Read idege 1 Ịdịrịhụ 16 Bible Online

1 Ịdịrịhụ 16 - idege bible

1 Ịdịrịhụ 16

¹Ụka ọhẹ lẹ, Amkpaa-à du iJehu ọlọmwụ ọnyị nya ịHanani ẹrụ tọ ịBaacha Adịrahụ kaka byọọ yẹkẹẹ,

²“M̀ hung ahụ ọngọ jula ọlọlọhẹ-ka hwaa kaka ri olegbeju nya ala Isirẹlụ angịnyị nyam. À tị họ ang onyobyi gbịla iJerobowam kpa angịnyị nyam kaka ju ka ẹpwụ nya ọhọbịrị ọhọhọ. À wule agbama nyam eji bwula ang onyobyi ọhọhọ nyaa ịwẹ lẹ.

³Ajị nya ọọwa lẹ, m̀ juwa ka tang ahụ ịBaacha bala ugbịyegu nyang wuu ayịreji jaabwọ kam họ iJerobowam lẹ.

⁴Ọngọngọhẹ bwu ugbiyegu nyang kọ gbu ẹ-ẹpwụ nya ẹpwa aalẹ, ibwu à ka be ogu nyamwụ ri lẹ. Ọngọngọhẹ kọ tị gbu o-ohwodehe aalẹ, epwu à ka ryọọ lẹ.”

⁵Ang myị ang ịkịla ịlẹ ká ịBaacha họ wuu tụ jaabwọ ká ọngịrị nya ọpyị ọkpakpa la ka ba lẹ ị daa ju ụ-ụpwụ nya Ego nya Ịdịrịhụ nya ala Isirẹlụ.

⁶Ụka ká ịBaacha gbu, ị jwoo eji i-iTiisa. Ọọwa, Ela ọnyị nyamwụ à ri adịrahụ ku iwe nyamwụ lẹlẹ.

⁷Ang odudu ká Amkpaa du iJehu ọlọmwụ ọnyị nya ịHananị ẹrụ ọwẹ tọ ịBaacha bala ugbiyegu nyamwụ ri ajị nyọlẹ kọ họ ọhọbịrị ba Amkpaa. ỊBaacha du agbama ju Amkpaa bwula ịhọbịrị ịlẹ kọ họ jaabwọ ká iJerobowam họ bala ajị nyọlẹ kọ nwụ alugbiyegu nya iJerobowam wuu.

⁸Ụka ká Asa Adịrahụ nya ala iJuda ri adịrahụ gu ẹka iwo imiiye kụrụ ịrwọnyẹ, Ela ọnyị nya ịBaacha-à dọmwụ nyọka ri adịrahụ nya Isirẹlụ lẹ. Ọ hụ i-iTiisa ri adịrahụ ẹka imiiye.

⁹Ụka ọọwa, iSimri kọ ri ọngọhẹ nya alegbeju ịkpẹhị rịrị ẹhya nya ang ịrụnyẹ nya adịrahụ wuu me obyi onyobyi jwoo. Ẹnẹhẹ juwa ká Ela nwa ere kpá họ diidii ẹ-ẹpwa nya Arisa olegbeju ọkpẹhị rịrị ẹpwa nya adịrahụ.

¹⁰ISimri jụ ka ẹpwang ọọwa, nwụ Ela dụwa kpịlagada lẹ, ọ ri adịrahụ ku iwe nyamwụ lẹlẹ. Ẹ-ẹpwụ nya ẹka iwo imiiye kụrụ irwiye nya adịrahụ oriri nya Asa i-iJuda ẹlẹwẹ à họ lẹ.

¹¹Ahyaahị nyọlẹ ká iSimri ri adịrahụ kpá, ọ nwụ alugbiyegu nya ịBaacha adịrahụ wuu. Ọ́ tụụbwọ hi ọlẹng ọhẹ-lọhẹ lahị-lahị ka. Angị ri aanamwụ bala aligu nyam ri, iSimri nwaa wuu.

