Read idege 2 ỊDỊRỊHỤ 11 Bible Online

2 ỊDỊRỊHỤ 11 - idege bible

2 ỊDỊRỊHỤ 11

¹Ụka ká Ataliya wo Ahasiya Adịrahụ ọnyị nyọwa nyị gbu lẹ, ọ da ehile ya nyị nwụ angị ri alugbiyegu nya adịrahụ wuu mẹ lẹlẹ.

²IJehochẹba ọnyịnịna ọnyang nya Ahasiya, kọ ri ọnyị nya iJehoram Adịrahụ tị hu iJowachị ọnyị nya Ahasiya kpa ru hi angịkịla. Ọ kpọọ bala ọnyị ọnyang ọlẹ kọọ kpẹhị rịrọọ kaka kpịbaa u-ube ọlẹpwụ nya Ube nya Amkpaa hi Ataliya du kị nwọọ ka.

³IJowachị hụ u-Ube nya Amkpaa ẹ-ẹpwụ nya ẹka ịrwọnyẹ gbẹgbịlẹ lụka ká Ataliya ri adịrahụ kpẹhị rịrị ọpyị.

⁴Ụka kọ pwụ ẹka ọharwiye nya adịrahụ oriri nya Ataliya, iJehoyada ọngọkiliya du kaka wụrụ alegbeju nya angịdẹwụ bala angị gbe adịrahụ tụ angị gbe ẹpwa nya adịrahụ wuu wẹ Ube nya Amkpaa. Ụka kị pwụ ụwa, ọ họ ịwa wuu nwa iro họọ lẹnyị nya Amkpaa nyọka myị ju ang ọlẹ kọ juwa ka họ. Ọọwa, ọ mẹ iJowachị ọnyị nya Ahasiya Adịrahụ jaa lẹ,

⁵ọ byaa yẹkẹẹ, “Jaabwọ kanụ ka họ à lẹẹ lẹ: Ebwo ịta nyanụ à wẹẹ ka gbeji Ẹnụtụrụ Ọhịnyọ Lụkụrwọ lẹ. Alebwo ọhẹ ka gbe ẹpwa nya adịrahụ.

⁶Ebwo ọkịla nyanụ ka gbeji ogirigba nya iSuu ene ká alebwo ọhata ohihi nyanụ ka dayị juwa gbeji ẹ-ẹkpẹ nya angịgbeji ịkịla.

⁷Ebwo imiiye ịkịla nyanụ ịlẹ kị ji ụkụrwọ Ẹnụtụrụ Ọhịnyọ Lụkụrwọ ka-à wẹ ka gbeji u-Ube nya Amkpaa juwa gbe adịrahụ.

⁸Anụ godayị dagaga ju iJowachị Adịrahụ juwa gbọọ lang-abwọ nya ẹwụ nyanụ a-abwọ mẹ. Ọngọngọhẹ kọ jẹ yahị danụ aalẹ, anụ nwọọ.”

⁹Ọọwa, alegbeju nya angịdẹwụ à họ kpẹẹkpẹẹ jaabwọ ká iJehoyada ọngọkiliya ya lẹlẹ. Ọngọnọọng nyaa kpa angịdẹwụ ilekpeleji nyaa warị. Angị ka ji ụkụrwọ Ẹnụtụrụ Ọhịnyọ Lụkụrwọ tụ angị ka la ọmwịịnyọ ẹnụ ọọwa wuu wẹ kaka tọ iJehoyada ọngọkiliya.

¹⁰Ọọwa, ọ ya awangga bala akụmada ha alegbeju ịịwa lẹlẹ. Ang-agbwọ nya ẹwụ ịwẹ ri ịlẹ ká iDevidi Adịrahụ la ene, kị tị yaa nọ a-ang u-Ube nya Amkpaa.

¹¹Angịgbeji ịwẹ kụ lang-abwọ nya ẹwụ nyaa wuu dagaga ju Ube Ịgọgọ bala ogidi nyọka chẹwụ ke iJowachị Adịrahụ bwu ịkịka ọnyị myị ọnyị.

