Read idege 2 ỊDỊRỊHỤ 15 Bible Online

2 ỊDỊRỊHỤ 15 - idege bible

2 ỊDỊRỊHỤ 15

¹Ụka kọ nọ kaka pwụ ẹka iwo imiiye kụrụ irwiye nya adịrahụ oriri nya iJerobowam Oheeye ụ-ụwa Isirẹlụ lẹ, Usiya ọnyị nya Amesiya-à ri adịrahụ nya ala iJuda lẹlẹ.

²Ọ gu ẹka iwo kụrụ ịrwọnyẹ ụka kọ dọmwụ nya nyọka ri adịrahụ. Ọ hụ iJerusalẹm ria adịrahụ ẹka iwo ịrụ kụrụ imiiye gbẹgbịlẹ. Ẹnyị nya ịnamwụ à ri iJekoliya ọla iJerusalẹm lẹ.

³Usiya Adịrahụ họ ang ọnyịịla ị-ịlahị nya Amkpaa jaabwọ ká Amasiya adamwụ họ.

⁴Ị tị be ẹga ị-kpụ ijiga ene hụrụ ka lẹ, angịnyị kịnyaa juwa kịla iya bala o-ju ịtangare ila ụ-ụwa.

⁵Amkpaa yẹ Usiya Adịrahụ akama bwula du ẹdụrụ olugba nya ịnyịrọ wẹ uhye nyamwụ. Ẹdụrụ ọọwa-á myị hyoo ka gbee da ka ẹnụ kọ gbu. Ụka ọwẹ, ọ kụ ẹ-ẹpwa nya ịlọmwụ datị-datị chwee. Ọọ họ ụkụrwọ nya adịrahụ kaka. IJotam ọnyị nyamwụ à kaa kpẹhị rịrị ọpyị lụka ọọwa lẹ.

⁶Ang myị ang ịkịla ịlẹ ká Usiya Adịrahụ họ lụka nyamwụ wuu lẹ, ị daa ju ụ-ụpwụ nya Ego nya Ịdịrịhụ nya ala iJuda.

⁷Ụka ká Usiya gbu, ị jwoo eji i-iworu nya ịdịrịhụ e-Epweji nya iDevidi. Ọọwa, iJotam ọnyị nyamwụ à ri adịrahụ kwiwa nyamwụ lẹlẹ.

⁸ỊSẹkaraya ọnyị nya iJerobowam Oheeye dọmwụ nyọka ri adịrahụ nya ala Isirẹlụ lụka ká Usiya gu ẹka iwo ịta lala adịrahụ nya iJuda. Ọ hụ ị-ịSameriya ri adịrahụ jịra ọya ịrwọnyẹ.

⁹ỊSẹkaraya Adịrahụ họ ang onyobyị ị-ịlahị nya Amkpaa gbịla adamwụ igogo anyị. Ọ dịrẹ ọgụ-ẹpẹtẹ ọtịpyọ nya iJerobowam ọnyị nya iNebatị ọlẹ kọ kpa ala Isirẹlụ kaka ju ka ẹpwụ nya ọhọbịrị ọhọhọ.

¹⁰Ụka ọọwa ịChalum ọnyị nya ịJabẹchị kọ ju ịSẹkaraya Adịrahụ lẹ, ị nwọọ i-Ibiliyam lẹ, ọ ri adịrahụ kwiwa nyamwụ lẹlẹ.

¹¹Ang myị ang ịkịla ịlẹ ká ịSẹkaraya Adịrahụ họ wuu lẹ, ị daa ju ụ-ụpwụ nya Ego nya Ịdịrịhụ nya ala Isirẹlụ.

¹²Ọwẹ ri ọ-họ jịra nya ọnụ ọlẹ ká Amkpaa myị ha iJehu Adịrahụ. Ọ lẹẹ byoo yẹkẹẹ, “Anyị ịtụma nyang gbee ka ju ka oyi ohene ka ri adịrahụ hi ụbwọ ha awụlẹ am̀ Isirẹlụ.”

¹³Ụka ká Usiya ri adịrahụ nya iJuda lala ẹka iwo ịta kụrụ ihikichu lẹ, ịChalum ọnyị nya ịJabẹchị à dọmwụ nyọka ri adịrahụ nya ala Isirẹlụ lẹlẹ. Ọ hụ ị-ịSameriya ri adịrahụ ọya ookpokpo kẹnẹ-kẹnẹ.

