Read idege 1 Ịdịrịhụ 9 Bible Online

1 Ịdịrịhụ 9 - idege bible

1 Ịdịrịhụ 9

¹Ụka ká iSolomọn nwụ Ube nya Amkpaa kpá bala ẹpwang nya adịrahụ bala ang ịlẹ wuu kọ tịtọ kọ ka họ kpa wuu lẹ,

²Amkpaa-à chị ịlọmwụ ehe mẹjọọ myịmyị ugbabwọ oheeye jaabwọ kọ chị ịlọmwụ ehe họọ ụka kọ juwa iGibiyọn lẹlẹ.

³Ọọwa, Amkpaa-à byi iSolomọn yẹkẹẹ, “M̀ wo abwọ ọriri nyang bala ang ịlẹ ká bịlẹ bwu ẹga nyam nyam lẹ. M̀ chị ịgọgọ ju Ube Ịgọgọ ọlẹ ká me ham ká angịnyị ka raabwọ ham ụ-ụwa lẹ. M̀ka kpẹhị nyam rịrọọ ụka wuu. Irya nyam ka juwa ụka myị ụka.

⁴Ma ahụ tị lẹ, ó-ri ká ka myị-ị̀ myị ẹrụ ham lihi bala abwẹla ọnyịịla ọlẹpwụ ọkịlẹtụ nyang lala iDevidi adang, ká myị ju ihi nya ehile nyam bala ọ-họ ang myị ang ịlẹ kam bying nyọka họ aalẹ,

⁵m̀ ka họ ọnụ ọmyịmyị nyam ọlẹ kam myị ha iDevidi adang jịra. M̀ lẹẹ myị ọnụ họọ ya ọnyị ọtụma nyamwụ à ka ri adịrahụ nya ala Isirẹlụ ụka wuu lẹ.

⁶Ma, ọ́ tị ri kaahụ lee anyị ịtụma nyang á hịnyọ la ọ-dịrẹm-dịrẹ, kị rụ kaka kpụ́ ijiga juwa kpụ eteji haa

⁷aalẹ, m̀ ka mwaa rụ hi ọpyị ọlẹ kam hu haa-à wẹ. M̀ ka nyẹẹkpẹ da Ube Ịgọgọ ọlẹ kam chị ịgọgọ ju-ù wẹ nya ẹga ọ-ka gbịgba ham. Ọọwa, alẹpwụma ọnyị myị ọnyị à ka kpanụ hu utungguru bala ọ-yẹnụ ẹ-ẹpẹpẹ lẹlẹ.

⁸Ụka ọọwa, Ube Ịgọgọ ọlẹ ka kpụ egwawụ-egwawụ wuu lẹlẹ. Ọng myị ọng kọ chịpwụrụ ka chị abwigo bala ọ-yụbwọ ba ọnụ juwa towo yẹkẹẹ, ‘Anyị tị́ du ká Amkpaa họ ọpyị nya angịlẹ bala Ube Ịgọgọ ọlẹ ẹla ọlịịwẹ kpá-à wẹẹ?’

⁹Ụka ọọwa, angịnyị ka wẹ yẹkẹẹ, ‘Ajị nyọlẹ kị nyẹẹkpẹ da Amkpaa Ohe Oluhye nya adaa igogo ọlẹ kọ gbaa kpehe bwu ọpyị nya Ijipiti ịnyị. Ị rụ kaka kpụ ijiga juwa kpụ eteji haa à du ká Amkpaa kpa akama ịwẹ warị chaa ọgụ lẹ.’ ”

¹⁰ISolomọn nwụ Ube nya Amkpaa bala ẹpwa nya adịrahụ kpá ẹ-ẹpwụ nya ẹka iwo imiiye.

¹¹IHiram Adịrahụ nya ala ịTaya à lẹẹ ya ekeji nya isida bala ịpayịn bala okpoko ịgọm ịlẹ wuu ká iSolomọn kpa họ ẹla nya ẹpwang ịwẹ ọnwụnwụ họọ lẹ. Ajị nya ọọwa lẹ, iSolomọn go epweji ịtụka-ịtụka iwo imiiye ịhyẹ ọ-ọpyị nya ịGalili ha iHiram Adịrahụ nya ala ịTaya nya uri ọnwụnwụ.

¹²Ụka ụka ká iHiram warị bwu ịTaya ka yẹ epweji ịlẹ ká iSolomọn ya họọ, ị́ tị họ́ọ ka.

¹³Ọọwa, ọ byi iSolomọn yẹkẹẹ, “Ahyu! Oligu nyam, ọọwa ri epweji ịlịịlẹ à ri ang ká ye ham lẹlẹ-ẹ́?” Ọọ-lajị nya ọọwa lẹ, ị kaa wụrụ ẹgẹwẹ ịKabulu[1]

¹⁴IHiram lẹẹ ya okolo ụnọ ine (4,000) nya okpoko ịgọm du kịla iSolomọn Adịrahụ.

