Read idege 1 Ịdịrịhụ 22 Bible Online

1 Ịdịrịhụ 22 - idege bible

1 Ịdịrịhụ 22

¹Okpunyi ji ẹpwarịrị nya nya ala Isirẹlụ bala ala iSiriya ẹ-ẹpwụ nya ẹka ịta lẹpwụ-lẹpwụ.

²Ẹ-ẹpwụ nya ẹka ọhata, iJehochafatị Adịrahụ nya ala iJuda kele ka ju Ehabụ Adịrahụ nya ala Isirẹlụ ụga.

³Ụka ọọwa, Ehabụ byi alegbeju ịtụkụ yoo yẹkẹẹ, “Ala iSiriya kpa epweji nya ịRamotu-igiliyadị ụ-ụwa pyịyọọ daalẹ wẹẹ-ẹ̄. Ọ tị́ lanyị kahị hụ́ kpiki nyọka kele kaka ye tịrẹkpẹ ka-à? Ahị à tị́ la!”

⁴Ọọwa, Ehabụ à tọ iJehochafatị wo yẹkẹẹ, “À ka bam kele kaka dẹwụ ịRamotu-igiliyadị-ị́?” IJehochafatị wọọ yẹkẹẹ, “Ịnọọ! Ịnyam tị́ ri ịnyang. Angịdẹwụ nyam tụ anyịrẹ nyaa wuu nwụlanọ nyọka wo bwu ẹga nyang lẹ.”

⁵Ọọwa, iJehochafatị à myịmyị yẹkẹẹ, “Āhị tị tọ Amkpaa wo ene mẹ.”

⁶Ọọwa, Ehabụ Adịrahụ à wụrụ alọmwụ lala angị ohu ine (400) kaka chọnụ kiding-ng lẹ, ọ taa wo yẹkẹẹ, “M̄ kele ka dẹwụ ta ala epweji nya ịRamotu-igiliyadị lee m̄ tị́ kele ka?” Ịwa wuu wọọ yẹkẹẹ, “Kele mẹ, Amkpaa ka ya ọkụrụ-kụrụ hang!”

⁷Ma, iJehochafatị tọọ wo yẹkẹẹ, “Ọlọmwụ nya Amkpaa ọkịla ọhẹ ji āhị ka tọ wo lẹẹ nyọka jẹ myị̀myị̀ wẹẹ-ẹ́?”

⁸Ehabụ wọọ yẹkẹẹ, “Ee, ọngọ ookpokpo ọhẹ ọlẹ kọ hi ri ịMikaya ọnyị nya Imla. Ẹla nyamwụ ọwa-á tị ham ka, chajị ọ́ kaa yẹ ọmwụ ọnyịịla u-uhye nyam kpong-kpong ka. Ẹla ọtịpyọ kẹnẹ-kẹnẹ mẹ ịnyị.” IJehochafatị à byoo yẹkẹẹ, “Ā ya ịnyị koo!”

⁹Ọọwa, adịrahụ nya ala Isirẹlụ à byi ọlụkụrwọ nyamwụ ọhẹ ya nyị kpa iMikaya ọnyị nya Imla warị ahyaahị mẹ lẹlẹ.

¹⁰Ụka ọọwa, ịdịrịhụ imiiye ịwẹ hụhụ lịwụrụ nya ịdịrịhụ nyaa ẹ-ẹchị nya adịrahụ nyaa ẹ-ẹga o-ru ajẹ nya ang-ẹrụ ọ-ọnụ nya ogirigba nya ịSameriya. Alọmwụ nya Ehabụ wuu juwa yẹ ọmwụ ị-ịlahị nyaa.

¹¹Ọlọmwụ ọhẹ ka ẹnyị nyamwụ ri iSedekaya ọnyị nya iKenaana họ achụ nya ịyo iloje-oje. Ọọwa, ọ byi Ehabụ yẹkẹẹ, “Ẹla ọlẹ ká Amkpaa ya à lẹẹ lẹ: ‘Achụ nya iyo ịlẹ ā ka kpa mwẹla ta ala iSirya gbee ká ka taa ayịreji gbanggbang lẹ.’ ”

¹²Alọmwụ ịkịla wuu mịrọọ ịnyịnyị juwa yẹkẹẹ, “Ee, kele ka mwẹla ta epweji nya ịRamotu-igiliyadị mẹ, à ka kụrụ, chajị Amkpaa juwa ka ya ọkụrụ-kụrụ hang.”

