Read idege 2 ỊDỊRỊHỤ 10 Bible Online

2 ỊDỊRỊHỤ 10 - idege bible

2 ỊDỊRỊHỤ 10

¹Ụka ọọwa, anyị ịtụma nya Ehabụ la angịnyị angị iwo irwiye kị kụ e-epweji nya ịSameriya. IJehu da ileta du kịla alegbeju nya epweji nya ịSameriya bala ịbagọ ilihi-ihi ịlụwa tụ angị kaa kpẹhị rịrị anyị nya Ehabụ. Ẹla ọlẹ kọ da i-ileta ọọwa ri ịịlẹ:

²“Anyị ịtụma nya Ehabụ adịrahụ tị́-ị̀ wẹ ụ-ụbwọ nyanụ lẹ. Anụ tị la ang ịrụnyẹ bala anyịrẹ bala ang-ab tị wẹẹ kpẹhị rịrị anjwo nya Ehabụ ayịbanụ tẹ anyị ịtẹma nyamwụ, agbọ ịlịpyị bala anyịrẹ ị-kpa dẹwẹ wuu, tẹ ịlẹ kị chị ajẹ dagaga juwọ nya ẹwụ bala epweji ọlẹ kị me ugulọ dagaga ju-ù wẹ lẹ. Lẹẹlẹ, ụka ká ileta ọlẹ-ẹ́ wunu ọyị bwaaa lẹ,

³anụ chụ ọnyị nya Ehabụ ayịbanụ ọlẹ kọ pwoku gụ wuu, kanụ hwoo ri adịrahụ mẹ, kanụ tị̀tị̀ nwụlanọ nyọka dẹwụ yẹ ugbiyegu nya Ehabụ Adịrahụ dada mẹ.”

⁴Ụka ká alegbeju ịla ịSameriya wa ụpwụ ọọwa, ị dapwụ hụ amẹ. Ọọwa, ị byi awụlẹ yẹkẹẹ, “IJoram Adịrahụ bala Ahasiya Adịrahụ anyị-ị́ jụ ọnụ nya ẹla nya iJehu myị ka. Ee lẹ, ahị tị́ ka họ anyị kahị ka bá ẹla tọọ myị-ị̀?”

⁵Ọọwa, alegbeju ịkpẹhị rịrị ẹpwa nya adịrahụ bala epweji bala ịbagọ tụ angị kpẹhị rịrị anyị nya adịrahụ à yọnụ da awụlẹ du ẹrụ kaka byi iJehu yẹkẹẹ, “Anchẹ nyang ahị ri lẹ. Ẹla myị ẹla ká byihi nyị họ ahị ka họ lẹ. Áhị juwa hu ọngọngọhẹ adịrahụ koo. Jaabwọ myị abwọ kọ hagụ i-irya nyang lẹ, à họ mẹ.”

⁶Ọọwa, iJehu a da ụpwụ ọkịla du kịlaa kaka byaa yẹkẹẹ, “Ó-ri kanụ ji oye nyam, kanụ myị ọnụ nyọka jum ihi lẹ aalẹ, anụ kele kanụ anyị alẹng nya Ehabụ egbeju kpa wam wẹ iJesiryẹlụ amachanyị ụka ọlịịlẹ ijuju mẹ.” Ụka ọọwa, anyị ịtụma angị iwo irwiye nya Ehabụ ịịwa hụ ta ịbagọ ilihi-ihi ịla ịSameriya. Ịwa-à kpa anyị ịwẹ nwà bwu enjwo-enjwo bẹdẹẹ lẹ.

⁷Ụka kị wa ileta oheeye nya iJehu lẹ, ị kele kaka nwụ anyị alẹng angị iwo irwiye nya Ehabụ ịịwa lẹ, ị ya egbeju nyaa ju e-edo du ẹrụ kịla iJehu i-iJesiryẹlụ lẹlẹ.