¹⁴Ụka ọọwa, iMenahẹm ọnyị nya ịGadị bwu epweji nya iTiisa kele ka ịSameriya lẹ, ọ nwụ ịChalum lẹ, ọ ri adịrahụ kwiwa nyamwụ lẹlẹ.

¹⁵Ang myị ang ịkịla ịlẹ wuu ka ịChalum họ tụ ẹla nya obyi onyobyi ọlẹ kọ me lẹ ị daa ju ụ-ụpwụ nya Ego nya Ịdịrịhụ nya ala Isirẹlụ.

¹⁶Ụka ọọwa, iMenahẹm ta epweji nya ta epweji nya ịTapuwa ayịreji bala alụwa wuu tụ epweji ịlẹ kị kụ dagaga jwaa lalaala kaka pwụ iTiisa, chajị alụwa-á myị tụ hi epweji nyaa họọ ka. Ọ dọmwụ gu anyang ịlẹnyị ịlụwa wuu ẹpwụ ene.

¹⁷Ụka ká Usiya ri adịrahụ nya iJuda jịra ẹẹka iwo ịta kụrụ ihikichu lẹ, iMenahẹm ọnyị nya ịGadị dọmwụ nyọka ri adịrahụ nya Isirẹlụ lẹlẹ. Ọ hụ ị-ịSameriya ri adịrahụ ẹka iwo chiriri.

¹⁸Ọ họ ang onyobyi ba Amkpaa gbee da ka ẹnụ kọ gbu. Lụka nya adịrahụ oriri nyamwụ, ọ dịrẹ ọhọhọ ịtịpyọ ịlẹ ka iJerobowam Adịrahụ ọnyị nya iNebatị ọlẹ kọ kpa ala Isirẹlụ ju ka ẹpwụ nya ọhọbịrị.

¹⁹Ụka ọọwa, iTigilatị-ịpịlẹsẹẹ[6] adịrahụ ọtụka nya ala Asiriya be ala Isirẹlụ ẹpwa. IMenahẹm tị ya okpoko onyoowuru ụnọ iwo ịta da ụnọ ine (34,000) họọ chajị kọ ka da iMenahẹm hụhụ giri-giri lala adịrahụ nya ala Isirẹlụ kịlahị.

²⁰IMenahẹm ye okpoko ọwẹ bwu ẹga nya alụdụ ịla Isirẹlụ. Ọ chị ọngọngọọng nyaa ụbwọ lokpoko onyoowuru iwo ịrụ. Ọọwa, iTigilatị-ịpịlẹsẹẹ à kpụba la ọ-mwẹla ta ala Isirẹlụ lẹ, ọ rụ tịrẹkpẹ ka ọpyị nyamwụ lẹlẹ.

²¹Ang myị ang ịkịla ịlẹ ká iMenahẹm họ wuu lẹ, ị daa ju ụ-ụpwụ nya Ego nya Ịdịrịhụ nya Isirẹlụ.

²²Ụka ká ịMẹnahẹm gbu, iPekahiya ọnyị nyamwụ à rị adịrahụ ku ọmwakpa nyamwụ lẹlẹ.

²³Ụka ká Usiya Adịrahụ gu ẹka iwo ịrụ nyọlẹ kọ ri adịrahụ nya iJuda, iPekahiya ọnyị nya iMenahẹm à dọmwụ nya adịrahụ oriri Isirẹlụ lẹ. Ọ ri adịrahụ ị-ịSameriya ẹka imiiye gbẹgbịlẹ.

²⁴Ọ họ ang onyobyi ba Amkpaa gbịla iJerobowam Adịrahụ ọnyị nya iNebatị ọlẹ kọ kpa ala Isirẹlụ ju ka ẹpwụ nya ọhọbịrị.

²⁵Ụka ọọwa, iPeka ọnyị nya ịRẹmaliya kọ ri ọngọhẹ ẹ-ẹpwụ nya alegbeju nya angịdẹwụ nya iPekahiya me obyi bala alẹng angị iwo ịrụ bwu iGiliyadị. Ọọwa, ị nwụ iPekahiya bala Arụgọbụ bala Ariyee u-ube ọlẹpwụ nya ẹpwa nya adịrahụ ị-ịSameriya lẹlẹ. Lẹ, iPeka a rị adịrahụ kwiwa nyamwụ lẹlẹ.

