Read idege 1 Ịdịrịhụ 8 Bible Online

1 Ịdịrịhụ 8 - idege bible

1 Ịdịrịhụ 8

¹Ụka ọọwa, iSolomọn Adịrahụ wụrụ alegbeju nya alimwawụ bala alogang datị-datị nya ala Isirẹlụ wẹ iJerusalẹm, chajị kị ka kele ka kpa Akpa nya Iro nya Amkpaa nyà bwu Epweji nya iDevidi ọlẹ kọ ri ịSayọn.

²Ịwa wuu wẹ kaka jịra ẹ-ẹga nya Adịrahụ iSolomọn ẹnụ nya Ọhụhụ nya Adáa nyaa lọya nya Ẹtanim ọlẹ kọ ri ọya ọharwiye.

³Ụka ká alegbeju wẹ kaka jịra, angịkiliya hu Akpa nya Iro hwaa ka uhye.

⁴Ọọwa, ịwa angịkiliya bala ala iLivayị à hu Akpa nya Iro bala Ọdụ nya Amkpaa tụ ang-abwọ ịlụwa wuu kpa ka ẹpwụ nya Ube nya Amkpaa lẹlẹ.

⁵Ụka ọọwa, iSolomọn Adịrahụ bala ala Isirẹlụ ịlẹ kị tụguru ị-ịlahị nya Akpa nya Iro ya iru nya ịkpịlọ bala ịna kịla iya. Iyo ikiliya ịwẹ ju iru kịla ọwawa kịla.

⁶Ụka ọọwa lẹ, angịkiliya-à hu Akpa nya Iro kpa kele ka Ube nya Amkpaa kaka rịrị ẹ-Ẹga Ọlịgọgọ Ọgụgụ wuu e-ekpeleji nya achwọ nya alegu-icherubu lẹlẹ.

⁷Achwọ ị-pyẹ maaa nya alegu-icherubu ịwẹ ke Akpa nya Iro bala igbilo ịlẹ kị kaa yụbwọ chị kpa kpa olo nyaa.

⁸Igbilo ịịwa la udiyo lụmẹ lẹ, ó-ri ká ọngịnyị-ị́ godayị ị-ịlahị nya Ẹga Ọlịgọgọ ọ ka jẹ-ẹ̀ yaa. Ị́ tị ka jẹ-ẹ̀ yaa bwu odehe oye ọkịla ka. Ị tị juwa ịnyịnyị pyịyọọ daalẹ wẹẹ.

⁹Ang ịlẹ kị juwa ẹ-ẹpwụ nya Akpa nya Iro kẹnẹ-kẹnẹ à ri ajwọ ịpapịla imiiye ịlẹ ká iMosisi ya juwa ọ-Ọgbọdọ nya ịSayịnayị lẹ. Ụka ọọwa Amkpaa-a nwa iro ta ala Isirẹlụ wuu nyọlẹ kị juwa kpehe bwu ọpyị nya Ijipiti lẹ.

¹⁰Ụka ká angịkiliya juwa kpehe bwu Ẹga Ọlịgọgọ Ọgụgụ lẹ, egbamwụ ọtụka-ọtụka-à myị̀ Ube nya Amkpaa lọmwaaa lẹlẹ.

¹¹Ọọ-lajị nya ahịgboo nya ụmụmẹ nya Amkpaa ọlẹ kọ myị Ube nya Amkpaa ịịwẹ lẹ, angịkiliya-á jẹ kịnyaa lụkụrwọ nyaa ọhọhọ myị kaka.

¹²Ọọwa, iSolomọn à raabwọ yẹkẹẹ, “Ahụ Amkpaa ya ọwa nyị ka kụ ẹ-ẹpwụ nya egbamwụ ohite-hite.

¹³M̀ nwụ ẹpwang olihi-ihi hang ẹga ká ka kụ gbe oyi myị oyi lẹ.”

¹⁴Ụka ká ala Isirẹlụ wuu godayị rịrị ụ-ụwa, iSolomọn adịrahụ a jahị kpata daa, juwa wahị kụrwaa lẹlẹ.

