Read idege 2 ỊDỊRỊHỤ 18 Bible Online

2 ỊDỊRỊHỤ 18 - idege bible

2 ỊDỊRỊHỤ 18

¹Ẹ-ẹpwụ nya ẹka ọhata nyọlẹ ká iHochiya ọnyị nya Ela ri adịrahụ nya ala Isirẹlụ, iHesekaya ọnyị nya Ehasị à dọmwụ nyọka ri adịrahụ nya ala iJuda lẹ.

²IHesekaya ayịdang gu ẹka iwo imiiye kụrụ ịrụ ụka kọ dọmwụ nya adịrahụ oriri. Ọ hụ i-iJerusalẹm ri adịrahụ ẹka iwo imiiye kụrụ ihikichu gbẹgbịlẹ. Ịnamwụ à ri Abija ọnyị nya ịSẹkaraya lẹ.

³IHesekaya họ ang ọnyịịla ị-ịlahị nya Amkpaa jaabwọ ká iDevidi adamwụ ogogo họ.

⁴Ọ ta ada ị-kpụ ijiga nyaa ayịreji, be ajwọ irigọgọ nyaa bala ekpeku nya Achẹra ojiga ọnyang nyaa ene hụrụ. Ọ be iNehuchitan ilo nya oje ọnyọmịla ọlẹ ká iMosisi họ ene yịgẹ-yịgẹ ịnyịnyị, chajị gbee da ka ụka ọwẹ lẹ ala Isirẹlụ kaa kpụ eteji họọ bwula o-ju ịtangare ila họọ.

⁵IHesekaya dahịhile Amkpaa Ohe Oluhye nya ala Isirẹlụ. Adịrahụ nya ala iJuda ọhẹ-lọhẹ olene nyamwụ lee ọlẹkpẹ nyamwụ-ụ́ ji kọ hiigu lala ọwa kaka.

⁶Ọ godayị kpẹẹkẹẹ ha Amkpaa ẹ-ẹpwụ nya ang myị ang ịlẹ kọ họ wuu. Ọ ju ihi nya ehile ịlẹ ká Amkpaa ya ha iMosisi wuu.

⁷Lẹẹlẹ, Amkpaa juwa tọọ, ọ kịlahị ẹ-ẹpwụ nya ang myị ang ịlẹ kọ họ wuu. Ọ dọmwụ la egbeju-ọngịrị ta adịrahụ ọtụka nya ala Asiriya. Ọ pwa ọwa nyị́ ka ri ọnchẹ nyamwụ kaka.

⁸Ọ kụrụ ala iFilisitiya ịnyịnyị. Ọ baa ẹpwa bwu epweji ichiche tụ ịtụka wuu lalaala ka ju ka ịGasa bala epweji ịdagaga jwọọ.

⁹Ẹ-ẹpwụ nya ẹka ohene nya adịrahụ iHesekaya ọlẹ kọ ri ẹka ọharwiye nya iHochiya Adịrahụ nya ala Isirẹlụ, ịChalụmanẹsẹẹ Adịrahụ ọtụka nya ala Asiriya wẹ kaka be ala Isirẹlụ ẹpwa, chị urwe ju ịSameriya wuu.

¹⁰Ẹka ịta ẹ-ẹkpẹ nya ọwẹ, ị kụrụ ịSameriya lẹ. Ụka ọwẹ ri ẹka ọharwọnyẹ nyọlẹ ká iHesekaya ri adịrahụ, kọ tị ri ẹka ohikichu nyọlẹ ká iHochiya ri adịrahụ nya Isirẹlụ.

¹¹Ụka ọọwa, adịrahụ ọtụka nya ala Asiriya go ala Isirẹlụ nya alagba kpa rụ ka ọpyị nya Asiriya lẹlẹ. Ị kpa angịhyẹ nyaa kaka kụ e-epweji nya ịHala, ị ya angịkịla kụ tụ ọnụụka-ọnụụka nya Ihu ịHabọ o-oye nya iGosan da bala epweji nya ala iMidiya ịhyẹ.

¹²Akama ọwẹ chaa ọgụ, chajị ị́ myị ju ihi nya Amkpaa Ohe Oluhye nyaa ka. Ị bịrị iro ọlẹ kọ nwa taa bala ehile ịlẹ wuu kọ ya ha iMosisi ọnchẹ nyamwụ. Ị́ myị ke ụrụ ke ka, ị́ myị ju ihi nya ehile ịịwa ju ka ịnyịnyị.

¹³Ẹ-ẹpwụ nya ẹka iwo kụrụ ine nyọlẹ ka iHesekaya ri adịrahụ, ịSẹnakeribyi adịrahụ ọtụka nya ala Asiriya wẹ kaka dẹwụ ta epweji nya ala iJuda ịlẹ kị me egwalọ yẹ dada wuu, kụrwaa chẹẹchẹẹ.