⁸Ọọwa, ọlẹrụ à kele kaka byi iJehu yẹkẹẹ, “Ị kpa egbeju nya anyị alẹng nya Ehabụ warị lẹ-ẹ̄.” Ọọwa, ọ da ehile yẹkẹẹ, “Kpaa kele ka ọnụ-ogirigba nya epweji kanụ ya guru ebwo imiiye gbudum gbee da ka alụtụrụ ọọnamwụ mẹ.”

⁹Ụka ká ahị pyẹ lụtụrụ kọ kpehe ka godayị rịrị ọ-ọnụ-ogirigba lẹ, ọ byi angịlẹ wuu kị juwa yẹkẹẹ, “Aanụ à ju ọmwụ ẹlẹlẹhẹ koo. Am à kọ ju ayịbam iJoram Adịrahụ du kị nwọọ lẹ. Angịlẹ tị lẹẹ, oowo à tị́ nwaa ịwa wuu lẹẹ mẹ?

¹⁰Anụ tị́ jẹ lẹ, ẹla myị ẹla ká Amkpaa ya chajị nya ugbiyegu nya Ehabụ ka họ jịra ịnyịlẹhị. Amkpaa ya deeji ene bwula Ịlayịja ọnchẹ nyamwụ ya ẹlẹwẹ nyị ka lịnyị.”

¹¹Ọọwa, iJehu à nwụ aanịna nya Ehabụ ịlẹ kị kụ i-iJesiryẹlụ wuu bala alegbeju ịtụkụ yoo bala aligu nyamwụ bala angịkiliya nyamwụ wuu lẹlẹ. Ọ nwaa kpá la ọngọ ookpokpo hi lahị ka.

¹²Ọọwa, iJehu à hu bwu iJesiryẹlụ nyọka kele ka ịSameriya lẹlẹ. Ụka kọ jẹ pwụ ẹgẹhẹ kị wụrụ Ẹga Ọchịkụ nya angịgbikpịlọ,

¹³iJehu tọ aanịna nya Ahasiya Adịrahụ nya ala iJuda. Ọ taa wo yẹkẹẹ, “Oowo anyị anụ tị́ ri?” Ị wẹ byọọ yẹkẹẹ, “Aanịna nya Ahasiya Adịrahụ ahị ri lẹ. Ahị wẹẹ jẹ kaka wụla anyị alẹng nya Ehabụ Adịrahụ bala iJesebẹlụ Adịrahụ Ọnyang yẹ.”

¹⁴Ọọwa, iJehu à byi angịnyị nyamwụ yẹkẹẹ, “Anụ waa lahị-lahị kpa rụ kịnyaa.” Ọọwa, ị wu anyị angịnyị angị iwo ine kụrụ imiiye ịịwa pyẹẹ lẹ, ị nwaa ẹ-ẹga nya ịwẹẹlụ ọlẹga Ọchịkụ nya Angịgbikpịlọ lẹlẹ. Ọngọngọhẹ nyaa-á be rụ myị ka.

¹⁵Ụka ká iJehu yegiri bwu ẹgẹwẹ, ọ tọ iJonadabụ ọnyị nya iRekabụ kọ wẹẹ jẹ warị wẹ ẹga nyamwụ. Ị dọnụ cha awụlẹ kpá lẹ, iJehu à byọọ yẹkẹẹ, “IJonadabụ ee, am lẹ, m̀ myị ẹla jung ka ọkịlẹtụ nyam wuu lẹ. Ahụ tị bẹẹ? À myị ẹla jum ịnyịnyị-ị́?” IJonadabụ wẹ byọọ yẹkẹẹ, “Ee m̀ myị jung ịnyịnyị.” Ọọwa, iJehu à byọọ yẹkẹẹ, “Ó-ri ịnyị aalẹ, tị̀ tị̄ ye ụbwọ mẹ.” IJonadabụ nịra ụbwọ nyamwụ kpaa lẹ, iJehu à yụbwọ chọọ ju ka ẹpwụ nya ang ọrụnyẹ nyamwụ lẹlẹ.

