Read idege 2 ỊDỊRỊHỤ 22 Bible Online

2 ỊDỊRỊHỤ 22 - idege bible

2 ỊDỊRỊHỤ 22

¹IJosaya gu ẹka ineku ụka kọ dọmwụ nya adịrahụ oriri i-iJuda. Ọ hụ iJerusalẹm ri adịrahụ ẹka iwo ịta kụrụ ookpokpo gbẹgbịlẹ. Ẹnyị nya ịnamwụ ri iJedida ọnyị nya Adaya bwu epweji nya iBosikatị.

²IJosaya họ ang ọnyịịla ị-ịlahị nya Amkpaa. Ọ dịrẹ ọgụ-ẹpẹtẹ nya iDevidi adamwụ ogogo, juwa họ ang ọlẹ kọ hiigu ụka wuu ka.

³Ẹ-ẹpwụ nya ẹka iwo kụrụ ineku nyọlẹ ká iJosaya ri adịrahụ, ọ du ịChafan akịraa ọlẹpwa nya adịrahụ ọlẹ ká ẹnyị nya adamwụ ri Asaliya, ká adamwụ-ọgbahị ri iMechulam kele ka Ube nya Amkpaa. Ọ byọọ yẹkẹẹ,

⁴“Kele ka ẹga nya iHilikaya olegbeju okiliya ká byọọ kọ ya jeng jaabwọ ká okpoko ọlẹ wuu ká angịgbe ọnang nya Ube nya Amkpaa ye bwu ẹga nya angịnyị la kaka ba wẹẹ.

⁵Byoo kọ ya okpoko ọwẹ ha alegbeju ịkpẹhị rịrị ụkụrwọ nya Ube nya Amkpaa ọnwụla-nwụla, chajị kị ka kpa nwụ

⁶ikebenta bala angị me ube bala angị be ajwọ uri mẹ. Ị́ họ lẹ, ị kpa okpoko ọwẹ ra ekeji bala ajwọ ịlẹ kị ka kpa họ ụkụrwọ ịnyịnyị mẹ.

⁷Ajị nyọlẹ ká alegbeju ịkpẹhị rịrị ụkụrwọ ịwẹ wẹẹ họ kpẹẹkpẹẹ lụmẹ bala ọ-chịla o-hu ọkịlẹtụ ha lẹ, ọ́ baba nyọka byaa ya nyị kụ ang achụ jaabwọ kị bwu họ ụkụrwọ lokpoko ọwẹ kaka.”

⁸Ụka ká ịChafan ya ẹrụ nya adịrahụ kpá lẹ, iHilikaya à byoo yẹkẹẹ, “M̀ ye ụpwụ nya Ehile nya Amkpaa u-Ube Ịgọgọ ye lẹẹ.” Ọọwa, ọ ya ha ịChafan lẹ, ịChafan à wọọ lẹlẹ.

⁹ỊChafan akịraa-à tịrẹkpẹ ka ẹga nya adịrahụ lẹ, ọ ya joo yẹkẹẹ, “Alegbeju ịtụkụ ying ya okpoko ọlẹ kọ ji Ube nya Amkpaa ha alegbeju ịkpẹhị rịrị ụkụrwọ lẹ.”

¹⁰Ọọwa, ọ ya je adịrahụ ịnyịnyị yẹkẹẹ, “IHilikaya olegbeju okiliya ya ụpwụ ọhẹ ham lẹẹ.” Lẹ, ịChafan à wọọ je adịrahụ lẹlẹ.

¹¹Ụka ká iJosaya Adịrahụ wo ala ịlẹpwụ nya Ụpwụ nya Ehile ọwẹ kị wẹẹ wa jo, ọ gu ịwụrụ nyamwụ ene hụrwang-ng ẹ-ẹpwụ nya olujwo ọtọtọ.

¹²Ọọwa, adịrahụ a da iHilikaya olegbeju okiliya bala Ahikam ọnyị nya ịChafan bala Akịbọ ọnyị nya iMikaya bala ịChafan akịraa bala Asaya ọngọ myị ẹrụ ha adịrahụ ehile yẹkẹẹ,

¹³“Anụ kele kanụ wo la Amkpaa ham bala ala iJuda wuu kọ ya jenu wẹẹ. Ọmẹjẹ ịlanyị ị tị́ da ụ-ụpwụ ọlẹ kị ye lẹẹ u-Ube nya Amkpaa-āà? Ikẹjẹ-awụrụ nya Amkpaa wuru jahị dahị lụmẹ, chajị adahị bala igogo anyị-ị́ myị ju ihi nya ala ịlẹpwụ nya ụpwụ ọwẹ jaabwọ ká Amkpaa tịtọ kahị ka họ ka.”

¹⁴Ọọwa, iHilikaya bala Ahikam bala Akịbọ bala ịChafan bala Asaya-à kele ka ẹga nya ọlọmwụ ọnyang ọhẹ kị wụrụ iHuluda lẹlẹ. Ọ kụ ẹpwa o-oye onyeewe nya iJerusalẹm. Ọrụmwụ ịChalum ri ọnyị nya iTikiva. Adamwụ-ọgbahị ri ịHaahasị. Ọwa-à kaa kpẹhị rịrị ịwụrụ ịla Ube nya Amkpaa lẹ.

¹⁵Ụka kị ya ẹla nya ụpwụ ọwẹ jọọ lẹ, ọ byaa yẹkẹẹ, “Anụ kele kanụ byi adịrahụ kọ duunu ẹrụ tọm-m̀ wẹ ya ịịlẹ Amkpaa Ohe Oluhye nya ala Isirẹlụ a ya lẹ:

¹⁶‘M̀ juwa ka ta epweji nya iJerusalẹm ọlẹ bala alụwa ayịreji jaabwọ kị da-à wẹ ụ-ụpwụ ọlẹ ká Adịrahụ nya ala iJuda wa wẹ.

¹⁷Ang odudu ri ị nyẹẹkpẹ dam juwa kpụ eteji ha ijiga. Ị du agbama jum bwula ang myị ang ịlẹ kị họ wuu. Agbama nyam wuleji lẹ, ọ́ tị ka kpụba kaka.

¹⁸Ịnyang ahụ adịrahụ tị lẹ, am Amkpaa Ohe Oluhye nya ala Isirẹlụ jam bying yẹkẹẹ, à wo ẹla ọlụpwụ ọlẹ kị wa lẹ.

¹⁹À yẹ irya da ká kpa ịlọng keji ị-ịlahị nyam, kpụ ā gu ịwụrụ nyang ene ụka ká wo ẹla ọlẹ kam ya chajị nya epweji ọlẹ bala angịnyị ịlụwa. M̀ ya ịnọ nyori ẹgẹlẹ ka kpụ egwawụ-egwawụ da luhwo-luhwo. Ma m tị wo abwọ ọ rịrị nyang lẹ.

²⁰Akama ọlẹ kam ka yẹ iJerusalẹm ka wẹ ụka ká gbu lokpunyi kpá, kị jung eji.’ ” Ọọwa, alẹrụ ịwẹ à nya kaka ya ẹrụ ọwẹ je iJosaya Adịrahụ lẹlẹ.