Read idege 2 ỊDỊRỊHỤ 12 Bible Online

2 ỊDỊRỊHỤ 12 - idege bible

2 ỊDỊRỊHỤ 12

¹Ẹ-ẹpwụ nya ẹka ọharwiye nyọlẹ ká iJehu ri adịrahụ nya ala Isirẹlụ iJowachị à dọmwụ nyọka ri adịrahụ nya ala iJuda lẹ. Ọ hụ i-iJerusalẹm ri adịrahụ ẹka iwo ine gbẹgbịlẹ. Ẹnyị nya ịnamwụ à ri iSibiya lẹ. Ọ bwu epweji nya iBiyẹchẹba.

²IJowachị họ ang ọlẹ kọ kpụ Amkpaa ọkịlẹtụ nyii lụka nya ọhịhị nyamwụ wuu, chajị iJehoyada ọngọkiliya mẹjọọ jaabwọ kọ ka họ.

³Ma, ị́ tị tụrụ ada ị-kpụ ijiga hụrụ ka lẹ, angịnyị kịnyaa juwa kịla iya bala o-ju ịtangare ila ụ-ụwa pyịyọọ.

⁴Ẹnẹhẹ, iJowachị Adịrahụ byi angịkiliya yẹkẹẹ, “Anụ tụ okpoko ọlẹ ká angịnyị wẹẹ kpa warị wẹ Ube nya Amkpaa nya ẹpwa ọnyẹnyẹ lee nyọka họ ọnụ ọmyịmyị nyaa jịra lee nya ọhaha o-bwu ọkịlẹtụ nyaa bawụlẹ mẹ.

⁵Ọngọngọọng nyanụ ā gba okpoko bwu ụwa nyọka kpa nwụla ẹgẹgẹhẹ nya Ube nya Amkpaa ọlẹ kọ bịrị mẹ.”

⁶Ma, gbee da ka ẹka iwo imiiye kụrụ ịta nya adịrahụ oriri nya iJowachị lẹ, angịkiliya-á tị nwụla ẹgẹgẹhẹ nya Ube nya Amkpaa lẹka.

⁷Ọọwa, iJowachị Adịrahụ à wụrụ iJehoyada bala angịkiliya ịkịla lẹ, ọ taa wo yẹkẹẹ, “Ọ tị́ lanyị kanụ nwụla Ube nya Amkpaa ka daalẹ-ẹ̀? Bwu ọlẹẹlẹẹ kịlahị lẹ, ānụ ye okpoko ọhẹ-lọhẹ ha ịlọnụ kaka. Ụkụrwọ nya Ube nya Amkpaa ọnwụla-nwụla ị ka kpa họ lẹlẹ.”

⁸Angịkiliya myị jwọọ nyori ịwa nyị́ ka ye okpoko bwu ụbwọ nya angịnyị kaka, ịwa nyị́ tị ka nwụla Ube nya Amkpaa lịlịịwa ka ịnyịnyị.

⁹Ọọwa, iJehoyada ọngọkiliya à hu akpa ọtụka ọhẹ, chọọ iwa ọ-ọnụ nyamwụ lẹ, ọ ya rịrị ịkịka olupwuriri nya ogidi ọ-ọnang nya Ube nya Amkpaa lẹlẹ. Ụka myị ụka ká ọngọhẹ-ẹ́ ha ọhaha, angịkiliya ịlẹ kị ji ụkụrwọ ọ-ọnang kaa ye okpoko ọọwa kpa kaka ju ka ẹpwụ nya akpa ọọwa.

¹⁰Ụka myị ụka ká okpoko-ó myị̀ akpa ọwẹ, akịraa nya adịrahụ bala Olegbeju Okiliya kaa kele kaka wa okpoko ọọwa. Lẹ, ị kaa gyaa ju ahụtọọ lẹlẹ.

