Read idege 1 Ịdịrịhụ 14 Bible Online

1 Ịdịrịhụ 14 - idege bible

1 Ịdịrịhụ 14

¹Ụka ọọwa, ẹdụrụ jụ Abija ọnyị nya iJehobowam.

²Ọọwa, iJerobowam à byi ahụ nyamwụ yẹkẹẹ, “Kụrụ ang nya ihwirihwa, ká angịnyị ka jẹng ogu datị kaka mẹ, ká kele ka iChilo ka ẹga nya Ahija ọlọmwụ ọlẹ kọ byim am nyị ka ri adịrahụ lẹẹ mẹ.

³Aa kpa abẹ nya ịkaa iwo bala ịkịra ịhyẹ bala ọta nya inwa ụ-ụbwọ ká ka ya dọọ ẹnmẹ mẹ. Aalẹ, ká tọọ wo jaabwọ ká une nya ọnyị nyahị ka la mẹ, ọ ka ya jeng.”

⁴Ọọwa, ahụ nya iJerobowam à kele ka ẹpwa nya Ahija i-iChilo lẹlẹ. Ahija ayịdang chị okwirichi kụnyẹ-kụnyẹ, ọ́ jẹ yọyị yẹẹyẹẹ kaka.

⁵Amkpaa tị lẹẹ ya je Ahija ya ahụ nya iJerobowam nyị juwa ka wẹ kaka tọọ wo chajị nya une nya ọnyị nyamwụ ọlẹ ká ẹdụrụ jụ. Amkpaa ya jọọ ịnyịnyị jaabwọ kọ ka ya. Ụka ká ahụ nya iJerobowam pwụ ụwa, ọ juwa họ ihwirihwa kị ka jọọ nya ahụ nya iJerobowam ka.

⁶Ụka ká Ahija wo ikwata nyamwụ ọ-ọnang lẹ, ọ be ẹkọ byọọ yẹkẹẹ, “Kẹwẹ wẹ ẹpwang chọọ, ahụ nya iJerobowam! Ịyẹ tị́ du ká juwa họ ihwirihwa lala ọngọkịla ọhẹ ahụ nyaa ri ene-è? Oja ọ-byị ụrụ m̄ la ka jang lẹ.

⁷Kele ká byi iJerobowam ọrụng mẹ, Amkpaa yẹkẹẹ, ‘M̀ hu iwe-ahụrụ nyang hwaa bwu ẹpwụ nya alụma wuu, yang ri olegbeju nya ala Isirẹlụ angịnyị nyam.

⁸M̀ nu ọpyị-adịrahụ ọlẹ bwu ụbwọ nya anyị ịtụma nya iDevidi pwaarịị, hwoo kịlẹlẹ hang. Á tị kpa ịlọng lala iDevidi ọnchẹ nyam ka. Ọwa la kpẹẹkpẹẹ ẹ-ẹga nyam, ju ihi nya ehile nyam bala ọ-họ ang ọlẹ kẹnẹ-kẹnẹ kọ pwoku a-ahị nyam.

⁹Ahụ tị lẹ, à họ ang onyobyi gụ ịnya ọngọngọhẹ ọlẹ kọ ri adịrahụ ene nyang. À nyẹẹkpẹ dam, du agbama jum bwula ọ-họ ekpeku bala ịna nyọka kpụ eteji haa.

¹⁰Ajị nya ọọwa lẹ, m̀ ka ya ugbiyegu nyang akama. M̀ ka nwụ anyị ịtụma alẹng nyang wuu, ịlẹ kị ri anyịhị ri lee i-ri anyịhị ri ka. M̀ ka jụ ugbiyegu nyang ila hụrụ jaabwọ ká ọngịnyị kaa rụ ajeyi ila gbee kị ka myị gbang-gbang.

¹¹Ọng myị ọng nya alugbiyegu nyang ahụ iJerobowam kọ gbu ẹ-ẹpwa, ibwu-ibwu à ka ri egu nyaa lẹ. Ọngọngọhẹ kọ tị gbu o-ohwodehe aalẹ, epwu-epwu à ka ryoo lẹ. Am Amkpaa kpangga-à ya ẹlẹwẹ lẹ.’ ”

¹²Ọọwa, Ahịja-à byi ahụ nya iJerobowam yẹkẹẹ, “Yegiri, ká rụ tịrẹkpẹ ka ẹpwa mẹ. Á jẹ pwụ epweji bwaaa lẹ, ọnyị nyang à ka gbụ lẹlẹ.

¹³Ala Ịsịrẹlụ wuu ka bida chajị nyamwụ lẹ, ị ka jwọọ eji lẹlẹ. Ọwa kẹnẹ-kẹnẹ à ka ri ọnyị nya iJerobowam ọlẹ kị ka ju eji ọlam-ọlam bwu ụgbịyegụ ọwẹ lẹ, chajị ọwa kẹnẹ-kẹnẹ a họ ẹla há Amkpaa Ohe Oluhye nya ala Ịsirẹlụ lẹlẹ.

¹⁴Amkpaa juwa ka hu adịrahụ ọkịla ha ala Isirẹlụ ọlẹ kọ ka ta ugbiyegu nya iJerobowam ayịreji. Ọ́ ka tata ene kọ ka lịnyị kokoo.

