Read idege 1 Ịdịrịhụ 2 Bible Online

1 Ịdịrịhụ 2 - idege bible

1 Ịdịrịhụ 2

¹Ụka ká ụka ká iDevidi juwa ka gbu ju chwẹẹ lẹ, ọ wụrụ iSolomọn ọnyị nyamwụ lẹ, ọ jwọọ ọhụ ịịlẹ yẹkẹẹ,

²“Ụtụrụ nyam hi kpii lẹ. Aa ju ugbodu ka godayị giri-giri lala ọlẹng,

³ká họ angọlẹ ká Amkpaa Ohe Oluhye nyang bying ahụ nyị họ mẹ. Aa ju ihi nya ehile bala ọmẹjẹ nyamwụ ịlẹ kị da ụ-ụpwụ nya Ehile nya iMosisi, chajị ká ang wuu ka hiigu hang ẹ-ẹga myị ẹga ọlẹ ká ka mẹ.

⁴Ọọwa ka du ká Amkpaa jẹ-ẹ họ ọnụ ọmyịmyị nyamwụ ọlẹ kọ myị ham jịra mẹ. Ọ lẹẹ myị ọnụ ham ya anyị ịtụma nyam kàkịnyaa juwa ri adịrahụ Isirẹlụ pyịyọọ ó-ri kịị nyị ju ihi nya ehile nyọwa kpẹẹkpẹẹ lọkịlẹtụ bala ugbodu okpukpuru nyaa wuu.

⁵“Ọ́ ba ọọwẹ kem ka, à tị ka kpịtịya nya ang ọlẹ ka iJowabụ ọnyị nya iSeruya họm. Ọ nwụ Abụnẹẹ ọnyị nya ịNẹẹ bala Amasa ọnyị nya ịJẹtẹẹ angị imiiye ịlẹ kị ri alegbeju nya angịdẹwụ nya ala Isirẹlụ. Ọ nwaa lụka nya okpunyi kwiwa nya angịlẹ ká alegbeju ịwẹ nwụ lụka nya ẹwụ ọdada. Ọwa-à kpa olo nya abyị bala akama chajị nya igu nya angịwẹ lẹ.

⁶Aa kpa ẹla ọjẹjẹ nyang yọọ akama jaabwọ kọ opwoku mẹ. Ā myị kọ gbu igu adoohe koo.

⁷Ma, aa họ anyị nya ịBasilayị i-bwu iGiliyadị ọnahị, ká ya ang haa ri, chajị ị dam ụbwọ ụka kam lẹẹ rụnyẹ rụ hi Abụsalọm ọnyadang ọlẹng ugbeene.

⁸Á tịị kpịtịya nya iChimeyi ọnyị nya ịGẹra olepweji nya ịBahurim bwu imwawụ nya iBenjamịn mẹ. Ọ gọlọ onyuujujwo jum ẹnụ kam kele ka ịMahanayim. Ụka kọ tị wẹ kaka tọm ị-ịJọdan lẹ, m̀ nwa iro lẹnyị nya Amkpaa, byọọ ya ḿ ka nwọọ ka.

⁹Chajị nya ọọwa lẹ, ā tụụbwọ hyoo rụ ọdodu ká. À ri ọngọ jẹ ẹla jẹ ene-ene lẹ, à jẹ kọ chịla ká ka nwọọ pyii lẹ.”

¹⁰Ụka ọọwa lẹ, iDevidi à gbu lẹ, ị jwoo eji e-Epweji nya iDevidi lẹlẹ.

¹¹Ọtụchawụlẹ nya ẹka ịlẹ ká iDevidi ri adịrahụ nya ala Isirẹlụ wuu ri ẹka iwo ine gbẹgbịlẹ. Ọ hụ i-iHebirọn ri adịrahụ ẹka irwiye. Ọ hụ i-iJerusalẹm ẹka iwo ịta kụrụ ịta.

¹²Ụka ọọwa, iSolomọn ri adịrahụ ku iwa nya iDevidi adamwụ. Ọngịrị nya ọpyị ọkpakpa nyamwụ yeji giri-giri.

