Read idege 2 ỊDỊRỊHỤ 21 Bible Online

2 ỊDỊRỊHỤ 21 - idege bible

2 ỊDỊRỊHỤ 21

¹ỊManasẹ gu ẹka iwo kụrụ imiiye ụka kọ dọmwụ nya adịrahụ oriri. Ọ hụ i-iJerusalẹm ri adịrahụ ẹka iwo ịrụ kụrụ ịrụ. Ẹnyị nya ịnamwụ à ri iMefisiba lẹ.

²ỊManasẹ họ ang inyibyi ị-ịlahị nya Amkpaa gbịla ọhọhọ ịtịpyọ nya alẹpwụma ịlẹ ká Amkpaa ku rụ hi ẹga da ha ala Isirẹlụ.

³ỊManasẹ myịmyị ma ada ị-kpụ ịlẹ wuu ká iHesekaya adamwụ ta ayịreji wuu nwụ. Ọ me ogidi ha ojiga ịBaalụ. Ọ mẹ ukpeku nya Achẹra ojiga ọnyang jaabwọ ká Ehabụ Adịrahụ nya ala Isirẹlụ họ. Ọ hirikpẹẹ ha ịdịchụ bala ọ-gbịgba haa.

⁴Ọ me ogidi nya ijiga u-Ube nya Amkpaa, ẹga ịnọ ká Amkpaa ya ụwa nyaa ka gbịgba họwa lẹ.

⁵Ọ myịmyị me ada ikiliya ẹga kị ka kpụ ịdịchụ rịrị ọdọda imimiiye ịlẹpwụ nya Ube nya Amkpaa.

⁶ỊManasẹ dọmwụ hu ọnyị ọlẹng nya ịlọmwụ ọhẹ kịla iya ọ-rụ ila. Ọ yụbwọ ju ẹla nya egino ọyẹyẹ bala ụhwa. Ọọ ka ọlọmwụ ọyẹyẹ bala o-wo ẹla bwu ẹga nya alegu. Ọ họ ang inyibyi lụmẹ ka kpoye ị-ịlahị nya Amkpaa, du agbama ju Amkpaa.

⁷ỊManasẹ hu ukpeku nya Achẹra ojiga ọnyang ọlẹ kọ kọ rịrị u-Ube nya Amkpaa, ẹga ọlẹ kpangga ká Amkpaa lẹẹ ya ẹla ta iDevidi bala iSolomọn ọnyị nyamwụ chajị nyamwụ yẹkẹẹ, “Am̀ u-Ube Ịgọgọ ọla iJerusalẹm ọlẹ à ri ẹga kam chụ bwu ẹpwụ nya imwawụ iwo kụrụ imiiye nya ala Isirẹlụ wuu kị ka chihi ju ẹnyị nyam gbe oyi myị oyi lẹ.

⁸Ó-ri ká ala Isirẹlụ-ụ́ ju ihi nya ehile nyam ịlẹ wuu kam ya du iMosisi ọnchẹ nyam kịlaa aalẹ, ḿ ka myị aluji kaa gyaa kpa rụ nya anyịhị hi ọpyị ọlẹ kam ya ha adaa igogo kaka.”

⁹Ala iJuda-á tị ju ihi nya Amkpaa ka. ỊManasẹ kpaa hwahị kaka họ ang inyibyi ịlẹ kị dọmwụ gụ ịnya alẹpwụma ịlẹ ká Amkpaa ta ayịreji hi ẹga da ha ala Isirẹlụ wẹẹ.

¹⁰Amkpaa ya ịịlẹ bwula alọmwụ anchẹ nyamwụ yẹkẹẹ,

¹¹“ỊManasẹ Adịrahụ nya ala iJuda lẹẹ, ọ họ ang iyibyi ikpelego lẹ. Ọ dọmwụ họ tịpyọ gụ ala Amọ ịlẹ kị kụ ọpyị ọlẹ jene nya ala Isirẹlụ lẹ. Ọ kpa ala iJuda kaka ju ka ẹpwụ nya ijiga ịkpụkpu lekpeku nyamwụ.

