Read idege 1 Ịdịrịhụ 3 Bible Online

1 Ịdịrịhụ 3 - idege bible

1 Ịdịrịhụ 3

¹Ụka ọọwa, iSolomọn la ọnụ ọ-myị hawụlẹ bala adịrahụ nya ala Ijipiti lẹ, ọ ye ọnyị nya adịrahụ nya ala iJipiti lẹlẹ. Ọ kpa ahụ nyamwụ ọọwa warị ka kụ e-Epweji nya iDevidi gbee kọọ nwụ ẹpwa nya ịlọmwụ bala Ube nya Amkpaa bala ugulọ ọdagaga ju iJerusalẹm kpá.

²Ụka ọwẹ, angịnyị wuu kaa juwa kịla iya u-uhye nya ada ikiliya datị-datị, chajị ị́ nwụ Ube nya Amkpaa lẹka.

³Amkpaa há iSolomọn lụmẹ. ISolomọn kaa juwa ba ọmẹjẹ nya iDevidi adamwụ jẹ. Ọkẹnẹ-kẹnẹ ri, ọ kaa kịla iya a-ada ikiliya datị-datị ịnyịnyị.

⁴Ụka ọhẹ, iSolomọn kele ka iGibyọn kọ ka kịla iya ụ-ụwa, chajị ada ọlụwa-à la gbẹgbịlẹ gụ ịkịla wuu lẹ. Ọ kịla ụnụnụụnọ nya iya ụ-ụwa ụka ọhẹ lẹ.

⁵Ụ-ụwa i-iGibyọn, Amkpaa-à chị ịlọmwụ ehe ha iSolomọn lodu nya ẹnụ ọọwa ẹ-ẹpwụ nya ụlaa lẹlẹ. Ohe Oluhye a byọọ yẹkẹẹ, “Bịlẹm ang ọlẹ ká tịtọ kam ka họ hang mẹ.”

⁶Ọọwa, iSolomọn a yẹkẹẹ, “À mẹ ọháha ọlala nyang jẹ ọnchẹ nyang iDevidi adam. Ọwa ayịdang bang jẹ kpẹẹkpẹẹ bala ọ-chịla o-hu ọkịlẹtụ ha bala ọ-kaa họ ang ọnyịịla bwu ẹpwụ ọkịlẹtụ nyamwụ wuu. À myịmyị kịnya la ọ-họọ ọnahị bwula ọ-ya ọnyị ọlẹng họọ ọlẹ kọ hụhụ lẹẹ ri adịrahụ ku ọmwakpa nyamwụ alẹ lẹ.

⁷Amkpaa Ohe Oluhye nyam ee, a họ m̄ ri adịrahụ ku ọmwakpa nya iDevidi adam lẹ. Ọ ri nyịlẹhị m̀ ri onjwo ochiche. Ḿ jẹ jaabwọ kam ka bwu kpẹhị rịrị lala adịrahụ ka.

⁸Am ọnchẹ nyang tị lẹẹ ẹ-ẹpwarịrị nya angịnyị ịlẹ ka chụ. Ị ri ụma ọtụka ọlẹ kị ju iru kịla ọwawa kịla.

⁹Lẹẹlẹ, ya ẹla ọjẹjẹ nyang ham, chajị kam ka jẹ ang ọnyịịla datị hi ang onyobyi mẹ. Ó-ri ịnyị ka, m̀ tị ka họ anyị kam ka kpẹhị rịrị iru nya angịnyị nyang ịlẹ myị?”

¹⁰Ọ kpụ Amkpaa ịpyọ lụmẹ chajị nya ang ọlẹ ka iSolomọn bịlẹ.

¹¹Ọọwa, Ohe Oluhye à byọọ yẹkẹẹ, “Ajị nyọlẹ ká bịlẹ ẹla ọjẹjẹ ọ-kpa kpẹhị rịrị, ká bịlẹ ehe oriri lee ụdụ ọkpụkpụ ha ịlọng lee ọ-raabwọ ká aluji nyang ka gbu ka lẹ,

¹²m̀ ka họ jaabwọ ká bịlẹ. M̀ka ya ẹla ọjẹjẹ hang lẹ, chajị ká ẹla ọjẹjẹ nya ọngọngọhẹ-ẹ́ ka wu ịnyang ọyị lẹpwụ nya angị jene nyang lee lẹpwụ nya aloyi ọlịlahị kaka.

¹³M̀ ka hu ang ọlẹ ká dọmwụ bịlẹ kpong-kpong ka hang ịnyịnyị. A ka kpụ ụdụ kpụ, à ka la ihi-i la ịnyịnyị. Adịrahụ ọhẹ-lọhẹ-ẹ́ lụmẹ lala ahụ odehe ọlẹ lụka nya ọhịhị nyang kaka.

¹⁴Ó-ri ká myị ju ihi nyam, ká kpa ehile nyam bala ọmẹjẹ nyam jaabwọ ká iDevidi adang họ aalẹ, m̀ ka ya ọhịhị oludiyo hang.”