¹⁵Ọlẹ ri ọ-da ju nya ụkụrwọ nya igwabwọ ọlẹ ká iSolomọn Adịrahụ kpa angịnyị họ chajị nya Ube nya Amkpaa bala ẹpwang nya ẹchị-adịrahụ nya ịlọmwụ ọwa ayịdang bala ugulọ nya epweji. Ọ kpaa chị ikpirigidi ju ịkịka ọlọmwẹnụ-ụtụrụ bala ugulọ nya iJerusalẹm bala ịHasọ bala iMegido bala iGẹsẹẹ.

¹⁶Adịrahụ nya ala Ijipiti lẹẹ mwẹla ta ala ịGẹsẹẹ, nwụ alụwa wuu, ọ jụ epweji ọwẹ ila hụrụ. Adịrahụ hu epweji nya ịGẹsẹẹ ọwẹ ga ha ọnyị nyamwụ ọlẹ kọ rụrwọ iSolomọn nya ang o-ju ahụ olo lụka nya ọrụ ọrwọrwọ nyamwụ lẹ,

¹⁷iSolomọn à ma ịGẹsẹẹ nwụ́ lẹlẹ. Ọ kpa alụkụrwọ nya igwabwọ nyamwụ nwụ ịBẹtị-ịhọrọn Oleji ịnyịnyị bala

¹⁸ịBaalatị bala ịTamaa olugbileji nya iJuda ịnyịnyị.

¹⁹ISolomọn Adịrahụ nwụ epweji ịlẹ kọ ka ya ang datị-datị guru bala epweji ịlẹ kị ka ri nya anyịrẹ bala ang ịrụnyẹ nyamwụ bala ụma nya ịngịngịhyẹ ọkịla ọlẹ kọ tịtọ kọ ka nwụ i-iJerusalẹm bala iLibanọn bala ẹ-ẹgẹgẹhẹ nya ọpyị nyamwụ wuu.

²⁰Angịlẹ wuu kị ri ala Isirẹlụ ka, kị ri ala Amọ bala ala iHiiti bala ala iPerisi bala ala iHivi bala ala iJebusi, kị hị kụ iKenan wẹẹ

²¹ri anyị ịtụma nya alẹpwụma ịlẹ ká ala Isirẹlụ-ụ́ ta ayịreji gbanggbang ka. Angịlẹ wuu iSolomọn à yẹ juju gyaa kpa họ ụkụrwọ nya igwabwọ ha ịlọmwụ lẹ.

²²ISolomọn Adịrahụ-ụ́ tị wu ọla Isirẹlụ ọhẹ-lọhẹ kpa họ ụkụrwọ nya igwabwọ ha ịlọmwụ lala ọnyọhị ka. Ala Isirẹlụ ọ go ri angịdẹwụ bala alegbeju ịtụkụ yoo bala alegbeju nya angịdẹwụ bala angị kụ anyịrẹ bala angị kụ ang ịrụnyẹ nyamwụ lẹ.

²³ISolomọn chụ alegbeju angị ohu ịrụ da angị iwo ịrụ (550) ịlẹ kị ka kpẹhị rịrị ụkụrwọ nya ẹpwang imeme datị-datị ịlẹ kọ kpa ụ-ụbwọ.

²⁴ISolomọn chị ikpirigidi ju ọpyị nyamwụ bwu ịkịka ọlọmwẹnụ-ụtụrụ ụka ká ahụ nyamwụ ọlẹ kọ ri ọnyị nya adịrahụ nya ala Ijipiti mwụ ka ẹpwa ọlẹ ká iSolomọn nwụ họọ kpá.

²⁵Ụka ịta ẹ-ẹpwụ nya ẹka, iSolomọn kaa kịla iya ọ-rụ bala iya nya ọhọlawụlẹ u-uhye nya ogidi ọlẹ kọ me ha Amkpaa. Ọ kaa ju ịtangare ila ha Amkpaa ịnyịnyị. Bwula ọọwa, ọ họ ang ịlẹ kị chịla nyọka họhọ u-uhye nya Ube nya Amkpaa jịra.

²⁶ISolomọn Adịrahụ họ agbọ nya enyi lụmẹ-lụmẹ e-Esiyọn-ịgẹbẹẹ ba Elotu ba ọ-ọnụ nya Ihu Oletungkohyo ọ-ọpyị nya Ẹdọm.

²⁷Ụka ọọwa, iHiram Adịrahụ du angịnyị nyamwụ ịlẹ kị jẹ-ẹ ju ụgbọ nya enyi yẹẹyẹẹ kaka ju agbọ nya enyi ta angịnyị nya iSolomọn.

²⁸Ụka ọọwa, ị ju ụgbọ nya enyi ịwẹ kele ọpyị nya Ofii lẹ, ị kpa okolo nya okpoko ụnọ iwo kụrụ ine (14,000) nya okpoko ịgọm nyà bwu ụwa wẹ iSolomọn.