¹³Ụka ọọwa, Adonija ọlẹ ká ẹnyị nya ịnamwụ ri ịHagiti kele ka ẹga nya ịBatịchẹba ịnịna nya iSolomọn. Ọọwa, ịnịna nya iSolomọn à tọọ wo yẹkẹẹ, “Ẹlẹhẹ ịnyị le?” Adonija à wẹ ịnịna nya iSolomọn yẹkẹẹ, “Ehe, okpunyi ịnyị.”

¹⁴Ọọwa, ọ ya ịnyịnyị yẹkẹẹ, “M̀ kpa ẹla ọhẹ kam ka ya tang.” Ịnịna nya iSolomọn à byọọ nyị ya mẹ lẹlẹ.

¹⁵Ọọwa, ọ yẹkẹẹ, “À tị́ jẹ am a lẹẹ ka ri adịrahụ lẹ. Ala Isirẹlụ wuu ya ẹhị rịrị kọ ka lịnyị. Ma, ang tị yẹda du ká ọnyadam ri adịrahụ, chajị Amkpaa-à họ ịnyị lẹ.

¹⁶M̀ tị la ịngịhyẹ kam ka bịlẹng. Ā pwa ọ-họ ang ọọwa koo.” Ọọwa, ịBatịchẹba à byọọ nyị ya mẹ lẹlẹ.

¹⁷Ọọwa, ọ yẹkẹẹ, “Chuchuu raabwọ ha iSolomọn Adịrahụ, chajị m̀ jẹ kọ ka myị-ị pwa ẹla ọ bwu ẹga nyang ka, kọ ya Abichagị ọyẹẹnọ nya ala iChunẹm ham nya ahụ nyam mẹ.”

¹⁸Ọọwa, ịBatịchẹba à wọọ ya, ọ hiigu, m ka ya je adịrahụ hang.

¹⁹ỊBatịchẹba kele ka ẹga nya Adịrahụ iSolomọn, kọ ka ya ẹla wọnụ nya Adonija ju lẹlẹ. Ụka ká adịrahụ chẹhị yọọ, ọ wuleji ahyaahị ka tọọ, hiri ịlọmwụ kpẹẹ ha ịnamwụ la ọnụ ọ-da chị. Lẹ, ọ tịrẹkpẹ kele ka hụhụ ẹ-ẹchị adịrahụ nyamwụ lẹ, ọ ya ị ya ẹchị da ha ịnamwụ ubwuriri nyamwụ lẹlẹ.

²⁰Ọọwa, ịnamwụ a yẹkẹẹ, m la ang ochiche ọhẹ ọlẹ kam ka bịlẹng, chuchuu a pwa koo. Adịrahụ a wẹ yẹkẹẹ, bịlẹ mẹ ịnam, ḿ ka pwa ka.

²¹Ọọwa, ịnamwụ a wọọ yẹkẹẹ, “Ya Abichagị ọla iChunẹm ha Adonija ọnyadang mẹ-ẹ̀.”

²²ISolomọn Adịrahụ wẹ ịnamwụ yẹkẹẹ, “Anyị tị du ká bịlẹm kam yẹ Abichagị họọ ye-è? Bịlẹm kam tụụbwọ hi ẹchị adịrahụ họọ ịnyịnyị mẹ, chajị ọnyadam ọ ri lẹ, ọ tị ri ọgbahị nyam. Abiyata ọngọkiliya bala iJowabụ ọnyị nya iSeruya tị ji oye nyamwụ.”

²³Ụka ọọwa, iSolomọn Adịrahụ a nwa iro lẹnyị nya Amkpaa yẹkẹẹ, “M̀ kpa ẹnyị nya Ohe Oluhye ya nya ịlẹhị-ịlẹhị ya Ohe Oluhye ā yẹm akama ó-ri ká Adonija a kpa ọhịhị nyamwụ nwụ uri nya ang ọlẹ kọ bịlẹm wẹ ka.

