Read idege 2 ỊDỊRỊHỤ 20 Bible Online

2 ỊDỊRỊHỤ 20 - idege bible

2 ỊDỊRỊHỤ 20

¹Ụka ọọwa, ẹdụrụ ju iHesekaya Adịrahụ nya ịlẹhị-ịlẹhị kpá hi ụkụchụ ookpopo kọ ka gbu. Ụka ká Ayịsaya ọlọmwụ ọnyị nya Amọsị kele kaka wụlọọyẹ, ọ byi iHesekaya yẹkẹẹ, “Amkpaa ya ahụ nyị nwụ ẹpwụ họ, ahụ nyị́ juwa go hwóò bwu ẹpwụ nya ẹdụrụ ọwẹ kokoo. Ahụ nyị juwa ka gbu lẹ.”

²Ọọwa, iHesekay-à jahị kpata da ugulọ lẹ, ọ raabwọ ha Amkpaa yẹkẹẹ,

³“Amkpaa ee, kpịtịya jaabwọ kam myị ẹrụ hang kpẹẹkpẹẹ bala ọ-họ ang opwoku a-ahị nyang wẹẹ.” Ọ da kpuu lida onyuujujwo lẹlẹ.

⁴Ụka ka Ayịsaya yegiri nya ọrụrụ kọ ka pwụ ẹpwarịrị nya ọdọda kpá lẹ, Amkpaa-à byoo yẹkẹẹ,

⁵“Tịrẹkpẹ kele ká byi iHesekaya olegbeju nya angịnyị nyam ịịlẹ: ‘Am Amkpaa Ohe Oluhye nya iDevidi adang ogogo wo abwọ ọrịrị nyang bala ọ-yẹ egbejida nyang lẹ. M̀ ka họng uda. Ọ́ ka lala ẹnụtụrụ ịta à ka hagụ kpụ ā ka jẹ pwụ Ube Ịgọgọ myị.

⁶M̀ ka ya ẹka iwo kụrụ ịrụ da ọhịhị nyang u-uhye. M̀ ka gbang kpehe bala ọ-chị epweji nya iJerusalẹm ọlẹ da chajị kam ka lihi bala ajị nya ọnụ ọlẹ kam myị ha iDevidi ọnchẹ nyam.’ ”

⁷Ọọwa, Ayịsaya-à byi anchẹ nya iHesekaya yẹkẹẹ, “Anụ go egbe nya okiledu hịlẹ-hịlẹ, kanụ ya ba iyi nya adịrahụ mẹ.” Ị họ ịnyị lẹ, iHeseaya-à hagụ lẹlẹ.

⁸IHesekaya Adịrahụ tọ Ayịsaya wo yẹkẹẹ, “Ịyẹ tị́ ka ri ang-ẹjẹẹ nyori Amkpaa ka họm uda kpụ m̄ ka jẹ pwụ Ube nya Amkpaa myị ẹnụtụrụ ọhata nya alẹ?”

⁹Ayịsaya wẹ byoo yẹkẹẹ, “Amkpaa ka ya ang-ẹjẹẹ hang ká ka jẹ nyori ọ ka họng uda ịnyịlẹhị. Oyina-à tị́ hang gụ: ụrụrụ ọlọnang nya ẹpwang ā jẹ kịlahị apatẹ iwo mẹ lee ọ tị́ jẹ kẹkpẹ apatẹ iwo?”

¹⁰IHesekaya wẹ byoo yẹkẹẹ, “Ụrụrụ ọ-jẹ kịlahị ri ẹla onyeewe koo. Ụrụrụ ā jẹ kẹkpẹ mẹ kam yẹ mẹ-ẹ̀.”

¹¹Ọọwa, Ayịsaya-à raabwọ ha Amkpaa lẹ, Amkpaa-à họ ụrụrụ à jẹ kẹkpẹ apatẹ iwo ọ-ọnang ọlẹ ká Ehasị Adịrahụ me lụka nyamwụ lẹlẹ.

¹²Ụka ọọwa, iMerodakị-ịbaladan Adịrahụ nya ala ịBabịlọn ọnyị nya ịBaladan wo oja ya ẹdụrụ nyị jụ iHesekaya Adịrahụ. Ọọwa, ọ ya ileta bala ang-ahị du kịlọọ lẹlẹ.

¹³IHeseakaya da alẹrụ ịịwa ọwụraba. Ọ mẹ ang myị ang ilebe nya ang-ụdụ nyamwụ wuu jaa. Ọ mẹ okpoko onyoowuru bala okpoko ịgọm bala ida ichoru kwọkwọ bala ang-abwọ nya ẹwụ tụ ang-ụdụ nyamwụ ịkịla wuu jaa. Ịngịngịhyẹ-ẹ́ juwa ọdọda nya adịrahụ bala ọpyị nyamwụ wuu kọ mẹjaa ka lẹ ka.

¹⁴Ọọwa, Ayịsaya ọlọmwụ a kele ka ẹga nya iHesekaya Adịrahụ kaka tọọ wo yẹkẹẹ, “Alẹng ịwẹ tị́ bwu ale-è? Ị tị́ bying anyị-ị̀?” IHesekaya wẹ byoo yẹkẹẹ, “Ị wẹ bwu ịBabịlọn lụrụ-lụrụ.”

¹⁵Ayịsaya tọọ wo myịmyị yẹkẹẹ, “Ịyẹ ị̄ tị́ yẹ ẹ-ẹpwa nya adịrahụ?” IHesekaya wọọ yẹkẹẹ, “Ang myị ang ịlụwa wuu ị yẹ lẹ. M̀ mẹ ang myị ang nya ang-ụdụ nyam wuu jaa.”

¹⁶Ọọwa, Ayịsaya a byi iHesekaya yẹkẹẹ, “Wo ẹrụ ọlẹ ká Amkpaa du tọng lẹẹ mẹ:

¹⁷Ụka juwa wẹ ká ang myị ang ịlẹpwa nyang wuu, tụ ịlẹ ká adang igogo anyị go ju ụjị gbee daalẹ wẹẹ, ká aluji ka nwụlaa wuu kpa rụ ka ịBabịlọn. Ịngịngịhyẹ-ẹ́ ka hi jam ẹgẹlẹ ụpẹnị-ụpẹnị ka.

¹⁸Ụka ọọwa, anyị nya ịlọng lụbwọ-lẹta ịhyẹ juwa kị ka go kpa rụ, rwaa ụgba, kị ka ri anchẹ ịlẹpwa nya adịrahụ nya ala ịBabịlọn.”

¹⁹Irya nya iHesekaya Adịrahụ ri nyị la abwọ myị abwọ la okpunyi nyị ka ji lụka nya ọhịhị nyọwa. Ọọwa, ọ yẹkẹẹ, “Ẹlẹwẹ ká Amkpaa ya wẹ hiigu lụmẹ.”

²⁰Ang myị ang ịkịla ịlẹ ká iHesekaya Adịrahụ họ tụ jaabwọ ká ọngịrị nyamwụ lụmẹ kaka ba bala ẹmwụ nya enyi ọlẹ kọ wu, dọọ ụgbụ nyọka gbile enyi bwu ụwa wẹ epweji nya iJerusalẹm wuu lẹ, ị daa ju ụ-ụpwụ nya Ego nya Ịdịrịhụ nya ala iJuda.

²¹Ụka ká iHesekaya gbu, ịManasẹ ọnyị nyamwụ à ri adịrahụ kwiwa nyamwụ lẹlẹ.