¹²Ị ta alugbiyegu nya ịBaacha ayịreji gbanggbang jaabwọ ká Amkpaa du iJehu ọlọmwụ ẹrụ tọ ịBaacha.

¹³Ọ lịnyị ajị nya ịhọbịrị ịlẹ ká ịBaacha bala Ela ọnyị nyamwụ họ, kị kpa ala Isirẹlụ ju ka ẹpwụ nya ọhọbịrị ọhọhọ bala o-du agbama ju Amkpaa Ohe Oluhye nya ala Isirẹlụ bwula ọ-kpụ eteji ha ekpeku.

¹⁴Ang myị ang ịkịla ịlẹ ká Ela họ wuu lẹ, ị daa ju ụ-ụpwụ nya Ego nya Ịdịrịhụ nya ala Isirẹlụ.

¹⁵Ẹ-ẹpwụ nya ẹka iwo imiiye kụrụ irwiye nya adịrahụ oriri nya Asa i-iJuda iSimri à dọmwụ nyọka ri adịrahụ nya Isirẹlụ lẹ. Ẹnụtụrụ irwiye kẹnẹ-kẹnẹ ọ tị ri adịrahụ i-iTiisa lẹ. Ụka ka angịdẹwụ nya ala Isirẹlụ ịlẹ kị juwa mwẹla ta iGibeton kọ ri epweji nya ala iFilisitiya

¹⁶wo ya iSimri nyị me obyi ju adịrahụ kpụ nyị nwọọ lẹ, ị hu Omri ri adịrahụ nya ala Isirẹlụ lẹlẹ.

¹⁷Ọọwa, Omri à kpa angịdẹwụ rụ bwu iGibton kaka mwẹla ta epweji nya iTiisa ọlẹ kọ egbeju-ẹpwa nya Isirẹlụ lẹlẹ.

¹⁸Ụka ká iSimri yẹ nyori nyị kụrụ ẹpweji ọwẹ, ọ rụ kele ka ẹpwụ nya ube ọlẹ kọ lọngịrị gụ ẹ-ẹpwa nya adịrahụ. Ọọwa, ọ chị ẹpwụ nya adịrahụ ila yẹ lịlọmwụ dada lẹ, ọ gbu ẹ-ẹpwụ nya ila ọọwa lẹlẹ.

¹⁹Ẹlẹwẹ lịnyị, chajị ọwa ayịdang họ ang ịtịpyọ ba Amkpaa. Ọ họ ang onyobyi gbịla iJerobowam, juwa kịnyaa la ọ-họ ịhọbịrị ká iJerobowam họ kọ kpa ala Isirẹlụ kaka ju ka ẹpwụ nya ang onyobyi ọhọhọ.

²⁰Ang myị ang ịkịla ịlẹ ká iSimri họ, tụ ẹla nya obyi onyobyi ọlẹ kọ me lẹ, ị daa wuu ju ụ-ụpwụ nya Ego nya Ịdịrịhụ nya ala Isirẹlụ.

²¹Ụka ọọwa, ala Ịsirẹlu chị ebwo imiiye hi awụlẹ kpooo. Ẹhya ọhẹ juwa tịtọ kị ka hu iTibini ọnyị nya iGinatị ri adịrahụ nyaa. Ẹhya ọkịla tị ji oye nya Omri.

²²Ụka ohyẹẹkpẹ, angị myị ẹla ju Omri kụrụ. Ị nwụ iTibini. Ọọwa, Omri à ri adịrahụ lẹlẹ.

²³Ụka ká Asa Adịrahụ nya ala iJuda hụ ẹnyị ẹka iwo ịta kụrụ ookpokpo, Omri à ri adịrahụ nya ala Isirẹlụ lẹ. Ọ ri adịrahụ ẹka iwo kụrụ imiiye gbẹgbịlẹ. I-iTiisa ọ hụ ri adịrahụ ẹ-ẹpwụ nya ẹka ịrwọnyẹ nya ọgbanyẹ-ọgbanyẹ lẹ.

