Read idege 2 ỊDỊRỊHỤ 14 Bible Online

2 ỊDỊRỊHỤ 14 - idege bible

2 ỊDỊRỊHỤ 14

¹Ẹ-ẹpwụ nya ẹka oheeye nya nya adịrahụ oriri nya iJehowachị ọnyị nya iJehowahasị ụ-ụwa Isirẹlụ, Amasiya ọnyị nya iJowachị à dọmwụ nyọka ri adịrahụ nya iJuda lẹ.

²Amasiya gu ẹka iwo imiiye kụrụ ịrụ ụka kọ dọmwụ nya adịrahụ oriri nyamwụ. Ọ hụ iJerusalẹm ri adịrahụ ẹka iwo imiiye kụrụ ihikichu gbẹgbịlẹgbẹ. Ẹnyị nya ịnamwụ ri iJehowadin ọla iJerusalẹm.

³Amasiya họ ang ịlẹ kị kpụ Amkpaa ọkịlẹtụ nyii kpá, ọ́ tị dịrẹ Amkpaa kpẹẹkpẹẹ lala iDevid adamwụ ogogo myị ka. Ọ họ ẹla gbịla iJowachị adamwụ.

⁴Ị́ ta ada ị-kpụ ijiga ayịreji ka. Lẹẹlẹ, angịnyị kịnyaa juwa kịla iya bala o-ju ịtangare ila ụ-ụwa kịlahị-ịlahị.

⁵Ụka ká Amasiya yẹta rịrị e-eji giri-giri lala adịrahụ lẹ, ọ go alẹng ịlẹ kị nwụ adamwụ nwụ ịnyịnyị lẹlẹ.

⁶Ọ́ tị nwụ anyị nya alegbeju ịlẹ kị nwụ adamwụ ka. Ọ ju ihi nya ehile nya Amkpaa ọlẹ kị da ụ-Ụpwụ nya Ehile nya iMosisi yẹkẹẹ, “Ị́ ka nwụ adịda chajị nya ọ-họ tịpyọ nya anyị ka, ị́ tị ka nwụ anyị chajị nya ọ-họ tịpyọ nya adịda ka ịnyịnyị. Ọngọnọọng ka gbu chajị nya ang onyobyi ọhọhọ nya ịlọmwụ-ịlọmwụ.”

⁷Amasiya-à nwụ angịdẹwụ nya ala Ẹdọm angị ụnọ iwo (10,000) lẹẹ ọ-Ọkpọọ nya Ịma. Ọ kụrụ epweji nya ịSẹla ịnyịnyị lẹ, ọ yẹ ẹnyị nyamwụ da kaka ri iJokitẹlụ ọlẹ kọ ri ẹnyị nya ụwa daalẹ.

⁸Ẹnẹhẹ, Amasiya du alẹrụ nyamwụ ịhyẹ kele kaka da iJehowachị Adịrahụ nya ala Isirẹlụ uya yẹkẹẹ, “Á ri ọlẹng aalẹ, à kpehe warị kaka tọm ọ-ọgbẹwụ wẹẹ.”

⁹Ọọwa, iJehowachị Adịrahụ nya ala Isirẹlụ à wẹ tịrẹkpẹ du kịla Amasiya yẹkẹẹ, “Ụka ọhẹ juwa ká ujwo-owuru ọhẹ ị-ịgbọdọ nya iLibanọn du ẹrụ tọ ùgboji ọtụka-ọtụka yẹkẹẹ, ‘Ya ọnyị nyang ha ọnyị ọlẹng nyam ye mẹ-ẹ̀.’ Ọọwa, iyo ọlẹpwamẹ ọhẹ à tị chịpwụrụ kam lẹ, ọ bwu uhye nya ujwo ọwẹ doo abwọ yịgẹ-yịgẹ lẹlẹ!

¹⁰Amasiya ee, ịnyịlẹhị ịnyị, à kụrụ ala Ẹdọm. Ọọwa, ā wẹẹ myẹ gẹgẹẹgẹ chajị nya ọọwa lẹka le? Aa kpa ahị ohihi nya ọkụrụ-kụrụ nyang ọwẹ ba ẹ-ẹpwa nya ịlọng mẹ. Ịyẹ tị́ du ká wẹẹ bẹẹdọ nya ẹla ọlẹ kọ ka kpa akama wẹ uhye nyang bala angịnyị nyang wuu wẹ mẹ?”

¹¹Amasiya-á tị myị ke ụrụ ka. Ọọwa, iJehowachị Adịrahụ nya ala Isirẹlụ a wuleji langịdẹwụ nyamwụ ka epweji nya ịBẹtị-ịchẹmẹchị i-iJuda nyọka dẹwụ ta angịdẹwụ nya Amasiya Adịrahụ nya iJuda lẹlẹ

¹²Ala Isirẹlụ kụrụ ala iJuda chẹẹchẹẹ. Angịdẹwụ nyaa nyi epepe rụnyẹ rụ ka ẹpwa.

¹³IJehowachị Adịrahụ nya ala Isirẹlụ wu Amasiya Adịrahụ nya ala iJuda lahị-lahị nya ọlagba. Ọọwa, ọ yegiri bwu ẹgẹwẹ yahị da ka iJerusalẹm lẹlẹ. Ọ tụrụ ugulọ nya iJerusalẹm bwu Ogirigba nya Ifurem lalaala ka ju ka Ogirigba Ọlọtụpịrịhyo. Udiyo nya ẹgẹwẹ lala apatẹ ohu ịrwọnyẹ (600) lẹpwụ-lẹpwụ.