¹⁵Ọọwa, ọ yẹkẹẹ, “Ogbo a ri nya Amkpaa, Ohe Oluhye nya ala Isirẹlụ. Ọ họ ang ọlẹ kọọwa ayịdang kpa ọnụ nya ịlọmwụ myị ọnụ ha iDevidi adam jịra lẹ. Ọwa ayịdang lẹẹ yẹkẹẹ,

¹⁶‘Mwiiji nyọlẹ kam gba ala Isirẹlụ angịnyị nyam kpehe bwu ọpyị nya Ijipiti, ḿ chụ epweji ọhẹ-lọhẹ ọ-ọpyị nya Isirẹlụ ọlẹ wuu nya ẹga kị ka nwụ ube nyam ka. Ma m tị chụng ahụ iDevidi nyọka ri adịrahụ nya angịnyị nyam.’ ”

¹⁷ISolomọn ya ịnyịnyị yẹkẹẹ, “Ịnọ iDevidi adam me lirya nyọka nwụ ẹpwang ọlẹ kị ka gbịgba ha Amkpaa Ohe Oluhye nya ala Isirẹlụ.

¹⁸Ma, Amkpaa tị byọọ yẹkẹẹ, ‘Ọ hiigu nyọlẹ ká lirya nyọka ka nwụ ẹpwang ọraabwọ ham.

¹⁹Aahụ à tị ka nwụ ẹpwang ham ka. Ọnyị ọlẹng nyang ọhẹ kpangga-à ka ka me Ube nyam lẹ.’

²⁰“Amkpaa họ ọnụ ọmyịmyị nyamwụ jịra lẹ. M̀ ri adịrahụ nya ala Isirẹlụ lẹẹ ku ọmwakpa nya iDevidi adam lẹ. M̀ tị nwụ Ube ọlẹ kị ka gbịgba ha Amkpaa Ohe Oluhye nya ala Isirẹlụ lẹ.

²¹M nwụla ẹga nọ ẹ-ẹpwụ nya Ube nya Amkpaa ẹg a kị ka ya Akpa nya Iro rịrị lẹ. Ẹpwụ nya Akpa nya Iro ọwẹ ị ya ajwọ ịpapịla nya iro ọlẹ ka Amkpaa nwa ta adahị igogo anyị ụka kọ gbaa kpehe bwu ọpyị nya Ijipiti ju lẹ.”

²²Ụka ọọwa, iSolomọn godayị ị-ịlahị nya ogidi okiliya nya Amkpaa i-ijata nya ala Isirẹlụ wuu lẹ ọ kpa abwọ nyamwụ ka uhye lẹ,

²³ọ raabwọ yẹkẹẹ, “Amkpaa Ohe Oluhye nya ala Isirẹlụ ee, ohe ọhẹ-lọhẹ-ẹ́ ji kọ lala ahụ ẹ-ẹpwoohe lee am̀ odehe ka. A ka họ ọnụ ọmyịmyị nyang jịra ẹ-ẹga nya angịnyị nyang bala ọ-mẹ ọháha nyang jẹ u-uhye nyaa ụka kị kpa ọkịlẹtụ nyaa wuu juwa hịhị ẹ-ẹpwụ nya ihi nyang ojuju.

²⁴A họ ọnụ ọlẹ ká myị ha ọnchẹ nyang iDevidi adam jịra. Ahụ a kpa ọnụ nya ịlọng myị ọnụ ọwẹ lẹ. Alẹ ọlẹ tịị wẹ lẹ, à kpa ụbwọ nya ịlọng họọ jịra wuu lẹ.

²⁵“Lẹẹlẹ, Amkpaa Ohe Oluhye nya ala Isirẹlụ ee, m jam raabwọ hang ká ka họ ọnụ ọmyịmyị ọkịla ọlẹ ká myị ha adam jịra. À lẹẹ myị ọnụ họọ ya ó-ri ká anyị ịtụma nyamwụ nyị ju ihi nyang kpẹẹkpẹẹ jaabwọ kọọwa ayịdang nyị jung ihi aalẹ, ọngọhẹ lẹpwụ nyaa nyị ka ri adịrahụ nya ala Isirẹlụ ụka datị-datị ịnyịnyịịnyị.

²⁶Ohe Oluhye nya ala Isirẹlụ ee, chuchuu myị ká ang myị ang wuu a họ jịra jaabwọ ká myị ọnụ ha iDevidi adam ọnchẹ nyang mẹ.

²⁷“Kpakpaakpa lẹẹ, ahụ Ohe Oluhye ka jẹ-ẹ kụ ẹpwa am̀ odehe ọlẹ myị-ịị́?” Epwoohe ri epwoohe wuu lẹpwụ-lẹpwụ-ụ́ la gbamgbam nwa ojuju nyang ka. Ee lẹ, Ube Ịgọgọ amamadiroko ọlẹ kam nwụ lẹẹ tị́ ka họ anyị kọ ka nwang-ǹg nwa-āà!

