Read idege 2 ỊDỊRỊHỤ 1 Bible Online

2 ỊDỊRỊHỤ 1 - idege bible

2 ỊDỊRỊHỤ 1

¹Ụka ká Ehabụ Adịrahụ nya ala Isirẹlụ gbu kpá, ala iMowabụ pwa ịwa nyị́ ka ji ekpeleji ala Isirẹlụ kaka.

²Ẹnẹhẹ lẹ, Ahasiya Adịrahụ nya ala Isirẹlụ à chabwọ bwu ọnụụkpa nya ube-oluhye nya ẹpwang nyamwụ ị-ịSameriya lẹ, ang à họọ aboji-aboji lẹlẹ. Ọọwa, ọ byi alerụ ịhyẹ yẹkẹẹ, “Anụ kele ka tọ ịBaalụsibọbụ ojiga nya ala Ẹkịrọn wo ham kọ ya jenu ó-ri kam ka jẹ-ẹ̀ hagụ bwu ẹpwụ nya ang ọlẹ kọ họm lẹẹ myị wẹẹ.”

³Ma, olegu-ẹrụ nya Amkpaa tị byi Ịlayịja ọla iTichibe yẹkẹẹ, “Kele ka tọ alẹrụ nya adịrahụ nya ala ịSameriya lalẹẹ ụ-ụgbẹyị ka taa wo wẹẹ. Ohe Oluhye-é jam Isirẹlụ ka-á? Ịyẹ tị du kị juwa kaka wo ẹla bwu ẹga nya ịBaalụsibọbụ ene-è? Ị me irya ká Ohe Oluhye-e jam ọ-ọpyị nya Isirẹlụ kaka-á?

⁴Ẹla ọlẹ kam Amkpaa ya ri yẹkẹẹ, ọ ka jẹ-ẹ wuleji bwu ẹpwụ nya ẹdụrụ ọwẹ kaka. Ẹdụrụ ọwẹ ka kpọọ ụ-ụbwọ pyii lẹ.” Ọọwa, Ịlayịja a kele lẹlẹ.

⁵Ụka ká alẹrụ nyà tịrẹkpẹ ka ẹga nya adịrahụ lẹ, ọ taa wo yẹkẹẹ, “Ịyẹ tị du kanụ nyà tịrẹkpẹ mẹ?”

⁶Alẹrụ a wọọ yẹkẹẹ, “Ọlẹng ọhẹ tọhi ụ-ụgbẹyị. Ọ byihi ahị nyị tịrẹkpẹ warị kaka bying mẹ, Amkpaa nyị yẹkẹẹ, ‘Ịyẹ nyaa tị du kaahụ nyị juwa du ẹrụ kaka wo ẹla bwu ẹga nya ịBaalụsibọbụ, ojiga nya ala Ẹkịrọn ene-è? Ahụ nyị me ká Ohe Oluhye nyị jam Isirẹlụ kaka-á? Ahụ nyị ka wuleji bwu ẹpwụ nya ẹdụrụ ọwẹ kaka. Ahụ nyị ka gbu pyii lẹ.’ ”

⁷Adịrahụ Ahasiya taa wo yẹkẹẹ, “Ọlẹng ọlẹ kọ tọnụ, kọ ya ẹlẹwẹ jenu tị lanyị-ị̀?”

⁸Ị wẹ byoo yẹkẹẹ, “Ọlẹng ọọwa bwu egbii huru-huru[1]. Ọ ya ugba ọchọhị chị.” Ọọwa, Adịrahụ Ahasiya a yẹkẹẹ, “Ọọngọkịla ọhẹ kpá kaka. Ịlayịja ọla iTichibe ịnyị.”

⁹Ọọwa, adịrahụ a du ọgẹwu ọlẹ ri olegbeju nya angịdẹwụ angị iwo ịrụ ẹrụ kele ka ẹga nya Ịlayịja lẹlẹ. Olegbeju nya angịdẹwụ ọwe yẹ Ịlayịja kọ hụhụ u-uhye nya ikiti. Ọọwa, ọ byi Ịlayịja yẹkẹẹ, “Onginyi nya Ohe Oluhye ee, adịrahụ ya ahụ nyi hireji, kaahụ nyị kẹwẹ.”

