Read idege 1 Ịdịrịhụ 6 Bible Online

1 Ịdịrịhụ 6 - idege bible

1 Ịdịrịhụ 6

¹Ụka kọ gu ẹka ohu ine da ẹka iwo ineku (480) nyọlẹ ká ala Isirẹlụ yegiri bwu Ijipiti kọ tịtị ri ẹka ohene nya adịrahụ oriri nya iSolomọn ụ-ụwa Isirẹlụ lẹpwụ nya ọya iSiivu ọlẹ kọ ri ọya oheeye nya ẹka lẹ, iSolomọn a dọmwụ nya ube nya Amkpaa omeme lẹlẹ.

²Ube nya Amkpaa ọlẹ ká iSolomọn Adịrahụ me ludiyo apatẹ iwo ihikichu bala apatẹ iwo ịta ẹ-ẹpwụ ojuju bala apatẹ iwo ine kụrụ ịrụ nya uhye ọlala.

³Ọnụụkpa nya ube Ịgọgọ ọwẹ ju ẹpwụ ta ube ayịdang meme. Ẹpwụ ojuju nyamwụ ri apatẹ iwo ịta. Ẹga kọ gba jọọ kpehe ị-ịlahị nya ube ri apatẹ iwo kụrụ ịrụ.

⁴Ị chị ube nya Ohe Oluhye iwindo ichiche-ichiche ịlẹ kodehe nyaa la kpiilee gụ ẹpwụ nyaa.

⁵ISolomọn me ube-oluhye apwụ ịta rịrị awụlẹ ju ugulọ ọdagaga ju odehe bala ugulọ ọ-ka ẹkpẹ nyamwụ.

⁶Ẹpwụ ojuju nya ẹpwụ oleji ri apatẹ irwiye ba ẹhya. Ịnya oheeye la apatẹ ihikichu. Ịnya ọhata la apatẹ iwo bẹhya. Ugulọ nya ẹpwụ oluhye ọnyọnyọọnyị la dilele gụ oleji nyamwụ chajị ká apwụ nya ube ịwẹ ka jẹẹ godayị rịrị chii u-uhye nya awụlẹ la o-me igbilo ịhyẹ dụrụ ka ẹpwụ nya ugulọ ene ka.

⁷Ajwọ ịlẹ kị kpa me ube nya Ohe Oluhye ọọwa wuu ri ịlẹ kị nwụla yẹẹyẹẹ bwu ẹga o-be ajwọ. Lẹẹlẹ, ị́ be ịngịngịhyẹ kpụ ọngọngọhẹ ka wo anụ nya ọjị ọ kpa tụ ang wu kpọngkpọng lee eje o-be ajwọ lee anụ nya ang olojoje ọhẹ-lọhẹ kpong-kpong ẹ-ẹpwụ nya ube ọwẹ ụka kị juwa kpa me ka.

⁸Ọnụ o-bwu ju kele ka ẹpwụ nya ube-oluhye ọhọhẹ ọlẹ kọ la bẹdẹẹ gụ wuu ji ka ịkịka nya ube ọlẹ kọ ji ka edii. Ị chị apatẹ ọlẹ kị ka bwu ẹpwụ ọlẹpwarịrị kele ka ẹpwụ ọhata.

⁹Ụka ká iSolomọn Adịrahụ me ẹpwang ọọwa kpá, ọ kpa ekeji-ekeji nya isida nwụ ịnawụ kụrwọọ wuu.

¹⁰Ọ nwụ ebe iluhye-ọgba dagaga ju ẹpwang ọwẹ wuu jaabwọ kọ la ẹpwụ nya ube-oluhye ọnyị myị ọnyị la apatẹ irwiye bẹẹhya u-uhye ọlala nyaa, ị mọọ hịla-awụlẹ bala ugulọ nya ube ọtụka nya Ohe Oluhye ụ-ụwa odehe nyamwụ, ene nya ekeji nya isida ikpa haa wuu lẹ.

