Read idege 1 Ịdịrịhụ 17 Bible Online

1 Ịdịrịhụ 17 - idege bible

1 Ịdịrịhụ 17

¹Ụka ọhẹ juwa ká Ịlayịja ọlọmwụ o-bwu epweji nya iTichibe i-Giliyadị byi Ehabụ Adịrahụ yẹkẹẹ, “M̀ kpa ẹnyị nya Amkpaa Ohe Oluhye nya ala Isirẹlụ ọlẹ kọ juwa hịhị, kam wẹẹ myị ẹrụ ha ya nya ịlẹhị-ịlẹhị yẹkẹẹ, amwụ ọkpụkpụ lee enyi ododo-ó ka ji ka ẹ-ẹpwụ nya ẹka ịmanyị-ịmanyị kịlahị kẹnẹ-kẹnẹ m̄ wọọnụ nya ọọwa da lẹ mẹ ịnyị.”

²Ọọwa, Amkpa-à byi Ịlayịja yẹkẹẹ,

³“Rụ bwu ẹgẹlẹ yahị da ká ọmwẹnụ-ụtụrụ ká kele kaka kpịbaa ọ-ọ̀bá nya iKeriti koye nya ọmwẹnụ-ụtụrụ nya ịJọdan mẹ.

⁴Aa nwa enyi bwu ọ̀bá ọwẹ, ká ri ang ọlẹ ká ipyeekpo-ò wẹẹ ka kpa wang mẹ, am à daa ẹrụ lẹ.”

⁵Ịlayịja ju ihi nya ẹla ọlẹ ká Amkpaa ya. Ọ kele kaka hụ ọ-ọnụ nya ọ̀bá nya iKeriti.

⁶Ipyeekpo kaa kpa ịkaa bala iyo warị wọọ lụtụrụ bala alobyi. Ọ kaa nwa enyi bwu ọ̀bá ọọwa.

⁷Ụka kọ nọ chẹẹ, ọ̀bá ọọwa nwụ, chajị enyi-í do kaka.

⁸Ọọwa, Amkpaa-à byi Ịlayịja yẹkẹẹ,

⁹“Kele ahyaahị ka epweji nya ịSarẹfatị ị-ịSayịdọn kaka hụ ụ-ụwa mẹ. M̀ byi ahụ-ogu ọhẹ lalẹẹ ụ-ụwa kọ ka kpang la ang oriri lẹ.”

¹⁰Ọọwa, ọ kele ka ịSarẹfatị lẹlẹ. Jaabwọ kọ pwụ ogirigba nya epweji ọwẹ bwaaa lẹ, ọ yẹ ahụ-ogu ọhẹ kọ juwa mwụ ịwụ lẹlẹ. Ọọwa, Ọ byi ahụ-ogu ọọwa yẹkẹẹ, “Chị enyi kpa wam kam nwa chẹẹ mẹ-ẹ̀.”

¹¹Ụka kọ juwa kele kaka chị enyi, Ịlayịja be ẹkọ byoo yẹkẹẹ, “Aa kpa une nya ịkaa ọhẹ wam ịnyịnyị.”

¹²Ọnyang ọwẹ tị wẹ byọọ yẹkẹẹ, “M̀ kpa ẹnyị nya Amkpaa Ohe Oluhye nyang ya nya ịlẹhị-ịlẹhị yẹkẹẹ, ḿ la ụpịlẹ nya ịkaa ọhẹ ji ẹpwa ka. Ọrụ nya ajẹ nya ang-ẹrụ lala ẹpwụtụbwọ ookpokpo m̄ la lalẹẹ ẹja bala ida otelike ẹ-ẹpwụ nya ọta lẹ. Ẹgẹlẹ m̄ wẹ lẹẹ nyọka mwụ ịwụ kam ka ya kpụ́ meme la ịlọm bala ọnyị ọlẹng nyam lẹ. Ọwẹ à ka ri ang oriri ohyẹẹkpẹ-ẹkpẹ nyahị lẹ. Ọọwa, āhị ka kụ abwabwọ gbee ká kahị ka gbu igu nya imyi lẹlẹ.”

