Read idege 2 ỊDỊRỊHỤ 16 Bible Online

2 ỊDỊRỊHỤ 16 - idege bible

2 ỊDỊRỊHỤ 16

¹Ẹ-ẹpwụ nya ẹka iwo kụrụ irwiye nyọlẹ ká iPeka ọnyị nya ịRẹmaliya ri adịrahụ nya ala Isirẹlụ, ọọwa Ehasị ọnyị nya iJotam à dọmwụ nyọka ri adịrahụ nya iJuda lẹ.

²Ehasị gu ẹka iwo imiiye ụka kọ dọmwụ nyọka ri adịrahụ. Ọ hụ i-iJerusalẹm ri adịrahụ ẹka iwo kụrụ ịrwọnyẹ. Ọ́ hịhị gbịla iDevidi kọ ri adamwụ ogogo bwula ọ-họ ang ọlẹ kọ ka kpụ Amkpaa ugbodu nyii ka.

³Ọkọkọ nya ọọwa, ọ hịhị gbịla ịdịrịhụ nya ala Isirẹlụ ịkịla. Ọ dọmwụ hu ọnyị ọlẹng nyamwụ ọhẹ kịla iya ọ-rụ ila ha ojiga jaabwọ ká alụma ịlẹ ká Amkpaa ku hi ẹga da ha ala Isirẹlụ kaa họ.

⁴Ehasị kaa kịla iya ha ijiga bala o-ju ịtangare ila a-ada ikiliya bala i-ikiti bala okoji ọ-kpụ ụrụrụ ọnyị myị ọnyị.

⁵Ụka ká Ehasị ri adịrahụ, iResin Adịrahụ nya ala iSiriya bala iPeka Adịrahụ nya ala Isirẹlụ wẹ kaka da Ehasị ẹwụ. Ị bá urwe yẹ iJerusalẹm dada, ị́ tị kụrụ Ehasị myị ka.

⁶Ụka-ụka ọwẹ, adịrahụ nya ala Ẹdọm ye epweji nya Elatị tịrẹkpẹ bwu ụbwọ nya ala iJuda lẹ, ị ku ala iJuda ịlụwa rụ kpehe hi ụwa lẹlẹ. Ọọwa, ala Ẹdọm à mwụ bwọọọ kaka kụ Elatị lẹlẹ. Ị kụ ụ-ụwa daalẹ wẹẹ.

⁷Ehasị du ẹrụ tọ iTigilatị-ịpịlẹsẹẹ Adịrahụ nya ala Asiriya yẹkẹẹ, “Am ọnchẹ ọ-myị ẹrụ hang à wẹẹ bịlẹng ụbwọ ọdada lẹ. Chuchuu, kẹwẹ ká chịm da bwu ẹpwụtụbwọ nya adịrahụ nya ala iSiriya bala ịnya ala Isirẹlụ kị lẹẹ dam ẹwụ mẹ.”

⁸Ehasị go okpoko onyowuru bala okpoko ịgọm bwu Ube nya Amkpaa bala ẹpwa nya adịrahụ du kaka gà adịrahụ nya ala Asiriya.

⁹Ọọwa, adịrahụ nya ala Asiriya à myị ẹla nya Ehasị lẹ, ọ hu ang bala angịdẹwụ nyamwụ kele kaka gba mịla epweji nya ịDamasịkọsị kọ ri egbeju-ẹpwa nya ọpyị nya iSiriya lẹlẹ. Ị kụrụ ẹpweji ọwẹ, wu iResin Adịrahụ nwụ lẹ, ị go alụwa kpa rụ nya alagba kele kaka kụ i-iKiiri lẹlẹ.

¹⁰Ehasị Adịrahụ kele ka ịDamasịkọsị kaka yẹ iTigilatị-ịpịlẹsẹẹ Adịrahụ ọtụka. Ụka kọ juwa ị-ịDamasịkọsị, ọ yẹ ogidi okiliya ọhẹ ụ-ụwa lẹ, ọ ya ihwoto nya ogidi ọọwa bala abwọ ọchịchị jaabwọ kị ka bwu họọ du kịla Uriya ọngọkiliya lẹlẹ.

¹¹Ọọwa, Uriya-à họ ogidi jaabwọ ká Ehasị chabwọ nya ọhọhọ nyamwụ, nwụlọọ nọ gbe ọnyànya nyamwụ lẹlẹ.

¹²Ụka ká adịrahụ nyà bwu ịDamasịkọsị, ọ kele ka wụlọọ bala ọ-ka kịla iya u-uhye nyamwụ. Ọ wule ka uhye nyamwụ lẹ,

¹³ọ kịla iya ọ-rụ ila bala iya nya ajẹ nya ang-ẹrụ ụ-ụwa bala ọ-ya iya nya ere hwọọ lẹ, ọ nyí ịwọ nya iyo okiliya nya ọhọlawụlẹ hwọọ lẹlẹ.

¹⁴Ogidi nya oje ọnyọmịla nya Amkpaa rịrị apewa nya ogidi onyeewe bala Ube nya Amkpaa. Ehasị tị mwọọ bwu ụwa kpa ka rịrị ka ẹtẹ nya ogidi nyamwụ onyeewe.

¹⁵Ehasị Adịrahụ da Uriya ọngọkiliya ehile yẹkẹẹ, “U-uhye nya ogidi ọtụka onyeewe ọwẹ ā ka kịla iya ọ-rụ ila nya alụtụrụ bala iya nya ajẹ nya ang-ẹrụ nya alobyi lẹlẹ. Ị ka kịla ọ-rụ ila bala ịnya ajẹ nya ang-ẹrụ nya adịrahụ tụ ịnya alụma bala iya nya ere nya alụma ụ-ụwa ịnyịnyị. Aa nyí iwo nya iyo okiliya ọnyị myị ọnyị hwọọ ịnyịnyị mẹ. Ogidi nya oje ọnyọmịla onyogo ọlaanyị tị lẹ, ọwa ri ọlẹ kam kpa họ ang nya ụbwọ nya ịlọm lẹ.”

¹⁶Uriya ọngọkiliya họ kpẹẹkpẹẹ jaabwọ ká Ehasị Adịrahụ dọọ ehile ya nyị họ.

¹⁷Ọọwa, adịrahụ à hụla ekeji ịpapịla ịlịkịka bala ịja hi ang ịrụnyẹ kịị ya enyi rịrị u-Ube nya Amkpaa lẹlẹ. Ọ hiri irim nya enyi eji bwu uhye nya ịna nya oje ọnyọmịla iwo kụrụ imiiye kpaa kaka rịrị u-uhye nya ang ọlẹ kị họ lẹjwọ-ẹjwọ.

¹⁸Ajị nyọka họ kpụ Adịrahụ ọtụka nya Asiriya ịpyọ lẹ, Ehasị gba ọdụ ọhẹ kị họ nyọka hụ gbịgba Ẹnụtụrụ Ọhịnyọ Lụkụrwọ kpehe hi Ube nya Amkpaa. Ọ tụ ọnang ọlẹ ká adịrahụ kaa bwu ka Ube nya Amkpaa ku ịnyịnyị.

¹⁹Ang myị angị ịkịla ịlẹ ịlẹ ká Ehasị họ lẹ, ị daa ju ụ-ụpwụ nya Ego nya Ịdịrịhụ nya ala iJuda.

²⁰Ụka ká Ehasị gbu, ị jwọọ eji i-iworu nya adamwụ anyị e-Epweji nya iDevidi. Ọọwa, iHesekaya ọnyị nyamwụ à ri adịrahụ kwiwa nyamwụ lẹlẹ.