Read idege 2 ỊDỊRỊHỤ 2 Bible Online

2 ỊDỊRỊHỤ 2 - idege bible

2 ỊDỊRỊHỤ 2

¹Ụka ọhẹ, Ịlayịja bala Ịlayịcha hu ang juwa jẹ rụ bwu iGiligalụ. Ụka ọwẹ ju ụka ọlẹ ká Amkpaa juwa ka hu Ịlayịja kpa rụ ka epwoohe la ugbọchịrị.

²Ụka kị juwa ẹ-ẹpwụ nya ẹdịyẹ nyaa, Ịlayịja byi Ịlayịcha yẹkẹẹ, “Hụ ẹgẹlẹ gbem mẹ, chajị Amkpaa ya am nyị jẹ pwụ ịBẹtẹlụ.” Ma, Ịlayịcha wẹ byọọ yẹkẹẹ, “Ehe. M̀ kpa ẹnyị nya Amkpaa ọlẹ kọ juwa hịhị bala ịnyang ahụ ayịdang ya nya ịlẹhị-ịlẹhị ya ḿ ka tụhing ka.” Ọọwa, ị bajẹ kele ka ju ka ịBẹtẹlụ lẹlẹ.

³Ụka ọọwa, ogu nya alọmwụ ịhyẹ ịlẹ kị juwa ị-ịBẹtẹlụ kpehe warị wẹ ẹga nya Ịlayịcha lẹ, ị tọọ wo yẹkẹẹ, “À jẹ ká Amkpaa juwa ka hu ayịbang kpa rụ hing alẹ ọlẹ-ẹ́?” Ịlayịcha waa yẹkẹẹ, “Ee, m̀ jẹ ịnyịnyị, ọ tị ba ọ-ọnụ nyanụ mẹ.”

⁴Ọọwa, Ịlayịja-à byi Ịlayịcha yẹkẹẹ, “Hụ ẹgẹlẹ gbem mẹ, chajị Amkpaa ya am nyị jẹ pwụ iJeriko.” Ma, Ịlayịcha tị myịmyị wẹ byọọ yẹkẹẹ, “Ehe. M̀ kpa ẹnyị nya Amkpaa ọlẹ kọ juwa hịhị bala ịnyang ahụ ayịdang ya nya ịlẹhị-ịlẹhị ya ḿ ka tụhing ka.” Ọọwa, ị bajẹ lawụlẹ ka pwụ iJeriko lẹlẹ.

⁵Ụka ọọwa, ogu nya alọmwụ ịla iJeriko wẹ ẹga nya Ịlayịcha kaka tọọ wo yẹkẹẹ, “À jẹ ká Amkpaa juwa ka hu ayịbang kpa rụ hing alẹ ọlẹ-ẹ́?” ỊLayịcha-à waa yẹkẹẹ, “Ee, m̀ jẹ ịnyịnyị, ọ tị ba ọ-ọnụ nyanụ mẹ.”

⁶Ụka ọọwa, ịLayịja myịmyị byi Ịlayịcha yẹkẹẹ, “Hụ ẹgẹlẹ gbem mẹ, chajị Amkpaa ya am nyị jẹ pwụ Ihu ịJọdan.” Ịlayịcha tị wọọ yẹkẹẹ, “Ehe. M̀ kpa ẹnyị nya Amkpaa ọlẹ kọ juwa hịhị bala ịnyịang ahụ ayịdang ya nya ịlẹhị-ịlẹhị ya ḿ ka tụhing ka.” Ọọwa, ịwa angị imimiiye ịwẹ à juwa jẹ kịlahị lẹlẹ.

⁷Alẹng angị iwo ịrụ bwu ẹpwụ nya ogu nya alọmwụ báa kele ka godayị hwẹẹ hi ẹga ka Ịlayịja bala Ịlayịcha godayị ọ-ọnụụka nya Ihu ịJọdan.

⁸Ọọwa, Ịlayịja à pwọ awụrụ oluhye nyamwụ, mwọọ aba lẹ, ọ ya duru enyi kpuu lẹlẹ. Enyi chị ebwo koye bala oye lẹ, ịwa angị imimiiye à jẹdịyẹ ọ-ọpyị ọchọrụ kpoye lẹlẹ.

⁹Ụka kị kpoye nya Ihu kpa, Ịlayịja tọ Ịlayịcha wo yẹkẹẹ, “Ịyẹ ā tị tịtọ kam ka họ hang ene ká Ohe Oluhye ka hum kpa rụ ka epwoohe hing mẹ?” Ọọwa, Ịlayịcha à wọọ yẹkẹẹ, “Chuchuu, ya ọngịrị nya olegu ọmwaaba ba ịnyangham mẹ.”

¹⁰Ụka ọọwa, Ịlayịja-à byi Ịlayịcha yẹkẹẹ, “À bịlẹ ang olujwo lụmẹ. Ọ́ tị ri ká ya ẹhị rịrịm tee ụka kị ka juwa hum kpa rụ hing aalẹ, ọngịrị ọọwa ka juwa hang. Ọ́ tị ri ka họ ịnyị ka aalẹ, ọ́ ka juwa hang ka.”

¹¹Ị juwa kpa ẹla ya, juwa jẹdịyẹ lawụlẹ kịlahị-ịlahị. Lụka ọmwaaa lẹ, ang ọrụnyẹ olila-lila ọhẹ ọlẹ ka anyịrẹ ilila-lila juwa gbile à hu gẹgịlẹ lẹ, ọ chị Ịlayịja ebwo hi Ịlayịcha lẹlẹ. Ọọwa, ugbọchịrị à hu Ịlayịja kpa rụ ka epwoohe lẹlẹ.

