Read idege 1 Ịdịrịhụ 18 Bible Online

1 Ịdịrịhụ 18 - idege bible

1 Ịdịrịhụ 18

¹Ụka kọ nọ tata chẹẹ pwụ ẹka ọhata nyọlẹ ká enyi-í do kaka lẹ, Amkpaa-à byi Ịlayịja yẹkẹẹ, “Kpa ịlọng ka ẹga nya Ehabụ Adịrahụ, ká byoo mẹ, m̀ juwa ka do ẹnyi lẹ!”

²Ọọwa, Ịlayịja à kele ka ịlahị nya Ehabụ lẹlẹ. Ụka ọwẹ ūhi ọla ịSameriya juwa changịrị kaka kpoye.

³Ọọwa, Ehabụ à du kaka wụrụ Obadaya ọlẹ kọ ri olegbeju ọkpẹhị rịrị ẹpwa nya adịrahụ lẹlẹ. Ọwa ayịdang ri ọngọ kaa gbịgba ha Amkpaa kpẹẹkpẹẹ.

⁴Ụka ọhẹ ká iJesebẹlụ juwa nwụ alọmwụ nya Amkpaa, Obadaya lẹẹ kpa angị ohu (100) lẹpwụ nyaa kaka kpịbaa ẹ-ẹpwụ nya agbụ imiiye ịhyẹ. Ọ ya angị iwo ịrụ kpịbaa ụgbụ ọhẹ, ọ ya angị iwo ịrụ ohihi kpịbaa ọ-ọkịla juwa kpa ang oriri bala enyi ọnwanwa kịlaa ịnyịnyịịnyị.

⁵Ehabụ byi Obadaya yẹkẹẹ, “Āhị ga wụla ụgbụ nya enyi bala ọkpọọ ọnyị myị ọnyị yẹ ó-ri kahị ka yẹ amẹ ịhyẹ chẹẹ ha anyịrẹ bala ibyiyó ri, chajị kị ka gbu kaka mẹ.”

⁶Ọọwa, ị myị ju awụlẹ jaabwọ kị ka jẹ lẹlẹ. Ehabụ yahị da ka oye ọhẹ, Obadaya jẹ ka oye ọkịla.

⁷Ụka ká Obadaya juwa jẹ ịnyịnyịịnyị lẹ, ọ tọ Ịlayịja lọmwaa lẹlẹ. Ọ jẹ Ịlayịja ogu, ọ hirikpẹẹ họọ lẹ, ọ tọọ wo yẹkẹẹ, “Ahụ ayịdang à wẹ lẹ-ẹ́, ayịbam?”

⁸Ịlayịja wẹ byoo yẹkẹẹ, “Ịnọọ, am Ịlayịja ịnyị. Kele ká byi adịrahụ ayịbang mẹ, m̀ lẹẹ lẹ.”

⁹Obadaya wọọ yẹkẹẹ, “Ayịbam ee, anyị m̄ tị́ họng wẹ kọ du ká wẹẹ tịtọ nyọka kpam egbeju kaka gá ẹ-ẹga nya Ehabụ Adịrahụ-ụ̀?

¹⁰M̀ jam kpa ẹnyị nya Amkpaa Ohe Oluhye nyang ọlẹ kọ juwa hịhị ya jẹ ya ẹgẹgẹhẹ-ẹ́ ji ká adịrahụ-ụ́ du kaka tịtọ nyang ka lẹ ka. Ẹgẹgẹhẹ ká adịrahụ nya alọpyị ọọwa-á ya ahụ nyị́ juwa ka, Ehabụ kaa byọọ ya nyị nwa iro pyii nyori ịwa nyị́ yẹng ka ịnyịlẹhị.

¹¹Ọọwa, ā wẹẹ byim am nyị kele kaka byọọ ya ahụ Ịlayịja nyị jam ẹgẹlẹ lẹ lẹ-ẹ́?

¹²Ọ chịkpẹẹ olegu nya Amkpaa ka kpang rụ bwu ẹgẹlẹ ka ẹgẹhẹ ụka kam ru hing kpá myị. Ó-ri kam tị byi Ehabụ wẹ yẹkẹẹ, à lẹẹ ẹgẹlẹ lẹ, kọ tị yẹng ka bẹ-ẹ̀? Ọ ka wum nwụ. À tị́ kpịtịya, m̀ ri ọnchẹ ọkpẹẹkpẹẹ nya Amkpaa bwu enjwo-enjwo nyam.