¹³Ụka ọọwa, olegbeju ọlẹ kị du ẹrụ nyọka wụrụ iMikaya byoo yẹkẹẹ, “Yẹ mẹẹ, alọmwụ ịkịla wuu yẹ ọmwụ ọnyịịla chajị nya adịrahụ lẹ-ẹ̄. Ọnụ nyang à ya owuna-owuna ịnyịnyị mẹ.”

¹⁴IMikaya tị byoo yẹkẹẹ, “M̀ kpa ẹnyị nya Amkpaa ọlẹ kọ juwa hịhị ya nya ịlẹhị-ịlẹhị ya ẹla myị ẹla ká Amkpaa-á byim m̄ ka ya lẹ.”

¹⁵Ụka kọ pwụ ụwa, Ehabụ Adịrahụ tọọ wo yẹkẹẹ, “IMikaya ee, am bala iJehochafatị Adịrahụ ā bajẹ kele kaka dẹwụ ta ala ịRamotu-igiliyadị lee āhị tị́ kele ka?” IMikaya wẹ byoo yẹkẹẹ, “Anụ kele ịnọ. Amkpaa ka ya ọkụrụ-kụrụ hang.”

¹⁶Ehabụ tị byoo yẹkẹẹ, “IMikaya ee, m̀ tị́ bying ya ụka myị ụka ka juwa ya ẹla jem lẹnyị nya Amkpaa aalẹ, à ya ẹla nya ịlẹhi! Ụka ịmanyị m̄ tị ka bying ịnyi ene-è?”

¹⁷Ọọwa, iMikaya-à byoo yẹkẹẹ, “M̀ yọyị a-arụrụ ká angịdẹwụ nya ala Isirẹlụ nyi epepe tụ uhye nya ikiti da lala ịkpịlọ ịlẹ kị la ọngọgbaa gbe ka. Ọọwa, Amkpaa-à yẹkẹẹ, ‘Angịdẹwẹ ịlẹ-ẹ́ la ayịbaba kaka. Ọngọngọọng nyaa-ā rụ ka ẹpwa lokem nyamwụ mẹ.’ ”

¹⁸Adịrahụ Ehabụ à byi iJehochafatị yẹkẹẹ, “Ḿ bying lẹẹ ya ọngọwẹ-ẹ́ kaa yẹ ọmwụ ọnyịịla chajị nyam ka lẹ ka-á? Ẹla onyobyi ọ kaa ya ụka wuu lẹ.”

¹⁹IMikaya myịmyị kịnyaa la ẹla oyaya tọọ yẹkẹẹ, “Aa wo mẹ, m̀ yẹ Amkpaa kọ hụhụ ẹ-ẹchị nya adịrahụ nyamwụ la alegu-ẹrụ ilepwoohe godayị dagaga jwoo.

²⁰Ọọwa, Amkpaa-à tọ wo yẹkẹẹ, ‘Oowo tị ka du Ehabụ Adịrahụ chụrwa kọ ka kele ka ịRamotu-igiliyadị ká ebe ka bọọ ụ-ụwa kpá-à wẹ-ẹ̀?’ Alegu-ẹrụ ịhyẹ ya abwọhẹ, ịkịla ya abwọkịla.

²¹Ụka ohyẹẹkpẹ lẹ olegu ọhẹ à kele kaka byi Amkpaa yẹkẹẹ, ‘M̀ ka họ ịnyị myị.’ Amkpaa tọọ wo yẹkẹẹ, ‘Ụgbẹyị oyina-ā tị́ ka kpa bwu?’

²²Olegu ọọwa wọọ yẹkẹẹ, ‘M̀ ka họ alọmwụ nya Ehabụ wuu ka me ọnọọkịla joo.’ Ọọwa, Amkpaa-à byoo yẹkẹẹ, ‘Kele kaka doo chụrwa mẹ. À ka jẹ-ẹ̀ họ ịnyị myị ịlẹhị.’ ”

²³Lẹ, à tị́ yẹ-ẹ̀ wẹ lẹ, “Amkpaa-à họ du ká alọmwụ nyang ịwẹ wuu wẹẹ me ọnọọkịla jeng lẹ, chajị ọwa ayịdang cheje nyọka yang kpụ ịtẹbyị lẹ!”

²⁴Ọọwa, iSedekaya ọlọmwụ ọnyị nya iKenaana à kele ká ẹga nya iMikaya, wọọ abwọ a-ahị kpuu lẹ, ọ tọọ wo yẹkẹẹ, “Ẹnịyẹ kpong-kpong olegu nya Amkpaa-à tị́ rụ him kpụ kọ ka kpang ahụ ya ẹla-à?”

²⁵IMikaya wẹ byoo yẹkẹẹ, “À ka jẹ ahyaahị kpá ẹnụ ká ka rụ kaka kpịbaa ikwee ọhẹ.”

