Read idege 1 Ịdịrịhụ 13 Bible Online

1 Ịdịrịhụ 13 - idege bible

1 Ịdịrịhụ 13

¹Ụka ọhẹ, ọlọmwụ ọla iJuda ọhẹ wuleji kele ka ịBẹtẹlụ jaabwọ ká Amkpaa byoo. Ọ pwụ ịBẹtẹlụ ụka ọlẹ kpangga ká iJerobwam godayị ị-ịkịka nya ogidi nyọka kịla.

²Ọọwa, jaabwọ ká Amkpaa byi ọlọmwụ ọọwa lẹ, ọ ya ẹla lịkata ta ogidi okiliya ọwẹ yẹkẹẹ, “Ogidi ee! Ogidi ee, Amkpaa yẹkẹẹ, ‘Ị juwa ka ma ọnyị ọhẹ ugbiyegu nya iDevidi ọlẹ ká ẹnyị nyamwụ ka ri iJosaya. Ọnyị ọọwa ka wu angịkiliya ịla ada ị-kpụ ijiga ịwẹ wuu kọ ka nwaa u-uhye nyang. Ọ ka jụ ekpinegu nya angịnyị ehe ila u-uhye nyang ịnyịnyị.’ ”

³Ọlọmwụ ọwẹ ya ịnyịnyị ẹnẹwẹ-ẹnẹwẹ yẹkẹẹ, “Ang-ẹjẹẹ ọlẹ kị ka kpa jẹ nyori Amkpaa-à kpam ya ẹlẹwẹ lẹ ri, ogidi ọlẹ ka hụla hi awụlẹ, ká agbụ iluhye nyamwụ ka nyi epepe hụrụ.”

⁴Ụka ká iJerobowam Adịrahụ wo ẹlẹwẹ, ọ nịra ụbwọ kpaaa me ọlọmwụ ọọwa lẹ, ọ yẹkẹẹ, “Anụ wu ọlẹng ọwẹ-ẹ̀ ham!” I-ijata-ijata lẹ ụbwọ nyamwụ ọọwa-à gbuba, nwọnwụ kọnggbọọ lẹ, ọ jẹ wọọ wii kaka lẹlẹ.

⁵Ahyaahị lẹ, ogidi à hụla hwaarịị hi awụlẹ lẹ, agbụ iluhye nyamwụ à nyi epepe hụrụ chị ka ịpyị jaabwọ ká ọlọmwụ ya deeji ẹ-ẹpwụ nya ẹrụ ọlẹ ká Amkpaa doo lẹlẹ.

⁶Ụka ọọwa, iJerobowam adịrahụ à byi ọlọmwụ ọwẹ yẹkẹẹ, “Chuchuu raabwọ bịlẹ Amkpaa Ohe Oluhye nyang kọ họ ụbwọ nyam uda mẹ!” Ọọwa, ọlọmwụ à raabwọ lẹ, ụbwọ nya adịrahụ à hagụ lẹlẹ.

⁷Ọọwa, adịrahụ à byi ọlọmwụ ọwẹ yẹkẹẹ, “Kẹwẹ kahị bajẹ ka ẹpwa nyam, ká ri ang mẹ. M̀ ka nwụng uri nya ang ọlẹ ká họ ham-m̀ wẹ.”

⁸Ọọwa, ọlọmwụ à byi adịrahụ yẹkẹẹ, “Ịgọgọ ẹnẹnẹhẹ! Á dọmwụ ya ẹhya nya ang-ụdụ nyang wuu ham-m̀ ha-à wẹẹ, ḿ ka bang rụ ka. Ḿ ka kpa ang oriri lee enyi ọnwanwa ka ọnụ ẹ-ẹgẹlẹ ka.

⁹Amkpaa dam ehile ya am nyị ri ịngịngịhyẹ lee ọ-nwa enyi kpong-kpong ka, am nyị tị tịrẹkpẹ nyà bwu ụgbẹyị ọlẹ kam nyị bwu wẹ ịBẹtẹlụ kaka.”

¹⁰Ọọwa lẹ, ọlọmwụ nya Ohe Oluhye ọwẹ a yegiri ru bwu ụgbẹyị ọkịla, ọ tịrẹkpẹ ru bwu kele ka ịBẹtẹlụ kaka.