²⁸Tị kpọkpọọkpọ ká wo abwọ ọrịrị nyam am ọnchẹ nyang, ká họ ọbaba nyam ịlẹ kam wẹẹ kpa wẹ ẹga nyang alẹ mẹ.

²⁹Aa kpẹhị rị Ube Ịgọgọ ọlẹ tụ odu tụ ẹnụ. Ụwa-à ri ẹga ká chụ kị ka gbịgba hang lẹ. Lẹẹlẹ, aa wo lam ụka myị ụka kam jahị da wẹ Ube nyang ọlẹ juwa raabwọ hang.

³⁰“Wo ọbịlẹ-bịlẹ nyam am ọnchẹ nyang bala ịnya angịnyị nyang ala Isirẹlụ ụka myị ụka kị jahị da warị wẹ ẹgẹlẹ juwa ka raabwọ. Aa wo lahị bwu epwoohe ẹga ká kụ, ká hịnyọhi ang onyobyi ịlẹ kahị họ.

³¹“Ó-ri kị chị ẹla ba ọngịnyị kpụ kị kpa ọngọọwa warị wẹ ẹga nya ogidi nyang u-Ube Ịgọgọ ọlẹ nyọka nwa iro ọ-wụ́ ọhịlà-hịlà hi ịlọmwụ

³²aalẹ, a chuchuu, ká wo pwụ epwoohe, ká ru ẹla nya anchẹ nyang ịịwa ori. Yẹ ọngọ la abyị akama, ká ọngọ da ẹla ka ā rụ gịlala.

³³“Ụka ká aluji-í kụrụ ala Isirẹlụ angịnyị nyang ajị nyori ị họ ang onyobyi bang, kị tị yẹ irya da tịrẹkpẹ wẹ ẹga nyang, kị wụrụ ẹnyị nyang juwa raabwọ bịlẹng ọhịnyọhi am̀ u-Ube Ịgọgọ ọlẹ

³⁴aalẹ, aa wo pwụ epwoohe, ká hịnyọhi ọ-họ tịpyọ nya angịnyị nyang, ká kpaa tịrẹkpẹ nyà warị wẹ ọpyị ọlẹ ká ya ha adaa igogo anyị.

³⁵“Ụka ká angịnyị nyang á họ ang onyobyi bang, ká yaa akama bwula ọ-hịnyọ lenyi o-do haa, kị tị yẹ irya da, kị jahị da wẹ Ube Ịgọgọ ọlẹ juwa raabwọ hang

³⁶aalẹ, aa wo pwụ epwoohe. Chuchuu, ká hịnyọhi ọ-họ tịpyọ nya ala Isirẹlụ anchẹ nyang, ká mẹjaa kị ka họ ang ọnyịịla. Ọọwa lẹ, ká do enyi am̀ ọ-ọpyị nyang ọlẹ ká hu ha angịnyị nyang nya ang ọlala ọpyịyọọ mẹ, Amkpaa.

³⁷“Ó-ri ká uhi-í ji ọpyị lee ẹdụrụ-ụ́ nya ịdọlọdọlọ-ọ́ jụ angịnyị lee ẹdụrụ ọ-bịrị ang-ẹrụ kị wo apwụ gbụdụ-gbụdụ bala o-gbu wombooo lee ịyịrị bala ekpunjuju-ú nẹ ang-ẹrụ nyaa lee aluji nyaa-á warị kaka yaa dada lee ụma nya ẹdụrụ ọnyị myị ọnyị kọ jụ angịnyị,

³⁸aa wo abwọ ọrịrị nyaa. Ó-ri ká ala Isirẹlụ angịnyị nyang á raabwọ bịlẹng bwu ọkịlẹtụ nyaa u-uhye nya akama lee ọjụjụ nyaa jahị da wẹ Ube Ịgọgọ ọlẹ

³⁹aalẹ, aa wo abwọ ọrịrị nyaa pwụ ẹpwoohe ẹga ká kụ, ká hịnyọhi ọ-họ tịpyọ nyaa, ká daa ụbwọ. Ahụ ụbwọng à jẹ irya ọlọkịlẹtụ nya ọngịnyị ehe lẹ. Aa ya ang ọlẹ kọ pwoku ọngọngọọng họọ.

⁴⁰Ọọwa, angịnyị nyang a ka ju ihi nyang ụka wuu ọ-ọpyị ọlẹ ká ya ha adaa igogo anyị lẹlẹ.