²⁴Amkpaa-a yam hụ ẹ-ẹchị adịrahụ nya iDevidi adam lẹẹ giri-giri lẹẹ bala o-hu ugbiyegu nyam nya angị ka ri adịrahụ jaabwọ kọ myị ọnụ lẹ. M nwa iro ya Adonija ka gbu kẹhị-kẹhị alẹ pyii lẹ!”

²⁵Ọọwa, iSolomọn Adịrahụ a ya ọngịrị ha iBenaya lẹ, ọ kele kaka nwụ Adonija lẹlẹ.

²⁶Ụka ọọwa, adịrahụ iSolomọn a byi Abiyata ọngọkiliya yẹkẹẹ, “Rụ tịrẹkpẹ ka ẹpwa nyang e-epweji nya Anatotu mẹ. Ịnọ, a họ ẹla pwoku kị ka nwụng, ḿ tị ka ya ịị nwụng lẹẹlẹẹ kaka, chajị ahụ a kaa kpẹhị rịrị Akpa nya Iro nya Amkpaa lụka nya iDevidi adam lẹ, a tị yẹ akama tọọ ịnyịnyị.”

²⁷Ọọwa, iSolomọn a ku Abiyata rụ hi ụkụrwọ nya iya ọkịlaakịla ha Amkpaa lẹlẹ. Elẹwẹ họ chajị ká ẹla ọlẹ ká Amkpaa ya rụ ugbiyegu nya Elayị i-iChilo ka họ jịra.

²⁸IJowabụ wo oja nya igu nya Adonija. IJowabụ ayịdang lẹẹ ji oye nya Adonija, ọ́ ji oye nya Abụsalọm ka. Ọọwa, iJowabụ a rụnyẹ rụ ka ẹpwụ nya Ọdụ nya Amkpaa lẹ, ọ yụbwọ chị ịpyịyẹ-pyịyẹ ịlịkpanggọ nya ogidi lẹlẹ.

²⁹Ụka ká angịhyẹ kele ka ya je adịrahụ iSolomọn ya iJowabụ nyị rụnyẹ ju ka ẹpwụ nya Ọdụ nya Amkpaa kaka godayị ba ogidi ba lẹ, ọ du iBenaya ẹrụ kele kaka nwọọ lẹlẹ.

³⁰IBenaya kele ka ẹpwụ nya Ọdụ nya Amkpaa lẹ, ọ byi iJowabụ yẹkẹẹ, adịrahụ ya ahụ nyị kpehe bwu ẹgẹwẹ. Ma, iJowabụ tị wẹ byọọ yẹkẹẹ, “Ehe, ẹgẹlẹ m ka gbu lẹ.” IBenaya tịrẹkpẹ kaka tịrọnụ ya je adịrahụ jaabwọ ká iJowabụ ya.

³¹Ọọwa, adịrahụ a wẹ byọọ yẹkẹẹ, “Kele ká họ jaabwọ kọ ya mẹ. Nwọọ, ká jwọọ eji mẹ. Aalẹ, am lee anyị ịtụma nya iDevidi-í ka la abyị u-uhye nya angịlẹ ká iJowabụ nwụ tu ododu kaka.

³²Amkpaa ka yẹ iJowabụ akama kwiwa nya angịlẹ kọ nwụ la iDevidi adam ọ-jẹ ẹla ọọwa ene ka. IJowabụ nwụ alẹng angị imiiye ịlẹ kị dọmwụ há gwọọ ọwa ayịdang wẹẹ. Angịịwa ri Abụnẹẹ olegbeju nya angịdẹwụ nya ala Isirẹlụ bala Amasa olegbeju nya angịdẹwụ nya ala iJuda.

³³Akama ọyẹyẹ chajị nya angịlẹ ká iJowabụ nwụ-ụ̀ wẹ ka ji uhye nya ịlọmwụ bala anyị ịtụma nyamwụ pyịyọọ. Amkpaa tị ka ya okpunyi bala ịlahị ọkaka ha anyị ịtụma nya iDevidi bala ọpyị ọkpakpa nyaa pyịyọọ.”