¹⁴Ụka ọọwa, iHesekaya Adịrahụ nya ala iJuda du ẹrụ tọ adịrahụ nya ala Asiriya kele ka epweji nya ịLakichi yẹkẹẹ, “M̀ jẹ ịnyam ri abyị ẹ-ẹga nyang lẹ. Tị bahim mẹ, adam. M̀ ka nwụ okpoko ọnyị myị ọnyị ká tịtọ hang.” Ọọwa, adịrahụ nya ala Asiriya-à chị iHesekaya okpoko onyoowuru ohu ịta (300) bala okpoko ịgọm iwo ịta lẹlẹ.

¹⁵Ọọwa, iHesekaya-à tụ okpoko onyoowuru ọlẹ kọ ji Ube nya Amkpaa bala ọlẹpwa nya adịrahụ dala awụlẹ lẹlẹ.

¹⁶Ọ dọmwụ pwọ okpoko ịgọm ọlẹ kị ya kpụ kụrụ ekpileku nya Ube nya Amkpaa bala iluhye nya ekeji i-wu ekpileku kpa ịlẹ kọọwa ayịdang ya kpụ kụrwaa lẹ, ọ yaa du kịla adịrahụ nya ala Asiriya lẹlẹ.

¹⁷Ụka ọọwa, adịrahụ nya ala Asiriya du alegbeju nya angịdẹwụ nyamwụ angị ịta ịlẹ kị la gbẹgbịlẹ gụ wuu bwu ịLakichi liru nya angịdẹwụ kele kaka mwẹla ta iHesekaya Adịrahụ i-iJerusalẹm. Ụka kị pwụ iJerusalẹm, ị chịkụ ụ-ụgbẹyị ọ-ba ube nya ihi nya angị kaa ju ang ịkụrụ-kụrụ ido ba. Ụwa ji ba àya olekpeleji ọlẹ ká enyi o-bwu Ẹmwụ-enyi Oluhye kaa mwụ ka.

¹⁸Ụka kị du ẹrụ tọ iHesekaya Adịrahụ, ọ du alụkụrwọ nyamwụ angị ịta kele kaka taa. Angịịwa ri Eliyakim olegbeju nya ẹpwa nya adịrahụ kọ ri ọnyị nya iHilikaya bala ịChẹbụna kọ ri akịraa ọlẹpwa nya adịrahụ bala iJowa ọnyị nya Asafụ kọ kaa kpẹhị rịrị apwụ nya igomenti.

¹⁹Ọọwa, olegbeju nya angịdẹwụ nya Asiriya ọhẹ à byaa yẹkẹẹ, “Adịrahụ ọtụka ya ahị nyị tọ iHesekaya wo wẹẹ, ịyẹ kpá ọ tị́ dahịhile du kọ ju ugbodu ịnyị-ị̄ị̀?

²⁰Ọ me ká ẹla ọlọnụ-ọnụ a ri ẹwụ ọjẹjẹ bala ọngịrị ọ lala nyọka kpa dẹwụ-ụ́? Lee oowo ọ tị kpụ nịrọ nyọka dọọ ụbwọ mwẹla ta ala Asiriya myị-ị̀ wẹẹ?

²¹Ijipiti ọ wẹẹ dahịhile ka le? Ọ ka yẹ kpáa, Ijipiti lala ugo nya etungkohyo ọlẹ ká ọngịnyị juwa kpa chị eji nya ọgọdọ. Ọ tị ka bene gu ọngọọwa ụ-ụbwọ. Adịrahụ nya ala Ijipiti ọlẹ kanụ wẹẹ kpụnịrọ-ọ́ ju ọ-dahịhile kpong-kpong koo.

²²“Ọ́ tị ri kanụ byim ya ịwa nyị kpụnịrọ Amkpaa Ohe Oluhye nyịwa, aada bala ogidi ikiliya nya Ohe Oluhye ọọwa iHesekaya-à bene hụrụ lẹẹ, ọ byi ala iJuda bala ala iJerusalẹm lẹẹ ya ẹga nya ogidi ọla iJerusalẹm kem nyaa ka gbịgba lẹ ka-á?

²³Anụ kẹwẹ kanụ chawụlẹ ọnụ bala ayịbam adịrahụ nya ala Asiriya mẹ, ó-ri kanụ ka ye angị kụ anyịrẹ lala angị ụnọ imiiye (2,000) ẹ-ẹpwụ nya angịdẹwụ nyanụ aalẹ, ọ ka ya anyịrẹ hanụ chaa ọnụ wuu!

²⁴Ala Ijipiti-í danụ da ụbwọ lanyịrẹ bala ang ịrụnyẹ nyaa wẹwẹ, ánụ ka jụ ọnụ nya ẹlẹlẹhẹ họ ọngọdẹwụ ọlẹ kọ dọmwụ la dẹwụ-dẹwụ gu wuu ẹ-ẹpwụ nya ala Asiriya ka.

²⁵Ánụ jẹ ka aalẹ, áhị wẹ kaka be ọpyị nyanụ ẹpwa ododu la o-wo bwu ẹga nya Amkpaa ene ka lẹ ka. Ọwa lịlọmwụ à byim am nyị wẹ kaka ta ẹpwụma nyanụ ayịreji lẹ!”

