Read idege 1 Ịdịrịhụ 10 Bible Online

1 Ịdịrịhụ 10 - idege bible

1 Ịdịrịhụ 10

¹Ụka ká adịrahụ ọnyang nya ala ịChẹba wo ohi oruru nya iSolomọn ọlẹ kọ kpa ihi ọlala wẹ Amkpaa, ọ warị ka mọọ yẹ la ịtọ ọtọtọ ịlẹ kị lujwo lụmẹ lẹlẹ.

²Adịrahụ ọnyang ọwẹ kpa anchẹ lụmẹ-lụmẹ dịrẹ ịlọmwụ wẹ iJerusalẹm la iru nya anyịrẹ-ịkamẹlụ ịlẹ kị kpa olo nya etiji ichoru kwọkwọ bala iru nya okpoko ịgọm bala ajwọ ịnyịịla-ịnyịịla. Ụka ká ọnyang ọwẹ pwụ eji wẹ ẹga nya iSolomọn, ọ tọ iSolomọn ịtọ ịlẹ wuu kọ kị ji ẹpwụ nyamwụ.

³ISolomọn wẹ ịtọ ịịwa wuu pịlẹtẹ. Ọhẹ-lọhẹ nyaa-á chọọ ọha lọwẹwẹ ka.

⁴Adịrahụ ọnyang nya ala ịChẹba ọwẹ yẹ jaabwọ ka ẹla ọjẹjẹ nya iSolomọn la kpori-kpori lụmẹ bala jaabwọ ká ẹpwang ọlẹ kọ nwụ la.

⁵Ọnyang ọwẹ yẹ ang oriri nya aleju ọlẹ kọ kaa ri. Ọ yẹ alegbeju ịtụkụ yoo jaabwọ kị hụ memeeme bala ang ịkụrụ-kụrụ nyaa bala anchẹ ịlẹ wuu kị juwa myị ẹrụ họọ lụka nya ang oriri bala iya ịlẹ wuu kọọ kịla u-Ube nya Amkpaa. Ụka kọ yọyị nya ẹlẹwẹ wuu, ọ wu ichinji godayị rụwa lọnụ hyoo pyee.

⁶Ọọwa, ọ byi iSolomọn Adịrahụ yẹkẹẹ, “Oja ọlẹ kam wo pwụ ọpyị nyam chajị nya ụkụrwọ ịlẹ wuu ká họ ẹla ọjẹjẹ nyang lẹ, ọ ri ẹla nya ịlẹhị.

⁷Ḿ tị hu oja ọọwa nya ẹla nya ịlẹhị ka gbee kam kpẹhị nya ịlọm yẹ lẹẹ ene. Ẹla ọjẹjẹ nyang bala ụdụ ọkpụkụ nyang wuu kpoye nya oja ọlẹ kị jam.

⁸Ụrụrụ nya angịnyị à tị̀tị̀ há lẹ! Ịnya alụkụrwọ bala anchẹ nyang ịlẹ há lẹ, chajị ị jẹ la iwe nyọka wẹ ijata nyang ẹnụ myị ẹnụ bala ọ-ka wo ẹla ịlẹ kaa ya bwula ẹla ọjẹjẹ nyang wuu!

⁹Ogbo a ri nya Amkpaa Ohe Oluhye nyang ọlẹ ká ẹla nyang kpọọ ugbodu nyii kọ hung ri adịrahụ nya ala Isirẹlụ! Ajị nyọlẹ ká ọháha nya Amkpaa ẹ-ẹga nya ala Isirẹlụ juwa pyịyọọ à du kọ hung ri adịrahụ nyaa ká ka kpẹhị rịrị ẹ-ẹpwụ nya ang ọnyịịla ọhọhọ bala ọkpẹẹkpẹẹ ọlala.”

¹⁰Ọọwa, adịrahụ ọnyang nya ala ịChẹba ọọwa a ya ang-ahị ga iSolomọn lẹlẹ. Ang ịlẹ kọ ya họọ ri okpoko ịgọm ọlẹ kọ lụmẹ gụ okolo ụnọ ine (4,000) bala iru nya etiji ichoru kwọkwọ bala ajwọ ịnyịịla-ịnyịịla. Ụka ọhẹ-lọhẹ á juwa ka ọngọngọhẹ kpa etiji ichoru kwọkwọ wẹ iSolomọn lụmẹ-lụmẹ lala ịnya Adịrahụ ọnyang ọwẹ kaka.

¹¹(Ụka ká agbọ nya enyi nya iHiram-ḿ kpa okpoko ịgọm warị bwu Ọfii, ị kaa kpa ekeji nya alụmọgụ bala ajwọ ịnyịịla-ịnyịịla nyà ịnyịnyị.

¹²ISolomọn Adịrahụ kpa ekeji ịịwa họ ịtachị i-wu ẹpwang kpa u-Ube nya Amkpaa bala ẹ-ẹpwa nya adịrahụ. Ọ kpaa họ ogum̀ bala ẹnwụ ịlẹ ká angị mwu eje ka kpa du. Ekeji nya alụmọgụ ịlẹ kị kpa wẹ Isirẹlụ lụka ọwẹ à hagụ wuu lẹlẹ. Ọngọngọhẹ-ẹ́ kpa ịlịnyị wẹ Isirẹlụ ene nya ụka ọwẹ lee ẹ-ẹkpẹ nya ọọwa kaka.)

