Read idege 1 Ịdịrịhụ 12 Bible Online

1 Ịdịrịhụ 12 - idege bible

1 Ịdịrịhụ 12

¹Ụka ọhẹ, iRehobowam kele ka iChekem ẹga ọlẹ ka ala Isirẹlụ wuu tụ gụrụ chajị kị ka hwọọ adịrahụ.

²Ụka ká iJerobowam ọnyị nya iNebatị ọlẹ kọ rụnyẹ rụ kaka kpịbaa Ijipiti hi iSolomọn Adịrahụ wo ẹlẹwẹ lẹ, ọ nyà tịrẹkpẹ bwu ụwa lẹlẹ.

³Alimwawụ ịlẹtẹ du ẹrụ ta iJerobowam lẹ, ị bajẹ lawụlẹ wuu ka ẹga nya iRehobowam lẹ ị byoo yẹkẹẹ

⁴“Adang iSolomọn ya olo olilo ọtụka-ọtụka chụụhi. ma ó-ri ká ka chụ olo olilo ọọwa hị aalẹ, ahị ka myị ẹrụ hang.”

⁵IRehobowam waa yẹkẹẹ, “Anụ ya ẹnụtụrụ ịta da ham chajị kam kụ irya ju ẹlẹwẹ ene kanụ ka tịrẹkpẹ mẹ.” Ụka ọọwa, angịnyị wuu a rụ ka ẹpwa nyaa lẹlẹ.

⁶IRehobowam Adịrahụ hu ẹkpẹ bala angịgbahị ịlẹ kị kaa ju iSolomọn adamwụ irya lụka nyamwụ. Ọ taa wo yẹkẹẹ, “Anyị à tị pwọku kam ka wẹ angịlẹ-ẹ̀?”

⁷Ị wẹ byoo yẹkẹẹ, “Ó-ri ká myị ọnụ nyọka myaa ẹrụ yẹẹyẹẹ aalẹ, aa wẹ ẹla nyaa lụgbẹyị ọ-kpụ umwu mẹ. Ị ka myị ẹrụ hang gbe oyi myị oyi.”

⁸IRehobowam tị nyẹẹkpẹ da irya ọlẹ ká angịgbahị jwoo, rụ kele kaka hu ẹkpẹ bala ikolobya aliko nyamwụ ịlẹ kị nwa lawụlẹ, kị ri angị jwoo irya lụka ọọwa.

⁹Ọ ta wo yẹkẹẹ, “Anyị à tị pwoku kam ka wẹ ẹla nya angịlẹ kịị wẹẹ ya am nyị chụ olo nyịwa hi-ì?”

¹⁰Anjwo ikolobya ịịwa wọọ yẹkẹẹ, “Ịịlẹ ā ka byaa lẹ: ‘Ánụ yẹ ọhẹ yẹ lẹka. Ánụ jẹ ka aalẹ, ụkụchụ ọhịnyẹnyẹ nyam ọlẹ hye kpụrụcha gụ ọhị nya adam wẹẹ.

¹¹Ịnyịlẹhị lẹ, adam ya olo olilo nịrọọnụ. M̀ ka ya ọ-gụ ịnyamwụ gụ nịrọọnụ. Ugboji ọlam-ọlam ọ kpa nyiinu lẹ, ọgbẹ nya ụnyịrẹ m̄ tị ka kpa nyiinu lẹ!’ ”

¹²Ẹnụtụrụ ọhata ẹ-ẹkpẹ nya ọọwa lẹ, iJerobowam bala angịnyị wuu a tịrẹkpẹ wẹ ẹga nya iRehobowam jaabwọ kọ byaa lẹlẹ.