²⁶Ọọwa, Ehabụ Adịrahụ à byi ọngọhẹ nya alegbeju ịtụka yoo yẹkẹẹ, “Wu iMikaya kpa kele kịla Amọn ịGọvụnọ ọla ịSameriya bala iJowachị ọnyị nyam.

²⁷Byaa kị yọọ ju agba. Ị̄ ya ịngịngịhyẹ ọkịla họọ ri dala ịkaa bala enyi ka gbee kam ka nyà lokpunyi bwu ọgbẹwụ.”

²⁸Ọọwa, iMikaya-à chabwo-igo ju adịrahụ byoo yẹkẹẹ, “Ó-ri ká nyà lọkpunyi bwu ẹwụ ọwẹ pyíì aalẹ, Amkpaa-á kpam ya ẹlẹwẹ ịnyịlẹhị ka.” IMikaya ya ẹla ta angị ji eji ịnyịnyị yẹkẹẹ, “Anụ wuu ā yẹta ba ẹlẹwẹ kam ya wẹ mẹ!”

²⁹Ọọwa, Ehabụ Adịrahụ nya ala Isirẹlụ bala iJehochafatị Adịrahụ nya ala iJuda a hu ang kele ka dẹwụ ta ala ịRamotu-igiliyadị lẹlẹ.

³⁰Ehabụ byi iJehochafatị yẹkẹẹ, “Ẹwụ ọlẹ kahị lẹẹ ka lẹ, m̀ ka kụrụ ang nya ihwirihwa kị ka jẹm ogu datị ka. Ahụ tị lẹ, aa kụrụ iwụrụ nya adịrahụ oriri nyang mẹ.” Ọọwa, Ehabụ à go ang ịkịla kụrụ lẹ, ị rụ ka ẹwụ lẹlẹ.

³¹Adịrahụ nya ala iSiriya tị lẹẹ da alegbeju nya angị kụ ang ịrụnyẹ ị-kpa dẹwụ angị iwo ịta kụrụ imiiye ọna yẹkẹẹ, “Ānụ mwẹla ta ọngọngọhẹ dala adịrahụ nya ala Isirẹlụ koo.”

³²Ụka kị yẹ iJehochafatị Adịrahụ, ị yahị dọọ myị̀myị̀ị̀myị̀ juwa yẹkẹẹ, “Ẹhẹẹ, adịrahụ nya ala Isirẹlụ lẹẹ lẹ!” Ụka ká iJehochafatị tị yeko kpọnụ,

³³ká alegbeju nya angịdẹwụ ịwẹ jẹ nyori Ehabụ nyaa wẹ kaka lẹ, ị tịrẹkpẹ hyoo lẹlẹ.

³⁴Ụka ọọwa, ọngọdẹwụ nya ala iSiriya ọhẹ da ịcha nyamwụ la ọ-ya me ọngọhẹ datị ka. Ọọwa, ịcha ọọwa-à kele kaka chị Ehabụ kpọ̀ńg-ng apewa nya ẹga ká ọkụmada nyamwụ yọnụ yi awụlẹ lẹlẹ. Ọọwa, ọ chị eko onyoowuru byi ọngọ kụ ang ọrụnyẹ nyamwụ yẹkẹẹ, “Ị họm ang lẹẹ, jahị kpata ka kpam rụ bwu ẹwụ mẹ!”

³⁵Ẹ-ẹpwụ nya ẹnẹwẹ wuu ẹwụ-ụ́ pwuru ka. Ehabụ Adịrahụ lẹ, ọwa kpụnịrọ ang ẹ-ẹpwụ nya ang ọrụnyẹ nyamwụ yahị da ka ẹga nya ala iSiriya. Ịwọ ọlẹga kị họọ ang nyà myị̀ eji nya ang ọrụnyẹ nyamwụ. Alobyi lẹ, ọ gbu lẹlẹ.

³⁶Ụka ká ẹnụ juwa ya ẹtẹ dụrụ ugba lẹ, ị du ẹrụ tụ angịdẹwụ nya ala Isirẹlụ wuu da byaa yẹkẹẹ, “Ọng myị ọng ā rụ ka ẹpwa nya ịlọmwụ me oo! Egbahị go lẹ oo!”

³⁷Ịịwẹ Ehabụ adịrahụ à gbu lẹ, ị kpa ogu nyamwụ rụ ka ịSameriya kaka ju eji lẹlẹ.

³⁸Ị kpa ang ọrụnyẹ nyamwụ kaka hụ́ lịwọ ẹ-ẹmwụ-enyi ọla ịSameriya ẹga ká alakpara kaa hyo enyi. Ọọwa, ibwu a kele kaka pịlẹ ịwọ nyamwụ nẹ jaabwọ ká Amkpaa ya nyị ka la lẹlẹ.