²⁶Ang myị ang ịkịla ịlẹ ká iPekahiya họ wuu lẹ, ị daa ụ-ụpwụ nya Ego nya Ịdịrịhụ nya ala Isirẹlụ.

²⁷Ẹ-ẹpwụ nya ẹka iwo ịrụ kụrụ imiiye nya adịrahụ oriri nya Usiya Adịrahụ nya ala iJuda, iPeka ọnyị nya ịRẹmaliya-à dọmwụ nyọka ri adịrahụ nya ala Isirẹlụ lẹ. Ọ ri adịrahụ ị-ịSameriya ẹka iwo imiiye.

²⁸Ọ họ ang ọtịpyọ ị-ịlahị nya Amkpaa gbịla iJerobowam Adịrahụ ọnyị nya iNebatị ọlẹ kọ kpa ala Isirẹlụ kaka ju ka ẹpwụ nya ọhọbịrị.

²⁹Ụka ká iPeka ri adịrahụ nya ala Isirẹlụ, Tigilatị-ịpịlẹsẹẹ Adịrahụ ọtụka nya ala Asiriya, warị ka dẹwụ ta ala Isirẹlụ. Ọ kụrụ epweji nya Ịjọn bala Ebẹlụ-ịbẹtị-ịmaaka bala ịJanowa bala ịKadẹchị bala ịHasọ tụ oye nya iGiliyadị bala ịGalili bala ọpyị nya ịNafụtali wuu ka ẹga kọ ba. Ọ wu alepweji ịwẹ kpa rụ nya anyịhị kele ka Asiriya.

³⁰Ụka ọhẹ, iHochiya ọnyị nya Ela me obyi onyobyi ju iPeka Adịrahụ lẹ, ọ nwọọ lẹlẹ. Ọ ri adịrahụ kwiwa nya iPeka lẹlẹ. Ọ dọmwụ nyọka ri adịrahụ nya Isirẹlụ ẹ-ẹpwụ nya ẹka iwo imiiye nya adịrahụ oriri nya iJotam ọnyị nya Usiya i-iJuda.

³¹Ang myị ang ịkịla ịlẹ ka iPeka họ wuu lẹ, ị daa ụ-Ụpwụ Ego nya Ịdịrịhụ nya ala Isirẹlụ.

³²Ẹ-ẹpwụ nya ẹka oheeye nyọlẹ ka iPeka ọnyị nya ịRẹmaliya ri adịrahụ nya ala Isirẹlụ, iJotam ọnyị nya Usiya-à dọmwụ nyọka ri adịrahụ nya ala iJuda lẹ.

³³IJotam gu ẹka iwo imiiye kụrụ ịrụ ụka ọọwa. Ọ hụ i-iJerusalẹm ri adịrahụ ẹka iwo kụrụ ịrwọnyẹ gbẹgbịlẹ. Ẹnyị nya ịnamwụ a ri iJerucha ọnyị ịSadọkọ lẹ.

³⁴IJotam họ ang ọnyịịla ịlahị nya Amkpaa jaabwọ ka Usiya adamwụ họ.

³⁵Ọ́ tị tụrụ ada ẹga ká angịnyị kaa kịla iya bala o-ju ịtangare ila ka. IJotam à ri ọngọlẹ kọ nwụ ogirigba Ọlẹtẹ nya Ube nya Amkpaa me lẹ.

³⁶Ang myị ang ịkịla ịlẹ ka iJotam Adịrahụ nya ala iJuda họ wuu lẹ, ị daa ju ụ-ụpwụ nya Ego nya Ịdịrịhụ nya ala iJuda.

³⁷Lụka nya adịrahụ oriri nya iJotam, Amkpaa dọmwụ nyọka du iResin Adịrahụ nya ala iSiriya bala iPeka Adịrahụ nya ala Isirẹlụ kaka mwẹla ta ala iJuda.

³⁸Ụka ká iJotam gbu, ị jwọọ eji i-iworu nya ịdịrịhụ e-Epweji nya iDevidi. Ọọwa, Ehasị ọnyị nyamwụ à ri adịrahụ kwiwa nyamwụ lẹlẹ.