Read idege 1 Ịdịrịhụ 19 Bible Online

1 Ịdịrịhụ 19 - idege bible

1 Ịdịrịhụ 19

¹Ehabụ Adịrahụ tịrọnụ ya je iJesebẹlụ ahụ nyamwụ ang myị ang ịlẹ wuu ká Ịlayịja họ bala jaabwọ kọ alọmwụ nya ịBaalụ wuu.

²Ịnyị, iJesebẹlụ à du ẹrụ kaka byi Ịlayịja yẹkẹẹ, “Ó-ri kọ ka pwụ ijuju amachanyị kam nwụng lala alọmwụ ịlẹ ká nwụ ka aalẹ, ijiga-ā tụm ẹhị pịrị.”

³Ẹlẹwẹ la Ịlayịja uhi-uhi lụmẹ. Ọọwa, rụnyẹ rụ nyọka kpa ọhịhị nyamwụ be lẹlẹ. Ọ kpa ọnchẹ nyamwụ ba ịlọmwụ. Ụka kị jẹ kaka pwụ iBiyẹchẹba, ọ pẹhi ọnchẹ nyamwụ ụ-ụwa lẹ,

⁴ọ yegiri ụbwọọmwụ juwa jẹ lala ahị ọpyẹpyẹ lẹpwụ-lẹpwụ kele ka ugbileji lẹlẹ. Ọ hụhụ ọ-ọmwụ nya okoji ọhẹ lẹ, ọ juwa ma ịlọmwụ igu ma yẹkẹẹ, “Áchááà! Ọ myịm pwẹẹpwẹẹ lẹ, Amkpaa. Nwụm ká egbahị ā go mẹ. Oyina nya ịnyam à tị́ há gụ ịnya adam igogo anyị ịlẹ kị gbu kam kpá lẹ ene-è?”

⁵Ọ hịnọnọ e-ekpeleji nya okoji ọọwa lẹ, ọ nune lẹlẹ. Ụka kọ juwa kpa une nọ, olegu-ẹrụ ọhẹ warị kaka hwọọ jigi-jigi byoo yẹkẹẹ, “Chahị ká ri ang mẹ.”

⁶Ọ yọyị dọgịlẹ ju lẹ, ọ yẹ ẹbẹ nya ịkaa bala ọta nya enyi o-okegbeju nyamwụ lẹlẹ. Ọ ri ang bala ọ nwa enyi lẹ, ọ hịnọnọ myịmyị lẹlẹ.

⁷Olegu-ẹrụ nya Amkpaa mwẹẹkpẹ ụka oheeye kaka chọọ ahị byoo yẹkẹẹ, “Wuleji ká ri ang mẹ. Ọ́ ri ịnyị ka, ẹdịyẹ ka myịng lụmẹ.”

⁸Ịlayịja wuleji, hu ang ri lẹ, ọ ya enyi nwa bwọọọ lẹlẹ. Ọ kpa ọngịrị nya ang oriri ọwẹ jẹdịyẹ ẹ-ẹpwụ nya ahị ọpyẹpyẹ iwo ine bala odu ine gbee kaka pwụ Ọgbọdọ nya ịSayịnayị, ọgbọdọ nya Amkpaa.

⁹Ọọwa, ọ kele ka ẹpwụ nya ụgbụ ọhẹ nyọka hyehe ụ-ụwa lẹlẹ. Lụka ọmwaaa lẹ, Amkpaa-à ya ẹla yẹkẹẹ, Ịlayịja ee, “Ịyẹ ā tịị họ ẹgẹlẹ?”

¹⁰Ịlayịja wẹ yẹkẹẹ, Amkpaa Ohe Oluhye Agụgụ ee, “Am lẹ, m̀ chila ju ụkụrwọ nya ẹrụ ọ-myị hang dịịlọm lẹẹ. Ala Isirẹlụ tị bịrị iro ọlẹ kị nwa tang, tụrụ ogidi ikiliya nyang bala ọ-nwụ alọmwụ nyang wuu lẹ. Am ụbwọm kẹnẹ-kẹnẹ à hi lẹẹ lẹlẹ. Ị tị wẹẹ maga kị ka nwụm ịnyịnyị lẹ.”

¹¹Ọọwa, Amkpaa-à byoo yẹkẹẹ, “Kpehe bwu ẹgẹlẹ ká godayị ị-ịlahị nyam u-uhye nya ọgbọdọ mẹ.” Ụka ká Ịlayịja godayị ụ-ụwa, Amkpaa chịpwụrụ kam ligbachịwụ ọtụka-ọtụka mịla ọgbọdọ nmoo. Ajwọ juwa bene bala o-wo pilo-pilo hi awụlẹ, Amkpaa-á tị juwa ẹ-ẹpwụ nya igbachịwụ ka. Ụka ká igbachịwụ kpụba kpá, ịpyị hụ́ jigi-jigi, Amkpa-á tị juwa ẹ-ẹpwụ nya ịpyị ọ-hụ́ jigi-jigi ka.

