Read idege 1 Ịdịrịhụ 20 Bible Online

1 Ịdịrịhụ 20 - idege bible

1 Ịdịrịhụ 20

¹Ụka ọhẹ juwa ká ịBẹnhadadị Adịrahụ nya ala iSiriya tụ angịdẹwụ nyamwụ wuu guru. Ịdịrịhụ iwo ịta kụrụ imiiye wẹ la anyịrẹ bala ang ịrụnyẹ nyaa wuu kaka yẹ julaa. Ọọwa, ị kele kaka yẹ epweji nya ịSameriya dada lẹ, juwa mwẹla ta alụwa lẹlẹ.

²Ọ du angịnyị ẹrụ kele ka ẹga nya Ehabụ Adịrahụ nya Isirẹlụ kaka byoo yẹkẹẹ,

³“À ka tụụbwọ hi okpoko onyoowuru bala okpoko ịgọm bala ịhụ bala ịkolobya ịkpịra-kpịra nyang wuu ham.”

⁴Ehabụ wẹ alẹrụ ịịwa yẹkẹẹ, “Anụ byi ịBẹnhadadị Adịrahụ mẹ, ọwa-à ri ayịbam lẹ. Ḿ pwa koo, ang myị ang ịlẹ kam la wuu ri ịnyamwụ!”

⁵Ụka kọ nọ chẹẹ, alẹrụ nya ịBẹnhadadị tịrẹkpẹ kpa ẹrụ nyamwụ ọkịla kaka ya jẹ Ehabụ yẹkẹẹ, “M̀ tị́ bying lẹẹ nyori à ka tụụbwọ hi okpoko onyoowuru bala okpoko ịgọm bala ịhụ bala anyị nyang wuu ham lẹẹ lẹ.

⁶Ma, ijuju amachanyị ịịlẹ, m̀ ka dụ alụkụrwọ nyam ẹrụ kaka yẹ ẹpwa nyang bala ịnya alụkụrwọ nyang kpete-kpete. Ị ka go ang myị ang ịlẹ wuu kị ri ang ịlahịchịng ị-kọng ẹhị kpa rụ!”

⁷Ọọwa, Ehabụ Adịrahụ à wụrụ alegbeju ịlọpyị nyamwụ wuu kaka jịra lẹ, ọ byaa yẹkẹẹ, “Anụ tị́ yẹ-ẹ̀ wẹ lẹ. Ẹla ọtụka ịBẹnhadadị à wẹẹ kpa tịtọ nyahị lẹ. Ụka kọ du ẹrụ nya ọgbanyẹ warị, m̀ lẹẹ myị họ nyori m̀ ka pẹhi ịhụ bala anyị nyam tụ okpoko onyoowuru bala okpoko ịgọm wuu họọ.”

⁸Ọọwa, alegbeju bala alụma wuu à byoo yẹkẹẹ, “Ā dọnụ wẹ ẹlẹlẹhẹ nyamwụ kaka. Ā myị ọnụ nya ịngịngịhyẹ họọ koo.”

⁹Ọọwa, Ehabụ à wẹ alẹrụ nya ịBẹnhadadị yẹkẹẹ, “Anụ kele kanụ byi adịrahụ ayịbam mẹ, ang ịlẹ wuu kọ tịtọ nya ọgbanyẹ lẹẹ, m̀ myị ju ịịwa lẹ. Ẹla oheeye ọlẹ kọ tị ya wẹ lẹ, ḿ ka jẹ-ẹ̀ myị ọọwa jwoo koko.” Ụka ká alẹrụ kpa ẹlẹwẹ kaka ya je ịBẹnhadadị,

¹⁰ọ du ẹrụ ọkịla tọ Ehabụ yẹkẹẹ, “M̀ wẹẹ kpa angịdẹwụ warị kaka ta ịSameriya ayịreji gbanggbang lẹ. Ị ka tọọ ayịreji bwụjẹ-bwụjẹ kpá angịdẹwụ nyam-ḿ dọmwụ ka ye ụpịlẹ nya ujeyi ọhẹ-lọhẹ kpa rụ ka bwu ụwa ka. Ó-ri kam họ jaabwọ kam ya wẹ ka aalẹ, ijiga-ā tụm ẹhị pịrị!”

¹¹Ehabụ Adịrahụ wẹ alẹrụ ịwẹ tịrẹkpẹ yẹkẹẹ, “Anụ kele kanụ byi ịBẹnhadadị mẹ, ọngọdẹwu ọlahịchịng-ńgǹg chị ọgọm ene ká ẹwụ ka dọmwụ ka.”

