Read idege 1 Ịdịrịhụ 11 Bible Online

1 Ịdịrịhụ 11 - idege bible

1 Ịdịrịhụ 11

¹Ụka ọọwa, anyang i-bwu ẹpwụma ịkịla lụmẹ-lụmẹ há iSolomọn. Datị hi ọnyị nya adịrahụ nya ala Ijipiti ọlẹ kọ ye, ọ ye ịhụ bwu iHiiti bala iMowabụ bala Amọn bala Ẹdọm bala ịSayịdọn.

²Anyang ịwẹ bwu epwoja ịlẹ ká Amkpaa ya ala Isirẹlụ nyị ye ịhụ bwu ka, nyị ri ịnyị, ịhụ ịịwa nyị ka gwaa ahị gboo hyoo kaka kpụ ijiga nya alụwa. ISolomọn-ń tị myị pẹ hyaa ka, ọ kịnyaa juwa la ọháha ẹ-ẹga nyaa.

³ISolomọn ye ịhụ ohu irwiye (700) ịlẹ kị ri anyị nya ịdịrịhụ. Ọ ye ịhụ-anchẹ ohu ịta (300) kaka báa. Ọọwa, ịhụ nyamwụ ịwẹ à joo ahị kpata hi Ohe Oluhye lẹlẹ.

⁴Ụka ká iSolomọn chị okwirichi lẹ, ịhụ ịwẹ à kpọọ kaka ju ka ẹpwụ nya ijiga ọkpụkpụ ọkọkọ nyọka dahịhile Amkpaa Ohe Oluhye nyamwụ jaabwọ ká iDevidi adamwụ họ lẹlẹ.

⁵ISolomọn kpụ eteji ha Asịtate ojiga ọnyang nya ala ịSayịdọn bala ịMọlẹkị ojiga onyobyi nya ala Amọn.

⁶Ọ họ ọhọbịrị ba Amkpaa. Ọ́ ba Amkpaa jẹ jaabwọ ká iDevidi adamwụ họ ka.

⁷ISolomọn nwụ́ ẹga kị ka kpụ eteji ha iKemochi ojiga onyobyi nya ala iMowabụ bala ịMọlẹkị ojiga onyobyi nya ala Amọn rịrị ọ-ọgbọdọ ọlọmwẹnụ-ụtụrụ nya iJerusalẹm.

⁸Ọ nwụ́ ẹga ịlịnyịnyị ha ịhụ nyamwụ wuu kị ka ju ịtangare ila bala ọ-kịla iya ha ijiga nyaa.

⁹Amkpaa wụ ẹjẹ ta iSolomọn lụmẹ chajị nyọlẹ kọ jahị kpata hyoo ọwa Ohe Oluhye nya ala Isirẹlụ ọlẹ kọ chị ịlọmwụ ehe mẹjọọ ugbabwọ imiiye.

¹⁰Amkpaa lẹẹ gbile iSolomọn ụbwọ ụ-ụrụ ya nyị kpụ eteji ha ijiga koo. Ọ́ tị myị kpa ehile nya Amkpaa ọọwa ka.

¹¹Ọọwa, Amkpaa-à byoo yẹkẹẹ, “Ajị nyọlẹ ká pwa ọ-ka kpa iro ọnwanwa bala ehile nyam ịlẹ kam ya dang e-eji wẹ lẹ, m̀ ka nung ọpyị-adịrahụ ọlẹ ha ọngọhẹ lẹpwụ nya anchẹ nyang lẹ.

¹²Ma, ajị nya iDevidi adang lẹ, ḿ ka họ ịnyị lụka nya ọhịhị nyang ka. Ụka nya adịrahụ oriri nya ọnyị nyang m̄ ka họ ịnyị lẹ.

¹³Ḿ nung ọpyị ọlẹ wuu lẹpwụ-lẹpwụ ka. M̀ ka pẹhi imwawụ ookpokpo họọ chajị nya iDevidi ọnchẹ nyam bala ajị nya iJerusalẹm epweji ọlẹ kam chụ.”

¹⁴Ụka ọọwa, Amkpaa họ ịHadadị bwu ugbiyegụ nya adịrahụ nya ala Ẹdọm ju iSolomọn uji.

¹⁵Ene nya ụka ọwẹ, iDevidi lẹẹ bajẹ bala iJowabụ olegbeju nya angịdẹwụ nyamwụ kaka ju ala Isirẹlụ ịhyẹ ịlẹ kị nwụ ẹ-ẹwụ eji. Ụka nya ẹwụ ọọwa, ị lẹẹ nwụ alẹng nya ala Ẹdọm wuu gbanggbang.

¹⁶IJowabụ bala angịdẹwụ nyamwụ hụ ụ-ụwa ịya ịrwọnyẹ gbẹgbịlẹ gbee kịị nwụ alẹng ịla Ẹdọm wuu.