³⁴Ọọwa, iBenaya a kele ka nmoo la iJowabụ ju ka eji lẹ, ọ nwọọ lẹlẹ. Ị jwoo eji ẹ-ẹpwa nya ịlọmwụ u-ugbileji.

³⁵ISolomọn Adịrahụ hu iBenaya ri olegbeju nya angịdẹwụ ku ọmwakpa nya iJowabụ lẹ, ọ ya ịSadọkọ ku ọmwakpa nya Abiyata lala ọngọkiliya lẹlẹ.

³⁶Ụka ọọwa, adịrahụ a du ẹrụ tọ iChimeyi lẹ, ọ byọọ yẹkẹẹ, “Nwụ ẹpwa ha ịlọng i-iJerusalẹm, ká kụ ụwa mẹ. A rụ bwu ka ẹga ọkịla kaka.

³⁷Ẹnụ ká hu ẹta chụtẹ kpoye nya Ọkpọọ nya iKidirọn lẹ, aa jẹ mẹ igu nyang ri ẹnẹwẹ lẹ. Ịlọng a tị ka kpụ abyị lẹ.”

³⁸Ọọwa, iChimeyi à wẹ adịrahụ yẹkẹẹ, “Ẹlẹwẹ ká ya wẹẹ hiigu, m̀ ka họ jaabwọ ka ya.” Ọọwa, iChimeyi à kụ iJerusalẹm tata lẹlẹ.

³⁹Ụka kọ nọ gbee pwụ ẹka ịta lẹ, anyịhị angị imiiye nya iChimeyi à rụnyẹ rụ kele ka ẹga nya Akichi adịrahụ nya ala ịGaatị ọlẹ kọ ri ọnyị nya iMaaka lẹlẹ. Ụka kị ya je iChimeyi ya anyịhị nyamwụ nyị juwa ị-ịGaatị,

⁴⁰ọ gba kụ obyiyó nyamwụ lẹ, ọ hu ang ka ẹga nya Adịrahụ Akichi ị-ịGaatị kaka teleko nya anyịhị nyamwụ lẹlẹ. Ụka kọ yaa, ọ kpaa nyà bwu ụwa.

⁴¹ISolomọn Adịrahụ wo iChimeyi nyị bwu iJerusalẹm kele ka ịGaatị kpụ nyị nyà bwu ụwa lẹ.

⁴²Ọọwa, ọ du ka wụrụ iChimeyi lẹ, ọ byọọ yẹkẹẹ, “Aam à kpang ka nwa iro lẹnyị nya Amkpaa lẹẹ nyori á ka kpehe hi iJerusalẹm ka lẹ ka-á? M̀ tị́ dang ọna bying ya ma jẹ myịmyị mẹ, ẹnụ myị ẹnụ ká kpehe hi iJerusalẹm ka ẹgẹhẹ lẹ aalẹ, ā ka gbu lẹlẹ. Ahụ ayịdang tị́ ya nyị hiigu, ọwa nyị ka ju ihi nya ẹlẹwẹ.

⁴³Lẹ, anyị tị du-họ ọnụ ọlẹ ká myị ha Amkpaa jịra bala ọ-ba ehile ọlẹ kam dang jẹ kaka mẹ?

⁴⁴Ahụ ayịdang à tị́ jẹ ang onyobyi ọlẹ wuu ká họ iDevidi adam. Amkpaa ka yẹng akama chajị nya ang ịịwa wuu.

⁴⁵Ọ tị ka wahị kụrụm bala ọ-ka họ ká ẹchị adịrahụ nya iDevidi ka yi eji giri-giri gbe oyi myị oyi.”

⁴⁶Ọọwa, iSolomọn Adịrahụ a da iBenaya ehile ya nyị nwụ iChimeyi mẹ lẹ, ọ kpehe kele kaka nwọọ lẹlẹ. Ụka ọọwa, ọngịrị nya ọpyị ọkpakpa wuu ji ẹpwụtụbwọ nya iSolomọn.