⁴¹“Angga ịlẹ kị ri alẹpwụ nya ala Isirẹlụ angịnyị nyang ka kà wo oja nyang, ị ka bwu ịpyị ịlụrụ warị kaka gbịgba hang myị.

⁴²Ó-ri kị wo ohi oruru nya ẹnyị nyang bala ụkụrwọ ịlẹbyẹbyị ịlẹ kaa họ, kị wẹ kaka gbịgba bala ọraabwọ hang jahị da Ube Ịgọgọ ọlẹ

⁴³aalẹ, aa wo pwụ epwoohe ẹga ká kụ, ka họ ang ọlẹ kị bịlẹ bwu ẹga nyang, chajị ká alodehe ka jẹng bala o-ju ihi nyang jaabwọ ká ala Isirẹlụ angịnyị nyang wẹẹ họ. Ọọwa, ịwa-à tịtị ka jẹ ká Ube Ịgọgọ ọlẹ kam nwụ lẹẹ à ri ẹga kị ka gbịgba ha ẹnyị nyang lẹlẹ.

⁴⁴Ó-ri ká angịnyị nyang á kpehe kaka dẹwụ ẹ-ẹgẹgẹhẹ ọlẹ ká daa ẹrụ ka, kị raabwọ hang ahụ Amkpaa jahị da epweji ọlẹ ka chụ bala Ube Ịgọgọ ọlẹ kam nwụ hang

⁴⁵aalẹ, aa wo abwọ ọrịrị nyaa. Wo abwọ ọrịrị ọọwa bwu epwoohe ká ya ọkụrụ-kụrụ haa.

⁴⁶“Ọngọngọhẹ-ẹ́ ji kọọ họ ang onyobyi ka lẹ koo. Ọ́ tị ká angịnyị nyang á họ ang onyobyi bang, ká wụ ẹjẹ, ká ya iwe da ha aluji nyaa kpụ ị wẹ kaka kụrwaa, gyaa kpa rụ ka ọpyị ọkịla, ụwa-á lụrụ-ụ la lee o-ju chwẹẹ

⁴⁷aalẹ, aa wo abwọ ọrịrị nyaa. Ó-ri kị yẹ irya da ọ-ọpyị ọlẹ kị ji, kị juwa ya dodehe ịwa nyị họ tịpyọ lẹ,

⁴⁸kị jahị kpata wẹ ẹga nyang lọkịlẹtụ bala ugbodu okpukpuru nyaa wuu, kị raabwọ hang jahị da ọpyị ọlẹ ká ya ha adahị igogo anyị bala epweji ọlẹ ká chụ bala Ube Ịgọgọ ọlẹ kam nwụ lẹẹ nyọka gbịgba hang

⁴⁹aalẹ, aa ke ụrụ la abwọ ọrịrị bala pwụ epwoohe ẹga ká kụ, ká daa ụbwọ.

⁵⁰Chuchuu hịnyọhi ịhọbịrị nya angịnyị nyang ịlẹ kị họ bala egbeju ọnyọọngịrị ọlẹ kị la, ká họ ká aluji nyaa-ā yẹ ahyẹẹrwẹrwa nyaa.

⁵¹Angịnyị nyang lụbwọ-lẹta ị ri lẹ. Ahụ à gbaa kpehe bwu ọpyị nya Ijipiti bwu ẹpwụ nya uhila nya ila nya akama ọlụwa lẹ.

⁵²“Ọngọlahị Amkpaa ee, aa kpa ụrụ nya ọnahị wo ọbịlẹ-bịlẹ nyam bala ịnya ala Isirẹlụ angịnyị nyang, ká wẹ ọbịlẹ-bịlẹ nyaa ụka myị ụka kị wụrụng.

⁵³Ahụ à chwaa bwu ẹpwụ nya alẹpwụma nya odehe wuu kị ka ri angịnyị nyang lụbwọ-lẹta jaabwọ ká ya dodehe bwula iMosisi ọnchẹ nyang ụka ká gba adahị igogo anyị kpehe bwu ọpyị nya Ijipiti lẹ.”

⁵⁴Ụka ká iSolomọn raabwọ ha Amkpaa kpá wuu lẹ, ọ wuleji dayị kọkọ ẹ-ẹga kọ ya arụụ kụ eji kpa abwọ ka uhye ị-ịlahị nya ogidi ene-ene lẹlẹ.