²⁶Ọọwa, Eliyakim bala ịChẹbụna bala iJowa-à byi olegbeju o-bwu Asiriya ọwẹ yẹkẹẹ, “Chuchuu ya ẹla tahị loja nya Arameyiki mẹ ayịbahị. Ahị wo yẹẹyẹẹ. Ā kpa iHiburu ya ẹla tahị kaka, ó-ri ịnyị ka angị kụ u-uhye nya ugulọ ka wo ẹla ọlẹ kanụ wẹẹ ya.”

²⁷Olegbeju ọọwa tị waa yẹkẹẹ, “Anụ me irya kanụ bala ayịbanụ adịrahụ kem ayịbam a dum ẹrụ tọ-ọ́? Angịwẹ wuu m̄ wẹẹ ya ẹla ta ịnyịnyị lẹ. Ịwa wuu tụụnụ juwa ka go eyi nya ịlọnụ ri bala ọ hu eetịrị nya ịlọnụ nwaa ahyaahị.”

²⁸Ọọwa, ọ dayị kọkọ ya ẹla gboo la iHiburu yẹkẹẹ, “Anụ wo ẹla ọlẹ ká adịrahụ ọtụka nya ala Asiriya wẹẹ ya tanụ mẹ!

²⁹Ọ yẹkẹẹ, ‘Anụ myị ká iHesekaya a pịrịnụ ju koo. Ọ́ lọngịrị ka gbanụ kpehe bwu ẹpwụtụbwọ nyam myị ka.’

³⁰Anụ myị kọ danụ lụgbaa nyọka dahịhile Amkpaa, kanụ ka juwa ya nyi ka gbịwa kpehe. Adịrahụ nya Asiriya nyị́ ka kụrụ epweji nyanụ ka lẹ ko.

³¹Anụ ke ụrụ la iHesekaya kaka. Anụ họ okpunyi tam kanụ kpehe warị wẹ ẹga nyam mẹ aalẹ, ọng myị ọng nyanụ ka la ịlọmwụ ka juwa ri egbe nya alakọnụ bala ikiledu nyamwụ bala ọ-ka juwa nwa enyi bwu ẹmwụ-enyi nya ịlọmwụ lokpunyi

³²gbee pwụ ụka ká adịrahụ ọtụka ka wẹ kaka goonu kpa rụ ka kụ ọ-ọpyi ọkịla ọlẹ kọ lala ọpyị nyanụ anụ ayịdang. Ẹga ọọwa ri ọpyị ọlẹ ká ịkaa bala alakọnụ bala olivu bala inwa bala ang oriri datị-datị dịda. Lẹẹlẹ, anụ chụ ọhịhị ọkọkọ nya igu-ụ̀ wẹ mẹ! Ānụ myị ká ịHesekaya-ā juwa danụ lụgbaa ya Amkpaa nyị ka gbịwa kpehe koo!

³³Anụ yẹ kpá ká ojiga nya alụma ọhẹ chị alọpyị ọọwa da bwu ẹpwụtụbwọ nya adịrahụ ọtụka nya ala Asiriya myị ẹnẹnẹhẹ lẹ-ẹ́?

³⁴Ijiga nya ala ala ịHamatị bala ịnya ala Apadị tị́ jị ale alẹ? Ịnya ala ịSẹfavayim bala ịHẹna bala Iva anyị bẹẹ? Ọhẹ-lọhẹ nya chị ala ịSameriya da bwu ụbwọ nyam myị anụ yẹ-ẹ̀ wẹẹ?

³⁵Oyina lẹpwụ nya ijiga ịwẹ à tị́ chị epweji nyaa da bwu ẹpwụtụbwọ nyam myị ẹnẹhẹ lẹ, kọ du ká Amkpaa ka gba iJerusalẹm kpehe hi ụbwọ nyam mẹ?”

³⁶Ma, angịnyị wuu tụ ọnụ nyaa pịrị la o-ya ẹlẹlẹhẹ ka, chajị iHesekaya Adịrahụ daa ehile ya nyị wọọ ẹlẹlẹhẹ ka.

³⁷Ụka ọọwa, Eliyakim olegbeju nya ẹpwa nya adịrahụ kọ ri ọnyị nya iHilikaya bala ịChẹbụna kọ ri akịraa ọlẹpwa nya adịrahụ bala iJowa ọnyị nya Asafụ kọ kaa kpẹhị rịrị apwụ nya igomenti a gu ịwụrụ nyaa ene ẹ-ẹpwụ nya ọkịlẹtụ ọ-kpụ enyi lẹlẹ. Ịwa angị ịta ịwẹ kele ka ẹga nya iHesekaya adịrahụ lịwụrụ nyaa ịwẹ lẹ, ị tịrọnụ joo ẹla myị ẹla ọlẹ ká olegbeju nya angịdẹwụ o-bwu Asiriya ya wuu lẹlẹ.