¹⁶Ọọwa, iJehu a byọọ yẹkẹẹ, bam warị ka yẹ jaabwọ kam kpa ọkịlẹtụ nyam wuu ba Amkpaa jẹ kaka ba mẹ. Ọọwa, ị bajẹ ẹ-ẹpwụ nya ang ọrụnyẹ nyamwụ lawụlẹ kele ka ịSameriya lẹlẹ.

¹⁷Ụka kị pwụ ịSameriya, iJehu nwụ aanịna nya Ehabụ wuu la ọngọngọhẹ nyaa-á hi lahị ka jaabwọ ká Amkpaa ya nyị ka la.

¹⁸Ọọwa, iJehu a tụ ala ịSameriya wuu guru lẹ, ọ byaa yẹkẹẹ, “Ehabụ lẹ, ọwa kaa kpụ eteji ha ịBaalụ pyịnyẹng-pyịnyẹng. Am tị lẹ, m̀ ka kpụ eteji họọ ọgwọgụ.

¹⁹Lẹẹlẹ, anụ wụrụ alọmwụ nya ịBaalụ wuu ham bala angị kaa kpụ eteji họọ bala angịkiliya nyamwụ wuu. Ọngọngọhẹ ā hi lọwẹwẹ kokoo. M̀ juwa ka la ọhụhụ nya iya ọkịlaakịla ọtụka-ọtụka ha ịBaalụ. Ọngọngọhẹ kọ hi lẹ aalẹ, ị ka nwụ ọngọọwa pyii lẹ.” Ijẹẹhị iJehu à tị wẹẹ họ chajị kọ ka go angị kaa kpụ eteji ha ịBaalụ wuu nwụ lẹ.

²⁰Ọọwa, iJehu a yẹkẹẹ, “Anụ wụrụ ọhụhụ nyọka gbịgba ha ịBaalụ mẹ oo!” Ọọwa, ị họ ịnyị lẹlẹ.

²¹IJehu du ẹrụ chị Isirẹlụ ọnụ wuu kaka wụrụ angị kaa kpụ eteji ha ịBaalụ. Ị wẹ kaka myị ube nya ịBaalụ bwu ọbaba ọhẹ ju ka ọbaba ọkịla.

²²IJehu byi ọngọlẹ kọọ kpehị rịrị ịwụrụ ịlịgọgọ nya angị kpụ eteji ha ịBaalụ ya nyị kpa ịwụrụ warị chajị ká ịwa angị gbịgba wuu ka kụrụ ịwụrụ ịwụrụ ịịwa.

²³Ụka ọọwa, iJehu lịlọmwụ jụ kele ka ẹpwang nya ịBaalụ bala iJonadabụ ọnyị nya iRekabụ. Ọọwa, ọ byi angị kaa kpụ eteji ha ịBaalụ wuu yẹkẹẹ, “Anụ kpẹhị dọgịlẹ ju wuu wẹẹ, angị kaa kpụ eteji ha ịBaalụ kem à ka jam ẹ-ẹpwang lẹ. Ānụ myị ká ọngọngọhẹ nya angị ka gbịgba ha Amkpaa-ā tụ wẹ ẹgẹlẹ koo.”

²⁴Ọọwa, ọwa bala iJonadabụ à kele ka ẹpwang nyọka kịla iya ọ-rụ ila lẹlẹ. IJehu lẹẹ ya angịdẹwụ angị iwo ineku kụ odehe nya ẹpwang ọọwa. Ọ lẹẹ daa ọna yẹkẹẹ, “Ánụ-ụ̀ nwụ angịwẹ wuu mẹ. Ọngọngọhẹ nyanụ kọ pẹhi ọngọhẹ nyaa be aalẹ, ọngọọwa ka ya ọhịhị nya ịlọmwụ kwiwa nya ọngọlẹ kọ rụnyẹ rụ.”

