Read idege 1 Ịdịrịhụ 7 Bible Online

1 Ịdịrịhụ 7 - idege bible

1 Ịdịrịhụ 7

¹ISolomọn nwụ ẹpwụ nya adịrahụ ha ịlọmwụ. Ọ nwụ ẹpwa ọọwa kpá wuu ẹ-ẹpwụ nya ẹka iwo kụrụ ịta.

²Ube nyamwụ ọhẹ juwa kị wụrụ “Ẹpwang nya Ipyinu nya iLibanọn”. Udiyo ọlala nya ẹpwang ọọwa ri apatẹ ohu ookpokpo da iwo ịrụ (150). Ẹpwụ ojuju nyamwụ la apatẹ iwo irwiye kụrụ ịrụ. Uhye ọlala nyamwụ la apatẹ iwo ine kụrụ ịrụ. Ị nwọọ rịrị ekeji iweji nya isida ịgba ịta bala igbilo nya isida ịlẹ kị ya nịraa u-uhye. Ị nwụ ịnawụ nyamwụ la ekeji nya isida. Iweji ịlẹ kị wu ịnawụ kpa la iwo ine kụrụ ịrụ. Ị la iwo kụrụ ịrụ ẹ-ẹpwụ nya ọgba ọnyị myị ọnyị wuu chọnụ.

⁴Ị ku iwindo ịgba ịtịtịịta ụpa nya ugulọ imimiiye jahị dawụlẹ.

⁵Ekpileku bala iwindo nyaa wu la ịkpanggọ ịtịtịịta. Ịgba ịta nya iwindo ilugulo ọhẹ jahị da ilugulọ ọkịla.

⁶Ẹpwụ nya ẹpwang ọkịla juwa ọlẹ kọ wụrụ Ube nya ịtachị. Udiyo nyamwụ la apatẹ iwo irwiye kụrụ ịrụ (75). Ẹpwụ ojuju nyamwụ la apatẹ iwo ine kụrụ ịrụ (45). Ịlahị nyamwụ ri ọnụụkpa ọlẹ kị ịtachị wu ịnawụ ọlẹ kị nwụ kụrwọọ kpa.

⁷Ẹpwang ọkịla ri Ube nya Ẹchị-adịrahụ. Ị kaa wụrwọọ Ube Oleje ịnyịnyị. Ụwa iSolomọn à kaa hụ leje lẹ. Ị ya ekeji nya isida ịpwọọpwọọ ba ube ọọwa rẹẹrẹẹrẹẹ bwu oyeji kaka ju ka isilin.

⁸Ẹpwang nya iSolomọn ayịdang ẹga kọ ka kụ ji kẹkpẹ nya Ube Oleje. Ọnwụnwụ nyamwụ me ịkịla. ISolomọn nwụ ẹpwang ụma ọlịnyịnyị ha ọnyị ọnyang nya iFero Adịrahụ ọlẹ kọ ye nya ahụ nyamwụ ịnyịnyị.

⁹O-bwu itiwe lalaal ka pwụ ọkachịwọ nya ebe ịwẹ wuu ri ajwọ ịnyịịla-ịnyịịla kị kpa haa. Ị me ajwọ ịịwa ori, tịraa yẹẹyẹẹ ịkịla ọlẹpwụ bala olodehe nyaa wuu gbịlẹ-gbịlẹ.

¹⁰Ajwọ ịnyịịla-ịnyịịla ịtụka-ịtụka ị kpa me omwuji nya ebe ịwẹ lẹ. Udiyo ọlala nya ịhyẹ nyaa ri apatẹ iwo kụrụ ịrụ. Ịkịla la apatẹ iwo kụrụ imiiye.

¹¹Ajwọ ịlahịchịng ịkịla ịhyẹ ịlẹ kị chaa eku jaabwọ kị maa ori no ene ị ya nịraa u-uhye lẹ. Ị kpa igbilo nya ekeji nya isida ịnyịnyị.

¹²Ọdọda nya ẹpwa nya adịrahụ ri ọlẹ kị họ la ọgba ookpokpo nya ekeji nya isida ba ịgba ịta nya ajwọ ịlẹ kị be yẹẹyẹẹ ba dịrẹ awụlẹ ịnyịnyịịnyị. Ịwẹ-ịwẹ ị bwu me egwalọ nya ọdọda ọlẹpwụ nya Ube nya Amkpaa bala ọnụụkpa o-bwu ka Ube nya Amkpaa ịnyịnyị lẹ.

