Read idege 2 ỊDỊRỊHỤ 17 Bible Online

2 ỊDỊRỊHỤ 17 - idege bible

2 ỊDỊRỊHỤ 17

¹Ẹ-ẹpwụ nya ẹka iwo kụrụ imiiye adịrahụ oriri nya Ehasị i-iJuda, iHochiya ọnyị nya Ela-à dọmwụ nyọka ri adịrahụ nya Isirẹlụ lẹ. Ọ hụ ị-ịSameriya ri adịrahụ ẹka ihikichu gbẹgbịlẹ.

²Ọ họ ang onyobyi ị-ịlahị nya Amkpaa. Ịnyamwụ-ụ́ tị tịpyọ lụmẹ lala ịnya ịdịrịhụ nya ala Isirẹlụ ịkịla ịlẹ kị jene nyamwụ myị ka.

³Ụka ọọwa, ịChalụmanẹsẹẹ Adịrahụ ọtụka nya ala Asiriya iSiriya wẹ kaka mwẹla ta iHochiya Adịrahụ. Ọọwa, ala Isirẹlụ à kaa nyẹ ẹpwa ọtụka-ọtụka ha ala Asiriya ẹka myị ẹka lẹlẹ.

⁴Ẹka ọhẹ, iHochiya kọ ju adịrahụ nya ala Asiriya. Ọ du kaka bịlẹ iSoo Adịrahụ nya ala Ijipiti kọ ka dọọ ụbwọ gbọọ kpehe hi ụbwọ nya ịChalụmanẹsẹẹ, chajị kọ ka hịnyọ la ẹpwa ọnyẹnyẹ họọ. Ụka ká ịChalụmanẹsẹẹ wo ẹla nya irikichi ọwẹ lẹ, ọ wu iHochiya kpa kaka ju agba lẹlẹ.

⁵Ụka ọọwa, ịChalụmanẹsẹẹ Adịrahụ ọtụka nya ala Asiriya be ọpyị nya Isirẹlụ ẹpwa, chị urwe ju epweji nya ịSameriya ẹka ịta gbẹgbịlẹ.

⁶Ẹ-ẹpwụ nya ẹka ohikichu nya adịrahụ oriri nya iHochiya, adịrahụ ọtụka nya ala Asiriya à kụrụ ịSameriya lẹ. Ị go ala Isirẹlụ nya alagba kpa rụ ka ọpyị nya Asiriya lẹlẹ. Ị kpa angịhyẹ nyaa kaka kụ e-epweji nya ịHala, ị ya angịkịla kụ tụ ọnụụka-ọnụụka nya Ihu ịHabọ o-oye nya iGosan da bala epweji nya ala iMidiya ịhyẹ.

⁷Akama ịwẹ wẹ chị ala Isirẹlụ ọgụ, chajị ị kpụ eteji ha ijiga, juwa họ ọhọbịrị ba Amkpaa Ohe Oluhye nyaa ọlẹ kọ gbaa kpehe bwu ọpyị nya Ijipiti.

⁸Ị gbịla ọhọhọ nya alụma ịlẹ ká Amkpaa ku hi ẹga da haa ụka kị wẹẹ kịnyaa ẹ-ẹpwụ nya ẹdịyẹ nyaa bala ọ-dịrẹ ọhọhọ ịtịpyọ ịlẹ ká ịdịrịhụ nya ala Isirẹlụ táa ụbwọ ba.

⁹Ala Isirẹlụ họ ang inyibyi lụmẹ-lụmẹ kpịbaa-kpibaa ịlẹ kị kpụ Amkpaa Ohe Oluhye nyaa ugbodu nyii ka. Ị nwụ ada ị-kpụ ijiga tụ epweji-epweji ịtụka bala ichiche nyaa da wuu.

¹⁰Ị ya ajwọ bala ekpeku nya Achẹra ojiga ọnyang nyaa rịrị i-ikiti ọnyị myị ọnyị bala e-ekpeleji nya okoji ọ-kpụ ụrụrụ ọnyị myị ọnyị wuu.

¹¹Ị ju ịtangare ila a-ada ị-kpụ ijiga wuu jaabwọ ká alụma ịlẹ ká Amkpaa ku hi ẹga haa kaa họ. Iru nya ang ịtịpyọ ịwẹ ká ala Isirẹlụ họ wuu du agbama ju Amkpaa lụmẹ.

¹²Ị kpụ eteji ha ijiga, ịnọ Amkpaa daa ehile ya nyị họ ịnyị kpong-kpong ka.

¹³Ụka lụmẹ-lụmẹ, Amkpaa du alọmwụ bala anchẹ nyamwụ kaka da ala Isirẹlụ bala ala iJuda ọna byaa yẹkẹẹ, “Anụ tịrẹkpẹ hi ụgbẹyị onyobyi nyanụ, kanụ ba ehile bala ọmẹjẹ nyam jẹ mẹ. Ịwa-à ri Ehile ịlẹ kam ya ha adanụ igogo anyị bala alọmwụ nyam kị ka kpa ya jenu lẹ.”