¹³Ayịbam, á wo oja nya ang ọlẹ kam họ ụka ká iJesebẹlụ lẹẹ go alọmwụ nya Amkpaa nwụ ka-á? M̀ kpa angị ohu (100) nyaa kaka kpịbaa agbụ imiiye—angị iwo ịrụ ụ-ụgbụ ọhẹ, angị iwo ịrụ ụgbụ ọkịla. Ọọwa, m kaa kpa ang oriri bala enyi kịlaa ịnyịnyịịnyị lẹ.

¹⁴Á yẹ-ẹ̀ wẹ ka-á! Á ka jẹ-ẹ̀ dum kaka byi adịrahụ nyori à lẹẹ lẹ koo. Ọ ka nwụm!”

¹⁵Ma Ịlayịja wẹ byọọ yẹkẹẹ, “M̀ kpa ẹnyị nya Amkpaa Agụgụ ọlẹ kọ juwa hịhị kam kaa myị ẹrụ ha ya nyori m̀ ka kpa ịlọm ka ẹga nya Ehabụ alẹ oleeri ọlẹ pyii lẹ.”

¹⁶Ọọwa, Obadaya-à kele kaka ya je Ehabụ Adịrahụ lẹ, Ehabụ à kele ka ẹga nya Ịlayịja lẹlẹ.

¹⁷Ụka ka Ehabụ chẹhị kaka yẹ Ịlayịja, ọ yẹkẹẹ, “Ọọwa ri à mịla ji ẹgẹhẹ ji lẹẹ, ahụ ọngọ gu ẹla reeji ha ala Isirẹlụ!”

¹⁸Ịlayịja tị wọọ yẹkẹẹ, “Am à gu ẹla reeji ha ala Isirẹlụ koo. Ahụ kpangga bala ugbiyegu nyang ịnyị. Anụ pwa ihi nya ehile nya Amkpaa ojuju, juwa mwọọgịlẹ kpụ eteji ha ekpeku nya ịBaalụ.

¹⁹Kele, ká wụrụ ala Isirẹlụ wuu kaka tọ ọ-Ọgbọdọ nya ịKamẹlụ. Aa kpa alọmwụ nya angị ohu ine da iwo ịrụ (450) nya ịBaalụ bala alọmwụ nya Achẹra angị ohu ine (400) ịlẹ kị wẹẹ ri ang bwu ụbwọ nya iJesebẹlụ ahụ nyang mẹ.”

²⁰Ọọwa, Ehabụ à du kaka wụrụ ala Isirẹlụ wuu bala alọmwụ nya ịBaalụ wẹ uhye nya Ọgbọdọ nya ịKamẹlụ lẹlẹ.

²¹Ịlayịja godayị ị-ịlahị nyaa wuu lẹ, ọ taa wo yẹkẹẹ, “Anụ tị́ ka chị ọkịlẹtụ agiye tata ka ba anyị? Ó-ri Amkpaa kọ ri Ohe Oluhye nya ịlẹhị lẹ, anụ bọọ jẹ mẹ! Ọ́ tị ri ịBaalụ kọ ri Ohe Oluhye lẹ, anụ bọọ jẹ mẹ-ẹ̀!” Ọngọngọhẹ-ẹ́ tị họ pyịm kpong-kpong ka.

²²Ọọwa, Ịlayịja-à byaa yẹkẹẹ, “Am kẹnẹ-kẹnẹ à ri ọlọmwụ nya Amkpaa ọlẹ kọ hi lẹẹ lẹlẹ. Alọmwụ nya ịBaalụ tị la angị ohu ine da iwo ịrụ-ụ̀ (450) wẹ.

²³Anụ kpa ịna imiiye warị mẹ. Alọmwụ nya ịBaalụ ā hu ọhẹ, kị nwọọ bala ọ-wọọ guru u-uhye nya ịwụ mẹ. Ị́ tị ka ya ila jwọọ ka. M̀ ka họ ẹna ọkịla ịịwẹ lẹ, ḿ tị ka ya ila jwọọ ka ịnyịnyị.

²⁴Ọọwa lẹ, ká alọmwụ nya ịBaalụ ā be ẹkọ wụrụ ojiga nyaa mẹ. Am ka be ẹkọ wụrụ Amkpaa lẹ. Ọngọlẹ kọ wẹ abwọ ọrịrị bwula o-du ila kaka rụ iya lẹ aalẹ, ọwa-à ri Ohe Oluhye lẹlẹ.” Angịnyị à myị dọọ ya ẹla nyamwụ ọwẹ nyị há lẹlẹ.