¹²Ụka ká Ịlayịcha yẹ ẹlẹwẹ, ọ chị eko wụrụ Ịlayịja yẹkẹẹ, “Adam ee! Ang ịrụnyẹ ị-kpa dẹwụ nya ala Isirẹlụ bala angị kwaa kụ ee!” Ịlayịcha-á tụtụm yẹ Ịlayịja gụ ọọwa kaka. Ọọwa, Ịlayịcha-à gu awụrụ nya ịlọmwụ ene hụrwang nya ang-ẹjẹẹ nya ọjụjụ ọlọkịlẹtụ nyamwụ lẹlẹ.

¹³Ọọwa, Ịlayịcha-à hu awụrụ nya Ịlayịja ọlẹ kọ chabwọ bwu uhye lẹ, ọ nyà tịrẹkpẹ kaka godayị ọ-ọnụụka nya Ihu ịJọdan lẹlẹ.

¹⁴Ụka ọọwa, Ịlayịcha ya awụrụ nya Ịlayịja ọọwa duru enyi kpuu lẹ, ọ yẹkẹẹ, “Ale Amkpaa Ohe Oluhye nya Ịlayịja à tị́ ji-íì?” Ahyaahị kọ ya awụrụ ọọwa duru enyi kpuu, enyi chị eku. Ọọwa, Ịlayịcha a chịpụrụ kpoye koye ọkịla lẹlẹ

¹⁵Alọmwụ angị iwo ịrụ i-bwu iJeriko ịlẹ kị kpẹhị nya ịlaa yẹ ẹlẹwẹ juwa yẹkẹẹ, “Ọngịrị nya Ịlayịja ji uhye nya Ịlayịcha ịnyịnyị lẹ!” Ị kele kaka tọ Ịlayịcha lẹ, ị hirikpẹẹ họọ lẹlẹ.

¹⁶Ọọwa, ị byọọ yẹkẹẹ, “Ayịbahị ee, ahị la alẹng ịkpịra-kpịra angị iwo ịrụ jam. Ya iwe da kị kele kaka pịlahị nya ayịbang mẹ. Ọhẹka, olegu nya Amkpaa hwọọ kpa kele ka hụ u-uhye nya ọgbọdọ ọhẹ lee ẹ-ẹpwụ nya ọkpọọ ọhẹ.” Ịlayịcha tị wẹ byaa ya nyị du ẹrụ kele koo.

¹⁷Ị tị kpa chị rịrọọ gbee kọ lọọ oyoyi nyọka pwapwa. Ọọwa, ọ yẹkẹẹ, “Anụ du kele mẹ.” Ị du angị iwo ịrụ ịịwa kaka pịlahị nya Ịlayịja ka uhye ka eji jịra ẹnụtụrụ ịta gbẹgbịlẹ, ị́ tị yọọ ka.

¹⁸Ị nyà tịrẹkpẹ kaka tọ Ịlayịcha ẹ-ẹga kọ hụ i-iJeriko. Ọọwa, ọ byaa yẹkẹẹ, “M̀ tị́ byinu lẹẹ ya anụ kele ka.”

¹⁹Ụka ọọwa, alẹng ịhyẹ nya ala iJeriko wẹ ẹga nya Ịlayịcha lẹ, ị byọọ yẹkẹẹ, “À tị́ yẹ-ẹ̀ wẹ, ịnọ epweji nyahị ọlẹ kụ ẹga ọnyịịla. Enyi ọlẹgẹlẹ tị tịpyọ. Ọ kaa chị ang ụma.”

²⁰Ọọwa, Ịlayịcha-à byaa yẹkẹẹ, “Anụ chụ ịma ju ẹja okpori-kpori onyeewe-onyeewe kanụ kpa wam wẹẹ.” Ọọwa, ị họ ịnyị lẹlẹ.

²¹Ụka kọ kpa kele ka ụ́gbụ nya enyi ọọwa, kọ ya ju ka ẹpwụ nyamwụ lẹ, ọ yẹkẹẹ, “Ịịlẹ Amkpaa-à ya lẹ, ‘Ḿ họ enyi ọlẹ uda lẹ. Bwu ọlẹẹlẹẹ kịlahị, ọ́ ka nwụ angịnyị lee ọ-chị ang ụma kaka.”

²²Bwu ụka ọwa pyịyọọ kịlahị lẹ, enyi ọọwa-à hiigu lẹlẹ.

²³Ịlayịcha yegiri bwu iJeriko kele ka ịBẹtẹlụ. Ụka kọ juwa ụ-ụgbẹyị wẹẹ, anjwo alẹng ịhyẹ à kpehe bwu epweji lẹ, ị juwa kpọọ họ bala ọ-hụlọ ahụ jwọọ lẹlẹ. Ị juwa byọọ yẹkẹẹ, “Tụ kịnyaa, ahụ ọngọ nehya bọngbọng ọwẹ! Tụ kịnyaa, ahụ ọngọ nehya bọngbọng ọwẹ!”

²⁴Ịlayịcha jahị kpata, mwụrụ yaa kpụụụ lẹ, ọ gọlọ jwaa lẹnyị nya Amkpaa lẹlẹ. Ọọwa, ọnarwọ anyang imiiye ịhyẹ à kpehe bwu ipyinu kaka wu anyị alẹng angị iwo ine kụrụ imiiye nyaa ri lẹlẹ.

²⁵Ịlayịcha rụ bwu ẹgẹwẹ kele ka Ọgbọdọ nya ịkamẹlụ ene kọọ nyà tịrẹkẹ ka ịSameriya lẹlẹ.