¹²Ọọwa, iJehoyada ọngọkiliya-à gba iJowachị ọnyị nya adịrahụ kpehe, ya okpo-adịrahụ kụrwọọ lẹ, ọ hu ụpwa nya ehile chajị nya ọpyị ọkpakpa họọ lẹ, ọ yoo dodehe nya adịrahụ oriri lẹlẹ. Ị ya ida hwọọ lẹ, angịnyị wuu à du abwọ họọ, juwa da iwuru jwoo yẹkẹẹ, “Adịrahụ ka pyẹ̀ẹẹ! Adịrahụ ka pyẹ̀ẹẹ!”

¹³Ụka ká Ataliya Adịrahụ ọnyang wo emwuru nya angịgbeji bala iru nya angịnyị, ọ kele ka Ube nya Amkpaa.

¹⁴Ọ yẹ adịrahụ onyeewe ọlẹ kị hu kọ godayị ba ọtachị nya Ube nya Amkpaa ba jaabwọ ká ọhọhọ ọlụka nya adịrahụ ohuhu ri. Ọ yẹ ká alegbeju nya angịdẹwụ bala angị chị ẹkụrwẹ dagaga jwoo bala angị ibwam̀-bwale wuu o-juwa da iwuru lọkẹkẹnị bala ọ-chị ẹkụrwẹ. Ọọwa, ọ gu ịwụrụ nyamwụ ene lẹ, ọ dakọ gboo yẹkẹẹ, “Ọpịrị-ha ịnyị! Ọpịrị-ha ịnyị!”

¹⁵Ọọwa, iJehoayada-à da alegbeju nya angịdẹwụ yẹkẹẹ, “Anụ gbọọ kpehe bwu ẹpwarịrị nya angịdẹwụ kanụ nwụ ọng myị ọng ọlẹ kọ juwa maga nyọka jwoo-ò ju tanụ. Ānụ tị nwọọ ọwa ju Ube nya Amkpaa chwẹẹ koo.”

¹⁶Ọọwa, ị wọọ pyẹẹ, kpọọ jẹ ka ẹpwa nya adịrahụ lẹ, ịnwọọ ẹ-ẹga nya ogirigba ọlẹ ká anyịrẹ kaa jụ bwu wẹ ọdọda nya adịrahụ lẹlẹ.

¹⁷Ụka ọọwa, iJehoyada họ iJowachị Adịrahụ bala ala alụma nwa iro ta Amkpaa nyọka ka ri angịnyị nya Amkpaa pyịyọọ. Ọ họ adịrahụ bala alụma nwa iro ha awụlẹ ịnyịnyị.

¹⁸Ọọwa, alụma wuu à kele ka ube nya ojiga ịBaalụ lẹ, ị tụrwọọ ju eji lẹlẹ. Ị be ogidi bala ekpeku ịlụwa ene hụrụ. Ị nwụ ịMatana ọngọkiliya nya ịBaalụ ị-ịlahị nya ogidi ịlụwa. IJehoyada ọngọkiliya chụ angịgbeji kpẹhị rịrị Ube nya Amkpaa.

¹⁹Ọọwa, ọwa bala alegbeju nya angịdẹwụ bala angị gbe adịrahụ bala angị gbe ẹpwa nya adịrahụ bala angịnyị wuu à kpa adịrahụ chị bwu Ube nya Amkpaa kele ka ẹpwa nya adịrahụ lẹlẹ. IJowachị jụ ka ẹpwa nya adịrahụ bwu ogirigba nya angịgbeji lẹ, ọ kele kaka hụhụ ẹ-ẹchị-adịrahụ lẹlẹ.

²⁰Angịnyị wuu chị ọkẹkẹnị. Okpunyi ji ọpyị ụka ọọwa, chajị ị nwụ Ataliya lẹ.

²¹IJowachị gu ẹka irwiye ụka kọ ri adịrahụ nya ala iJuda.