¹¹Ụka ọọwa, ọlọmwụ onyogo ọhẹ juwa kọ kụ ị-ịBẹtẹlụ. Anyị alẹng nyamwụ tịrọnụ nya ang ịlẹ wuu ká ọlọmwụ o-bwu iJuda ọwẹ họ ị-ịBẹtẹlụ ẹnẹwẹ bala ala ịlẹ wuu kọ ya ta adịrahụ.

¹²Ọọwa, ọlọmwụ onyogo ọwẹ à taa wo yẹkẹẹ, “Ụgbẹyị oyina ọ tị́ bwu rụ?” Anyị nyamwụ a ya joo ụgbẹyị ọlẹ ká ọlọmwụ o-bwu iJuda ọọwa bwu lẹlẹ.

¹³Ọlọmwụ onyogo a byi anyị alẹng nyamwụ ịwẹ ya nyị nwụla obyiyó nyọwa nọ họwa ahyaahị mẹ lẹlẹ. Ụka kị họ ịnyị lẹ, ọ gba hụrwọọ

¹⁴juwa kụ obyiyó nyamwụ ku ọlọmwụ onyogo o-bwu iJuda ọwẹ gbee kọ jẹ ka yọọ kọ hụhụ ọmwụ nya okoji ooku ọhẹ lẹlẹ. Ọlọmwụ onyogo ọwẹ tọọ wo yẹkẹẹ, “Ahụ à ri ọlọmwụ o-bwu iJuda warị lẹ-ẹ́?” Ọlọmwụ ọọwa wọọ yẹkẹẹ, “Ee, am ịnyị.”

¹⁵Ọọwa, ọlọmwụ onyogo ọwẹ a byoo yẹkẹẹ, “Kẹwẹ kahị ka bajẹ ka ẹpwa nyam ká ri ang mẹ.”

¹⁶Ma, Ọlọmwụ o-bwu iJuda tị wọọ yẹkẹẹ, “Ḿ ka jẹ-ẹ̀ bang rụ lee ọ-myị ọnụ nya ụga ọhọhọ nyang ka. Ḿ ka ri ang lee ọ-nwa enyi am̀ ẹgẹlẹ ka,

¹⁷chajị Amkpaa dam ehile ya am nyi ri ịngịngịhyẹ lee ọ-nwa enyi kpong-kpong ka. Ọ myịmyị dam ehile ya am nyị nyà bwu ụgbẹyị ọlẹ kam nyị bwu warị wẹ ịBẹtẹlụ ka.”

¹⁸Ụka ọọwa, ọlọmwụ onyogo ọla ịBẹtẹlụ à byoo yẹkẹẹ, “Am ayịdang ri ọlọmwụ lala ahụ-ahụ ịnyịnyị. Olegu-ẹrụ nya Amkpaa wẹ kaka byim am nyị kpang nyà wẹ ẹpwa nyam kam nyị họng ụga.” Ọnọọkịla ọlọmwụ onyogo ọwẹ à tị me lẹ.

¹⁹Ọọwa, ị bajẹ rụ ka ẹpwa lẹ, ọlọmwụ o-bwu iJuda-à ri ang bala ọ-ya enyi nwa bwọọọ ẹ-ẹpwa nya ọlọmwụ onyogo lẹlẹ.

²⁰Ụka kị hụhụ wẹẹ kpa ang ri lẹ, Amkpaa-à ya du ọlọmwụ onyogo ọwẹ ẹrụ tọ ọlọmwụ o-bwu iJuda lẹlẹ.

²¹Ọọwa, ọ dakọ byi ọlọmwụ o-bwu iJuda ọwẹ yẹkẹẹ, “Amkpaa ya ahụ nyị́ ju ọwa ihi ka, ahụ nyị́ họ jaabwọ kọọwa nyị dang ehile ka.

²²Ọ bying ahị nyị ri ang lee ọ-nwa enyi ẹgẹlẹ ka, à tị họ ịnyị. Ajị nya ọọwa lẹ, ụka ká gbu, ị́ ka ju ogu nyang eji i-iworu nya adang igogo anyị ka.”