¹³Adịrahụ iSolomọn du ẹrụ kele ka wụrụ iHuram ọngọ jẹ ịbańg bwu epweji nya ịTaya.

¹⁴IHuram ri ọnyị ọlẹng nya ahụ ogu ọhẹ ọlẹ kọ ri alimwawụ nya ịNafụtali. Adamwụ tị ri alepweji nya ịTaya. Ọ ri ọlụkụrwọ nya ụbwọ nya oje ọnyọmịla ọ-kpa họ ang. Ọ jẹ ang kpori-kpori bala ọ la irya lụmẹ. Ọ jẹ-ẹ̀ kpa oje ọnyọmịla họ ụma nya ụkụrwọ datị-datị. Ụka kọ wẹ ẹga nya Adịrahụ iSolomọn, ọ họ ụkụrwọ ịlẹ wuu kị ya jwọọ ụ-ụbwọ.

¹⁵IHuram hya ịtachị imiiye loje ọnyọmịla ọlẹ ká uhye ọlala nya ọnyọnyọọnyị la apatẹ iwo imiiye kụrụ irwiye. Ohyehye dagaga ju nya ọnyọnyọọnyị la apatẹ iwo kụrụ ineku.

¹⁶IHuram kpa oje ọnyọmịla họ egbeju ọlẹ kị ka ya kụrụ uhye nya ịtachị ịwẹ. Uhye ọlala nya ọnyọnyọọnyị nyaa ri apate irwiye ba ẹhya.

¹⁷Ọ họ ang ọ weeji ọnyị myị ọnyị ịnyangga u-uhye egbeju nyamwụ la ụma nya agba ọlẹ kị gwọọ ọlapa irwiye.

¹⁸Ọ kpa oje ọnyọmịla họ ịgba imiiye nya egbe nya okoji ipomegiraneti dagaga ju egbeju nya ang iweji ịwẹ chajị nyọka ke uhye nyaa.

¹⁹Egbeju nya ịtachị ịla ọnụụkpa lẹ, ị haa lala ikoko ịnyịịla ịlẹpwụ nya ọkpọọ. Uhye ọlala nya ọnyị myị ọnyị la apatẹ ịrwọnyẹ-ịrwọnyẹ.

²⁰Ị ya egbe nya ipomegiraneti ohu imiiye (200) wụlọ rẹẹrẹẹrẹẹ dọgịlẹ ju ịgba imiiye nya ọnyọnyọọnyị.

²¹IHuram hu ịtachị nya oje ọnyọmịla ịwẹ wu eji ọ-ọnụụkpa o-bwu ka Ube nya Amkpaa. Ọ wụrụ ọtachị ọlẹ kọ ya weji e-edii ịJakin. Ọ wụrụ ẹnyị nya ọkịla ọlẹ kọ ya wu eji koye nya ẹtẹ iBowasị.

²²Ị họ àpwụ igugu iluhye nya ịtachị ịịwa me ikoko. Ọwẹ à ri ocheju nya ụkụrwọ ọlẹga nya ịtachị lẹlẹ.

²³IHuram me irim ọkịlọlọ ọhẹ loje ọnyọmịla. Ọ la apatẹ iwo kụrụ ịrụ dagaga ju. Ọ la apatẹ iwo ine kụrụ ịrụ nya ọ chị ẹpwụ nyamwụ eku bwu oye ọhẹ koye ọkịla. Ọ la apatẹ irwiye ba ẹhya nya ọkpori-okpori nyamwụ.

²⁴Ọ họ ịnyangga la ịgba imiiye nya akwọ-akwọ nya oje ọnyọmịla ịlẹ kị họ ju irim ọwẹ lawụlẹ ba ekpeleji nya ugbọọnụ oluhye ba. Apewa ọ-chị dawụlẹ nya akwọ ịrwọnyẹ ọnyọnyọọnyị lala ẹpẹtẹ ookpokpo.

²⁵Ọ họ irim ọwẹ rịrị u-uhye nya ịna iwo kụrụ imiiye nya oje ọnyọmịla. Ịta nyaa jahị da ka ẹtẹ, ịta nyaa jahị da ka ọmwẹnụ-obyi, ịta ịkịla jahị da ka edii. Ịta ihihi jahị da ka ọmwẹnụ-ụtụrụ. Ịna ịwẹ godayị jahị da ka odehe ya okwata da ka ẹpwarịrị.