¹³ISolomọn Adịrahụ go iru nya ang lụmẹ-lụmẹ ga ha adịrahụ ọnyang nya ala ịChẹba ọwẹ jaabwọ myị abwọ kọ bịlẹ ka ba. Ịwẹ datị hi ang-ahị ịkịla ịlẹ ká adịrahụ iSolomọn ya họọ ụga jaabwọ kịị họ. Ụka ọọwa lẹ, ọ yegiri rụ ka ọpyị nyamwụ bala anchẹ ịlẹ kọ kpa dịrẹ ịlọmwụ lẹlẹ.

¹⁴Ẹka myị ẹka wuu iSolomọn kaa ye okpoko ịgọm ụnọ iwo imiiye da ụnọ ịta (23,000).

¹⁵Ịwẹ datị hi ẹpwa ọnyẹnyẹ ịlẹ kọọ ye bwu ẹga nya alọhị bala ịdịrịhụ i-bwu ọpyị nya Arebyiya bala ịgọvụnọ ịla Isirẹlụ.

¹⁶ISolomọn Adịrahụ họ akụmada nya okpoko ịgọm ohu imiiye (200) ju ẹpwụ pọpịlọ-pọpịlọ.

¹⁷Ọ họ akụmada ichiche ohu ịta (300) lokpoko ịgọm ọlẹ kị hyahya. Ọ kpa okpoko ịgọm lala okolo imiiye họ ọnyọnyọọnyị. Ọọwa adịrahụ a ya ị go akụmada iwẹ guru ẹ-Ẹpwang nya Ipyinu nya iLibanọn lẹlẹ.

¹⁸Adịrahụ họ ẹchị ọtụka-ọtụka la ẹngịrị nya inyi. Ị kpụ okpoko ịgọm ọlahịchng kụrwọọ u-uhye.

¹⁹Ị chị apẹtẹ ịrwọnyẹ kele ka uhye nya ẹchị ọwẹ. Ị họ egbeju nya ẹna ju ẹkpẹ nyamwụ. Ị họ ẹga ị-yụbwọ nọ oyiye-oyiye nya ẹchị ọwẹ la ugẹbẹ godayị ịkịka nya ọnyọnyọọnyị nyaa. Ị họ ugẹbẹ kụ ọbaba nya ẹpẹtẹ ọnyọnyọọnyị.

²⁰Egabẹ iwo kụrụ imiiye godayị rịrị apatẹ ịrwọnyẹ ịwẹ. Ẹpwụma ọhẹ-lọhẹ-ẹ́ họ ẹchị-adịrahụ o-me ọwẹ ẹnẹnẹhẹ lẹka.

²¹Ekeku ị-kpa nwa ere nya iSolomọn wuu tụ ang-abwọ ịlẹ kị ji Ẹpwang nya Ipyinu nya iLibanọn wuu ri ịlẹ kị kpa okpoko ịgọm họ. Ị́ họ ọhẹ-lọhẹ nyaa lokpoko onyoowuru ka, chajị ị́ hwoo nya ang o-ju apyobwuna loyi nya iSolomọn ka.

²²Ọ la agbọ nya enyi ịtụka ị-kpa da ọhị ịlẹ kịị bajẹ ta agbọ nya enyi nya iHiram. Ụka ookpokpo ẹ-ẹpwụ nya ẹka ịta, ị kaa nyà la olo nya okpoko ịgọm bala okpoko onyoowuru bala angịrị nya inyi bala ije bala ahyọ lẹ.

²³Adịrahụ iSolomọn kpụ ụdụ bala ọ-jẹ ẹla gụ ịdịrịhụ ịkịla ilodehe ọlẹ wuu.

²⁴Alodehe wuu kaa tịtọ kị ka wẹ ẹga nyamwụ kaka wo ẹla ọjẹjẹ ọlẹ ká Ohe Oluhye ya họọ.

²⁵Ẹka myị ẹka wuu, ọngọngọọng nya angịlẹ kịị ka wẹ kaa kpa ang-ahị wọọ lala ang ịlẹ kị họ lokpoko onyoowuru bala okpoko ịgọm bala ịwụrụ bala ang-abwọ nya ẹwụ bala etiji ichoru kwọkwọ bala anyịrẹ ịlam bala anyịrẹ ịlahịchịng nya adịrahụ.

²⁶ISolomọn la angịdẹwụ ị-kụ ang ịrụnyẹ ịlẹ ká anyịrẹ ka gbile angị ụnọ ookpokpo da angị ohu ine (1,400) bala angịdẹwụ ị-kụ anyịrẹ angị ụnọ iwo kụrụ imiiye (12,000). Ọ ya angịdẹwụ ịwẹ guru e-epweji datị-datị ene kọọ ya angị ihihi kụ ta ịlọmwụ i-iJerusalẹm.

²⁷Lụka nya adịrahụ oriri nyamwụ, okpoko onyoowuru dịda i-iJerusalẹm lala egbanjwọ. Ekeji nya isida dịda lala ikiledu ịlọka nya ikiti ịla iJuda.

²⁸Alọhị nya iSolomọn à kaa ra anyịrẹ nyamwụ bwu Ijipiti bala iSilisiya kpa wọọ lẹ.

²⁹Ụka ọọwa, ịnya nya ang ọrụnyẹ ookpokpo o-bwu iJipiti ịlẹ kịị kpa wẹ iJerusalẹm ri okpoko onyoowuru ohu ịrwọnyẹ (600). Ịnya nya ụnyịrẹ ookpokpo tị ri okpoko onyoowuru ohu da iwo ịrụ (150).