²⁵Ọọwa, Ịlayịja-à byi alọmwụ nya ịBaalụ yẹkẹẹ, “Anụ ā dọmwụ jene mẹ, anụ ju iru lẹ. Anụ hu ẹna ọhẹ kanụ nwọọ lẹ, kanụ wụrụ ojiga nyanụ mẹ. Anụ ya ila jwoo koo.”

²⁶Ị hu ẹna ọlẹ ki kpa waa lẹ, ị nwọọ hwoo nọ ogidi lẹ, ị be ẹkọ wụrụ ịBaalụ bwu alụtụrụ gbee da ka ẹnụ ọrịrị ẹ-ẹpwayịrẹtẹ lẹlẹ. Ị juwa dakọ gboo yẹkẹẹ, “ỊBaalụ ee, wẹẹhị mẹ-ẹ̀!” Ị kịnyaa juwa chewo dagaga ju ogidi. ỊBaalụ-ụ́ tị wẹ abwabwọhẹ ka.

²⁷Ụka nya ẹnụ ọrịrị ẹ-ẹtẹ lẹ, Ịlayịja-à juwa kpaa hu utungguru yẹkẹẹ, “Anụ dakọ gboo gụ olene-ene mẹ. Ojiga nya ịlẹhị ọ ri lẹ. Ọhẹka ọ juwa kpa irya nya ẹlẹhẹ mẹ lee ọ juwa kpa ata kaka ju amẹ, lee o-juwa ka anyị! Ọchịkpẹẹ ọ tị ka juwa nune myị. Anụ chọọ ahị mẹ!”

²⁸Ọọwa, alọmwụ nya ịBaalụ ịwẹ à juwa dakọ gboo gụ olene bala ọ-kpa ịma bala ije-ịkpachị kọ ịlaa gbee kị juwa da ịwọ bolo-bolo jaabwọ ká ọhọhọ nyaa ri lẹlẹ.

²⁹Ị kịnyaa juwa ya ẹla lobo-lobo-lobo gbee ka ẹnụ pyị ẹtẹ pwoku ụka kịị kịla iya nya obyi. Ị́ ti wo ụnụ ọhẹ-lọhẹ kụrẹkẹ lee ọwẹwẹ nya abwọ ọrịrị nyaa ka.

³⁰Ọọwa, Ịlayịja-à byi angịwẹ yẹkẹẹ, “Anụ jẹ tụ bam wẹẹ.” Ị tụ gbiriri kele ka ẹga nyamwụ lẹ, ọ ma ogidi nya Amkpaa ọlẹ tọ tụrụ bwụjẹ-bwụjẹ me myịmyị lẹlẹ.

³¹Ọ go ajwọ iwo kụrụ imiiye ku ọmwakpa nya imwawụ iwo kụrụ imiiye nya ala Isirẹlụ ịlẹ ká Amkpaa ya ẹnyị nya iJekọbụ adaa ogogo da kaka ri Isirẹlụ.

³²Ọ ya ajwọ ịịwa mẹ ogidi nya Amkpaa. Ọọwa, ọ be aya pwọọ dagaga jwoo ọlẹ ká ịgalụwa nya enyi ịta ka jẹ-ẹ̀ kele muị lẹlẹ.

³³Ọọwa, ọ go ịwụ guru u-uhye nya ogidi lẹ ọ wọ iyo nya ẹnụ ọọwa guru ịwụ u-uhye lẹlẹ. Ọọwa, ọ byaa yẹkẹẹ, “Anụ ya enyi myị̀ ịta ịtụka-ịtụka ine kanụ yọọ hụ iyo okiliya bala ịwụ iluhye nya ogidi mẹ.” Ọọwa, ị họ ịnyị lẹlẹ.

³⁴Ọ byaa yẹkẹẹ, “Anụ myịmyị họ jaabwọ kanụ họọ-ọ̀ wẹ wẹẹ.” Ụka kị họ ịnyị kpá, ọ byaa yẹkẹẹ, “Anụ myịmyị ma họ ugbabwọ ọhata wẹẹ.” Ọọwa, ị họ jaabwọ kọ ya lẹ,

³⁵Enyi à mwụ bwu uhye nya ogidi bala ọdagaga jwoo kaka myị̀ aya ọlẹ kọ be tọlọng-ng lẹlẹ.