¹³Adịrahụ pwa ọmẹjẹ nya angịgbahị deeji, juwa wẹ angịnyị ẹla pwaapwaa

¹⁴jaabwọ ká ikolobyọ jwoo irya. Ọ byaa yẹkẹẹ, “Ịnyịlẹhị lẹ, adam ya olo olilo nịrọọnụ. M̀ ka ya ọ-gụ ịnyamwụ gụ nịrọọnụ. Ugboji ọlam-ọlam ọ kpa nyiinu lẹ, ọgbẹ nya ụnyịrẹ m̄ tị ka kpa nyiinu lẹ.”

¹⁵IRehobowam adịrahụ-ụ́ ke ụrụ la ọbịlẹ-bịlẹ nya angịnyị ka. Ọhọhọ nyamwụ ọọwa tị ri irya nya Amkpaa, chajị ọwẹ du ká ẹrụ ọlẹ kọ du Ahija ọlọmwụ ọla iChilo to iJerobowam ọnyị nya iNebatị họ jịra.

¹⁶Ụka ká ala Isirẹlụ wuu yẹ nyori adịrahụ-ụ́ myị ke ụrụ laa kaka lẹ, ịwa wuu à yọnụ dawụlẹ dọọọ juwa yẹkẹẹ, “Anụ ba hi ẹla nya iDevidi bala ẹchị-adịrahụ nyamwụ mẹ pyíiì! Ẹlẹhẹ-ẹ́ guhi ẹ-ẹpwụ nya ẹla nya ọnyị nya iJesi ọwẹ kaka! Anụ ala Isirẹlụ wuu, anụ kịnyaa ká ọng myị ọng ā rụ ka ẹpwa nya ịlọmwụ mẹ! IRehobowam ā ri adịrahụ nya alugbiyegu nya iDevidi mẹ oo!” Ọọwa, ala Isirẹlụ à bene kpachịka hi awụlẹ rụ ka ẹpwa lẹlẹ.

¹⁷Ụka ọọwa, ala Isirẹlụ ịlẹ kị kụ oye nya iJuda kem iRehobowam à hụhụ ri adịrahụ nyaa lẹlẹ.

¹⁸Ụka ọọwa, iRehobowam Adịrahụ du Adoniram olegbeju ọ-kpa angịnyị họ ụkụrwọ nya igwabwọ kele nyọka ká ala Isirẹlụ. Ma, ị tị da ajwọ nwọọ kẹhị-kẹhị. Ụka ká iRehobowam wọ ẹlẹwẹ, ọ chị agaga gba kụ ang ọrụnyẹ nyamwụ lẹ, ọ rụnyẹ rụ ka iJerusalẹm lẹlẹ.

¹⁹Bwu ụka ọwẹ pyịyọọ wẹ ịlahị, alọpyị-adịrahụ ọlẹtẹ nya Isirẹlụ kaa la egbeju-ọngịrị ta adịrahụ o-bwu ugbiyegu nya iDevidi.

²⁰Ụka ká ala Isirẹlụ wo iJerobowam nyị nyà bwu Ijipiti, ị wụrwọọ ka ọjịra-jịra nyaa lẹ, ị hwoo adịrahụ nya Isirẹlụ lẹlẹ. Imwawụ nya iJuda kẹnẹ-kẹnẹ à hi myị ẹla ju ugbiyegu nya iDevidi lẹlẹ.

²¹Ụka ká iRehobowam nyà tịrẹkpẹ pwụ iJerusalẹm, ọ wụrụ angịdẹwụ ịlahịchịng angị ụnọ ohu da ụnọ iwo ineku (180,000) dala awụlẹ bwu imwawụ nya iJuda bala iBenjamịn. Ọ tịtọ kọ ka kpa ọngịrị tịrị ala Isirẹlụ ẹkpẹ wẹ ẹga nya ịlọmwụ kọ ka ri adịrahụ nyaa.

