Read idege 2 ỊDỊRỊHỤ 19 Bible Online

2 ỊDỊRỊHỤ 19 - idege bible

2 ỊDỊRỊHỤ 19

¹Ụka ká iHesekaya Adịrahụ wo ala ịwẹ, ọ gu ịwụrụ nyamwụ ene, hu awụrụ nya owuru kụrụ lẹ, ọ kele ka Ube nya Amkpaa lẹlẹ.

²Ọ du Eliyakim olegbeju ọlẹpwa nya adịrahụ bala ịChẹbụna akịraa ọlẹpwa nya adịrahụ bala angịkiliya ịgbẹgbịlẹ ịhyẹ kele kaka tọ Ayịsaya ọlọmwụ ọnyị nya Amosị. Ịwa wuu kụrụ ịwụrụ nya owuru ọkpakpa.

³Ị pwụ ụwa lẹ, ị ya ẹrụ nya adịrahụ jọọ yẹkẹẹ, “Ayịsaya ee, alẹ ọlẹ ri ẹnụ nya akama bala ẹla oloyi-oyi bala olujwo ọtọtọ lẹ. Ahị la kpá jaabwọ ká ọnyang wẹẹ hya ụma nyọka ma ọnyị lẹ, ọngịrị-ị́ tị ji họọ myị kpụ ọ-ka ma kaka.

⁴Amkpaa Ohe Oluhye nyang tị́ ka wo ala ịtipyọ ịlẹ ká olegbeju nya angịdẹwụ nya ala Asiriya ya wẹ wuu jaabwọ ká ayịbamwụ adịrahụ nya ala Asiriya doo ẹrụ warị-ị̀ wẹ. Ọ kpa Amkpaa ọlẹ kọ juwa hịhị họ jaabwọ kọ họọ. Amkpaa Ohe Oluhye yang ā wo kọ yaa akama chajị nya ala kị ya bọọ-ọ̀ wẹ mẹ. Á tịị raabwọ chajị nyahị ahị angị hi lọhịhị lẹẹ mẹ.”

⁵Ụka ká alẹrụ nya iHesekaya Adịrahụ ya ẹrụ je Ayịsaya lẹ,

⁶Ayịsaya-à byaa yẹkẹẹ, “Byi ayịbanụ mẹ, ịịlẹ Amkpaa-à ya lẹ: ‘Anụ ju uhi nya ala ịlẹ kanụ wo wẹ ká anchẹ nya adịrahụ nya ala Asiriya ya bam-m̀ wẹ ka.

⁷Anụ wo mẹ, am ayịdang ka họ kọ ka wo oja ọ-há ụrụ ka rụ tịrẹkpẹ ka ẹpwa. Ụka kọ rụ tịrẹkpẹ ka ọpyị nyamwụ lẹ, m̄ ka họ kị ka nwọọ ụ-ụwa lẹlẹ.’ ”

⁸Ụka ọọwa, olegbeju nya angịdẹwụ nya ala Asiriya wo adịrahụ ọtụka nya ala Asiriya nyị rụ bwu ịLakichi juwa dẹwụ ta epweji nya ịLakichi. Ọọwa, ọ kele kaka tọọ ụ-ụwa lẹlẹ.

⁹Ụka-ụka ọwẹ, adịrahụ ọtụka nya ala Asiriya wo oja ya iTiihaka Adịrahụ nya ala Itiyọpyiya nyị lalẹẹ kpa angịdẹwụ nya ala Ijipiti kụ ịlahị kaka mwẹla tọọ. Ọọwa, ọ da ụpwụ du kịla iHesekaya kaka byoo yẹkẹẹ,

¹⁰“Anụ kele kaka byi iHesekaya Adịrahụ nya ala iJuda ịịlẹ mẹ: ‘Ā myị ká ojiga ọlẹ ká wẹẹ kpụnịrọ ā dang lụgbaa nyori ala Asiriya-á ka kụrụ iJerusalẹm myị ka lẹ koo.’

¹¹À tị́ wo oja nya ang ịlẹ ká ịdịrịhụ nya ala Asiriya kaa họ epwoja ọnyị myị ọnyị kị jahị da ka. Ịị daa abwọ yịgẹ-yịgẹ ó-ri kị myẹ hwẹẹ hi ẹga haa ka. Ịyẹ tị́ du ká ẹbyị ọlịnyị-ịnyị-ị́ ka họnụ ka?

¹²Adam igogo anyị ta epweji nya iGosan bala ịHaran bala iResẹfụ bala ala Idẹn ịlẹ kị kụ iTelasaa wuu ayịreji gbanggbang. Ijiga nyaa daa ụbwọ myị ā wo-ó?

¹³Ale ịdịrịhụ nya ala ịHamatị bala ịnya ala Apadị bala ịnya ịSẹfavayim bala ịnya ịHẹna bala ịnya Iva anyị wuu à tị́ ji? Ọngọhẹ wo ẹnyị nyaa alẹ wẹẹ-ẹ́?”

