Read idege 1 Ịdịrịhụ 21 Bible Online

1 Ịdịrịhụ 21 - idege bible

1 Ịdịrịhụ 21

¹Ụka ọọwa, iNebotu la ẹrụ nya alakọnụ ọhẹ ba ẹpwa nya Ehabụ Adịrahụ ba i-iJesiryẹlụ.

²Ẹnẹhẹ lẹ, ọ byi iNebotu yẹkẹẹ, “Ya ẹrụ nya alakọnụ nyang ọwẹ ham mẹ-ẹ̀. Ọ ju ẹpwa nyam chwẹẹ lẹ, m̀ tịtọ kam kpa wu apwụ. M̀ ka ya ọpyị ọlẹ kọ há gụ ọwẹ hang. Ọ́ tị ri okpoko kọ hang gụ, m̀ ka nwụng uri nyamwụ jaabwọ kọ chịla.”

³INebotu tị wẹ byoo yẹkẹẹ, “Ịgọgọ ẹnẹnẹhẹ! Ọpyị ọwẹ ri ang-ugu ká adam igogo anyị la hi tọ awụlẹ gbee kọ wẹẹ hi pwụm. Ḿ ka jẹ-ẹ̀ tụụbwọ hyoo hang myị koo!”

⁴Ụka ọọwa, Ehabụ rụ ka ẹpwa. Agbama jwoo ju, ajila chọọ chị pwuuu ọọ-lajị nya ẹlẹwẹ ká iNebotu ya tọọ. Ọ kele kaka hịnọnọ ị-ịbẹẹdị nyamwụ yahị da ka ugulọ. Ọ́ myị kpa ang oriri ka ọnụ ka.

⁵Ụka ọọwa, iJesebẹlụ ahụ nyamwụ kele kaka tọọ wo yẹkẹẹ, “Ịyẹ tị́ du ká ọkịlẹtụ juwa kpụng enyi, ká myị ri ang ka ịnyị-ị̄ị̀?”

⁶Ọ wẹ byi ahụ nyamwụ yẹkẹẹ, “Ajị nya ẹla ọlẹ ká iNebotu byim ịnyị. M̀ byoo ma ọ-ya ẹrụ nya alakọnụ nyamwụ ham-m̄ ra lee o-ba kam ya ẹrụ ọkịla kwoo iwa mẹ, ọ tị pwa nyị ka jẹ-ẹ̀ lịnyị ka.”

⁷Ọọwa, ahụ nyamwụ à byoo yẹkẹẹ, “Họọọhọ, ịnọ ọwẹ ịnyị-ị́? Ahụ à tị́ ri adịrahụ nya ala Isirẹlụ. Wuleji kam ká ri ang. Ọwẹ ā ring ẹla ka. M̀ ka ye ẹrụ nya iNebotu ọwẹ hang ā ka yẹ lẹ!”

⁸Ọọwa, iJesebẹlụ à da ileta ịhyẹ lẹnyị nya Ehabụ, ya ịna nya ang ọlẹ ká Ehabụ kaa kpa yụbwọ ju ụpwụ ẹ-ẹpwụ ba ileta ịịwa lẹ, ọ ya du kịla alegbeju bala ịbagọ ịla iJesiryẹlụ lẹlẹ.

⁹Ọ da ileta ịịwa yẹkẹẹ, “Anụ hu ẹnụtụrụ ọhẹ nọ nyọka hụ limyi bala ọ-ka raabwọ mẹ. Anụ-ụ̀ ya iwe-ahụrụ olihi-ihi ha iNebotu ọ-ọhụhụ ọọwa.

¹⁰Anụ diro alachị nya angịnyị ịhyẹ warị kị ka chị ẹla ba iNebotu ya nyị do Ohe Oluhye bala adịrahụ mẹ. Ụka kị họ ịnyị lẹ, anụ gbiloo kpehe hi epweji kele ka ugumẹ, kanụ da ajwọ nwọọ ụ-ụwa mẹ.”

¹¹Ọọwa, alegbeju bala ịbagọ ịla iJeiryẹlụ à họ jaabwọ ká iJesebẹlụ ya lẹlẹ.

¹²Ị wụrụ ọhụhụ nya ọ-hụ limyi lẹ, ị ya iNebotu hụ ị-ịlahị ẹ-ẹga olihi-ihi lẹlẹ.

¹³Ọọwa, alachị angị imiiye ịlẹ kị diro à wẹ kaka hụhụ jahị da iNebotu lẹ, ị me ọnọọkịla bọọ a-ahị nya aluche wuu ya iNebotu nyị do Ohe Oluhye bala adịrahụ lẹlẹ. Ịnyị ị gbiloo kpịla-kpịla kpehe kele ka ugumẹ lẹ, ị da ajwọ nwọọ ụ-ụwa lẹlẹ.

¹⁴Ọọwa, alegbeju à du ẹrụ kaka ya je iJesebẹlụ yẹkẹẹ, “Ị da ajwọ nwụ iNebotu lẹ-ẹ̄.”