¹²Ẹla ọwẹwẹ nya Ehabụ ọwẹ wu ịBẹnhadadị ọyị ụka kọọwa bala ịdịrịhụ ịkịla alakpa nyamwụ juwa nwa ẹrẹ ẹ-ẹpwang nya ọdụ nyaa. Ọọwa, ọ byi angịdẹwụ nyamwụ nyị nwụlanọ kịị nyị ka gba mịla epweji nya ịSameriya mẹ lẹ, ị nwụlanọ hu an kele kaka kụ ẹgẹgẹẹga lẹlẹ.

¹³Ụka ọwẹ, ọlọmwụ ọhẹ kele kaka byi Ehabụ Adịrahụ yẹkẹẹ, “Amkpaa yẹkẹẹ, ‘Ā ju uhi nya iru nya alẹwụ ịwẹ ka! M̀ ka ya ọkụrụ-kụrụ hang u-uhye nyaa. Ụka ọọwa, à ka jẹ ká am à ri Amkpaa ịnyịlẹhị.’ ”

¹⁴Ehabụ tọ ọlọmwụ wo yẹkẹẹ, “Oowo anyị à tị́ ka kpa ịlahị?” Ọlọmwụ wọọ yẹkẹẹ, “Amkpaa ya ikolobya angịdẹwụ ịlẹ kị ji ekpeleji nya alegbeju nya angịdẹwụ i-bwu oye datị-datị nyaa-à ka kụ ịlahị lẹ.” Adịrahụ myịmyị tọọ wo yẹkẹẹ, “Oowo tị́ ka ri olegbeju kpaa ji ịlahị?” Ọlọmwụ byọọ yẹkẹẹ, “Ahụ ịnyị.”

¹⁵Ọọwa, adịrahụ a wụrụ ịkọlọbya ịdẹwu ilekpeleji nya alegbeju nya angịdẹwụ i-bwu oye datị-datị kaka jịra wuu lẹlẹ. Ịwa wuu la angị ohu imiiye da angị iwo ịta kụrụ imiiye (232). Ọ wụrụ angịdẹwụ angị ụnọ irwiye (7,000) ihihi nya ala Isirẹlụ kaka jịra ịnyịnyị.

¹⁶Angịdẹwụ nya ala Isirẹlụ hu ang kele lụka nya ẹnụ ọ-rịrị ẹ-ẹtẹ, ká ịBẹnhadadị bala ịdịrịhụ alakpa nyamwụ angị iwo ịta kụrụ imiiye juwa nwa ere jụ ịnyịrọ.

¹⁷Ikolobya ịdẹwu ịkpịra-kpịra à kele jene lẹ. Ụka kị juwa yahị daa kele, angịdẹwụ alụmwọnụ ịhyẹ ịlẹ ká ịBẹnhadadị du kpehe à nyà kaka byoo yẹkẹẹ, “Ahị yẹ ká angịdẹwụ ịhyẹ lalẹẹ jẹ kpehe bwu ịSameriya yahị da warị.”

¹⁸Ọọwa, ịBẹnhadadị à byaa yẹkẹẹ, “Anu kele kanu waa lahị-lahị, ó-ri ẹwụ ri lee okpunyi kị kpakpa warị.”

¹⁹Ikolobya ịdẹwụ nya ala Isirẹlụ à kpa angịdẹwụ nya ịkịla kụ ịlahị nya ẹwụ lẹ.

²⁰Ọngọngọọng nya ala Isirẹlụ kpụ ọngọdẹwụ nya ala iSiriya ọnyọnyọọnyị ọlẹ kọ jahị dọọ nọnọ. Ọọwa, ala iSiriya-à rụnyẹ rụ lẹ, ala Isirẹlụ à juwa kwaa lẹlẹ. ỊBẹnhadadị Adịrahụ tị be rụnyẹ rụ ụ-ụnyịrẹ bala angị ịmanyị-ịmanyị ịkịla.

²¹Ụka ká ẹwụ wẹẹ yere, Ehabụ Adịrahụ anyị à gba da ka ẹpwụmẹ ịnyịịnyị lẹ, ị ta anyịrẹ bala ang ịrụnyẹ ayịreji bala ọ-nwụ ala iSiriya aboji-aboji lẹlẹ.

²²Ọọwa, ọlọmwụ ọọwa-à wka ẹga nya Ehabụ Adịrahụ kaka byoo yẹkẹẹ, “Aa nwụ ịlọng kpa ká ya agba weji giri-giri mẹ. Adịrahụ nya ala iSiriya juwa ka wẹ kaka danụ ẹwụ myịmyị lụka nya ụrwẹnụ nya ihọngkịla wẹẹ-ẹ̄.”

