Read idege 1 Ịdịrịhụ 15 Bible Online

1 Ịdịrịhụ 15 - idege bible

1 Ịdịrịhụ 15

¹Abijam dọmwụ nyọka ri adịrahụ nya ala iJuda ụka ká iJerobowam Adịrahụ nya ala Isirẹlụ lẹẹ gu ẹka iwo kụrụ ineku nyọlẹ kọọwa ri adịrahụ.

²Abija ri adịrahụ i-iJerusalẹm ẹka ịta. Ẹnyị nya ịnamwụ à ri ịMaaka ọnyị nya Abụsalọm lẹ.

³Ọ họ ụma nya ịhọbịrị ịlẹ ká adamwụ họ. Ọ́ myị dịrẹ Amkpaa Ohe Oluhye nyamwụ kpẹẹkpẹẹ jaabwọ ká iDevidi adamwụ ogogo họ ka.

⁴Ajị nya iDevidi lẹ, Amkpaa ya iwe da ká ẹchị-adịrahụ nyamwụ-ụ́ ka myị ka. Ọ họ Abijam ma ọnyị ọlẹng ọhọ ọlẹ kọ ka ri adịrahụ i-iJerusalẹm juwa kpẹhị rịrị ụwa.

⁵Amkpaa họ ịnyị chajị iDevidi họ ang ọ-kpọọ ịpyọ bala o-ju ehile nyamwụ ihi kpẹẹkpẹẹ ẹ-ẹpwụ nya ọhịhị nyamwụ wuu, kẹnẹ-kẹnẹ ẹla ọlẹ kọ họ ẹ-ẹga nya Uriya ọla iHiiti lẹẹ mẹ ịnyị.

⁶Ẹwụ ọlẹ ká iRehobowam bala iJerobowam da awụlẹ kịnyaa kịlahị-ịlahị lụka ká Abijam ri adịrahụ ịnyịnyị.

⁷Ang myị ang ịkịla ịlẹ ká Abijam họ wuu lẹ, ị daa ju ụ-ụpwụ nya Ego nya Ịdịrịhụ nya ala iJuda.

⁸Ụka ká Abijam gbu, ị jwoo eji e-Epweji nya iDevidi. Ọọwa, Asa ọnyị nyamwụ a ku ọmwakpa nyamwụ lẹlẹ.

⁹Asa dọmwụ nyọka ri adịrahụ nya ala iJuda ụka ká iJerobowam ri adịrahụ nya Isirẹlụ lala ẹka iwo imiiye.

¹⁰Ọ hụ i-iJerusalẹm ri adịrahụ jịra ẹẹka iwo ine kụrụ ookpokpo gbẹgbịlẹ. Ẹnyị nya ịnamwụ-ọgbahị à ri ịMaaka ọnyị nya Abụsalọm lẹ.

¹¹Asa họ ang ịlẹ kị kpụ Amkpaa ugbodu nyii jaabwọ ká iDevidi adamwụ ogogo họ.

¹²Ọ ku alakpara alẹng bala anyang ịlẹ kịị họ ụkụrwọ a-ada ị-kpụ ijiga rụ hi ọpyị nyamwụ gbanggbang. Ọ go ekpeku nya ijiga ịlẹ wuu ká adamwụ igogo anyị họ hụrụ.

¹³Ọ ku ịMaaka ịnamwụ-ọgbahị rụ hi iwe-ahụrụ ọlẹ kọ la lala ịnịna nya adịrahụ, chajị nyọlẹ kọ họ ukpeku nya Achẹra ojiga ọnyang. Ọ tụrụ ukpeku ọọwa, jwọọ ila hụrụ ọ-ọkpọọ nya iKidirọn.

¹⁴Ọ ri ịnyịlẹhị Asa-á ta ada ị-kpụ ijiga wuu ayịreji kpá ka, ọ tị dịrẹ Amkpaa kpẹẹkpẹẹ lụka nya ọhịhị nyamwụ wuu.