¹⁴Ala Isirẹlụ-ụ́ tị myị ju ihi nya ehile ọọwa ka. Ị la egbeju-ọngịrị lala adaa igogo anyị kị pwa ọ-ka myị la Amkpaa Ohe Oluhye nyaa.

¹⁵Ị pwa ehile nyamwụ bala iro ọlẹ kọ nwa ta adaa igogo bala ọna ịlẹ kọ daa wuu. Ị kpụ eteji ha ekpeku i-ju apyobwuna ka du kịịwa ayịdang tịtị ri angị ju apyobwuna nya ịngịngịhyẹ kaka. Ị dịrẹ ọhọhọ nya alẹpwụma ịlẹ kị kụ dagaga jwaa, juwa bịrị ehile ọlẹ ká Amkpaa daa ya nyị gbịlaa ka.

¹⁶Ị bịrị ehile ịlẹ ká Amkpaa Ohe Oluhye nyaa daa wuu, hu ang kele kaka họ ịna iloje-oje imiiye ịlẹ kị ka kpụ eteji ha. Ị họ ukpeku nya Achẹra ojiga ọnyang. Ịị kpụ eteji ha ịdịchụ bala ọ-myị ẹrụ ha ojiga ịBaalụ.

¹⁷Ị dọmwụ kaa go anyị alẹng bala anyị anyang nya ịlaa kịla iya ju ila ha ijiga. Ị kaa ye egino bala o-ri ụhwa, hu ịlaa ga ha ang onyobyi ọhọhọ ị-ịlahị nya Amkpaa, juwa du agbama jwoo.

¹⁸Amkpaa wụ ẹjẹ ta ala Isirẹlụ lụmẹ gbee kọ kwaa rụ hi ahị nya ịlọmwụ. Alimwawụ nya iJuda ụbwọọmwụ kẹnẹ-kẹnẹ a hi lẹlẹ.

¹⁹Ala iJuda wẹwẹ lẹ, ị́ myị kpa ehile nya Amkpaa Ohe Oluhye nyaa ka ịnyịnyị. Ang ịtịpyọ ịlẹ ká ala Isirẹlụ ye ju ụbwọ, ang ịịwa ị juwa họ lẹ.

²⁰Amkpaa pwa ala Isirẹlụ wuu, yaa akama bwula ọ-tụbwọ hyaa ju aluji nyaa ụ-ụbwọ gbee kọ kwaa rụ hi ijata nya ịlọmwụ.

²¹Ụka ká Amkpaa chị ala Isirẹlụ ebwo hi ugbiyegu nya iDevidi, ala Isirẹlụ hu iJerobowam ọnyị nya iNebatị adịrahụ nyaa. IJerobowam kpaa rụ hwahị hi Amkpaa bala ọ-họ kị họ ang onyobyi ọtụka.

²²Ala Isirẹlụ ba ang inyibyi ịlẹ wuu ká iJerobowam họ jẹ. Ị́ myị tụ ẹta kẹkpẹ hi ụgbẹyị ọọwa ka

²³gbee ká Amkpaa kwaa rụ hi ịlọmwụ jaabwọ kọ du alọmwụ nyamwụ wuu kaka daa ọna neeji. Ịịwẹ à du kị wu ala Isirẹlụ kpa rụ nya alagba ka ọpyị nya ala Asiriya ẹga kị ji pyịyọọ daalẹ lẹ.

²⁴Ụka ọọwa, Adịrahụ ọtụka nya ala Asiriya wu ebwo angịnyị ịhyẹ bwu ịBabịlọn bala iKutaa bala Ava bala ịHamatị bala ịSẹfavayim, kpaa lagbụrụ kaka kụ e-epwẹji nya ịla ịSameriya ku ọmwakpa nya ala Isirẹlụ ịlẹ kọ mwụ rụ bwu ụwa. Ị ye epweji ịlẹ ká ala Isirẹlụ kụ wuu ene-ene la tụ ịSameriya kọ ri egbeju-ẹpwa.

²⁵Bwu ọmwụ ọdada nyọlẹ ká angga ịwẹ kụ ụwa lẹ, ịị gbịgba ha Amkpaa ka. Ọọwa, ọ du egabẹ ka ẹga nyaa kaka nwụ angịhyẹ nyaa lẹlẹ.

²⁶Ọọwa, ị du ẹrụ kaka ya je adịrahụ ọtụka nya Asiriya yẹkẹẹ, “Angịlẹ ká kpa kaka kụ e-epweji ịla Isirẹlụ-ụ́ jẹ jaabwọ kịị gbịgba ha ojiga nya alụwa ka. Lẹẹlẹ, ojiga ọọwa du egabe kele lalẹẹ ka taa ayịreji wuu ajị nya ọọwa lẹ-ẹ̄.”