¹¹Ụka ọọwa, Amkpaa ya ẹla ta iSolomọn yẹkẹẹ,

¹²“Ẹla chajị nya ẹpwang ọlẹ ká wẹẹ nwụ wẹẹ, ọ-ri ká ka myịị ba ọmẹjẹ bala ehile nyam jẹ kpẹẹkpẹẹ aalẹ, m̀ ka họ ọnụ ọmyịmyị nyam ịlẹ kam myị ha iDevidi adang jịra hang.

¹³Aalẹ, m̀ ka kụ ẹpwa ẹpwarịrị nya ala Isirẹlụ angịnyị nyam. Ḿ ka nyẹẹkpẹ daa kpong-kpong kaka.”

¹⁴Ịnyị, iSolomọn a me ube nya Ohe Oluhye gbịlẹ-gbịlẹ wuu lẹlẹ.

¹⁵Ị ya ekeji nya isida ba ugulọ ọlẹpwụ bwu eji gbee pwụ isilin nya ube ọwẹ. Ene ịpwọọpwọọ nya ekeji ịpayịn ị ya pa oyeji nyamwụ pẹẹpẹẹpẹẹ wuu lẹ.

¹⁶Ube ọlẹpwụ ọlẹ kị wụrụ Ẹga Ọlịgọgọ Ọgụgụ wuu ji ka ẹkpẹ hwẹẹ ẹ-ẹpwụ nya Ube nya Amkpaa. Udiyo nyamwụ la apatẹ iwo ịta. Ị kpa ene ịpwọọpwọọ nya ekeji isida chọọ ẹpwụ bwu oyeji pẹtẹẹ kele ka gu isilin.

¹⁷Epwụ nya ube ọlẹ kọ jịlahị nya Ẹga Ọlịgọgọ Ọgụgụ wuu kpangga la apatẹ iwo ịrwọnyẹ.

¹⁸Ẹpwụ nya ube Ịgọgọ ayịdang kpangga lẹ, ekeji nya isida ịlẹ kị hwo ihwoto nya akwọ bala àpwụ̀ igugu nya ekeji datị-datị ba ị kpa họọ ịnyangga lẹ. Ị ya ekeji nya isida ba ẹpwụ nyamwụ, wuu chajị kị ka jẹ-ẹ yẹ ajwọ ịlẹ kị kpa me egwalọ ka.

¹⁹ISolomọn nwụla ẹga ọlẹ kị ka ya Akpa nya Iro nya Amkpaa rịrị ẹ-ẹpwụ nya ẹpwụ ọlọbaba nya Ube nya Amkpaa pẹtẹẹ.

²⁰Ube ọlẹpwụ la apatẹ iwo ịta nya udiyo ọlala. Ẹpwụ ojuju nyamwụ la apatẹ iwo ịta. Uhye ọlala nyamwụ la apatẹ iwo ịta ịnyịnyị. Ọ kpụ okpoko ịgọm ọlahịchịng kụrwọọ wuu. Ị ya ekeji nya isida ba ogidi okiliya wuu ịnyịnyị.

²¹ISolomọn adịrahụ kpa okpoko ịgọm kwo ẹpwụ ọlẹpwụ nya Ube nya Amkpaa. Ọ ya agba nya okpoko ịgọm do ori chị yẹ ọnang nya Ẹga Ọlịgọgọ Ọgụgụ dada. Ị kpụ okpoko ịgọm kụrụ ọnang ọọwa ịnyịnyị.

²²Ị kpụ okpoko ịgọm kụrụ ẹpwụ nyamwụ wuu ka ẹga ka ọba. Ị kpụ okpoko ịgọm kụrụ ogidi ọlẹpwụ nya Ẹga Ọlịgọgọ Ọgụgụ wuu.

²³Ị kpa ekeji nya olivu kọ alegu-icherubu imiiye rịrị ẹ-Ẹga Ọlịgọgọ Ọgụgụ wuu ọlẹ ká ọnyọnyọọnyị la apatẹ iwo kurụ ịrụ u-uhye ọlala.