¹⁵Ọọwa, iSolomọn a chahị une lẹ, ọ jẹ ká ụlaa ọ la-à wẹ lẹlẹ. Ọ nyà tịrẹkpẹ kele ka iJerusalẹm lẹ, ọ kele ka godayị ị-ịlahị nya Akpa nya Iro nya Amkpaa lẹ, ọ kịla iya ọ-rụ ila bala iya nya ọhọlawụlẹ lụmẹ-lụmẹ ha Amkpaa lẹlẹ. Ụka kọ kịla iya ịwẹ kpá, ọ họ ọhụhụ ha alụkụrwọ nyamwụ wuu lẹlẹ.

¹⁶Ẹnẹhẹ juwa ká anyang alakpara angị imiiye ịhyẹ warị wẹ ẹga nya iSolomọn Adịrahụ ka godayị rịrị ị-ịlahị nyamwụ.

¹⁷Ọnyang ọhẹ ẹ-ẹpwụ nyaa a yẹkẹẹ, “Agaba Idu ee, ọnyang ọlẹ bala am ju u-ube ookpokpo. M̀ ma ọnyị ọlẹng ụka ká ahị juwa ẹ-ẹpwang ọọwa lawụlẹ.

¹⁸Ẹnụtụrụ ọhata nyọlẹ kam ma ọnyị kpá, ọnyang ọlẹ a ma ọnyị ọlẹng ịnyịnyị lẹlẹ. Ahị angị imiiye ịlẹ à tị juwa ẹ-ẹpwang ọwẹ ụbwọọhị kem lẹ. Ọngọngọhẹ ọkịla-á juwa tahị ụ-ụwa ka.

¹⁹Ọọwa, ọnyị nya ọnyang ọlẹ a gbu lodu ọhẹ chajị nyọlẹ kọ nịrọọ u-uhye lẹlẹ.

²⁰Ụka kọ chahị une lẹpwodu jijiiji lẹ, ọ hu ọnyị nyam bwu ịkịka nyam ụka kam juwa kpa une nọ kpa ka nọ ta ịlọmwụ ị-ịbẹẹdị nyamwụ lẹ, ọ hu ogu ọnyị nyamwụ ọwa kpa ka nọ ịkịka nyam am lẹlẹ.

²¹Ụka kam chahị lụtụrụ kam ka ya ẹmẹ ha ọnyị lẹ, m yẹ kọ ri ogu ọnyị lẹlẹ. Ụka kam wụlọọ yẹ yẹẹyẹẹ lẹ, m jẹ ká ọnyị nyam à wẹ kaka lẹlẹ.”

²²Ma, ọnyang ọkịla ọlaanyị họ gbońg yẹkẹẹ, “Eheehe, ọnyị ọhịhị à ri ịnyam lẹ. Ogu ọnyị à ri ịnyang lẹ.” Ma ọnyang nya ọgbanyẹ wẹ tịrẹkpẹ yẹkẹẹ, “À me ọnụ, ọnyị ọhịhị a ri ịnyam lẹ, ogu ọnyị a ri ịnyang lẹ!” Ịịwẹ ịwa angị imiiye à juwa da awụlẹ ịwẹẹ ị-ịlahị nya adịrahụ lẹlẹ.

²³Ọọwa, iSolomọn adịrahụ a yẹkẹẹ, “Ọọwa ri ọng myị ọng nyanụ juwa ya ọnyị ọhịhị nyị ri nya ọwa, ọngọkịla nyaa la ogu ọnyị lẹ lẹ-ẹ́?

²⁴Ọ hiigu, ọngọhẹ ā hu oge kpa wam wẹẹ.” Ọọwa, ị kpa oge wẹ adịrahụ lẹ,

²⁵ọ yẹkẹẹ, “Anụ gu ọnyị ọlahị-lahị ọwẹ ene imiiye, kanụ hu une ọhẹ ha ọngọhẹ kanụ hu une ọkịla ha ọngọkịla mẹ.”

²⁶Ụka ọọwa, ọnyang ọlẹ kọ ri ịnịna nya ọnyị ọlẹ kọ juwa lọhịhị, ká ọnyị nyamwụ tị kọọ ẹhị, a byi adịrahụ yẹkẹẹ, “Agaba Idu, tụụbwọ hi ọnyị ọlahị-lahị ha ọnyang ọwẹ mẹ, ā nwọọ ka.” Ma, ọnyang ọkịla ọwẹ tị yẹkẹẹ, “Ọnyị ọhịhị ọwẹ-ẹ́ ka ri ịnyam ri ka, ọ́ ka ri ịnyang ri ka ịnyịnyị. Ị gwoo ene imiiye mẹ!”

²⁷Ọọwa, adịrahụ à yẹkẹẹ, “Anụ nwụ ọnyị ọwẹ kaka. Anụ hwoo ha ọnyang ọlẹ kọ ri nya ọgbanyẹ mẹ. Ọwa-à ri ịnịna nya ọnyị ọwẹ ị-ịlẹhị lẹ.”

²⁸Ụka ká ala Isirẹlụ wo eje ọwẹ ká adịrahụ iSolomọn chị lẹ, ịwa wuu myị la ihi ojuju ẹ-ẹga nya adịrahụ, chajị ị jẹ ká Ohe Oluhye à ya ẹla ọjẹjẹ họọ nyọka kpa chị eje kpẹẹkpẹẹ jaabwọ kọ chịla.