pyẹẹẹ! mẹ.’

³⁵Ánụ bọọ nyà bwu ụwa lẹ, ọ hụ ẹ-ẹchị nyam mẹ, chajị ọwa m chụ kọ ka ri adịrahụ nya Isirẹlụ bala iJuda wuu lẹ.”

³⁶Ọọwa, iBenaya à wẹ byi adịrahụ yẹkẹẹ, “Ahị ka họ ịnyị, Agaba Idu. Amkpaa Ohe Oluhye nyang ā myị ju ẹlẹwẹ mẹ.

³⁷Jaabwọ ká Amkpaa hụ tang lẹ, ọ hụ ta iSolomọn ịnyịnyị, ká adịrahụ oriri nyamwụ ā yeji giri-giri gbee kọ gụ ịnyang mẹ.”

³⁸Ọọwa, ịSadọkọ bala ịNatan bala iBenaya anyị bala angịgbe adịrahụ à ya iSolomọn hụ ụnyịrẹ nya Adịrahụ iDevidi lẹ, ị kpọọ chị ka Ụ́gbụ nya enyi ọla iGihọn lẹlẹ.

³⁹ỊSadọkọ hu ang ọlẹ kị ya ida ọlịgọgọ ju bwu Ọdụ nya Amkpaa, ọ ya ida hụ iSolomọn lẹlẹ. Ị chị ẹkụrwẹ lẹ, angịnyị wuu à juwa da iwuru gboo yẹẹkẹẹ, “Adịrahụ iSolomọn ka pyẹẹẹ! ISolomọn Adịrahụ ka pyẹẹẹ!”

⁴⁰Angịnyị wuu juwa tọọ da wurututu juwa du uhule bala ọ-da iwuru lọkẹkẹnị ọtụka-ọtụka gbee ká iru okuuu nyaa hu eji pwẹẹpwẹẹ.

⁴¹Jaabwọ ká Adonija bala alọhụhụ nyamwụ ri ang kpá bwaaa lẹ, ị wo iru okuuu ọọwa lẹlẹ. Ọọwa iJowabụ à wo ẹkụrwẹ ọchịchị lẹ, ọ towo yẹkẹẹ, “Ẹla-ịyẹ tị́ lọmọnyọ ọlaanyị e-epweji-ì?”

⁴²Ụka kọ ka ya ẹla cheju kpá lẹ, iJonatan ọnyị nya Abiyata ọngọkiliya à pwụ eji lẹlẹ. Ọọwa, Adonija à byoo yẹkẹẹ, “Ẹhẹẹ, kẹwẹ wẹ ẹpwang chọọ. À ri ọngịnyị ọnyịịla, á ka dayị la ọ-kpa oja ọnyịịla warị ka.”

⁴³IJonatan wẹ byoo yẹkẹẹ, “Eheehe, oja ọnyịịla-á ji koo. Adịrahụ iDevidi ayịbaba nyahị wuu hu iSolomọn ọnyị nyamwụ adịrahụ lẹ!

⁴⁴Ọ du ịSadọkọ bala ịNatan bala iBenaya tụ angịgbe adịrahụ wuu kaka kpọọ chị. Ị hwọọ hụ ụ-ụnyịrẹ nya adịrahụ.

⁴⁵ỊSadọkọ ya ida nya adịrahụ oriri hwọọ ẹ-ẹga nya Ụ́gbụ ọla iGihọn. Ị bwu ụwa lẹ, ị rụ wẹ epweji liwuru nya ọkẹkẹnị ọdada lẹ, alepweji wuu à ye myị m̀mm lẹlẹ. Ọmọnyọ ọlẹ ká wẹẹ wo à wẹ lẹ.

⁴⁶Lẹẹlẹ, iSolomọn ri adịrahụ lẹẹlẹẹ lẹ.

⁴⁷Ọ́ ba ọọwẹ ka, alụkụrwọ ịlẹpwa nya adịrahụ wuu wẹ kaka da Adịrahụ iDevidi ọlẹẹkwáà juwa byọọ ya Ohe nyị myị ká adịrahụ oriri nya iSolomọn nyị yeji giri-giri gbee kịị nyị ka gụ ịnya iDevidi ayịdang mẹ. IDevidi ayịdang nọnọ ị-ịbẹẹdị nyamwụ lụka ọọwa, ọ tị hirikpẹẹ gbịgba ha Ohe Oluhye bala

⁴⁸o-ya yẹkẹẹ, ‘Āhị gwogbo ha Amkpaa Ohe Oluhye nya ala Isirẹlụ ọlẹ kọ myị ká ọngọhẹ nya anyị nyam lẹẹ ri adịrahụ ku iwa nyam alẹ, kọ tị ya iwe da kpụ m̄ lẹẹ kpẹhị nya ịlọm yẹ.’ ”

⁴⁹Ụka ọọwa, alọhụhụ nya Adonija wuu ju uhi hụ́ kpákpaakpa. Lẹ, ọng myị ọng nya à nyí epepe rụ lẹlẹ.

⁵⁰Adonija tị lẹ, ọ rụ ka ẹpwụ nya Ọdụ nya Amkpaa lẹ, ọ yụbwọ chị ịpyịyẹ-pyịyẹ nya ogidi nyọka kpa ịlọmwụ be ọọ-lajị nyọlẹ kọ ju uhi nya iSolomọn lẹlẹ.

⁵¹Ọọwa, ị ya je iSolomọn ya Adonija nyị ju uhi nyamwụ lẹ, nyị lalẹẹ yụbwọ chị ịpyịyẹ-pyịyẹ nya ogidi lẹ. Ị byoo ịnyịnyị ya Adonija nyị juwa bịlẹ ya iSolomọn nyị̄ nwa iro ya nyị́ ka nwọwa kaka mẹ.

⁵²Ọọwa, iSolomọn à wẹ du kịlọọ yẹkẹẹ, “Ó-ri kọ kpa ịlọmwụ keji aalẹ, uke-inyi nyamwụ-ụ́ ka wo pile ka. Ọ́ tị ri ịnyị ka aalẹ, ọ ka gbu.”

⁵³Ọọwa, iSolomọn Adịrahụ à du alẹng ịhyẹ kaka kpa Adonija hireji bwu ogidi lẹlẹ. Adonija wẹ ẹga nya iSolomọn Adịrahụ kaka hirikpẹẹ họọ lẹ, iSolomọn à byọọ ya nyị rụ ka ẹpwa mẹ lẹlẹ.