²³Alegbeju nya angịdẹwụ nya iBẹnhadadị byoo ụka ọọwa yẹkẹẹ, “Ijiga nya ala Isirẹlụ ri ijiga iluhye nya ịgbọdọ. Ịnyị à dụ ká ala Isirẹlụ kụrụụhị lẹẹ lẹ. Áhị dẹwụ taa ụteeji, áhị ka dayi la ọ-kụrwaa kụrụ kaka.

²⁴Ugbẹnyị lẹ, aa gba ịdịrịhụ iwo ịta kụrụ imiiye ịwẹ ká ya alegbeju nya angịdẹwụ ịkịla kụ ịlahị ku ọmwakpa nyaa mẹ

²⁵Aa go angịdẹwụ ịkịla la ịlẹ kị ta ayịreji lẹẹ mẹ. Ya anyịrẹ bala ang ịrụnyẹ ju iru lala ilene ịnyịnyị. Ọọwa, āhị ka dẹwụ ta ala Isirẹlụ uụteeji lẹlẹ. Ugbẹnyị lẹ, ahị ka kụrwaa chẹẹchẹẹ lẹ.” ỊBẹnhadadị myị jwaa lẹ, ọ họ jaabwọ kị jwoo irya lẹlẹ.

²⁶Ụka nya ụrwẹnụ ọọnamwụ à pwụ eji lẹ, ọ wụrụ angịdẹwụ nyamwụ da lawụlẹ lẹ, ọ kpaa chẹwụ yahị da kele nyọka mwẹla ta ala Isirẹlụ e-epweji nya Afẹkị lẹlẹ.

²⁷Ala Isirẹlụ tịtị tụ ịlaa michi, ju ịlaa agidi lẹ, ị kele kaka chịkụ ebwo imiiye jahị da ala iSiriya lẹlẹ. Ala Isirẹlụ lala ógù nya ịkpịlọ imiiye a-ahị nya iru nya ala iSiriya ịlẹ kị pyẹ yịrị ẹga myị ẹga yịrị wuu.

²⁸Ọọwa, ọlọmwụ ọọwa-à kele kaka byi Ehabụ Adịrahụ yẹkẹẹ, “Amkpaa yẹkẹẹ, ‘Ajị nyọlẹ ká ala iSiriya ya am Amkpaa nyị ri ojiga oluhye nya ịgbọdọ, am nyị-ị̀ lọngịrị ụteeji ka lẹ, m̀ ka họ ká ka kụrụ irya nya angịdẹwụ nyaa ịwẹ. Ọọwa, ahụ bala angịnyị nyang à ka jẹ ká am à ri Amkpaa lẹlẹ.’ ”

²⁹Ẹ-ẹpwụ nya ẹnụtụrụ irwiye gbẹgbịlẹ, ala iSiriya bala ala Isirẹlụ nwụ angịdẹwụ nya ala iSiriya angị ụnọ ohu (100,000).

³⁰Angị ihihi nyaa rụnyẹ rụ ka epweji nya Afẹkị lẹ, ugulo nya epweji à kpụ̀ nwụ angị ụnọ iwo imiiye da ụnọ irwiye (27,000) nyaa lẹlẹ. ỊBẹnhadadị lẹ, ọwa rụnyẹ rụ kaka kpịbaa ikwee nya ẹpwa ọhẹ.

³¹Alegbeju nya angịdẹwụ nyamwụ à kele kaka byoo yẹkẹẹ, “Ị ya adịrahụ nya ala Isirẹlụ nyị ri ọlahyẹẹrwẹrwa. Lẹẹlẹ, āhị go ịpwụ nya owuru duru liri daba rị ịlọhị e-egbeju kele ka ẹga nyamwụ kaka bịlọọ mẹ. Ọ chịkpẹẹ Ehabụ ka pẹhing aa hị myị.”

³²Ịnyị, ị go ịpwụ nya owuru duru bala ọ-ya iri daba rị ịlaa e-egbeju kele ka ẹga nya Ehabụ lẹ, ị byoo yẹkẹẹ, “ỊBẹnhadadị ọnchẹ nyang duuhi warị nyọka bịlẹng ya ahụ nyị chuchuu kahịị nyị chị ọhịhị nyọwa da mẹ.” Ọọwa, adịrahụ nya Isirẹlụ, à wẹ yẹkẹẹ, “Ọ juwa lahị wẹẹ-ẹ́? Ọọnam ọ tị́ ri.”

³³Alegbeju nya angịdẹwụ nya ịBẹnhadadị ịịwa lẹẹ kụ hwooo nyọka wo ẹla ọnyịịla bwu ẹga nya Ehabụ. Ọọwa, ị mịrọọ ahyaahị byoo yẹkẹẹ, “Ee, ịBẹnhadadị ọọnang ịnyịlẹhị ịnyị!” Ọọwa, Ehabụ à byaa yẹkẹẹ, “Anụ kele kaka kpọọ wam.” Ụka ka ịBẹnhadadị pwụ eji le, Ehabụ a byoo nyị kpụ uhye nya ang ọrụnyẹ wẹ ẹga nyamwụ mẹ lẹlẹ.