¹³Ịlayịja tị byoo yẹkẹẹ, “Ā chị uko ka. Kele ká ya ang oriri ọwẹ kpụ ha ịlọng bala ọnyị nyang mẹ. Ene nya ọọwa tị lẹ, chwọọ họ ịkaa ọpyịnyẹng ọhẹ kpa wam ene wẹẹ. Á họ ịnyị kpá, ohihi ka nwang bala ọnyị nyang wẹẹ.

¹⁴Ang odudu ri Amkpaa Ohe Oluhye nya ala Isirẹlụ yẹkẹẹ, ‘Ọrụ nya ang oriri ọlẹja nyang ọwẹ lee ida ọlọta nyang ka juwa nwang gbee da ka ụka ká am Amkpaa ka do enyi myịmyị.’ ”

¹⁵Ahụ-ogu ọwẹ kele kaka họ jaabwọ ka Ịlayịja byoo. Ang oriri ọọwa tị nwọọ ọwa bala Ịlayịja bala ọnyị nyamwụ ẹ-ẹpwụ nya ẹnụtụrụ lụmẹ-lụmẹ.

¹⁶Jaabwọ myị abwọ kị ri ang ọwẹ kaka ba, ọrụ nya ajẹ nya ang-ẹrụ bala ida ọlọta nyamwụ-ụ́ myị́ ka pyịyọọ jaabwọ ka Amkpaa myị ọnụ bwula ẹla ọlọnụ nya Ịlayịja.

¹⁷Lụka ọhẹ ẹ-ẹkpẹ nya ọwẹ, ọnyị nya ahụ-ogu ọwẹ ju ẹdụrụ. Ẹdụrụ ọọwa-ụ́ pwuru kaka gbee kọ gbu.

¹⁸Ọọwa ahụ-ogu ọwẹ à byi Ịlayịja yẹkẹẹ, “Ọngịnyị nya Ohe Oluhye ee, ịyẹ tị́ du ká họm ẹla ọlịịlẹ mẹ? À wẹ nyọka nwụ ọnyị nyam ká ka kpa ọọwa bwurum ida nya ịhọbịrị ịlẹ kam họ ba Ohe Oluhye ịnyị-ị́?”

¹⁹Ma Ịlayịja byoo yẹkẹẹ, “Ye ọnyị nyang ham wẹẹ.” Ọọwa, ọ ye ọnyị ọọwa kpa kele ka ube oluhye ẹga kọọwa kaa hụ lẹ, ọ yọọ nọ ịbẹẹdị nya ịlọmwụ lẹlẹ.

²⁰Ọọwa, Ịlayịja-à raabwọ gbooo ha Amkpaa yẹkẹẹ, “Amkpaa Ohe Oluhye nyam ee, ịyẹ tị́ du ká kpa akama ọlịịlẹ wẹ uhye nya ahụ-ogu ọlẹ kọ họm ọnahị ya ẹga ham kụ lẹẹ ẹ-ẹpwa nyamwụ ká nwụ ọnyị nyamwụ lẹẹ mẹ?”

²¹Ịlayịja nịra ịlọmwụ kpaaa ka uhye nya ọnyị ọwẹ ugbabwọ ịta, juwa raabwọ yẹkẹẹ, “Amkpaa Ohe Oluhye ee, tịrị ọnyị ọlẹ ẹkpẹ kaka hịhị mẹ!”

²²Ọọwa, Amkpaa-à wẹ abwọ ọlẹ ká Ịlayịja rị lẹ, ọnyị à dọmwụ nyọka da ịhụ lẹ, ọ chaịhị lẹlẹ.

²³Ịlayịja hu ọnyị ọọwa kpa hireji wẹ ẹga nya ịnamwụ, ọ byoo yẹkẹẹ, “À tị́ yẹ-ẹ̀ wẹ lẹ, ọnyị nyang chahị jam hịhị lẹ!”

²⁴Ọọwa, ahụ-ogu à wọọ yẹkẹẹ, “Ẹhẹẹ, ugbẹnyị m̄ jẹ ká ri Ọngịnyị nya Ohe Oluhye ịnyịlẹhị, nyori Amkpaa ka ya ẹla bwulang wẹẹ lẹ.”