¹²Lẹẹlẹ, am Amkpaa Ohe Oluhye nya ala Isirẹlụ jam ka kpa akama onyobyi-obyi wẹ uhye nya iJerusalẹm bala iJuda lẹ. Ọng myị ọng kọ wo ẹla ọọwa, ejiri ka woo.

¹³M̀ ka yẹ iJerusalẹm akama jaabwọ kam yẹ ịSameriya bala jaabwọ kam họ Ehabụ bala ugbiyegu nyamwụ. M̀ ka yịlẹ iJerusalẹm hụrụ jaabwọ ká ọngịnyị yịlẹ ẹja kpá kọ kaa yọọ ahị kụrụ eji kọ ka chị ọhụ.

¹⁴M̀ ka nyẹẹkpẹ da angị ihihi lọhịhị ẹpwụ nya angịnyị nyam ju aluji ụ-ụbwọ. Ị ka kụrwaa chẹẹchẹẹ, waa ang wụ wuu kpa rụ.

¹⁵Ang odudu ri ị họ ang onyobyi a-ahị nyam lụmẹ kaka kpoye. Ị du agbama jum bwu ụka-ụka ká adaa igogo anyị gba kpehe bwu Ijipiti gbee daalẹ ọlẹ.”

¹⁶ỊManasẹ nwụ iru nya angị da ẹlẹlẹhẹ-ka gbee ká ịwọ nya angị da ẹlẹlẹhẹ-ka ịwẹ chị cheji tụ ẹga myị ẹga nya iJerusalẹm da wuu. Ọwẹ kaka ba ojiga ọlẹ kọ kpa ala iJuda kaka kpụ u-uhye, du kị họ ọhọbịrị ba Amkpaa.

¹⁷Ang myị ang ịkịla ịlẹ ká ịManasẹ họ tụ ịhọbịrị ịlẹ kọ họ wuu lẹ, ị daa ju ụ-ụpwụ nya Ego nya Ịdịrịhụ nya ala IJuda.

¹⁸Ụka ká ịManasẹ gbu, ị jwoo eji ẹ-ẹrụ nya Usa ọlẹ kọ ba ọdọda nya adịrahụ ba.

¹⁹Amọn gu ẹka iwo imiiye kụrụ imiiye ụka kọ dọmwụ nya adịrahụ oriri. Ọ hụ iJerusalẹm ri adịrahụ ẹka imiiye. Ẹnyị nya ịnamwụ ri iMechulẹmẹtị ọnyị nya ịHarusi iJotiba.

²⁰Ọ họ ang onyobyi ba Amkpaa jaabwọ ká ịManasẹ adamwụ họ.

²¹Ọ gbịla ọhọhọ ọnyị myị ọnyị nya adamwụ. Ọ kpụ eteji ha ekpeku ịlẹ wuu ká adamwụ kpụ eteji ha ịnyịnyị.

²²Ọ nyẹẹkpẹ da Ohe Oluhye nya adamwụ igogo anyị. Ọ́ myị ba ụgbẹyị nya Amkpaa jẹ ka.

²³Ọọwa, alegbeju ịtụkụ yi Amọn a me obyi jwoo lẹ, ị bọọ kele ka ẹpwang nyamwụ ka nwụ lẹlẹ.

²⁴Ụka ọọwa, ala iJuda nwụ angịlẹ kị nwụ Amọn Adịrahụ lẹ, ị hu iJosaya ọnyị nyamwụ ri adịrahụ ku ọmwakpa nyamwụ lẹlẹ.

²⁵Ang myị ang ịkịla ịlẹ ká Amọn họ wuu lẹ, ị daa ju ụ-ụpwụ nya Ego nya Ịdịrịhụ nya ala IJuda.

²⁶Ị jwoo eji i-iworu nya ịlọmwụ ụ-ụwa ẹpwụ nya ẹrụ nya Usa. Ọọwa, iJosaya ọnyị nyamwụ a ri adịrahụ ku ọmwakpa nyamwụ lẹlẹ.