³⁶Ụka ká ụka ọlẹ kịị kịla iya nya alobyi pwụ lẹ, Ịlayịja-à jẹ tụ ba ogidi lẹ, ọ raabwọ yẹkẹẹ, “Amkpaa Ohe Oluhye nya Ebiraham bala Ayịsiki bala iJekọbụ ee, aa họ ká angịnyị ā jẹ alẹ nyori ahụ à ri Ohe Oluhye nya Isirẹlụ lẹ, ọnchẹ nyang m̄ tị ri lẹ mẹ. Họ kị jẹ ịnyịnyị nyori bwula ehile ọlẹ ká dam m̄ họ ang ịlẹ wuu lẹ mẹ.

³⁷Amkpaa ee, aa wẹm, wẹm chajị ká angịlẹ wuu ka jẹ nyori ahụ Amkpaa-à ri Ohe Oluhye lẹ, à tị juwa kpa ọkịlẹtụ nyaa nyà tịrẹkpẹ wẹ ẹga nya ịlọng myịmyị lẹ mẹ.”

³⁸Ahyaahị lẹ, Amkpaa-à du ila wẹ eji kaka rụ iya tụ ịwụ bala ajwọ bala ịpyị ọlụwa lẹ, enyi ọlaya-à nwụ kịrẹ-kịrẹ lẹlẹ.

³⁹Ụka ká angịnyị yẹ ẹlẹwẹ, ị hị chị ka ịpyị yahị kụrụ eji lẹ, ị ya dodehe gboo yẹkẹẹ, “Amkpaa-à ri Ohe Oluhye lẹ! Amkpaa kẹnẹ-kẹnẹ a ri Ohe Oluhye lẹ!”

⁴⁰Ọọwa, Ịlayịja-à byi angịnyị yẹkẹẹ, “Anụ wu alọmwụ nya ịBaalụ ịwẹ kpa warị. Ānụ myị ká ọngọngọhẹ nyaa-ā be rụ koo!” Ị waa wuu lẹ, Ịlayja-à kpaa kele ka ju ka Ọkpọọ nya iKichọn lẹ, ọ nwaa ụ-ụwa lẹlẹ.

⁴¹Ọọwa, Ịlayịja-à Ehabụ Adịrahụ yẹkẹẹ, “Kele ká ri lọbanyii ugbẹnyị mẹ. M̀ wo ká enyi ododo wẹẹ tụ́ iru jẹ warị lẹ.”

⁴²Ụka ká Ehabụ rụ nyọka ri ang lẹ, Ịlayịja-à wule ka achinege nya Ọgbọdọ ịKamẹlụ lẹ, ọ hirikpẹẹ ya egbeju ju ẹ-ẹpwụ ata lẹlẹ.

⁴³Ọọwa, ọ byi ọnchẹ nyamwụ yẹkẹẹ, “Kele ká chẹhị ka oye nya ihu wẹẹ.” Ọnchẹ nyamwụ kele lẹ, ọ nyà kaka byoo yẹkẹẹ, “Ḿ yẹ ịngịngịhyẹ ụ-ụwa koo.” Ịlayịja byoo ya nyị mwẹẹkpẹ kele kaka wụlayẹ jịra ugbabwọ irwiye.

⁴⁴Ụka ọharwiye lẹ, ọnchẹ ọwẹ à nyà kaka yẹkẹẹ, “M̀ yẹ egbamwụ ochiche-ochiche lala ẹpwụtụbwọ kọ juwa kpehe bwu uhye nya ihu.” Ọọwa, Ịlayịja-à byoo yẹkẹẹ, “Kele ka ẹga nya Ehabụ Adịrahụ ká byoo kọ gba kụ ang ọrụnyẹ nyamwụ kọ rụ ka ẹpwa ahyaahị mẹ ó-ri ịnyị ka aalẹ enyi ka do yoo dada yọọ dada lẹ-ẹ̄.”

⁴⁵Ahyaahị, egbamwụ chị owu kpịlẹẹ, igbachịwụ à dọmwụ nyọka dada lẹ, enyi ọtụka-ọtụka-à dọmwụ nyọka dodo lẹlẹ. Ehabụ gba kụ ang ọrụnyẹ nyamwụ lẹ, ọ rụ ka iJesiriyẹlụ lẹlẹ.

⁴⁶Ụka ọọwa, Amkpaa ya ọngịrị ju Ịlayịja. Ọọwa, ọ wu awụrụ nyamwụ ju ka ekpeleji nya ugba ọchọhị nyamwụ lẹ, ọ rụnyẹ ji ịlahị nya Ehabụ lalaala ka ju ka iJesiriyẹlụ lẹlẹ.