²⁵Ahyaahị ká iJehu kịla iya ọ-rụ ila kpá lẹ, ọ byi angịgbeji bala angịdẹwụ yẹkẹẹ, “Anụ jụ kele kanụ nwụ angịwẹ wuu mẹ. Ānụ myị ká ọngọngọhẹ ā gụụnụ be koo.” Ọọwa, ị jụ kele lẹ, ị nwaa wuu loge nyaa lẹlẹ. Angịgbeji bala angịdẹwụ ịwẹ gbile egu nyaa chị ka odehe. Ọọwa, ị rụ bwu ẹgẹwẹ kele ka ẹpwụ ọlẹpwụ nya ube nya ịBaalụ lẹlẹ.

²⁶Ị gba ukpeku nya ịBaalụ kpehe kaka chị ịla.

²⁷Ị tụrụ ukpeku ọọwa ju eji bala ọ-ta ube nya ịBaalụ ayịreji lẹ, ị yẹ ụwa la ohuku nya alụma lẹlẹ. Ị kaa ka ohuku ka ụwa Isirẹlụ daalẹ wẹẹ.

²⁸Ịịwẹ iJehu à bwu ta ẹtẹ ọ-kpụ eji ha ịBaalụ ayịreji hi Isirẹlụ lẹlẹ.

²⁹Ọ́ tị hu angịnyị abwọ lịgba ọgbagba ha ịna nya okpoko ịgọm ịlẹ kị me rịrị ị-ịBẹtẹlụ bala ịDan ka. Ọ kịnyaa ẹ-ẹpwụ nya ọhọbịrị ọlala ịnya iJerobowam Adịrahụ ọnyị nya iNebatị ọlẹ kọ kpa ala Isirẹlụ kaka ju ka ẹpwụ nya ọhọbịrị ọhọhọ.

³⁰Ụka kọ nọ chẹẹ lẹ, Amkpaa-à byi iJehu yẹkẹẹ, “Yẹ mẹẹ, à họ kpẹẹkpẹẹ ba ehile nyam jẹ jaabwọ kam me obyi nyọka ta ugbiyegu nya Ehabụ ayịreji wuu lẹ. Lẹẹlẹ, m̀ jam myị ọnụ hang nyori anyị ịtụma nyang ka ri adịrahụ am̀ Isirẹlụ bawụlẹ-bawụlẹ ju ka oyi ohene gbẹgbịlẹ.”

³¹IJehu-ú tị myị kpa ọkịlẹtụ nyamwụ wuu ba ehile nya Amkpaa Ohe Oluhye nya ala Isirẹlụ jẹ ka. Ọkọkọ nya ọọwa, ọ kịnyaa juwa kpụ eteji ha ijiga lala iJerobowam ọlẹ kọ kpa ala Isirẹlụ kaka ju ka ẹpwụ nya ọhọbịrị ọhọhọ.

³²Ụka ọọwa, Amkpaa dọmwụ nyọka chụ ọpyị nya ala Isirẹlụ hi. ỊHasẹlụ Adịrahụ nya ala iSiriya kụrụ ala Isirẹlụ ye ọpyị nyaa la ẹ-ẹga datị-datị

³³bwu ọmwẹnụ-ụtụrụ nya ịJodan lalaala ka ju ka epweji nya Aroyẹẹ ba Ọkpọọ nya Anọn ba. Ẹgẹwẹ ri ọpyị nya iGiliyadị bala ịBachan ẹga ká alimwawụ nya ịGadị bala iRubẹn bala ịManasẹ kụ.

³⁴Ang myị ang ịkịla ịlẹ ká iJehu wuu tụ ugbodu ojuju nyamwụ lẹ, ị daa ju ụ-ụpwụ nya Ego nya Ịdịrịhụ nya ala Isirẹlụ.

³⁵Ụka ká iJehu gbu, ị jwọọ eji i-iworu nya adamwụ anyị ị-ịSameriya. Ọọwa, iJehoyahasị à ri adịrahụ kwiwa nyamwụ lẹlẹ.

³⁶IJehu hụ ị-ịSameriya ri adịrahụ nya ala Isirẹlụ ẹka iwo imiiye kụrụ ineku.