Read idege 1 Ịdịrịhụ 5 Bible Online

1 Ịdịrịhụ 5 - idege bible

1 Ịdịrịhụ 5

¹Ụka ọọwa, iHiram adịrahụ nya ala Taya ri ọligu nya iDevidi ụka wuu. Ụka kọ wo nyị ya ida hụ iSolomọn nyọ ka ri adịrahụ ku ọmwakpa nya adamwụ lẹ, ọ du alụkụrwọ ịgbẹgbịlẹ nyamwụ ẹrụ kaka dọọ ọlẹẹkwaa lẹlẹ.

²ISolomọn du ẹrụ tịrẹkpẹ kele ka ẹga nya iHiram yẹkẹẹ,

³“A tị́ jẹ ká iDevidi adam-ḿ lọngịrị nwụ ube nya ịgba ọgbagba nya Amkpaa Ohe Oluhye nyamwụ myị kaka, chajị nya ẹwụ ọdada ta aluji nyamwụ ịle kị dagaga jwọọ gbee pwụ ọlẹ ká Amkpaa hu ọkụrụ-kụrụ họọ.

⁴Ma tị lẹẹlẹẹ wẹẹ, Amkpaa Ohe Oluhye nyam hu ọmwịịnyọ ham ịkịka oyiye-oyiye ham. Aluji a ji ham kaka, uko ọ chịchị nya ẹla ọmwọmwọ ọ bwu agaga a tị ji kaka.

⁵Chajị nya ọọwa lẹ, m nwụlanọ kam ka nwụ ẹpwang nya ịgba ọgbagba ha Amkpaa Ohe Oluhye nyam, jaabwọ ká Amkpaa myị ọnụ ha iDevidi adam yẹkẹẹ, ọnyị nyang ọlẹng ọlẹ ká am ka hu hụhụ u-uhye nya ẹchị adịrahụ nyang ku ọmwakpa nyang a ka nwụ ẹpwang ham lẹ.

⁶Lẹẹlẹ, da angịnyị nyang ehile kị chị ekeji nya isida nya ala iLibanọn kpa wam mẹ. Am bala angịnyị nyam ka warị ka họ ụkụrwọ ta anchẹ nyang lẹ, m tị ka nwụng uri ha angịnyị nyang jaabwọ ká chị m ịnya ka ba kọ pwọku. A tị jẹ ká ọngọngọhẹ a jam ẹ-ẹpwarịrị nyahị kọ jẹ chị igbilo nya ekeji lala iSayidọn kaka lẹ.”

⁷Ụka ká iHiram wo ẹrụ ọwẹ ka iSolomọn du, ọ chị ọkẹkẹnị ọtụka-ọtụka, lẹ ọ yẹkẹẹ, “Ogbo a ri ịnya Amkpaa alẹ mẹ, ọngọlẹ kọ hụ ọnyị ọlẹng ọ jẹ ẹla ọlịịlẹ ha iDevidi nyọka ri olegbeju kpẹhị rịrị iru nya angịnyị ịtụka ịlịịlẹ.”

⁸Ọọwa, iHiram a du ẹrụ kaka byi iSolomọn yẹkẹẹ, “M̀ wo ẹrụ ọlẹ ka du tọm lẹ. M̀nwụlanọ nyọka họ ang myị ang ịlẹ ká tịtọ ẹ-ẹga nya ẹla nya ekeji lẹ. M̀ ka ya ekeji nya isida bala ịnya ịpayịn hang lẹ.

⁹Anchẹ nyam ka hiraa eji bwu iLibanọn kpa warị wẹ ihu lẹ. Ị ká chaa ori bawụlẹ gyaa chị ka ẹpwụ nya enyi kị ka tụ enyi-enyi da gbee ka pwụ ẹga kọ hang. Ụ-ụwa ị ka yaa iri hi awụlẹ, chajị kanụ ka jẹ-ẹ nwụla kpa rụ lẹlẹ. Ang ọlẹ kaahụ tị ka họ ham ri, ang oriri a ka nwụlanọ ham bala alẹpwa nyam lẹlẹ.”

¹⁰Ọọwa, iHiram a ya ekeji nya isida bala ịpayịn du kịla iSolomọn jaabwọ kọ tịtọ ka ba lẹlẹ.

¹¹ISolomọn nwụ uri bwula ọ-ya okolo ụnọ imiiye (2,000) nya ịrayịsị iwiiti bala ịgalụwa ụnọ ohu ine (400,00) nya ida ochire-chire nya olivu ha iHiram ẹka myị ẹka wuu.

¹²Amkpaa hu ẹla ọjẹjẹ ha iSolomọn jaabwọ kọ myị ọnụ họọ. Ụka ọọwa, okpunyi juwa ẹ-ẹpwarịrị nya iSolomọn bala iHiram. Ọọwa, ịwa ịdịrịhụ imiiye ịwẹ à nwa iro ha awụlẹ.

¹³ISolomọn chụ angịlẹ kị ka kpa angịnyị họ ụkụrwọ nya ịgwabwọ bwu epweji nya ala Isirẹlụ wuu. Iru ojuju nya alẹng ịlẹ kọ chụ wuu la ụnọ iwo ịta (30,000).

¹⁴Ọọwa, ọ du alẹng ịịwa ẹrụ kele ka iLibanọn yẹ hi ha awụlẹ lẹlẹ. Ọ chaa ebwo ịta. Ọya ohẹ, angị ụnọ iwo (10,000) nyaa ka juwa iLibanọn. Ọya imiiye angịịwa ka hụhụ am ẹ-ẹpwa ụka ká angịkịla ka kele. Adoniram a ri olegbeju nya ụkụrwọ nya igwaabwọ ọwẹ lẹ.

¹⁵ISolomọn la angịnyị angị be ajwọ i-ikiti angị ụnọ iwo ineku (80,000) bala angị kpa olo nya ajwọ ang ụnọ iwo irwiye (70,000).

¹⁶ISolomọn la angị kụ ịlahị nya ụkụrwọ ọwẹ angị ụnọ ịta da angị ohu ịta (3,300) kị kaa kpẹhị rịrị bala ọ-wụla ụkụrwọ yẹ.

¹⁷ISolomọn Adịrahụ da ehile lẹ, ị be ajwọ ịnyịịla-ịnyịịla ịtụka-ịtụka ịlẹ kị ka kpa dọmwụ uji nya ẹpwang nya Ohe Oluhye lẹlẹ.

¹⁸Alụkụrwọ nya iSolomọn bala ịnya iHiram bala alẹng i-bwu epweji nya iBibilosi a nwụla ajwọ bala ekeji nọ chajị nya ube nya Ohe Oluhye ọnwụnwụ lẹ.