¹¹Ụka kị da ju jaabwọ ká okpoko ọọwa la ka ba, ị ka ya ju alegbeju ịkpẹhị rịrị ụkụrwọ nya Ube nya Amkpaa lẹ, ị kaa kpa okpoko ọọwa nwụ̀ ikebenta bala angị nwụ ịnawụ

¹²bala angị me egwalọ bala angị be ajwọ uri lẹlẹ. Ịị kpa okpoko ọọwa ra ekeji bala ajwọ ịlẹ kị ka kpa nwụla Ube nya Amkpaa bala ọ-kpa nwụ̀ uri nya ang myị ang ịkịla ịlẹ kị baba ẹ-ẹpwụ nya ụkụrwọ nya Ube nya Amkpaa ọnwụla-nwụla.

¹³Ị́ kpa okpoko ọwẹ nwụ̀ uri nya ekeku nya okpoko onyoowuru lee ịja lee ẹkụrwẹ lee ang ị-kpa chị ebyi nya itinika lee ang ịkịla ịlẹ kị họ lokpoko ịgọm lee okpoko onyoowuru kpịlọ ka.

¹⁴Ị hwoo wuu ha alụkụrwọ nya Ube nya Amkpaa ọnwụla-nwụla kị ka kpa họ ang myị ang ọlẹ kọ baba.

¹⁵Ajị nyọlẹ ká alegbeju ịkpẹhị rịrị ụkụrwọ ọwẹ họ kpẹẹkpẹẹ lụmẹ chịla o-hu ọkịlẹtụ ha lẹ, ọngọhẹ-ẹ́ tụtụm byaa ya nyị kụ ang achụ jaabwọ kịị nyị kpa okpoko ọọwa họ ụkụrwọ kaka ba mẹ kaka.

¹⁶Okpoko ọlẹ kọ ri nya iya ọ-wụ́ abyị bala ịnya iya ọ-hụ́ ọhọbịrị lẹ, ị́ kpa ịịwa wẹ Ube nya Amkpaa kaka. Ị ya ịịwa ha angịkiliya, chajị ị ri nyaa.

¹⁷Ụka ọlịnyịnyị, ịHasẹlụ Adịrahụ nya ala iSiriya hu ang kaka mwẹla ta epweji nya ịGaatị kpụ ọ kụrụ. Ọọwa, ọ jahị kpáta nyọka dẹwụ ta iJerusalẹm ịnyịnyị lẹlẹ.

¹⁸Ọọwa, iJowachị Adịrahụ nya ala iJuda à go ang ịlẹ wuu kọọwa ayịdang tụ iJehochafatị bala iJehoram bala Ahasiya ịdịrịhụ ilene nyamwụ ya ha ọhaha lẹlẹ. Ọ go okpoko ịgọm ịlẹ kị juwa ẹ-ẹga ọ-ya okpoko nọ u-Ube nya Amkpaa bala ịlẹpwa nya adịrahụ dala ang nya ọhaha ịịwa lẹ, ọ ya du kịla ịHasẹlụ lẹlẹ. Ọọwa, ịHasẹlụ à hịnyọ la ọ-mwẹla ta epweji nya iJerusalẹm lẹlẹ.

¹⁹Ang myị ang ịkịla ịlẹ ká iJowachị Adịrahụ họ wuu lẹ, ị daa ju ụ-ụpwụ nya Ego nya Ịdịrịhụ nya ala iJuda.

²⁰Alegbeju ịtụka yoo kọ jwọọ lẹ, ị nwọọ ị-ịBẹtịmilo ụ-ụgbẹyị o-bwu ka epweji nya iSila lẹlẹ.

²¹Ẹnyị nya alegbeju ịlẹ kị nwọọ ri iJosabadị ọnyị nya iChimiyatị bala iJehosabadị ọnyị nya iChomẹẹ. Ị ju iJowachị eji i-iworu nya adamwụ anyị e-Epweji nya iDevidi. Ọọwa, Amasiya ọnyị nyamwụ à ri adịrahụ kwiwa nyamwụ lẹlẹ.