²⁶Ụka ọchịchị nya irim ọtụka ọwẹ lala eku nya ẹpẹtẹ ookpokpo. Ugbọọnụ nyamwụ lala ụgbọọnụ nya ụkoku, yọnụ da daaa lala àpwà nya ekeji ịwụrụ arụ. Enyi ọlẹ kọ ka ka ẹpwụ nyamwụ ka myị̀ ịgalụwa ụnọ iwo kụrụ ookpokpo da ohu ịrụ (11,500).

²⁷IHuram họ ang ị-kpa pá lolo iwo chiriri la oje ọnyọmịla. Uhye ọlala nya ọnyọnyọọnyị lala apatẹ ịrwọnyẹ-ịrwọnyẹ. Ẹpwụ ojuju ri apatẹ ine ba ẹhya.

²⁸Jaabwọ kị bwu họ ang ị-kpa pa lolo ri ị la ang ịpapịla ịlẹ kị ya ju ịkịka nyaa.

²⁹Ị họ ihwoto nya egabẹ bala ịna bala alegu-icherubu ba ẹga ịpapịla nyaa u-uhye. Ị họ ang ịkịlẹ-kịlẹ jwaa e-ekpeleji

³⁰Ọnyị myị ọnyị nyaa la iwiili ine nya oje ọnyọmịla bala igbilo i-waa ju awụlẹ. Ị la ang ikperi-kperi ịlẹ kị ya nịra ang i-waa kpa u-uhye. Ị họ ang ịkịlẹ-kịlẹ jwaa e-ekpeleji.

³¹Ang ọ-kpa kpa olo ọnyọnyọọnyị la ang ọkụrụ ọnụ nya ẹja ọlẹ kọ hu hwaa ka uhye nya ang okpolo lala apatẹ ookpokpo ba ẹhya nya okpori-kpori nyamwụ. Ọnụ nyamwụ la kịlọlọ. Ọmwụ nyamwụ lala apatẹ imiiye ba ẹhya. Ị kọ ang ang dagaga jwaa. Ẹga ịpapịla nyaa la ịkpanggọ ine, ị́ la kịlẹlẹ ka.

³²Iwiili ine ịlẹ kị juwa kịị kpa rụnyẹ ji ekpeleji nya ang ịpapịla nyaa. Ẹpwụ ojuju nya iwiili ọnyọnyọọnyị ri apatẹ imiiye ba eku. Ị ogbilo olekpelji bala ang ẹrụnyẹ ẹ-kpa pá olo ọwẹ ju awụlẹ la ookpokpo.

³³Ị họ iwiili ịịwa lala ata nya ang ịrụnyẹ ịlẹ ká anyị kaa gbile. Igbilo ilekpeleji nyaa bala anyayiije bala ịhọọbụ bala ugbọọnụ nyaa wuu ri ịlẹ kị kpa oje ọnyọmịla họ.

³⁴Ịkpanggọ ine nya ang ị-kpa pá olo ịwẹ wuu la ẹga ọ-yụbwọ chị jịra ine ịnyịnyị. Ị haa ju awụlẹ lookpokpo bala ang okpolo ọọwa.

³⁵Ị họ ang ọkịlịlẹ ọlẹ ká ẹpwụ ojuju nyamwụ lala eku ịta nya ẹpẹtẹ ookpokpo dịrẹ uhye nya ang okpolo dagaga jwọọ. Ị họ ẹga ịpapịla ịlịkịka bala ang i-wu ang okpolo ọwẹ kpa ju awụlẹ lookpokpo.

³⁶Ị họ ang i-wu ang okpolo ọwẹ kpa tụ ẹga ịpapịla ịlịkịka nyamwụ ịnyangga la ihwoto nya alegu-icherubu bala egabẹ bala ịrị ẹ-ẹga myị ẹga ká iwe-é chịda haa la àpwụ̀ nya ekeji ịlẹ kị ya wụlọ rẹẹrẹẹrẹẹ dagaga jwọọ.

³⁷Ịịwẹ ị bwu họ ang ikpolo iwo ịịwa lẹlẹ. Ị haa wuu me awụlẹ labwụma ookpokpo bala ọtụka oriri ụma ookpokpo.

³⁸IHuram họ ịja i-ju enyi iwo loje ọnyọmịla ká ọnyọnyọọnyị ka ri nya ang okpolo ọnyọnyọọnyị ịnyịnyị. Udiyo ọ-chị ẹpwụ nya ọnyọnyọọnyị nyaa eku bwu ọbaba ọhẹ ka ọkịla ri apatẹ ịrwọnyẹ. Ọnyị myị ọnyị nyaa ka kpa enyi ọlẹ kọ ka myị̀ ịgalụwa ohu imiiye da iwo ịta (230) myị.