²²Ma, Ohe Oluhye byi iChemaya ọlọmwụ

²³nyị byi iRehobowam Adịrahụ ọnyị nya iSolomọn bala ala iJuda tụ ala iBenjamịn wuu yẹkẹẹ,

²⁴“Ānụ kele kaka mwẹla ta ala Isirẹlụ aananụ koo. Anụ wuu ā rụ tịrẹkpẹ ka ẹpwa mẹ, chajị am Amkpaa-à du ká ang ịwẹ wuu lịnyị lẹ!” Ọọwa, ịwa wuu à ju ẹla nya Amkpaa ihi lẹ, ị tịrẹkpẹ ka ẹpwa lẹlẹ.

²⁵Ụka ọọwa, iJerobowam Adịrahụ chị egwalọ ịnyịịngịrị ju epweji nya iChekem ọlẹ kọ ji ikiti ịlọpyị nya Ifurem lẹ, ọ kụ ụ-ụwa lẹlẹ. Ụka kọ nọ chẹẹ, ọ kele kaka chị egwalọ ịnyịịngịrị ju epweji nya ịPẹnụwẹlụ ịnyịnyị.

²⁶Ẹnẹhẹ lẹ, iJerobowam a juwa me irya ẹ-ẹpwụ-ẹpwụ yẹkẹẹ, “Ḿ dụmwọ-dụmwọ ka aalẹ, ọpyị ọlẹ ka tịrẹkpẹ ka ụbwọ nya ugbiyegu iDevidi wẹẹ.

²⁷Angịnyị wuu wẹẹ kele kaka kịla iya ha Amkpaa u-Ube nya Amkpaa ọla iJerusalẹm daalẹ. Ị ka dọmwụ nya ọ-myị ẹla ju iRehobowam Adịrahụ nya ala iJuda myị. Ọ́ tị lịnyị, ị ka wẹ kaka nwụm kị ka nyà tịrẹkpẹ ka ẹpwụtụbwọ nyamwụ.”

²⁸Ụka kị jwoo irya lẹ, ọ họ ịna imiiye nya okpoko ịgọm lẹ, ọ byi angịnyị yẹkẹẹ, “Anụ ala Isirẹlụ ee, iJerusalẹm ọlẹ kanụ kele kaka gbịgba wẹẹ ọ gbilata lụmẹ. Anụ kẹwẹ mẹ, ijiga ịlẹ kị gbanụ kpẹhe bwu ọpyị nya Ijipiti à lẹẹ lẹlẹ!”

²⁹Ọ ya ẹna ọhẹ rịrị ị-ịBẹtẹlụ, ọ ya ọkịla rịrị ị-ịDan.

³⁰Ẹlẹwẹ rị ọhọbịrị ká ala Isirẹlụ họ. Ịị kpụ eteji ha ịna ịwẹ. Ịị jẹ lalaala ka pwụ ịDan nyọka kpụ eteji ha ọlụwa ịnyịnyị.

³¹IJerobowam nwụ ada ikiliya i-ikiti ịnyịnyị. Ọ chụ angịnyị bwu ugbiyegu ịlẹ kị bwu imwawụ nya iLivayị ka kpaa kaka ri angịkiliya lẹlẹ.

³²IJerobowam hu ẹnụtụrụ iwo kụrụ ịrụ nya ọya ọhaneku nọ nya ọhụhụ nya ịgba ọgbagba lala ọlẹ kịị la i-iJuda. Ọ kila iya ha ẹna ọlẹ kọ rịrị ị-ịBẹtẹlụ lẹ, ọ ya angịkiliya ịlẹ kọ chụ hụ ụ-ụwa nyọka kpẹhị rịrị ịya ịkịlaakịla ịlụwa lẹlẹ.

³³Ẹnụtụrụ iwo kụrụ ịrụ nya ọya ọhaneku ọlẹ kọ hụnọ lẹ, ọ kele ka ịBẹtẹlụ kaka kịla iya ogidi ọlụwa nya ọ-kpa kpịtịya nya ọhụhụ ọlẹ kọ ya yeji ha ala Isirẹlụ lẹlẹ.