¹⁷Ụka ọwẹ ịHadadị bala alụkụrwọ ịlẹpwa nya adịrahụ ịhyẹ rụnyẹ rụ ka Ijipiti. ỊHadadị ayịdang ri onjwo lụka ọọwa wẹẹ.

¹⁸Ụka kị be bwu iMidiyan, ị kele kaka ju ka ịParan ene ká angịkịla ịhyẹ yẹjulaa ẹ-ẹpwụ nya ẹdịyẹ ọọwa. Ị jẹ gbee kaka pwụ Ijipiti lẹ, ị ka ẹga nya adịrahụ nya alụwa lẹlẹ. Adịrahụ ya ọpyị bala ẹpwa ha ịHadadị kụ bala o-juwa kpọọ la ang oriri.

¹⁹Ụka ọọwa, ẹla nya ịHadadị há adịrahụ nya ala Ijipiti gbee ká adịrahụ ya ọgọm nyamwụ ọlẹ kọ ri ọnyịnịna nya ịTafẹniisi ahụ nyamwụ họọ-ọ̄ ye.

²⁰Ahụ nya ịHadadị ọọwa ma ọnyi ọlẹng ọlẹ ká ẹnyị nyamwu ri iGenubatị họọ. Ahụ nya adịrahụ kpa iGenubatị nwà ọdọda nya adịrahụ ta anyị alẹng nya adịrahụ.

²¹Ụka ká ịHadadị wo oja pwụ Ijipiti nyori iDevid nyị gbu lẹ, bala o-ri iJowabụ olegbeju nya angịdẹwụ nyị gbu ịnyịnyị lẹ, ọ byi adịrahụ yẹkẹẹ, “Ba kam rụ tịrẹkpẹ ka ẹpwa ka ọpyị nyam mẹ.”

²²Adịrahụ tọọ wo yẹkẹẹ, “Ịyẹ tị́ du ká ya ịnyị? Ịyẹ tị́ kung amwụ lẹẹ ẹgẹlẹ kọ du ká juwa tịtọ nyọka rụ ka ẹpwa-à?” ỊHadadị wẹ byi adịrahụ yẹkẹẹ, “Ẹẹlẹlẹhẹ ka. Tị ba him kam rụ mẹ.”

²³Ohe Oluhye họ iResọn ọnyị nya Eliyada ri oluji nya iSolomọn ịnyịnyị. IResọn ọwẹ lẹẹ rụnyẹ rụ bwu ẹpwa nya ayịbamwụ ịHadadẹsẹẹ adịrahụ nya ala iSoba

²⁴kaka ri olegbeju nya alachị i-be angịnyị ẹpwa ịhyẹ. Ụka ká iDevidi kụrụ ịHadadẹsẹẹ kpá, iResọn bala alakpa nyamwụ à hu ang kele kaka kụ ị-ịDamasịkọsị lẹ, ị hwoo ri adịrahụ nya ala iSiriya lẹlẹ.

²⁵IResọn ọwẹ ri oluji ọtụka nya ala Isirẹlụ luka nya ọhịhị nya iSolomọn wuu. Ọọ kpa ẹla ta ala Isirẹlụ ịnyịnyịịnyị jaabwọ ká ịHadadị họ. Ala Isirẹlụ wọọ ẹjẹ onyobyi-obyi. Ọ ri adịrahụ nya ala iSiriya.

²⁶Ọleng ọkila ọlẹ kọ yahị da iSolomọn adịrahụ bwee ri ọlụkụrwọ nyamwụ ọhẹ kị wụrụ iJerobowam ọnyị nya iNebatị bwu ẹpwẹji nya ịSẹrẹda i-imwawụ nya Ifurem. ISeruya ịnamwụ ri ahụ-ogu.

²⁷Jaabwọ kọ bwu dọmwụ nyọka bá ẹla ta iSolomọn à lẹẹ lẹ. Ụka ọhẹ, iSolomọn juwa chị ikpirigidi ju ọpyị ọlọmwẹnụ-ụtụrụ nya iJerusalẹm bala ọ-nwụla ẹga nya ugulọ nya epweji nya iDevidi adamwụ ịlẹ kị bene.

²⁸IJẹrobowam ri ọlẹng ọ-jẹ họ ụkụrwọ lụmẹ. Ụka ká iSolomọn yẹ jaabwọ kọ wẹẹ họ ụkụrwọ ọnyọọngịrị kaka ba lẹ, ọ hwoo kaka ri olegbeju ọkpẹhị rịrị ụkụrwọ nya igwabwọ ọlẹ kị juwa họ o-oye nya imwawụ nya Ifurem bala ịManasẹ wuu lẹlẹ.