³⁹IHuram go ịja i-ju enyi ịrụ ịhyẹ rịrị koye nya edii nya Ube nya Amkpaa. Ọ ya ịrụ ịkịla rịrị koye nya ẹtẹ. Irim tị lẹ, ọ yọọ ọwa rịrị ka ọtụpịrịhyo ọlapewa nya edii bala ọmwẹnụ-ụtụrụ.

⁴⁰IHuram me ịta nya enyi bala alẹ bala ịja ikpori-kpori. IHuram họ ang ịlẹ wuu ká iSolomọn Adịrahụ byoo ya nyị họ chajị nyọka kpa họ ụkụrwọ u-Ube nya Amkpaa. Ang ịlẹ kọ họ ri

⁴¹ịtachị ịtụka imiiye bala àpwụ igugu ịlala ịja ikperi-kperi iluhye nya ịtachị ịịwa

⁴²bala egbe nya ipomegịraneti ohu ine (400) ịlẹ kị ya pịlẹ agba iluhye nya àpwụ̀ igugu. Ị họ ịgba imiiye nya egbe nya ipomegịraneti ju ebwo nya agba ịlẹ kị ya bwọ awụlẹ pịlẹ dagaga ju àpwụ̀ igugu iluhye nya ịtachị,

⁴³ang ikpolo iwo bala ịja iwo iluhye nyaa ịnyịnyị,

⁴⁴irim bala ịna iwo kụrụ imiiye ịlẹ kị họ ji ekpeleji nyamwụ,

⁴⁵ị̀ta bala alẹ bala ịja. Ang-abwọ nya Ube nya Amkpaa ịwẹ wuu ká iSolomọn byi iHuram nyị họ lẹ, oje ọnyọmịla ọlahịchịng ọ kpa haa wuu lẹ.

⁴⁶Adịrahụ ya lẹ, ị kpa imoda nya ume gba ang ịwẹ wuu guru ẹ-ẹga ọlẹ kọ ji apewa nya iSukotu bala ịSaretan ọ-Ọkpọọ nya ịJọdan lẹlẹ.

⁴⁷ISolomọn Adịrahụ-ụ́ ya ị maa ori jaabwọ kị la ilo nya ang ịwẹ la kaka ba ka, chajị ị ju iru lụmẹ. Lẹẹlẹ, ọngọhẹ-ẹ́ jẹ ilo ọlala nya oje ọnyọmịla ọlẹ wuu kị kpa haa kaka.

⁴⁸ISolomọn ya ị kpa okpoko ịgọm họ ang-abwọ ịkịla chajị nya Ube nya Amkpaa. Ang-abwọ ịịwa ri ogidi okiliya bala iteburu nya ịkaa ọlịgọgọ.

⁴⁹Ị họ ang ọ-ya itinika rịrị ọlẹ kịị ya rịrị ịlahị nya Ẹga Ọlịgọgọ Ọgụgụ wuu. Ị ya ịrụ nyaa rịrị koye nya edii. Ị ya ịrụ ịkịla rịrị koye nya ẹtẹ. Àpwụ̀ igugu nya ekeji bala itinika bala abụwa. Ang-abwọ ịkịla ịlẹ kị kpa okpoko ịgọm họ ri,

⁵⁰ekeku bala ịwanggbẹ ị-kpa chị itinika ebyi bala ịja ịtụka bala ịja nya ịtangare bala ịja ị-kpa chụ ila bala ịgbana nya ekpileku nya ọnang nya Ẹga Ọlịgọgọ Ọgụgụ wuu bala ịnya ekpileku nya ọnang ilodehe nya Ube nya Amkpaa. Okpoko ịgọm ị kpa họ ang-abwọ ịwẹ wuu lẹ.

⁵¹Ụka ọọwa, iSolomọn Adịrahụ họ ụkụrwọ oluhye nya Ube nya Amkpaa cheju wuu. Ọọwa, ọ kele ka kpa okpoko onyoowuru bala okpoko ịgọm bala ang-abwọ ịkịla ịlẹ wuu ká iDevidi adamwụ chị ịgọgọ ju warị kaka guru ẹ-ẹpwang ị-ya ang guru nya Amkpaa lẹlẹ.