³⁴ỊBẹnhadadị byi Ehabụ yẹkẹẹ, “Epweji ịlẹ wuu ka adam nu bwu ẹga nya adang wẹẹ, m̀ ka tịraa ẹkpẹ hang. À ka nwụ ẹga ị-kpa ihi ra ị-ịDamasịkọsị jaabwọ ká adam họ lẹẹ ị-ịSameriya myị.” Ehabụ wọọ yẹkẹẹ, “Ó-ri ịwẹ tụbwọ aalẹ, m̀ ka tụụbwọ hing rụ lokpunyi.” Ọọwa, ị nwa iro ha awụlẹ lẹ, ọ tụ hi ịBẹnhadadị rụ lẹlẹ.

³⁵Ụka ọọwẹ, Amkpaa byi ọngọhẹ lẹpwụ nya alọmwụ aanamwụ ya nyị byi ọlọmwụ ọọnamwụ ọkịla kịị nyị mịlọọ ang, ọngọọwa tị pwa, ọ́ myị mịla ọlọmwụ ọọwa ang ka.

³⁶Ọọwa ọlọmwụ nya ọgbanyẹ ọọwa-a byi ọlọmwụ ọkịla ọwẹ yẹkẹẹ, “Ajị nyọlẹ ká myị ju ihi nya ẹla ọlẹ ká Amkpaa ya ka-à wẹ lẹ, ụka ka yegiri bwu ẹga nyam bwaaa, ugẹbẹ ka nwụng.” Ụka kọ yegiri bwu ẹgẹwẹ lẹ, ugẹbẹ ọhẹ à wẹ kaka mịlọọ nmoo, nwọọ kpịlagada ịnyịlẹhị lẹlẹ.

³⁷Ọlọmwụ ọwẹ-ọwẹ kele ka ẹga nya ọngọkịla kaka byoo yẹkẹẹ, “Mịlam ang mẹ!” Ọọwa, ọ ya ang mịlọọ nmoo lẹ ang à họọ lẹlẹ.

³⁸Ọọwa, ọlọmwụ ọwẹ à kele kaka godayị ọ-ọnụ nya ụgbẹyị gbe ụka ká adịrahụ nya Isirẹlụ ka chịpwụrụ kam lẹlẹ. Ọ ya abacha chị ịlọmwụ a-ahị ká adịrahụ-ụ́ ka jọọ ogu ka.

³⁹Ụka ká Ehabụ ju chịpwụrụ kam lẹ, ọlọmwụ ọwẹ à be ẹkọ byoo yẹkẹẹ, “Agaba Idu ee, ụka kam wẹ ọ-ọgbẹwụ lẹ, ọngọdẹwụ ọkịla ọhẹ à wu oluji kpaa kaka him ụbwọ lẹ, ọ byim yẹkẹẹ, ‘Aa gbe ọngọlẹ yẹẹyẹẹ mẹ. Ó-ri kọ gụng be aalẹ, à gbu kwiwa nya ọọwa lee ọ-nwụ̀ ijwo lokpoko onyoowuru ụnọ ịta (3,000).’

⁴⁰Ụka kam tị juwa kpa ịngịhyẹ ọkịla họ lẹ, ọngọọwa-à gụm be lẹlẹ.” Adịrahụ à wọọ yẹkẹẹ, “Ẹhẹẹ, ahụ à la abyị lẹ, ahụ à tị ya eje wu ịlọng ịnyịnyị lẹ. À ka yẹ akama ọọwa ịnyịlẹhị.”

⁴¹Ọọwa, ọlọmwụ ọwẹ à nwụla abacha ọwẹ hi ịlọmwụ a-ahị lẹ, adịrahụ à jẹ nyori ọlọmwụ ọhẹ nyaa wẹ lẹ lẹlẹ.

⁴²Ọlọmwụ ọwẹ à byi adịrahụ yẹkẹẹ, “Ịịlẹ Amkpaa-à ya lẹ, ‘Ajị nyọlẹ ká pẹhi ọngọlẹ kam ya ma nwụ kọ be rụ lẹ, ahụ à ka gbu kwiwa nyamwụ lẹlẹ. Angịnyị nyang tị̀tị̀ ka gbu kwiwa nya angịnyị nyamwụ ịlẹ kị be rụ.’ ”

⁴³Ọọwa, adịrahụ nya ala Isirẹlụ a rụ ka ẹpwa nyamwụ ị-ịSameriaya lagbama bala ajila pwuuu lẹlẹ.