¹⁴Adịrahụ nya ala Isirẹlụ go okpoko ịgọm bala okpoko onyowuru bala ang-abwọ ị-kpa họ ụkụrwọ u-Ube nya Amkpaa bala ang-ụdụ ịlẹpwa nya adịrahụ wuu kpa ba ịlọmwụ rụ ka ịSameriaya. Ọ go angịnyị kpa rụ lala alagba ịnyịnyị.

¹⁵Ang myị ang ịkịla ịlẹ ká iJehowachị họ tụ jaabwọ ká ọngịrị nyamwụ la kaka ba bala ẹwụ ọlẹ kọ da ta Amasiya Adịrahụ nya ala iJuda lẹ ị daa ju ụ-ụpwụ nya Ego nya Ịdịrịhụ nya ala Isirẹlụ.

¹⁶Ụka ká iJehowachị gbu, ị jwọọ eji i-iworu nya adamwụ anyị ị-ịSameriya. Ọọwa, ọnyị nyamwụ kọ ri iJerobowan oheeye à ri adịrahụ kwiwa nyamwụ lẹlẹ.

¹⁷Amasiya Adịrahụ nya ala iJuda ri ehe tata ẹka iwo kụrụ ịrụ ẹ-ẹkpẹ nyọlẹ ka iJehowachị Adịrahụ nya ala Isirẹlụ gbu kpá.

¹⁸Ang myị ang ịkịla ịlẹ ká Amasiya họ wuu lẹ, ị daa ju ụ-ụpwụ nya Ego nya Ịdịrịhụ nya ala iJuda.

¹⁹Ụka ọhẹ, angịhyẹ i-iJerusalẹm me obyi nyọka nwụ Amasiya. Ọọwa, ọ rụnyẹ rụ ka epweji nya ịLakichị lẹlẹ. Tị kpokpọọkpọ aluji nyamwụ bá pyee kele kaka nwọọ ụ-ụwa.

²⁰Ị kpa ogu nyamwụ nyà wẹ iJerusalẹm ụ-ụnyịrẹ lẹ ị jwọọ eji i-iworu nya adamwụ anyị e-Epweji nya iDevidi lẹlẹ.

²¹Ụka ọọwa, ala iJuda hu Asariya ọnyị nyamwụ ọlẹ kọ gu ẹka iwo kụrụ ịrwọnyẹ nya adịrahụ kwiwa nyamwụ.

²²Asariya ye epweji nya Elatị tịrẹkpẹ wẹ iJuda bala ọ-mọọ nwụ ụka ká Amasiya adamwụ gbu kpá.

²³Ẹ-ẹpwụ nya ẹka iwo kụrụ ịrụ nya adịrahụ oriri nya Amasiya Adịrahụ nya ala iJuda, iJerobowam Oheeye ọnyị nya iJehowachị à dọmwụ nyọka ri adịrahụ nya ala Isirẹlụ lẹ. Ọ hụ ị-ịSameriya ri adịrahụ ẹka iwo ine kụrụ ookpokpo.

²⁴Ọ họ ang ọtịpyọ ba Amkpaa. Ọ́ myị nyẹẹkpẹ da ijiga ịkpụkpụ ịlẹ ká iJerobowam ọnyị nya iNebatị kpa ala Isirẹlụ kaka ju ka ẹpwụ nyamwụ ka.

²⁵Ọ ye ọpyị o-bwu ẹga Ọchịpwụrụ bwu ọla ịHamatị ẹ-ẹtẹ lalaala ka pwụ Ihu Ọlịma-ịma e-edii ọlẹ kọ ri nya ala Isirẹlụ ene-ene wuu tịrẹkpẹ. Ẹlẹwẹ ri ọ-họ jịra nya ẹla ọlẹ ká Amkpaa Ohe Oluhye nya ala Isirẹlụ ya bwula ọnchẹ nyamwụ iJona ọlọmwụ ọnyị nya Amitayị ọla ịGatị-ịhẹfẹẹ.

²⁶Amkpaa yẹ jaabwọ ká ala Isirẹlụ juwa yẹ akama onyuujujwo lụmẹ kaka ba. Ọ tị yẹ ịnyịnyị jaabwọ ká ọngọngọhẹ-ẹ́ ji nyọka daa ụbwọ kaka.

²⁷Ọ́ tị ri irya nya Amkpaa nyọka ta ala Isirẹlụ ayịreji gbanggbang pyịyọọ ka lẹ, ọ kpa iJerobowam Oheeye ọnyị nya iJowachị chaa da.

²⁸Ang myị ang ịkịla ịlẹ ká iJerobowam Oheeye họ tụ jaabwọ ká ọngịrị nyamwụ la kaka ba bala ẹwụ ịlẹ kọ da bala jaabwọ kọ ye ịDamasịkọsị bala ịHamatị tịrẹkpẹ bwu iJuda ha Isirẹlụ wuu lẹ, ị daa ju ụ-ụpwụ nya Ego nya Ịdịrịhụ nya ala Isirẹlụ.

²⁹Ụka ká iJerobowam Oheeye gbu, ị jwọọ eji i-iworu nya adamwụ anyị. Ọọwa, ịSẹkaraya ọnyị nyamwụ à ri adịrahụ kwiwa nyamwụ lẹlẹ.