²³Ụka kị ri ang kpá lẹ, ọlọmwụ onyogo ọwẹ à ya ugba da obyiyó nya ịlọmwụ u-uhye ha ọlọmwụ o-bwu iJuda lẹlẹ.

²⁴Ọọwa, ọlọmwụ à yegiri nya ọrụrụ lẹlẹ. Ụka kọ jẹ pwụ ụgbẹyị, ugẹbẹ ọhẹ kpehe kaka nwọọ. Ogu nyamwụ dụwa ụ-ụgbẹyị pátaa lobyiyó bala ugẹbẹ dayị rịrị ịkịka nyamwụ chahị jwoo.

²⁵Angịhyẹ ịlẹ kị juwa chịpwụrụ bwu ụgbẹyị ọwẹ kị yẹ ọgu nya ọlẹng ọwẹ dụwa pátaa lugẹbẹ godayị rịrọọ rụ kele ka epweji nya ịBẹtẹlụ ẹga ká ọlọmwụ onyogo kụ lẹ, ị ya je angịnyị ang ọlẹ kị yẹ-ẹ̀ wẹ lẹlẹ.

²⁶Ụka ká ọlọmwụ onyogo wo oja ọwẹ, ọ yẹkẹẹ, “Ọọngọngọhẹ kaka, ọlọmwụ ọlẹ kọ ju ihi nya ehile nya Amkpaa ka-à wẹ ọ ka ri lẹ. Amkpaa-à du ugẹbẹ kaka nwọọ-ọ̀ wẹ jaabwọ kọ ya ọwa nyị ka họ lẹ.”

²⁷Ọọwa, ọ byi anyị nyamwụ yẹkẹẹ, “Anụ hu ugba da obyiyó u-uhye ham wẹẹ.” Ụka kị họ ịnyị lẹ,

²⁸ọ hu ang kele kaka yẹ ogu nya ọlọmwụ ọwẹ dụwa ụ-ụgbẹyị pátaa lẹlẹ. Obyiyó bala ugẹbẹ godayị ịkịka nya ogu nyamwụ. Ugẹbẹ-ẹ́ tị be ogu nyamwụ ri lee ọ-gba mịla obyiyó ka.

²⁹Ọọwa, ọlọmwụ onyogo ọwẹ à hu ogu nya ọlọmwụ ọwẹ nọ u-uhye nya obyiyó nyamwụ kpa rụ ka epweji nya ịBẹtẹlụ kọ ka bida chajị nyamwụ bala ọ-ka jwoo eji lẹlẹ.

³⁰Ọlọmwụ onyogo ọọwa kpa ogu ọwẹ kele ka ju eji i-iworu nya ugbiyegu nya ịlọmwụ lẹ, ọwa bala anyị nyamwụ à juwa chị eko jwoo yẹkẹẹ, “Chaahohoo, chahoho, ọọnam ee, ọọnam ee!”

³¹Ụka kị ju ogu ọwẹ eji kpá, ọlọmwụ ọwẹ byi anyị alẹng nyamwụ yẹkẹẹ, “Ẹnụ kam gbu, anụ-ụ jum eji i-iworu ọlẹ kị ya ọlọmwụ ọlẹ ju eji. Anụ-ụ̀ ya ogu nyam nọ ba ịnyamwụ ba.

³²Ẹrụ ọlẹ ká Amkpaa doo warị kaka ya chajị nya ogidi ọla ịBẹtẹlụ bala ada ị-kpụ ijiga ilepweji ịlọpyị nya ịSameriya ka họ jịra pyii.”

³³Ọlẹ ká ẹlẹwẹ họ kpá, iJerobwam Adịrahụ nya ala Isirẹlụ-ụ́ myị yẹda hi ang onyobyi ọhọhọ nyamwụ ka. Ọ kịnyaa juwa go angịnyị ri angịkiliya ododoodu. Angịlẹ kọ háa nyọka ri angịkiliya lẹ, ịwa adịrahụ à kaa go nya angịkiliya a-ada ị-kpụ ijiga lẹlẹ.

³⁴Ọhọhọ nyamwụ ọwẹ ri ọhọbịrị onyobyi ọlẹ kpa ayịreji ọtata gbanggbang wẹ ugbiyegu nyamwụ.