¹²Ụka ká ọpyị ọ-hụ́ jigi-jigi kpụba, ila dọmwụ nyọka wuru, Amkpaa-á tị juwa ẹ-ẹpwụ nya ila ka. Ụka ká ila kpụba, omyi ọdụmwọọ ọhẹ ya ẹla.

¹³Ụka ká Ịlayịja wo ọmyi ọọwa, ọ ya awụrụ nyamwụ da kụrụ ịlọmwụ a-ahị lẹ, ọ kele kaka godayị ọ-ọnụ nya ụgbụ. Ọọwa, omyị ọhẹ à ya ẹla ta Ịlayịja yẹkẹẹ, “Ịlayịja ee, ịyẹ ā tịị họ ẹgẹlẹ?”

¹⁴Ịlayịja wẹ byoo yẹkẹẹ, “Amkpaa Ohe Oluhye Agụgụ ee, Am lẹ, m̀ chila ju ụkụrwọ nya ẹrụ ọ-myị hang dịịlọm lẹẹ. Ala Isirẹlụ tị bịrị iro ọlẹ kị nwa tang, tụrụ ogidi ikiliya nyang bala ọ-nwụ alọmwụ nyang wuu lẹ. Am ụbwọm kẹnẹ-kẹnẹ à hi lẹẹ lẹlẹ. Ị tị wẹẹ maga kị ka nwụm ịnyịnyị lẹ.”

¹⁵Ọọwa, Amkpaa-à byoo yẹkẹẹ, “Rụ tịrẹkpẹ tụ ụgbẹyị ọlẹ ká bwu-ù wẹ da, ká kele ka ugbileji nya ịDamasịkọsị. Ụka ká pwụ epweji ọọwa, aa ya ida hụ ịHasẹlụ kọ ka ri adịrahụ nya ala iSiriya.

¹⁶Ọọwa lẹ, ká ya ida hụ iJehu ọnyị nya iNimchi kọ ka ri adịrahụ nya ala Isirẹlụ, ká ya ida hụ Ịlayịcha ọnyị nya ịChafatị ọla Ebẹlụ-imehola to ka ri ọlọmwụ ku ọmwakpa nyang mẹ.

¹⁷Ọng myị ọng kọ gụ ịHasẹlụ be, iJehu ka woo nwụ. Ọngọngọhẹ kọ tị gụ iJehu be, Ịlayịcha ka wọọ nwụ.

¹⁸M̀ tị ka chẹwụ ke angị ụnọ irwiye (7,000) am̀ Isirẹlụ nya angịlẹ kị myị kpụ eteji ha ojiga ịBaalụ lee o-ju ukpeku nyamwụ ọnụ ka.”

¹⁹Ịlayịja rụ bwu ẹgẹwẹ lẹ, ọ yẹ Ịlayịcha kọ juwa kpa ịna imiiye wu ẹrụ. Alẹng angị iwo kụrụ ookpokpo ịkịla juwa ị-ịlahị nyamwụ ká ọngọngọọng nyaa kpa ịna imimiiiye juwa wu ẹrụ ịnyịnyị. Ịlayịja tụ ba Ịlayịcha lẹ, ọ pwụ awụrụ nyamwụ da kụrụ Ịlayịcha lẹlẹ.

²⁰Ịlayịcha-à tụ hi ịna nyamwụ lẹ, ọ rụnyẹ ba Ịlayịja lẹ, ọ byi Ịlayịcha yẹkẹẹ, “Ba kam kele kaka ju adam bala ịnam ọnụ, daa ọkpahị ene kam ka wẹ kaka dịrẹng mẹ.” Ịlayịcha wẹ byoo yẹkẹẹ, “Ọ hiigu. Kele mẹ-ẹ̀, ḿ pwa koo. Á tịị kpịtịya nya ang ọlẹ kam họ-ọ̀ wẹ ẹ-ẹga nyang mẹ.”

²¹Ọọwa, Ịlayịcha-à rụ tịrẹkpẹ ka ẹga nya ịna nyamwụ lẹ, ọ nwaa lẹ, ọ ya kpụ́ lẹlẹ. Ekeji ịlẹ kị ya ju ịna ịịwa kpa wu ẹrụ ọ go kpa kaka tụ ila ọlẹ kọ kpụ ịna ịịwa lẹ. Ọ ya iyo nya ịna ịịwa ha angịnyị ri kpá lẹ, ọ rụ kaka ba Ịlayịja jẹ lala ọngọdụbwọ nyamwụ lẹlẹ.