¹⁵Amkpaa ka yẹ ala Isirẹlụ akama. Ọọwa, ị ka juwa che genggenggeng jaabwọ ká etungkohyo kaa che ẹ-ẹpwụ nya enyi lẹlẹ. Ọ ka hu ala Isirẹlụ latẹ-latẹ bwu ọpyị ọnyịịla ọlẹ kọ ya ha adaa igogo anyị. Ọ ka nyaa epepe hwẹ̀ẹẹ kpoye nya Ihu iYufuretisi, chajị ị du agbama jwoo bwula ọ-họ ekpeku nya ojiga Achẹra, kị juwa kpụ eteji họọ.

¹⁶Ọ ka nyẹẹkpẹ da ala Ịsirẹlu, ọọ-lajị nyọlẹ ká iJerobowam họ ang onyobyi, kọ kpa ala Isirẹlụ hwahị kaka họ ang onyobyi ịnyịnyị.”

¹⁷Ahụ nya iJerobowam à yegiri rụ tịrẹkpẹ ka iTiisa lẹlẹ. Jaabwọnyị nyamwụ à gbu lẹlẹ.

¹⁸Ala Isirẹlu bida chajị nyamwụ lẹ, ị jwọọ eji jaabwọ ká Amkpaa ya deeji bwula Ahija ọlọmwụ lẹlẹ.

¹⁹Ang myị ang ịkịla ịlẹ ká iJerobowam Adịrahụ họ tụ ẹwụ ịlẹ kọ da bala jaabwọ kọ bwu kpẹhị rịrị ọpyị lẹ, ị daa wuu ju ụ-ụpwụ nya Ego nya Ịdịrịhụ nya Isirẹlụ.

²⁰IJerobowam lẹẹ rị adịrahụ nya ala Isirẹlụ ẹ-ẹpwụ nya ẹka iwo imiiye kụrụ imiiye gbẹgbịlẹ. Ụka kọ gbu kpá lẹ, ị hu ịNadabụ ọnyị nyamwụ ri adịrahụ ku iwa nyamwụ lẹlẹ.

²¹IRehobowam ọnyị nya iSolomọn gu ẹka iwo ine kụrụ ookpokpo ụka kọ dọmwụ nyọka ri adịrahụ nya iJuda. Ọ ri adịrahụ ẹka iwo kụrụ irwiye gbẹgbịlẹgbẹ i-iJerusalẹm epweji ọlẹ ká Amkpaa chụ ọ-ọpyị nya ala Isirẹlụ wuu nyọka ri ẹga kị ka gbịgba họọ. Ẹnyị nya ịnịna nya iRehobowam ri ịNaama kọ ri ọla Amọn.

²²Ala iJuda họ ang onyobyi ba Amkpaa. Ọhọhọ ịtịpyọ nyaa ịlẹ kị du agbama ju Amkpaa dọmwụ tà atịra gụ ịnya adaa igogo anyị wẹẹ.

²³Ị nwụ ada ị-kpụ ijiga bala ọ-ya ajwọ nya ojiga Achẹra weji i-ikiti bala e-ekpeleji nya arụrụ nya ekeji ẹga kị kaa kpụ eteji haa.

²⁴Ọtịpyọ okwookwee wuu ri alẹng bala anyang kaa họ akpara ẹ-ẹga kịị kpụ eteji ha ijiga ịwẹ. Ala iJuda hịhị gbịla ọhọhọ inyibyi nya alẹpwụma ịlẹ ká Amkpaa ku hi ẹga da haa ụka kị wẹẹ jụ ka ọpyị kọ ya haa.

²⁵Ụka kọ nọ pwụ ẹka ọharụ nyọlẹ ká iRehobowam ri adịrahụ, iChichakị Adịrahụ nya ala Ijipiti wẹ kaka mwẹla ta iJerusalọm.

²⁶Ọ da Ụbe nya Amkpaa bala ẹpwa nya adịrahụ ịyo, go ang myị ang ịlụwa tụ akụmada nya okpoko ịgọm ịlẹ ká iSolomọn họ wuu kpa rụ.

²⁷Ọọwa, iRehobowam à họ akụmada nya oje ọnyọmịla lẹ, ọ yaa ku ọmwakpa nya ịlẹ kị go kpa rụ lẹlẹ. Ọ ya akụmada ịịwa ju alegbeju nya angịgbeji ẹ-ẹpwa nya adịrahụ ụ-ụbwọ.

²⁸Ụka myị ụka ká adịrahụ-ụ́ juwa ka Ube nya Amkpaa, angịgbeji kaa go akụmada ịwẹ kpa dịrọọ ene kị ka kpa nyà tịrẹkpẹ kaka guru u-ube nya angịgbeji.

²⁹Ang myị ang ịkịla ịlẹ ká iRehobowam Adịrahụ họ wuu lẹ, ị daa ju ụ-ụpwụ nya Ego nya Ịdịrịhụ nya ala iJuda.

³⁰Lụka ọwẹ wuu, iRehobowam bala iJerobowam kaa da awụlẹ ẹwụ ịnyịnyịịnyị.

³¹Ụka ká iRehobowam gbu, i jwoo eje ẹ-ẹga kị ju adamwụ igogo anyị eji e-Epweji nya iDevidi. Ọọwa, Abijam ọnyị nyamwụ à ri adịrahụ ku iwa nyamwụ lẹlẹ.