Read idege 1 Ịdịrịhụ 4 Bible Online

1 Ịdịrịhụ 4 - idege bible

1 Ịdịrịhụ 4

¹ISolomọn Adịrahụ à ri adịrahụ nya ala Isirẹlụ wuu ká ẹga kọ ba lẹ.

²Ẹnyị nya angịlẹ kị ri alegbeju ịgbẹgbịlẹ gụ wuu ịlẹ kọ chụ a lẹẹ lẹ: Ọngọkiliya ri Asariya ọnyị nya ịSadọkọ.

³Angị ri akịraa ri Elihorẹfụ bala Ahija anyị nya iChicha. Ọngọ kpẹhị rịrị apwụ nya ego ri iJehosafatị ọnyị nya Ahiludu.

⁴Olegbeju nya angịdẹwụ ri iBenaya ọnyị nya iJehoyada. Angịkiliya ri ịSadọkọ bala Abiyata.

⁵Olegbeju nya angị ri ịgovụnọ nya ebwo datị-datị ri Asariya ọnyị nya ịNatan. Ọngọ ju adịrahụ irya ri ịSabudu ọngọkiliya ọnyị nya ịNatan.

⁶Olegbeju nya anchẹ ịlọdọda nya adịrahụ ri Ahichaa. Olegbeju ọ-kpa angịnyị họ ụkụrwọ nya igwabwọ ri Adoniram ọnyị nya Abuda.

⁷Ụka ọọwa, iSolomọn chụ ịgọvụnọ iwo kụrụ imiiye ịlẹ kị ri angị kaa kpẹhị rịrị ala Isirẹlụ wuu. Angị iwo kụrụ imiiye ịịwa a ri angịlẹ kị kaa ye ang oriri bwu imwawụ nyaa datị-datị kpa kịla adịrahụ bala alọdọdẹpwa nyamwụ wuu lẹ. Ọng myị ọng nyaa kaa kpa ang oriri ọlẹ kọ ka nwa lọya ookpokpo ụka ookpokpo ẹpwụ nya ẹka.

⁸Ẹnyị nya angịịwa bala oye ịlẹ kị kpẹhị rịrị a lẹẹ ẹẹ: ỊBẹnhuu kpẹhị rịrị ọpyị ilikiti nya Ifurem.

⁹ỊBẹndẹkẹẹ kpẹhị rịrị epweji nya ịMakasị bala ịChaalụbim bala ịBẹtị-ịchẹmẹchị bala Elọn bala ịBẹtịhanan.

¹⁰ỊBẹnhẹsẹdị kpẹhị rịrị epweji nya Arubotu bala ịSọkọ tụ oye nya ịHẹfẹẹ wuu.

¹¹ỊBẹnabinadabụ ọlẹ kọ ye ịTafatị ọnyị nya iSolomọn kpẹhị rịrị oye nya ịNafatịdọọ wuu.

¹²ỊBaana ọnyị nya Ahiludu ri ịgọvụnọ kpẹhị rịrị epweji nya ịTaanakị bala iMegido tụ oye nya ịBẹtịchan ọlẹ kọ ba epweji nya ịSarẹtan ba kele ka edii nya epweji nya iJesiriyẹlụ lalaala ka ju ka epweji nya Ebẹlụ-imehola bala epweji nya iJokemiyam.

¹³ỊBẹnggẹbẹẹ kpẹhị rịrị epweji nya ịRamotu-igiliyadị bala epweji ịkịla ịla iGiliyadị ịlẹ kị ri nya alogang ya ịJayii ọnyị ọtụma nya ịManasẹ. Ọ kpẹhị rịrị oye nya Aagọbụ ị-ịBachan tụ epweji ịtụka iwo ịrwọnyẹ ịlụwa ịlẹ kị me egwalọ dagaga ju bala o-ku igirigba nyaa ekpileku iloje-oje.

¹⁴Ahinadabụ ọnyị nya Ido ri ịgọvụnọ nya iMahanayim.

¹⁵Ahimaasị ọlẹ kọ ye ịBasẹmatị ọnyị nya iSolomọn ri ịgọvụnọ nya ala ịNafụtalị.

¹⁶ỊBaana ọnyị nya iHuchayị kpẹhị rịrị Achẹẹ bala iBeyalotu.

¹⁷IJehochafatị ọnyị nya ịParuwa kpẹhị rịrị i-imwawụ nya Ịsakaa.

¹⁸IChimeyi ọnyị nya ẹla ri ịgọvụnọ nya iBenjamịn.

¹⁹ỊGẹbẹẹ ọnyị nya Uri ri ịgọvụnọ o-oye nya iGiliyadị ẹga ká Sihọn Adịrahụ nya ala Amọ bala Ọọgụ Adịrahụ nya ala ịBachan kpẹhị rịrị pwụ ene-ene. Datị hi ịgọvụnọ ịwẹ, ịgọvụnọ ọhẹ juwa kọ kpẹhị rịrị ọpyị iJuda wuu.

²⁰Ala iJuda bala Isirẹlụ ju iru lụmẹ gbee ká iru ojuju nyaa lala egburuja ilugbọnụ nya ihu ịtụka, ị juwa kaa ye ang ri yẹyẹẹyẹ bala ọ-nwa ere, ị kaa juwa chị ọkẹkẹnị.