¹⁵Ahyaahị ká iJesebẹlụ wo ẹlẹwẹ lẹ, ọ byi Ehabụ ọrụmwụ yẹkẹẹ, “Ẹhẹẹ, à tị́ jẹ ẹrụ ọlẹ ká iNebotu pwa ọ-ka ya hang-ǹg ha lẹẹ. Kele ká ya la ugbẹnyị mẹ. INebotu gbu lẹ.”

¹⁶Ọọwa, Ehabụ à wuleji kele i-ijata-ijata kele kọ ka ya ẹrụ nya iNebotu la lẹlẹ.

¹⁷Ọọwa, Amkpaa-à byi Ịlayịja ọlọmwụ o-bwu iTichibe yẹkẹẹ,

¹⁸“Hu ang kele ka tọ Ehabụ Adịrahụ ọla ịSameriya. Ọ juwa ẹ-ẹrụ nya alakọnụ nya iNebotu lẹẹlẹẹ nyọka ya la.

¹⁹Aa byoo am Amkpaa nyị jam ya ẹla tọọ yẹkẹẹ, ‘Ọlẹ ka nwụ iNebotu lẹ, ọọwa-á nwang lẹka, à juwa hu ọpyị nyamwụ la ba ọọwa u-uhye-é? Ẹga ọlẹ kangga ká ibwu pịlọ ịwọ nya iNebotu nẹ wẹẹ, ụwa-ụwa ibwu à tịtị ka pịlẹ ịwọ nyang nẹ lẹ!’ ”

²⁰“Étēmēee! Oluji nyam, ọọwa ri à wum itinabwọ lẹ-ẹ́!” Ịlayịja wẹ byoo yẹkẹẹ, “Ịnọọ, m̀ wung nụwẹ lẹ! Ọọwa ri ang-ang ịlẹ kị tịpyọ a-ahị nya Amkpaa ā ju ịlọng agidi nyọka họhọ lẹka lé?

²¹Amkpaa ya ọwa nyị juwa ka kpa akama ọtụka wẹ uhye nyang lẹ! Ọ ya ọwa nyị́ ka ya ẹga da kpụ ọnyị ọtụma ọlẹng nyang ọhẹ-lọhẹ ọlẹ kọ ri ọnyị ọlọpyị lee ọnyọhị nyị ka hị am̀ Isirẹlụ kaka!

²²Ọ ka ta ugbiyegu nyang ayịreji lala ịnya iJerobowam ọnyị nya iNebatị bala ịnya ịBaacha ọnyị nya Ahija. Ang odudu ri à du agbama jwoo lụmẹ kaka kpoye bala ọ-kpa ala Isirẹlụ ju ka ẹpwụ nya ọhọbịrị ọhọhọ.

²³IJesebẹlụ ahụ nyang tị lẹ, Amkpaa ya ibwu nyị ka be ogu nyamwụ ri ẹ-ẹga nya ugulọ nya epweji nya iJesiryẹlụ.

²⁴Ọngọngọhẹ nya aanang kọ gbu e-epweji aalẹ, ibwu ka ryọọ. Ọngọngọhẹ nyaa kọ gbu ẹ-ẹpwụmẹ aalẹ, epwu ka ryoo.”

²⁵Ọngọkịla ọhẹ-lọhẹ-ẹ́ ji kọ hu ịlọmwụ lẹpwụ-lẹpwụ juwa kpa họ ang onyobyi ịịwẹ ị-ịlahị nya Amkpaa lala Ehabụ, ká iJesebẹlụ ahụ nyamwụ doo ju lẹka.

²⁶Ọ họ ang ịlẹ kị ri ibyi bwula ọ kpụ eteji ha ekpeku lala ala Amọ ịlẹ ká Amkpaa ku ri hi ẹga da ha ala Isirẹlụ.

²⁷Ụka ká Ehabụ wo ẹrụ ọwẹ ká Ịlayịja ya joo kpá, ọ gu ịwụrụ nyamwụ ene hụrwang-ng hi ịlọmwụ lẹ, ọ hu awụrụ nya owuru ọkpakpa kụrụ lẹlẹ. Ọ́ myị ri ang ka. Ọ́ ka nune nọ, ọọ pwọ awụrụ nya owuru ọwẹ hi ịlọmwụ ka. Ịịwẹ ọ kaa tụ gaaa layiiji kpa ịlọmwụ kem-m lẹlẹ.

²⁸Ọọwa, Amkpaa-à myịmyị byi Ịlayịja ọlọmwụ yẹkẹẹ,

²⁹“À tị́ yẹ jaabwọ ká Ehabụ kpa ịlọmwụ keji dụmwọ-ọ̀ wẹ ham ugbẹnyị lẹ. Ajị nya ọọwa lẹ, ḿ ka họ jaabwọ kam ya wẹ lụka nya ọhịhị nyamwụ kaka. Ụka nya ọhịhị nya ọnyị nyamwụ m̄ ka kpa akama ọlẹ kam ya wẹ uhye nya ugbiyegu nyamwụ lẹlẹ.”