²⁹Ẹnẹhẹ juwa ká iJerobowam juwa jẹ kpehe bwu iJerusalẹm. Ọọwa, Ahija ọlọmwụ o-bwu iChilo à tọọ ụ-ụgbẹyị lẹlẹ. Ọngọnọhẹ-ẹ́ ji ọnaabwọ nya ụwa ụka ọwẹ ka. Ahija kụrụ awụrụ onyeewe.

³⁰Ọọwa, Ahija-à pwọ awụrụ ọnyewe nyamwụ ọwẹ kọ kụrụ-ụ̀ wẹ, gwoo ene iwo kụrụ imiiye lẹ,

³¹ọ byi iJerobowam yẹkẹẹ, “Ye ene iwo nya awụrụ ọlẹ kpa ụ-ụwa mẹ, chajị Amkpaa Ohe Oluhye nya ala Ịsirelụ yẹkẹẹ, ‘M̀ ka nu ọpyị-adịrahụ ọlẹ bwu ụbwọ nya iSolomọn, kam ka ya imwawụ iwo chiriri ji ekpeleji nyang lẹ.

³²Ọọ-lajị nya iDevidi ọnchẹ nyam bala epweji nya iJerusalẹm ọlẹ kam chụ ha ịlọm ẹ-ẹpwụ nya epweji ịla Isirẹlụ wuu lẹ, m̀ ka pẹhi imwawụ ookpokpo ha iSolomọn.

³³M̀ ka họ ịnyị, chajị nyọlẹ ká iSolomọn nyẹẹkpẹ dam rụ kele kaka kpụ eteji ha Asịtate ojiga ọnyang nya ala ịSayịdọn bala iKemosi ojiga nya ala iMowabụ bala ịMọlẹkị ojiga nya ala Amọn. Ọ́ myị jum ihi juwa họ ang ọlẹ kọ pwoku irya nyam ka. Ọ́ myị ju ihi nya ehile bala ọmẹjẹ nyam jaabwọ kị́ iDevidi adamwụ họ ka.

³⁴Ḿ tị ka ye ọpyị-adịrahụ ọlẹ hi iSolomọn ka. Ọọ-lajị nya iDevidi ọnchẹ nyam ọlẹ kam chụ, kọ tị kpa ehile nyam lẹ, m̀ ka bahyoo kọ ka ri adịrahụ lụka nya ọhịhị nyamwụ wuu.

³⁵M̀ ka ye ọpyị-adịrahụ ọlẹ bwu ụbwọ nya ọnyị nya iSolomọn, kam ka ya imwawụ iwo chiriri hang.

³⁶Ọnyị nya iSolomọn ka kpẹhị rịrị imwawụ ookpokpo, chajị ká ọngọhẹ nya anyị ịtụma nya iDevidi ọnchẹ nyam ka kịnyaa juwa ri adịrahụ ịnyịnyịịnyị.

³⁷Ahụ iJerobowam tị lẹ, m̀ ka hung ri adịrahụ nya Isirẹlụ ká ka kpẹhị rịrị oye ọnyị myị ọnyị kọ hang i-irya nyang.

³⁸Ó-ri ká ke ụrụ lẹla nyam, ká ba ọmẹjẹ nyam jẹ kpẹẹkpẹẹ jaabwọ ká iDevidi ọnchẹ nyam họ aalẹ, m̀ ka juwa tang. M̀ ka ya ẹchị-adịrahụ yeji ugbiyegu nyang, ká ọngọhẹ nya anyị ịtụma nyang ka ri adịrahụ ịnyịnyịịnyị jaabwọ ká ịnya iDevidi la-à wẹ.

³⁹M̀ ka yẹ anyị ịtụma nya iDevidi akama ọọ-lajị nya ang onyobyi ọhọhọ nya iSolomọn. Ị́ tị ka ji ẹpwụ nya akama ọọwa pyịyọọ koo.”

⁴⁰ISolomọnị maga nyọka nwụ iJerobowam, ma ọ rụnyẹ rụ kaka ba iChichakị Adịrahụ nya ala Ijipiti ba. Ọ hụ ụ-ụwa gbee da ka ụka ká iSolomọn gbu.

⁴¹Ang ịkịla ịlẹ wuu ká iSolomọn họ tụ ụkụrwọ bala ẹla ọjẹjẹ nyamwụ lẹ, ị daa ju ẹ-ẹpwụ nya Ụpwụ nya Ego nya ISolomọn.

⁴²ISolomọn hụ i-iJerusalẹm ri adịrahụ nya ala Isirẹlụ wuu jịra ẹẹka iwo ine gbẹgbịlẹ.

⁴³Ụka ká iSolomọn gbu, ị jwoo eji e-epweji nya iDevidi adamwụ. Ọọwa, iRehobowam ọnyị nyamwụ à ri adịrahụ kwiwa nyamwụ lẹlẹ.