²⁴Udiyo nya ụchwọ ọhẹ nya olegu-icherubu la apatẹ irwiye ba ẹhya. Udiyo nya ụchwọ ọkịla la apatẹ irwiye ba ẹhya ịnyịnyị. O-bwu ọbaba nya ụchwọ ọhẹ kele ka ọbaba nya ọkịla nya olegu-icherubu la apatẹ iwo kụrụ ịrụ.

²⁵Alegu-icherubu imimiiye ịwẹ memeeme ẹ-ẹpwụ nya abwụma ọlẹ kị la bala ohyehye nyaa.

²⁶Uhye ọlala nya olegu-icherubu ọnyị myị ọnyị la apatẹ iwo kụrụ ịrụ.

²⁷ISolomọn hu alegu-icherubu ịwẹ rịrị ịkịka nya awụlẹ ụ-ụwa ẹ-Ẹga Ọlịgọgọ Ọgụgụ wuu. Achwọ imiiye nyaa pyẹ maaa ka gu awụlẹ ẹ-ẹpwarịrị nya ube. Achwọ imiiye ịkịla nyaa pyẹ maaa kaka gu ugulọ ịkịka ọhẹ bala ọkịla.

²⁸Ị kpụ okpoko ịgọm kụrụ alegu-icherubu ịwẹ.

²⁹Ị họ egwalọ nya ẹpwụ ọlẹpwụ bala olodehe ịnyangga la ihwoto nya alegu-icherubu bala ịrị bala àpwụ̀ igugu nya ekeji ịlẹ kị kpa ekeji kọ wuu.

³⁰Ị dọmwụ kpụ́ okpoko ịgọm kụrụ oyeji nya ube nya Amkpaa wuu.

³¹Ekpileku ịlẹ kị kpa ekeji nya olivu kọ iSolomọn a ya ku ọnang o-bwu ka Ẹga Ọlịgọgọ Ọgụgụ wuu lẹ. Ị kọ ekpileku ịịwa kị ka wụrwaa ka oyiye-oyiye. Ekeji i-wu ekpileku ịịwa kpa la ụpata ịrụ ịlẹ kị la piye-piye e-egbeju.

³²Ọ kọ ekpileku ịịwa, haa ịnyangga la ihwoto nya alegu-icherubu bala ịrị bala àpwụ̀ igugu nya ekeji. Ị kpụ okpoko ịgọm kụrụ ekpileku bala alegu-icherubu bala ịrị ịịwa wuu.

³³Ị kọ ekeji i-wu ukpileku nya ọnang o-bwu ube nya Amkpaa la okoji nya olivu. Ị la ịkpanggọ ine.

³⁴Ekpileku imiiye ịhyẹ juwa ịlẹ kị kpa okoji nya ịpayịn kọ, ká ụpa nya ọnyọnyọọnyị nyaa kaa mwụ bawụlẹ.

³⁵Ị hwo ihwoto nya alegu-icherubu bala ịnya ịrị bala ịnya àpwụ̀ igugu nya ekeji ba ekpileku u-uhye. Ị kpụ okpoko ịgọm kụrụ ang ịwẹ wuu chọnụ.

³⁶ISolomọn me ube ọlẹpwụ la ọgba ịta nya ajwọ ịlẹ kị kọkọ bala ọgba ookpokpo nya ekeji nya isida.

³⁷Ị dọmwụ uji nya Ube nya Amkpaa lọya nya iSiivu ọlẹ kọ ri ọya oheeye ẹ-ẹpwụ nya ẹka ohene nya adịrahụ oriri nya iSolomọn.

³⁸Ẹ-ẹpwụ nya ọya nya iBuulu ọlẹ kọ ri ọya ọhaneku nya ẹka iwo kụrụ ookpokpo kpangga nyọlẹ ká iSolomọn ri adịrahụ, ị nwụ ube nya Amkpaa cheju gbanggbang kpá jaabwọ kị me obyi neeji ene lẹ. Ẹka irwiye iSolomọn a bịrị ju ẹpwang ọwẹ ene kọọ nwọọ kpá cheju lẹ.