¹⁴Ụka ká iHesekaya ye ileta ọọwa kọ wọọ kpá, ọ kele ka Ube nya Amkpaa lẹ, ọ pyẹ ileta ọọwa maa da ị-ịlahị nya Amkpaa lẹ,

¹⁵ọ raabwọ yẹkẹẹ, “Amkpaa Ohe Oluhye nya ala Isirẹlụ, ahụ ọngọlẹ ká hụhụ ẹ-ẹchị-adịrahụ nyang apewa nya alegu-icherubu ee, ahụ kẹnẹ-kẹnẹ à ri Ohe Oluhye nya ẹpwụma ilodehe wuu lẹ. Ahụ à họ odehe bala uhye-ọgba lẹ.

¹⁶Amkpaa ee, yẹ iwe-ahụrụ nyahị wẹẹ. Wo ala ịlẹ ká ịSẹnakeribyi wẹẹ ya, jaabwọ kọ pwọng ahụ Ohe Oluhye ọlọhịhị pwụrwọ̀-pwụrwọ̀ lido kaka ba wẹẹ.

¹⁷Ịnyịlehị lẹ, ahị jẹ ká ịdịrịhụ nya ala Asiriya ta iru nya ẹpwụma lụmẹ-lụmẹ ayịreji, họ lịpyị nya kpụ egwawụ-egwawụ.

¹⁸Ị go ijiga nyaa ju ila taa ayịreji gbanggbang, chajị ekpeku ịlẹ ká angịnyị kpa ekeji bala ajwọ họ kem ị ri lẹ. Ị́ ri ihye ka.

¹⁹Lẹẹlẹ, Amkpaa Ohe Oluhye nyahị ee, chuchuu chịhị da bwu ụbwọ nya adịrahụ nya ala Asiriya mẹ. Ọọwa, ẹpwụma ilodehe wuu à ka jẹ kaahụ Amkpaa kẹnẹ-kẹnẹ à ri Ohe Oluhye lẹ.”

²⁰Ụka ọọwa, Ayịsaya du ẹrụ tọ iHesekaya yẹkẹẹ, “Amkpaa Ohe Oluhye nya ala Isirẹlụ ya ọwa nyị wo abwọ ọlẹ kaahụ nyị rị-ị̀ wẹ chajị nya ịSẹnakeribyi adịrahụ ọtụka nya ala Asiriya lẹ.

²¹Amkpaa ya ẹla chajị nyamwụ yẹkẹẹ, ‘ỊSẹnakeribyi Adịrahụ ọtụka ee, Ala iJerusalẹm hụlọ ẹhụ jung. Ị kpang hu utungguru, tụng ịmyị-ọnụ, ụka ká rụnyẹ mwụ ata bịmwụ.

²²Oowo ā tị́ dọmwụ lẹẹ do ido, hu ẹpẹpẹ ju lẹẹ ene-è? Oowo ā tị́ hu ọnụ da lẹẹ, yẹhị da bwee ẹ-ẹpwụ nya ọgọm ọchịchị-ị̀? Aam Ohe Oluhye ọlịgọgọ nya ala Isirẹlụ ka le!

²³À du alẹrụ nyang warị kaka dom am Ọngọlahị,’ À chị ọgọm juwa yẹkẹẹ, ‘Bwula ang ịrụnyẹ nyam m̀ gu ịgbọdọ ịtụka ịgụgụ wuu cheji— ee, achinege nya ịgbọdọ nya iLibanọn! m̀ kpụ ekeji nya isida ịtụka ịlụwa nọnọ, tụ ekeji nya ịsayịpịrẹsị ịnyịịla ịlụwa. M̀ jẹ pwụ ẹga ochowu gụgụ nya ipyinu ọlụwa.

²⁴M̀ wu ịwẹẹlụ ị-ịpyị ịkịla datị-datị, bala ọ-nwa enyi bwu ụwa. M̀ kpa ẹpẹtẹ-ẹpẹtẹ ọ-ba eji nyam họ ị̀bá nya ala Ịjipiti nyị nwụ kịrẹ-kịrẹ du ká angịdẹwụ nyam kpoye.’

²⁵“ ‘Ọọwa ri á wo ene kpong-kpong jẹ ka-á? Am Amkpaa ayịdang me obyi gbalẹ-gbalẹ nyori ang ịwẹ wuu ka lịnyị. Ọọwa, m̄ haa jịra wẹ lẹẹlẹẹ lẹ. Am à jung ọngịrị nyọka ta epweji ịtụka ayịreji, du kị kpụ egwawụ-egwawụ lẹ.