²⁴Ọọwa, ọ ra ọgbọdọ ọlẹ kị wụrụ ịSameriya bwu ụbwọ nya ọlẹng ọlẹ ká ẹnyị nyamwụ ri ịChẹmẹẹ lokpoko onyoowuru ụnọ ịrwọnyẹ (6,000) lẹlẹ. Omri chị ugulọ yẹ ọgbọdọ ọwẹ dada wuu lẹ, ọ me epweji ụ-ụwa lẹ ọ wụrụ ẹnyị nyamwụ ịSameriya da wụlẹ ẹẹnyị nya ịChẹmẹẹ ọngọ la ọgbọdọ ọwẹ ene-ene lẹlẹ.

²⁵Omiri họ ọhọbịrị ba Amkpaa. Ang onyobyi ịlẹ kọ họ dọmwụ kpa gụ ịnya angịlẹ kị ri adịrahụ jene nyamwụ wẹẹ.

²⁶Ọ họ tịpyọ dịrẹ ọgụ-ẹpẹtẹ nya iJerobowam juwa kịnyaa la ijiga ịkpụkpụ ịlẹ ká iJerobowam kpa ala Isirẹlụ ju ka ẹpwụ nyamwụ. Ọhọhọ ọọwa du agbama ju Amkpaa Ohe Oluhye nya ala Isirẹlụ.

²⁷Ang myị ang ịkịla ịlẹ ká Omri họ wuu, tụ jaabwọ ká ọngịrị nya ọpyị ọkpakpa nyamwụ la kaka ba lẹ, ị daa ju ụ-ụpwụ nya Ego nya Ịdịrịhụ nya ala Isirẹlụ.

²⁸Ụka ká Omri gbu, ị jwoo eji ị-ịSameriya. Ọọwa, Ehabụ ọnyị nyamwụ à ri adịrahụ ku iwe nyamwụ lẹlẹ.

²⁹Ẹ-ẹpwụ nya ẹka iwo ịta kụrụ ineku nyọlẹ ká Asa ri adịrahụ nya iJuda, Ehabụ ọnyị nya Omri à dọmwụ nyọka ri adịrahụ nya ala Isirẹlụ lẹ. Ọ ri adịrahụ ị-ịSameria ẹka iwo imiiye kụrụ imiiye.

³⁰Ọ họ ang onyobyi ba Amkpaa gụ angịlẹ wuu kị ri adịrahụ jene nyamwụ.

³¹Ịhọbịrị ịlẹ kọ họ gbịla iJerobowam Adịrahụ-ụ́ nwọọ ka, ọ hu ang kele kaka ye ọnyị nya Etibaalụ Adịrahụ nya ala ịSayịdọn. Ọọwa, ọ dọmwụ nyọka kpụ eteji ha ojiga ịBaalụ lẹlẹ.

³²Ọ nwụ ube bala o-me ogidi ha ojiga ịBaalụ ị-ịSameriya.

³³Ọ ya ẹjwọ nya Achẹra ojiga ọnyang yeji ịnyịnyị. Ọ họ ang ịlẹ kị du agbama ju Amkpaa Ohe Oluhye nya ala Isirẹlụ gụ angịlẹ wuu kị ri adịrahụ Isirẹlụ jene nyamwụ.

³⁴Lụka nya adịrahụ oriri nya Ehabụ ọlẹng ọhẹ ọlẹ kị wụrụ iHiyẹlụ bwu ịBẹtẹlụ à ma epweji nya iJeriko nwụ lẹ. Ụka kọ ya itiwe nyamwụ yeji, Abiram ọnyị ọlẹng ọgbahị nyamwụ gbu. Ụka kọ chọọ eju bwula ọ-ya ekpileku kwoo, iSegubu ọnyị ọlẹng nyamwụ ọlẹ kọ ri onjwo gụ wuu gbu. Ịwẹ wuu ri ọ-họ jịra nya ẹla ọlẹ ká Amkpaa ya neeji ene bwu ẹga nya iJochuwa ọnyị nya iNun.