Read idege 2 ỊDỊRỊHỤ 23 Bible Online

2 ỊDỊRỊHỤ 23 - idege bible

2 ỊDỊRỊHỤ 23

¹Ọọwa, iJosaya Adịrahụ à wụrụ alegbeju nya ala iJuda bala ịnya iJerusalẹm wuu kaka jịra lẹlẹ.

²Adịrahụ kpa angịwẹ bala ala iJuda bala ala iJerusalẹm bala angịkiliya bala alọmwụ wuu tụ ọng myị ọng wuu ịlẹ kị ri alẹbyahị ri lee alụdụ kele ka Ube nya Amkpaa. Ọọwa, ọ wa ụpwụ nya iro ọlẹ kị ye bwu Ube nya Amkpaa wẹ gboo ká ịwa wuu ka wo lẹlẹ.

³Ọ godayị rịrị ẹ-ẹga ọtachị ọlụwa ọhẹ lẹ, ọ nwa iro ha Amkpaa nyọka ju ihi nya ehile bala ọmẹjẹ nyamwụ wuu kpẹẹkpẹẹ lọkịlẹtụ bala ugbodu okpukpuru nyamwụ bala ọ-ka họ ang ịlẹ wuu kị da ụ-ụpwụ nya iro ọọwa lẹlẹ. Angịnyị wuu myị ọnụ nyọka kpa ehile nya iro ọnwanwa ọọwa ịnyịnyị.

⁴Ọọwa, iJosaya-à byi iHilikaya Olegbeju Okiliya bala angịkiliya ịkịla bala angị gbe ọnang nyị gba ang myị ang ịlẹ kịị kpa họ ụkụrwọ nya ịgba ọgbagba ha ijiga ịBaalụ bala Achẹra bala ịdịchụ kpehe bwu Ube nya Amkpaa mẹ lẹlẹ. Adịrahụ ya ị go ang ịịwa wuu kpa kpehe kaka chị ila hụrụ ọ-Ọkpọọ nya iKidirọn lẹ, ị kpa agbụ nyaa kele ka ịBẹtẹlụ lẹlẹ.

⁵Adịrahụ iJosaya gba angịkiliya ịlẹ ká ịdịrịhụ nya ala iJuda go ene-ene nyọka kịla iya bala ọ-ka ju itangare ila a-ada ị-kpụ ijiga ilepweji nya iJuda bala ịlẹga i-ju iJerusalẹm chwẹẹ wuu hi ụkụrwọ. Angịlẹ kọ gba wuu ri anglẹ kịị kịla iya ha ịBaalụ bala ẹnụ baya ọya bala ang iluhye-ọgba datị-datị tụ ịdịchụ wuu.

⁶Ọ gba ukpeku nya Achẹra ojiga ọnyang kpehe hi Ube nya Amkpaa kpa bwu iJerusalẹm kele ka Ọkpọọ nya iKidirọn lẹ, ị chọọ ila ụ-ụwa lẹlẹ. Ị gyọọ kpụ ọrụ pwụrẹ-pwụrẹ lẹ, ị nyi ọrụ nyamwụ pwẹpwẹepwẹ hụrụ ka ẹga o-ju egu eji nya alụma lẹlẹ.

⁷Ọ ya ị ịkwọta nya alakpara ilube nya Amkpaa ju eji. Ụ-ụwa anyang à kaa nụ ịwụrụ ịlẹ kịị kụrụ kpa gbịgba ha Achẹra ojiga ọnyang lẹ.

⁸Ọ kpa angịkiliya nya Amkpaa ịlẹ kị kụ e-epweji ịkịla ịla iJuda wuu nyà wẹ iJerusalẹm. Ọ bịrị ada ị-kpụ ijiga ẹga kịị ju ịtangare ila ịlẹ kị juwa bwu ịGẹba lalaala kaka pwụ iBiyẹchẹba tụ ẹga ị-kpụ ijiga ịlọnụ nya ogirigba nya iJochuwa kọ ri ịGọvụnọ nya iJerusalẹm. Ogirigba ọọwa ji ka oye ụpụpịla nya epweji ụka ká ọngịnyị juwa jẹ kele.

⁹Ị́ myị angịkiliya ịlada nya ijiga ịwẹ họ ụkụrwọ u-Ube nya Amkpaa, ị tị kaa rị ịkaa ọmịrịị-mịra ka ịlẹ kị kaa ya ha angịkiliya aanaa.

¹⁰Ọ du angịnyị kele kaka ju iTofẹtị ẹga ọ-kpụ ijiga ọ-Ọkpọọ nya iHinọm àgụgụ, chajị ká ọngọngọhẹ-ẹ́ ka ya ọnyị ọnyang lee ọnyị nyamwụ kịla iya ha ojiga ịMọlẹkị kaka.