⁵⁵Ọọwa, ọ juwa bịlẹ lomyi gboo ká ká Ohe Oluhye ka wahị kụrụ aluche nya Isirẹlụ wuu yẹkẹẹ,

⁵⁶“Ogbo a ri nya Amkpaa ọlẹ kọ họ ká ala Isirẹlụ angịnyị nyamwụ hụ lokpunyi wẹ jaabwọ kọ myị ọnụ. Ọnụ ịlẹ kọ myị wuu bwula iMosisi ọnchẹ nyamwụ lẹ, ọhẹ-lọhẹ-ẹ́ ji kọ họ jịra ka lẹ ka.

⁵⁷Amkpaa Ohe Oluhye nyahị ā jam tahị jaabwọ kọ juwa ta adahị igogo anyị, kọ tụụbwọ hiihi lee o-nyẹẹkpẹ dahị kaka mẹ.

⁵⁸Ọ họ kahị ju ihi nya irya bala ehile bala ọmẹjẹ nyamwụ wuu ịlẹ kọ ya adahị igogo anyị mẹ.

⁵⁹Amkpaa Ohe Oluhye nyahị a chuchuu kọ kpịtịya ụka wuu nya abwọ ọrịrị nyam bala ọbịlẹ-bịlẹ ịlẹ kam bịlọọ, chajị kọ yẹm am ayịdang ahyẹẹrwẹrwa bala ala Isirẹlụ angịnyị nyamwụ ịnyịnyị jaabwọ kọ baba hahị ẹnụ myị ẹnụ mẹ.

⁶⁰Ọọwa ka du ká ẹpwụma nya odehe ọlẹ wuu ka jẹ ya Amkpaa ụbwọọmwụ nyaa ri Ohe Oluhye lẹ, Ohe ọkịla-á ji dalọọ kaka.

⁶¹Anụ angịnyị nyamwụ ā tị hu ọkịlẹtụ nyanụ wuu lẹpwụ-lẹpwụ ha Amkpaa Ohe Oluhye nyahị, kanụ juwa ju ihi nya ehile bala ọmẹjẹ nyamwụ wuu jaabwọ kanụ wẹẹ họ alẹ mẹ.”

⁶²Ọọwa, iSolomọn Adịrahụ bala ala Isirẹlụ wuu ịlẹ kị juwa tọọ a kịla iya ha Amkpaa lẹlẹ.

⁶³Ọ ya ịna ụnọ iwo da imiiye bala ịkpịlọ ụnọ ohu ookpokpo da ụnọ iwo imiiye kịla ịya nya ọhọlawụlẹ ha Amkpaa. Ịịwẹ iSolomọn Adịrahụ bala ala Isirẹlụ wuu a bwu chị ịgọgọ ju Ube nya Amkpaa lẹlẹ.

⁶⁴Ẹnụtụrụ ọọwa adịrahụ chị ịgọgọ ju ẹga ọlẹpwarịrị nya ọdọda ọlịlahị nya Ube nya Amkpaa lẹ. Ụ-ụwa ọ kịla iya ị-rụ bala iya nya ajẹ nya ang-ẹrụ bala ọ-jụ eyo nya iyo okiliya nya ọhọlawụlẹ ila lẹ. Ọ họ ịnyị chajị ogidi nya oje ọnyọmịla-á lụmẹ nwa nyọka kịla iya ịwẹ wuu u-uhye nyamwụ ka.

⁶⁵Ọọwa, iSolomọn Adịrahụ bala ala Isirẹlụ wuu a la Ọhụhụ nya Adáa i-ijata nya Amkpaa Ohe Oluhye nyaa lẹlẹ. Iru nya angịnyị wẹ ọhụhụ ọọwa bwu ẹga Ọchịpwụrụ bwu ọla ịHamatị ẹ-ẹtẹ lalaala ka pwụ Ọkpọọ nya Ijipiti e-edii. Ị la ọhụhụ ọọwa ẹnụtụrụ iwo kụrụ ine gbẹgbịlẹ. Ẹnụtụrụ irwiye ọhẹ ri ịnya ịgọgọ ọ-chị ju ogidi, ẹnụtụrụ irwiye ọkịla ri nya Ọhụhụ nya Adáa.

⁶⁶Ẹnụtụrụ ọhaneku lẹ, iSolomọn a tụụbwọ hi ọng myị ọng rụ ka ẹpwa nyamwụ lẹlẹ. Angịnyị wuu mịla oja nya adịrahụ lẹ, ị rụ lọkẹkẹnị chajị nya ahị ọwawa ịlẹ wuu ká Amkpaa ya ha iDevidi ọnchẹ nyamwụ bala ala Isirẹlụ angịnyị nyamwụ wuu lẹlẹ.