¹⁵Ọ kpa ang-abwọ nya okpoko onyoowuru bala okpoko ịgọm ịlẹ ká adamwụ chị ịgọgọ ju wẹ Ube nya Amkpaa tụ ịlẹ kọọwa ayịdang chị ịgọgọ ju ịnyịnyị.

¹⁶Asa Adịrahụ nya ala iJuda bala ịBaacha Adịrahụ nya ala Isirẹlụ kaa da awụlẹ ẹwụ ịnyịnyịịnyị pyịyọọ lụka ká ịwa angị imimiiye ịwẹ ra adịrahụ.

¹⁷Ụka ọhẹ, ịBaacha Adịrahụ nya ala Isirẹlụ be iJuda ẹpwa. Ọọwa, ọ chị egwalọ ịnyịịgịrị ju epweji nya ịRama, chajị ká ọngọngọhẹ-ẹ́ ka jẹ-ẹ̀ bwu ọpyị nya Asa Adịrahụ nya ala iJuda kpehe lee ọ-jụ kele kaka lẹlẹ.

¹⁸Ụka ọọwa, Asa go okpoko onyoowuru bala okpoko ịgọm ịlẹ kị hi u-Ube nya Amkpaa bala ẹpwa nya adịrahụ lẹ, ọ ya du alegbeju ịtụka yoo ịhyẹ ẹrụ kịla ịBẹnhadadị Adịrahụ nya ala iSiriya ọlẹ kọ hụ ị-ịDamasịkọsị lẹlẹ. Ọ du ẹrụ nya ọnụ tọọ ịnyịnyị yẹkẹẹ,

¹⁹“À tị́ kpịtịya jaabwọ ká adam bala adang anyị ri igu lee ugbeene. Āhị chị igu ọọwa ahị mẹ-ẹ̀. Okpoko onyoowuru bala okpoko ịgọm ịlẹ kam wẹẹ ya du tọng ri ang-ahị ọlẹ kam ye hang. Lẹẹlẹ, myị́ igu ọlẹ kaahụ bala ịBaacha Adịrahụ nya ala Isirẹlụ ri wẹ, chajị kọ kpa angịdẹwụ nyamwụ rụ hi ọpyị nyam kam dọhụ rwẹẹ mẹ.”

²⁰ỊBẹnhadadị myị ẹla ọlẹ ká Asa Adịrahụ ya lẹ, ọ du alegbeju nya angịdẹwụ nyamwụ bala angịdẹwụ ilekpeleji nyaa kele kaka mwẹla ta epweji nya ala Isirẹl lẹlẹ. Ị kụrụ epweji nya Ịjọn bala ịDan bala Ebẹlụ-ịbẹtị-ịmaaka bala oye nya Ihu ọkịlọlọ nya ịGalili tụ ọpyị nya ịNafụtali wuu.

²¹Ụka ká ịBaacha Adịrahụ wo ẹlẹwẹ lẹ, ọ hwabwọ la egwalọ o-me ju epweji nya ịRama lẹ, ọ rụ kele ka iTiisa lẹlẹ.

²²Ọọwa, Asa Adịrahụ à da ehile ọhẹ ọlẹ kị kpa pyẹ tụ iJuda da wuu lẹlẹ. Ọ ya ọng myị ọng wuu, lọngọngọhẹ o-hi deeji ka, nyị kele ka da ụbwọ bwula o-go ekeji bala ajwọ ịlẹ ká ịBaacha Adịrahụ nyị lẹẹ kpa me epweji nya ịRama kpa rụ hi ụwa. Ụka kị go ang-abwọ ịwẹ wuu kpa nyà lẹ, Asa-à ya me egwalọ ịnyịịngịrị ju epweji nya ịGẹba i-imwawụ nya iBenjamịn bala epweji nya iMisipa lẹlẹ.