³⁹Ang myị ang ịkịla ịlẹ ká Ehabụ Adịrahụ họ wuu tụ ẹpwa nya adịrahụ ọlẹ kọ nwụ kọ kpa ẹngịrị nya inyi họọ ịnyangga bala epweji ịlẹ kọ nwụ wuu lẹ, ị daa ju ụ-ụpwụ nya Ego nya Ịdịrịhụ nya ala Isirẹlụ.

⁴⁰Ụka ká Ehabụ gbu lẹ, Ahasiya ọnyị nyamwụ à ri adịrahụ kwiwa nyamwụ lẹlẹ.

⁴¹Ụka ká Ehabụ ri adịrahụ nya ala Isirẹlụ ẹka ine, iJehochafatị ọnyị nya Asa-à ri adịrahụ nya iJuda lẹ.

⁴²IJehochafatị lẹẹ gu ẹka iwo ịta kụrụ ịrụ ụka kọ ri adịrahụ. Ọ hụ i-iJerusalẹm ri adịrahụ ẹ-ẹpwụ nya ẹka iwo imiiye kụrụ ịrụ gbẹgbịlẹ. Ẹnyị nya ịnamwụ ri Asuba ọnyị nya iChilihi.

⁴³Ọ ri adịrahụ ọnyịịla lala Asa adamwụ. Ọ họ ang ịlẹ kị hiigu a-ahị nya Amkpaa. Ụka nya adịrahụ oriri nyamwụ, ọ tụrụ ada ẹga ká angịnyị kaa kpụ eteji ju eji ka lẹ, angịnyị kaa juwa kịla iya bala o-ju ịtangare ila ụ-ụwa.

⁴⁴IJehochafatị họ okpunyi bala adịrahụ nya Isirẹlụ lụka ọọwa.

⁴⁵Ang myị ang ịkịla ịlẹ ká iJehochafatị họ wuu tụ ẹwụ ịlẹ kọ da bala jaabwọ ká ọngịrị nyamwụ la kaka ba lẹ, ị da ju ụ-ụpwụ nya Ego nya Ịdịrịhụ nya ala iJuda.

⁴⁶Ọ ku alakpara anyang tụ alẹng ịlẹ kị hi ẹ-ẹkpẹ nyọlẹ ká Asa adamwụ ri adịrahụ kpá kị kaa myị ẹrụ ẹ-ẹga ị-kpụ ijiga rụ.

⁴⁷Ala Ẹdọm-ḿ la adịrahụ lụka ọwẹ ka. Ọngọ bọọ ba ọlẹ ká iJehochafatị chụ a kpẹhị rịrị lẹ.

⁴⁸Ịnọ iJehochafatị Adịrahụ kọ agbọ nya enyi ịtụka ịlẹ kị ka da ọhị nya okpoko ịgọm ka ọpyị nya Ofii kpá, ị́ tị jẹdịyẹ nya ọhị ọọwa ka, chajị ị bịrị e-Esiyọn-ịgẹbẹẹ.

⁴⁹Ụka ọọwa, Ahasiya Adịrahụ nya ala Isirẹlụ myị ọnụ ká angị ju agbọ nya enyi nyamwụ ka bajẹ ta angịnyị nya iJehochafatị, iJehochafatị tị pwa.

⁵⁰Ụka ká iJehochafatị gbu, ị jwoo eji i-iworu nya ịdịrịhụ e-Epweji nya iDevidi. Ọọwa, iJehoram ọnyị nyamwụ a ri adịrahụ kwiwa nyamwụ lẹlẹ.

⁵¹Ẹ-ẹpwụ nya ẹka iwo kụrụ irwiye nya adịrahụ oriri nya iJehochafatị Adịrahụ nya ala iJuda Ahasiya ọnyị nya Ehabụ à ri adịrahụ nya ala Isirẹlụ lẹ. Ọ hụ ị-ịSameriya ri adịrahụ ẹka imiiye.

⁵²Ọ họ ang onyobyi ị-ịlahị nya Amkpaa gbịla Ehabụ adamwụ bala iJesebẹlụ ịnamwụ anyị kị kpa ala Isirẹlụ kaka ju ka ẹpwụ nya ọhọbịrị ọhọhọ.

⁵³Ọ kpụ eteji bala ọ-myị ẹrụ ha ịBaalụ. Ọ du agbama ju Amkpaa Ohe Oluhye nya Isirẹlụ jaabwọ ká adamwụ họ.