²⁶Ịnyị à du ka alụwa-á lọgịrị jụ ẹlẹlẹhẹ họng ka lẹ, ị ju uhi, wu ichinji, ị kpụ rụgbẹ-rụgbẹ lala amẹ lala amẹ ịlẹ kị juwa chịcha chị wẹẹ-ẹ̀, ká ọ-chị pwuu nya ẹnụ kaa nwaa piletee.

²⁷“ ‘Tị yẹ mẹ, m̀ jẹng kẹkpẹ-kene— ang myị ang ọlẹ ká juwa họ bala ẹga myị ẹga ká jua ka. M̀ jẹ jaabwọ ká hwahwa jahị dam kaka ba.

²⁸Ajị nyọlẹ ká hwahwa jahị dam ịnyị wẹẹ, kam yẹ ọgọm ọchịchị ọtụka nyang-ǹg wẹẹ, m̀ ka ya ọkụja gung o-okwinyi bala ọnụ, kam ka gbileng kpịla-kpịla yahị da rụ bwu ụgbẹyị ọlẹ ká bwu warị.’ ”

²⁹Ọọwa, Ayịsaya-à byi iHesekaya yẹkẹẹ, “Amkpaa ya ịnyịnyị ịịlẹ: ‘Ang-ẹjẹẹ ọlẹ kọ ka mẹjẹ nyori ẹlẹwẹ ka lịnyị à lẹẹ lẹ: Ihwẹnyị anụ ka ye ang ri bwu ẹpwụ nya arụrụ nya ang-ẹrụ nyanụ. Ihwọngkịla anụ ka ri ihihi nya ang ịlẹ kị bwu lịlaa ịnyịnyị. Ẹka ọhata tị lẹ, anụ ka wu ẹrụ nyanụ, kanụ ka ye ang oriri wụ bwu ụwa kpa nyà kaka ri. Anụ ka wu ẹrụ nya alakọnụ nyanụ, anụ tị ka ye egbe nyaa ri ịnyịnyị.

³⁰Ụka ọọwa, ala iJuda ịlẹ kị ka hi hị ka yẹta yeji da ụtẹ ka ẹpwụ nya ịpyị kpori-kpori, kị ka ka pyẹ pyọọ am̀ ọ-ọpyị nya ịlaa.

³¹Angịhyẹ bwu iJerusalẹm ịhyẹ bala angị kụ Ọgbọdọ nya ịSayọn juwa kị ka hi lọhịhị. Amkpaa chị ehe nyọka họ ịnyị pyii lẹ.

³²“ ‘Lẹẹlẹ, am Amkpaa jam bying ya adịrahụ ọtụka nya ala Asiriya-á jẹ-ẹ jụ warị wẹ epweji ọlẹ lee ọ-ka da ju warị kpong-kpong ka. Ọngọdẹwụ nyamwụ ọhẹ-lọhẹ-ẹ́ ka hu ọkụmada nyamwụ tụ ju epweji ọlẹ chwẹẹ bala ọ-ka me úgbùdù ẹga kị ka dayị rịrị mwẹla tanụ kpong-kpong ka ịnyịnyị.

³³Ọ ka rụ tịrẹkpẹ ka ọpyị nyamwụ tụ ụgbẹyị ọlẹ kọ bwu warị da rụ. Ọ́ ka jụ wẹ epweji ọlẹ kpong-kpong ka. Am Amkpaa ayịdang à ya ẹlẹwẹ lẹ.

³⁴M̀ ka dẹwụ yẹ epweji ọlẹ dada bala ọ-chẹwụ kọọ chajị kam ayịdang ka lihi bala ajị nya ọnụ ọlẹ kam myị ha iDevidi ọnchẹ nyam.’ ”

³⁵Lodu nya ẹnụ ọọwa, olegu-ẹrụ nya Amkpaa kele kaka nwụ angịdẹwụ nya ala Asiriya angị ụnọ iwo ineku da ụnọ ịrụ (85,000) lẹpwụ-lẹpwụ. Ụka ká angị hi lahị-lahị chahị lụtụrụ, ị yẹ ká ẹga myị ẹga ri egu-egu yịrịtịtịịtị.

³⁶Ọọwa, ịSẹnakeribyi Adịrahụ ọtụka nya ala Asiriya a wa wii rụ tịrẹkpẹ ka iNineve lẹlẹ.

³⁷Ẹnẹhẹ kọ juwa kpụ eteji u-ube nya iNisirochi ojiga nyamwụ, Adịramẹlẹkị bala ịCharẹsẹẹ kị ri anyị alẹng nyamwụ kele kaka nwọọ loge nyaa. Ọọwa, ị rụnyẹ rụ ka ọpyị nya Araratị lẹlẹ. Ọnyị ọlẹng nyanwụ ọkịla ọlẹ ká ẹnyị nyamwụ ri Ẹsahadọn à ri adịrahụ kwiwa nyamwụ lẹlẹ.