²³Ang myị ang ịkịla ịlẹ ká Asa Adịrahụ họ wuu tụ ọngịrị ọlẹ kọ kpa kpẹhị rịrị eji bala epweji ịlẹ wuu kọ chị egwalọ ju lẹ, ị daa wuu ju ụ-ụpwụ nya Ego nya Ịdịrịhụ nya ala iJuda. Ụka ká Asa chị okwirichi kụnyẹ-kụnyẹ, ịngịhyẹ họọ a-ata.

²⁴Ụka ká Asa gbu, ị jwọọ eji i-iworu nya adamwụ igogo anyị e-Epweji nya iDevidi. Ọọwa, iJehochafatị ọnyị nyamwụ à ri adịrahụ ku iwa nyamwụ lẹlẹ.

²⁵Ẹ-ẹpwụ nya ẹka oheeye ọlẹ ká Asa ri adịrahụ nya ala iJuda, ịNadabụ ọnyị nya iJerobowam à ri adịrahụ nya Isirẹlụ lẹ. Ọ ri adịrahụ nya Isirẹlụ ẹka imiiye.

²⁶Ọ họ ang inyibyi ba Amkpaa lala adamwụ iJerobowam ọlẹ kọ kpa ala Isirẹlụ kaka ju ka ẹpwụ nya ọhọbịrị ọhọhọ.

²⁷ỊBaacha ọnyị nya Ahija bwu imwawụ nya Isakaa me obyi ju ịNadabụ lẹ, ọ nwụ ịNadabụ ụka ká ịNadabụ bala angịdẹwụ nya ala Isirẹlụ chị urwe ye iGibeton epweji nya iFilisitiya dada lẹlẹ.

²⁸Ụka ká Asa ri adịrahụ nya iJuda gu ẹka ịta, ịBaacha-à nwụ ịNadabụ Adịrahụ nya ala Isirẹlụ lẹ. Ọọwa, ọ ri adịrahụ nya ala Isirẹlụ ku iwe nya ịNadabụ lẹlẹ.

²⁹Ahyaahị ká ịBaacha ri adịrahụ lẹ, ọ dọmwụ nyọka nwụ alugbiyegu nya iJerobowam lẹlẹ. Ụka ohyẹẹkpẹ, jaabwọ ká Amkpaa ya bwula Ahija ọlọmwụ ọla iChilo lẹ, ị nwụ alugbiyegu nya iJerobowam wuu gbanggbang, ọngọngọhẹ nyaa-á hi lọhịhị kaka.

³⁰Ẹlẹwẹ lịnyị, chajị iJerobowam du agbama ju Amkpaa Ohe Oluhye nya ala Isirẹlụ bwula ọlẹ kọ họ ọhọbịrị ba Amkpaa bala ọ-kpa ala Ịsirẹlu ka ẹpwụ nya ọhọbịrị ọhọhọ.

³¹Ang ịkịla ịlẹ wuu ká ịNadabụ họ lẹ, ị daa ju ụ-ụpwụ nya Ego nya Ịdịrịhụ nya ala Isirẹlụ.

³²Asa Adịrahụ nya ala iJuda bala ịBaacha Adịrahụ nya ala Isirẹlụ kaa da awụlẹ ẹwụ ịnyịnyịịnyị lụka nya adịrahụ oriri nyaa ịwa angị imiiye ịwẹ.

³³Ẹ-ẹpwụ nya ẹka ọhata nyọlẹ ká Asa ri adịrahụ nya ala iJuda, ịBaacha ọnyị nya Ahija-à ri adịrahụ nya ala ịsirẹlu wuu lẹ. Ọ hụ i-iTiisa ri adịrahụ jịra ẹẹka iwo imiiye kụrụ ine gbẹgbịlẹ.

³⁴Ọ họ ang ịtịpyọ ba Amkpaa dịrẹ ọgụ-ẹpẹtẹ ọtịpyọ nya iJerobowam ọlẹ kọ kpa ala Isirẹlụ ju ka ẹpwụ nya ọhọbịrị ọhọhọ.