²⁷Ọọwa, adịrahụ ọtụka nya ala Asiriya-à da ehile yẹkẹẹ, “Anụ ya ọngọhẹ nya angịkiliya ịlẹ kahị wu bwu ịSameriya du tịrẹkpẹ ka ọpyị nya Isirẹlụ mẹ. Ọwa-ā kele ka kụ ụ-ụwa taa, kọ mẹ ehile nya ojiga nya alọpyị ọọwa jaa mẹ.”

²⁸Ọọwa, ọngọhẹ nya angịkiliya ịlẹ kị wu bwu ịSameriya kpa ka agba-à nyà kaka kụ ị-ịBẹtẹlụ lẹ, ọ mẹjaa jaabwọ kị kaa gbịgba ha Amkpaa lẹlẹ.

²⁹Ebwebweebwo nya angga ịwẹ kị kpa bwam-bwale wẹ ịSameriya wẹẹ tị kịnyaa juwa kpụ eteji ha ojiga nya ịlaa-ịlaa. E-epweji ọnyọnyọọnyị ịlẹ kị kụ, ọngọngọọng nyaa ya ukpeku nyamwụ rịrị a-ada ịlẹ ká ala Isirẹlụ nwụ ene kịị waa kpa rụ.

³⁰Angị bwu ịBabịlọn họ ukpeku nya iSukotu-iBenotu ojiga nyaa. Angị bwu iKutaa họ ukpeku nya ịNẹẹgalụ ojiga nyaa. Angị bwu ịHamatị họ ukpeku nya Achima ojiga nyaa ịnyịnyị.

³¹Angị bwu Ava họ ekpeku nya iNibihasị bala ịTaakị ịlẹ kị ri ijiga nyaa ịnyịnyị. Ala ịSẹfavayim lẹ, ịwa dọmwụ go anyị nyaa kịla iya ju ila ha Adịramẹlẹkị bala Anamẹlẹkị ịlẹ kị ri ijiga nyaa.

³²Angịwẹ kaa gbịgba ha Amkpaa. Ị tị yụbwọ me angịhyẹ bwu ẹpwụ-ẹpwụ nya ịlaa ká angịịwa ka ri angịlẹ kị ka kịla iya a-ada ị-kpụ ijiga nyaa,

³³Lẹẹlẹ, ịị gbịgba ha Amkpaa kpá odu ịnyị, ị kịnyaa juwa ba ijiga ịkpụkpụ nya ẹpwụma ịlẹ kị bwu warị jẹ ịnyịnyị.

³⁴Ị juwa kịnyaa lụgbẹyị inyogo nyaa pyịyọọ. Ị́ myị gbịgba ha Amkpaa lọkịlẹtụ nyaa wuu ka. Ị́ myị ju ihi nya ehile bala ọmẹjẹ ịlẹ wuu kọ ya ha anyị ịtụma nya iJekọbụ ọlẹ kọ yẹ ẹnyị nyamwụ da kaka ri Isirẹlụ ka ịnyịnyị.

³⁵Amkpaa lẹẹ nwa iro ta anyị ịtụma nya iJekọbụ, daa ehile yẹkẹẹ, “Ānụ kpụ eteji ha ojiga ọhẹ-lọhẹ, juwa hiri ịlọnụ kpẹẹ haa lee ọ-kịla iya haa koo.

³⁶Amkpaa ọlẹ kọ gbanụ kpehe bwu ọpyị nya ala Ijipiti lọngịrị ọtụka nyamwụ bala ụkụrwọ ẹbyẹbyị ānụ ka gbịgba ha lẹ. Anụ ka hirikpẹẹ juwa gbịgba họọ bala ọ-kịla iya họọ.

³⁷Anụ ka kpa ehile bala ọmẹjẹ nyamwụ ịlẹ wuu kọ da ju hanụ. Ánụ ka gbịgba ha ojiga ọhẹ-lọhẹ ka.

³⁸Ānụ deeri nya iro ọlẹ kam nwa tanụ koo. M̀ ya jenu lẹẹ, ānụ gbịgba ha ojiga ọhẹ-lọhẹ koo.

³⁹Anụ tụtụ ju ihi nyam am Amkpaa Ohe Oluhye nyanụ mẹ aalẹ, m̀ ka gbanụ kpehe bwu ẹpwụtụbwọ nya aluji nyanụ wuu.”

⁴⁰Angịlẹ kị kpa kaka kụ Isirẹlụ wẹ-ẹ́ tị ke ụrụ ka. Ị kịnyaa ẹ-ẹpwụ nya ụgbẹyị inyogo nyaa.

⁴¹Lẹẹlẹ, angga ịwẹ kị kụ Ịsirẹlụ juwa gbịgba gba ha Amkpaa, ị juwa kpụ eteji ha ekpeku nyaa ịnyịnyị. Anyị ịtụma nyaa kaa họ ịnyịnyị pyịyọọ daalẹ wẹẹ.