²¹Ụka ọọwa, iSolomọn ri adịrahụ juwa kpẹhị rịrị ịpyị nya ịdịrịhụ ịkịla i-bwu Ihu iYufuretisi lalaala ka pwụ oyi nya ẹpwa ọlẹ ká ala iFilisitiya bala ala Ijipiti. Ịwa wuu kaa kpa ẹpwa ọnyẹnyẹ nyaa warị wẹ iSolomọn bala ọ-myị ẹrụ họọ lụka nya ọhịhị nyamwụ wuu.

²²Ang oriri ọlẹnụtụrụ ookpokpo nya iSolomọn bala alọdọdẹpwa nyamwụ ri okolo ụnọ ịrụ (5,000) nya ọrụ nya ajẹ nya ang-ẹrụ bala bala okolo ụnọ iwo (10,000) nya ajẹ nya ang-ẹrụ ịlẹ kị ru kpọrụ-ka bala

²³ịna iwo ịlẹ kị kpa ang haa ri ẹ-ẹpwang bala ịna iwo imiiye ịlẹ kị kpa rị amẹ odehe bala ịkpịlọ ohu (100) tụ ẹnụ bala apyị bala anụ.

²⁴ISolomọn ri adịrahụ nya ịpyị ịlọmwẹnụ-ụtụrụ nya Ihu iYufuretisi bwu iTifusa kele ka ịGasa. Ịdịrịhụ ịlọmwẹnụ-obyi nya Ihu iYufuretisi wuu kpa ịlaa keji họọ. Ọ la okpunyi bala alọpyị ịlẹ kị kụ dagaga ju wuu.

²⁵Ụka nya adịrahụ oriri nya iSolomọn ala iJuda bala ala Isirẹlụ wuu bwu ọbaba nyaa ọla ịDan ka ju ka ọbaba ọkịla ọla iBiyẹchẹba hụ lokpunyi. Ọng myị ọng nyaa kaa hụhụ ọ-ọmwụ nya alakọnụ bala okiledu nyamwụ la ụnụ ọ-haa họ ka.

²⁶ISolomọn la ẹga ọ-ya anyịrẹ i-gbile ang ịrụnyẹ nyamwụ bwọ eji ụnọ iwo ine (40,000) bala anyịrẹ ị-kpa dẹwụ ụnọ iwo kụrụ imiiye (12,000).

²⁷Ọya ọnyị myị ọnyị wuu ọngọ ookpokpo ẹ-ẹpwụ nya ịgọvụnọ iwo kụrụ imiiye nya iSolomọn kaa kpa ang oriri ọlẹ kọ ka nwọọ ẹpwụ nya ọya warị wọọ bala angịlẹ kị ka warị ka ri ang tọọ. Ị kaa myị ịngịngịhyẹ kaa ku amwụ kpong-kpong ka.

²⁸Ọngọngọọng nyaa kaa kpa ebwo nya ịrayịsị ibali bala amẹ kele kịla anyịrẹ i-gbile ang ịrụnyẹ bala anyịrẹ ịkịla jaabwọ kị wa họọ.

²⁹Ohe Oluhye ya ẹla ọjẹjẹ okpori-kpori ha iSolomọn bala ọjẹ myịmyị ọlẹ kọ kpoye nyọka jẹ-ẹ me ẹla ọjẹjẹ nyamwụ ori.

³⁰Ọ dọmwụ lụmẹ kpuu lẹ, ẹla ọjẹjẹ nya iSolomọn lụmẹ kpoye nya ẹla ọjẹjẹ nya alọmwẹnụ-ụtụrụ wuu bala ịnya angị jẹ ẹla nya ala Ijipiti wuu.

³¹Ọwa-à jẹ ẹla gụ angịnyị ịlẹ kị jam odehe ọlẹ wuu lẹlẹ. Ọ dọmwụ jẹ ẹla gụ Ẹtan ọla Ẹsịrahị bala ịHẹman tụ ịKalịkọlụ bala ịDaada kị ri anyị nya ịMahọlụ. Ohi oruru nyamwụ pwụ ịpyị ịdagaga ju wuu.

³²ISolomọn da etu ụnọ ịta (3,000). Eje ịlẹ kọ mwu wuu la ụnọ ookpokpo kụrụ ịrụ (1,005).

³³ISolomọn ya ẹla rụ ẹchẹ nya ekeji bala amẹ bala ụma nya apwụ datị-datị lala ekeji nya isida ịtụka ilepweji nya iLibanọn bala apwụ ihisọfụ ichiche ịlẹ kịị bwu u-uhye nya ugulọ. Ọ ya ẹla rụ ẹchẹ nya iyo ịlẹpwamẹ bala ịchịnụ datị-datị bala ilo datị-datị bala iyenyi ịnyịnyị.

³⁴Angịnyị datị-datị ịlẹ kị wo oja nyamwụ kaa bwu ịkịka nya odehe ọlẹ wuu kaa kele ka ke ụrụ la iSolomọn nyọka wo ẹla ọjẹjẹ nyamwụ.