¹¹Ọ mwụ anyịrẹ ịlẹ ka ịdịrịhụ inyogo nya iJuda me rịrị ọ-ọnang nyọka kpa chị ihi ju ẹnụ hi ụwa. Ọ-ọnụ nya ẹpwa nya ịNatan-ịmẹlẹkị olegbeju ọgbẹgbịlẹ nya ọdọda nya adịrahụ ị ya anyịrẹ ịịwa rịrị lẹ. Ọ chị ang ịrụnyẹ ịlẹ kị họ nyọka kpa chị ihi ju ẹnụ ila hụrụ ịnyịnyị.

¹²Ogidi ịlẹ ká ịdịrịhụ inyogo nya iJuda me rịrị u-uhye nya ẹpwa nya Ehasị Adịrahụ wuu, iJosaya tụrwaa chị keji tụ ogidi ịlẹ ka ịManasẹ Adịrahụ me rịrị ọdọda imiiye ilube nya Amkpaa. Ọ baa ene yịgẹ-yịgẹ gyaa chị ka Ọkpọọ ny iKidirọn.

¹³Ada ị-kpụ ijiga ịlẹ ká iSolomọn Adịrahụ nya ala Isirẹlụ nwụ rịrị ka ọmwẹnụ-ụtụrụ nya iJerusalẹm e-edii nya Ọgbọdọ nya Olivu[7] lẹ, iJosaya jwaa àgụgụ wuu. ISolomọn lẹẹ nwa ada ịịwa ha Asịtatẹ ojiga ọnyang nya ala ịSayịdọn bala iKemochi ojiga nya ala iMowabụ bala iMolẹkị ojiga ala Amọn.

¹⁴Ọ tụrụ ajwọ irigọgọ bala ekpeku nya ojiga Achẹra lẹ ọ go ekpinegu nya angịnyị chị ka ẹga kị rịrị ene-ene lẹlẹ.

¹⁵IJosaya tụrụ ada ọ-kpụ ojiga ọlẹ ka iJerobowam Adịrahụ ọnyị nya iNebatị nwụ rịrị ị-ịBẹtẹlụ ụka kọ kpa ala Isirẹlụ kaka ju ka ẹpwụ nya ọhọbịrị. Ọ go ajwọ ịịwa kpụ ọrụ pwụrẹ-pwụrẹ bala ọ-chị ukpeku nya Achẹra ila.

¹⁶Ụka ká iJosaya kpẹhị pileji dagaga ju, kọ yẹ iworu ịhyẹ i-ikiti ọlụwa, ọ ya ị go ekpinegu nya egu ịlụwa kpa kaka chị ila u-uhye nya ada ọla ịBẹtẹlụ ọọwa. Bwula ọhọhọ ọwẹ, iJosaya ju ada ọwẹ àgụgụ jaabwọ ká Amkpaa nya neeji tataata ene bwula ọlọmwụ nyamwụ ụka ká iJerobowam godayị ẹ-ẹga nya ada ọwẹ lụka nya ọhụhụ. ọlẹ kọ wụrụ. Ọọwa, iJosaya a jahị kpata lẹ ọ yẹ iworu nya ọlọmwụ ọlẹ kọ ya ẹlẹwe neeji lẹ,

¹⁷ọ tọ wo yẹkẹẹ, “Iworu nya owo à tị lalẹẹ?” Ala ịBẹtẹlụ a wẹ byọọ yẹkẹẹ, “Ịnya ọlọmwụ o-bwu iJuda ọlẹ kọ ya ala ịwẹ ká họ-ọ̀ wẹ neeji ịnyị.”

¹⁸Ọọwa, ọ byaa yẹkẹẹ, “Anụ bahyọọ kem. Ị ka gba ekpinegu nyamwụ chị odehe ka. Lẹ, ị ba hi ekpinegu nyamwụ bala ịnya ọlọmwụ ọlẹ kọ bwu ịSameriya lẹlẹ.”

¹⁹E-epweji ọnyị myị ọnyị nya Isirẹlụ, iJosaya tụrụ ẹga ị-kpụ ijiga ịlẹ ká ịdịrịhụ nya Isirẹlụ nwụ du ká Amkpaa wụ ẹjẹ taa wuu. Jaabwọ kọ họ ẹ-ẹga nya ada ịla ịBẹtẹlụ, ọ họ ụ-ụwa ịnyịnyị lẹ.

²⁰IJosaya nwụ angịkiliya nya ijiga ịwẹ wuu u-uhye nya ogidi ịlẹ kịịwa ayịdang kaa kịla iya. Ọọwa, Ọ nyà ka iJerusalẹm lẹlẹ.

²¹Adịrahụ iJosaya byi angịnyị nyị la ọhụhụ nya Ang Oriri Ọchịpwụrụ nyọka chị ihi ju Amkpaa Ohe Oluhye nyaa jaabwọ kị da nọ ụ-ụpwụ iro ọnwanwa.