¹⁰Ma, Ilayịja wẹ byi olegbeju nya angịdẹwụ ọwẹ yẹkẹẹ, “Ó-ri kam ri ọnginyi nya Ohe Oluhye aalẹ, ila ā do bwu epwoohe ka rụng bala angị iwo ịrụ (50) nyang ịwẹ wuu.” Ọọwa ila à do bwu epwoohe ka rwọọ bala angị iwo ịrụ nyamwụ lẹlẹ.

¹¹Adịrahụ Ahasiya myịmyị du olegbeju nya angịdẹwụ ọkila bala angị iwo ịrụ kele ka ẹga nya Ịlayịja. Olegbeju ọọwa byi Ịlayịja yẹkẹẹ, “Ọnginyi nya Ohe Oluhye ee, adịrahụ ya ahụ nyị hireji lagaga páaa!”

¹²Ma, Ịlayịja wọọ yẹkẹẹ, “Ó-ri kam ri ọnginyi nya Ohe Oluhye aalẹ, ila ā do bwu epwoohe ka rụng bala angị iwo ịrụ (50) nyang ịwẹ wuu!” Ọọwa, ila à do bwu epwoohe ka rwọọ bala angị iwo ịrụ (50) nyamwụ lẹlẹ.

¹³Adịrahụ du olegbeju ọhata bala angịdẹwụ angị iwo ịrụ ẹrụ kele. Olegbeju nya angịdẹwụ ọhata ọwẹ à kele lẹ, ọ hirikpẹẹ ya arụụ kụ eji ha Ịlayịja lẹ, ọ bịlọọ yẹkẹẹ, “Ọngịnyị nya Ohe Oluhye ee, chuchuu chị chị ọhịhị nyam bala ịnya anchẹ nyang angị iwo ịrụ da mẹ, adam.

¹⁴Yẹ wẹẹ, ila do bwu epwoohe ka rụ alegbeju nya angịdẹwụ imiiye nya ọgbanyẹ bala angịnyị nyaa wuu. Ugbẹnyị tị lẹ, chuchuu chị ọhịhị nyam da mẹ-ẹ̀.”

¹⁵Ọọwa, olegu-ẹrụ nya Amkpaa à byi Ịlayịja yẹkẹẹ, “Hireji bọọ kele mẹ. A ju uhi nyamwụ ka.” Ọọwa, ọ hu ang hireji bọọ kele ka ẹga nya adịrahụ lẹlẹ.

¹⁶Ọọwa, Ịlayịja à byi Ahasiya yẹkẹẹ, “Ịịlẹ Amkpaa-à ya lẹ, ‘Ọlẹ kpakpaakpa ká du alẹrụ kaka tọ ẹla wo bwu ẹga nya ịBaalụsibọbụ, ojiga nya ala Ẹkịrọn lẹ, Ohe Oluhye-é jam ọ-ọpyị nya Isirẹlụ kpụ a ka tọọ wo kaka-á? Ọọ-lajị nya ọhọhọ nyang ọwẹ lẹ, á ka wuleji bwu ẹpwụ nya ang ọlẹ kọ họng-ǹg wẹ kaka. A ka gbu pyii lẹ.’ ”

¹⁷Ọọwa, adịrahụ a gbu jaabwọ ká Amkpaa ya bwula Ịlayịja lẹlẹ. Ahasiya-á ma ọnyị ọlẹng ka lẹ, iJoram ọnyịnamwụ ọlẹng[2] à ri adịrahụ kwiwa nyamwụ lẹlẹ. Ụka ọwẹ pwoku ẹka oheeye nya adịrahụ oriri nya iJehoram ọnyị nya iJehochafatị Adịrahụ nya ala iJuda.

¹⁸Ang myị ang ịkịla ịlẹ ka Adịrahụ Ahasiya họ wuu lẹ, ị daa ju ụ-ụpwụ nya Ego nya Ịdịrịhụ nya ala Isirẹlụ.