²²Bwu ụka ka angịleje kpẹhị rịrị Isirẹlụ gbee da wẹ ụka ọwẹ adịrahụ ọhẹ Isirẹlụ lee iJuda-á wụrụ ọhụhụ nya Ang Oriri Ọchịpwụrụ ọlịịwẹ lẹka.

²³Ẹ-pwụ nya ẹka iwo kụrụ ineku nya adịrahụ oriri nya iJosaya ị kpa ri ang Oriri Ọchịpwụrụ ọlẹ lẹ.

²⁴Ọ ba ọọwẹ ka, iJosaya ku alegino bala angị yọyị rụ bwu iJerusalẹm bala ẹga ịkịla nya iJuda wuu. Ọ go ekpeku bala ijiga bala ang ị-kpa kpụ ijiga ịkịla wuu hụrụ. Ọọwa, ri ọ-ka họ dịrẹ ehile ịlẹ kị da ju ụpwụ ọlẹ ká iHilikaya yẹ u-ube nya Amkpaa.

²⁵Adịrahụ ọhẹ-ẹ ji ene nya iJosaya lee o-ku nyamwụ ọlẹ kọ myị ẹrụ ha Amkpaa lọkịlẹtụ bala irya bala ọngịrị nyamwụ juwa ju ihi nya Ehile nya iMosisi o-me ịnyamwụ kaka.

²⁶Amkpaa lẹẹ ju agbama ọtụka-ọtụka ta ala iJuda chajị nya ang inyibyi ịlẹ ká ịManasẹ Adịrahụ họ. Agbama ọọwa-á tị pwuru lẹka.

²⁷Ọọwa, Amkpaa-à yẹkẹẹ, “M̀ ka ku ala iJuda rụ hi ẹhị nyam jaabwọ kam họ ala Isirẹlụ lẹ. M̀ ka pwa iJerusalẹm epweji ọlẹ ịnọ kam ya nyori ụwa angịnyị à ka gbịgba ham lẹ.”

²⁸Ang myị ang ịkịla ịlẹ ká iJosaya Adịrahụ họ wuu lẹ, ị daa ju ụ-ụpwụ nya Ego nya Ịdịrịhụ nya ala IJuda.

²⁹Lụka nya adịrahụ oriri nya iJosaya, iNeko Adịrahụ nya ala Ijipiti kpa angịdẹwụ nyamwụ jẹ kaka chịkụ Ihu iYufuretisi kị ka da adịrahụ ọtụka nya ala Asiriya ụbwọ. Adịrahụ iJosaya tị kpa angịdẹwụ nyamwụ kpehe jahị da adịrahụ iNeko. Ụka kị tọ awụlẹ i-iMegido lẹ, ị nwụ iJosaya lẹlẹ.

³⁰Alegbeju ịtụkụ yoo kpa ogu nyamwụ a-ang ọrụnyẹ nyà wẹ iJerusalẹm lẹ, ị jwọọ eji i-iworu nya ịdịrịhụ lẹlẹ. Ọọwa, ala iJuda-à hu iJehowahasị ọnyị nyamwụ adịrahụ kwiwa nyamwụ lẹlẹ.

³¹IJehowahasị gu ẹka iwo imiiye kụrụ ịta ụka ka kọ ri adịrahụ nya iJuda. Ọ hụ i-i-iJerusalẹm ri adịrahụ ẹ-ẹpwụ nya ịya ịta. Ịnamwụ à ri ịHamutalụ ọnyị nya iJeremaya bwu epweji nya iLibina lẹ.

³²Ọ họ ang onyobyi a-ahị nya Amkpaa gbịla adamwụ igogo anyị.

³³Ụka ọọwa, iNeko Adịrahụ nya ala Ijipiti wọọ ju agba e-epweji nya iRibila ọ-ọpyị nya ịHamatị. Ọ kpa ala iJuda nyẹ ẹpwa lokpoko onyoowuru ụnọ ịta da ohu ine (3,400) bala okpoko ịgọm iwo ịta kụrụ ine.

³⁴Adịrahụ iNeko hu Eliyakim ọnyị ọkịla nya iJosaya ri adịrahụ ku ọmwakpa nya iJosaya. Ọ yẹ ẹnyị nya Eliyakm da ka ri iJehoyakim. Ọọwa, ọ kpa iJehowahasị rụ ka Ijipiti lẹ, ọ gbu ụ-ụwa lẹlẹ.

³⁵IJehoyakim kaa nyẹ ala iJuda ẹpwa lụmẹ-lụmẹ jaabwọ ka ọngọngọọng nyaa jụ ụbwọ ka ba chajị kọ ka ye okpoko nya ẹpwa ọnyẹnyẹ ha Adịrahụ iNeko.

³⁶IJehoyakim gu ẹka iwo imiiye kụrụ ịrụ ụka kọ dọmwụ nyọka ri adịrahụ nya iJuda. Ọ hụ i-iJerusalẹm ri adịrahụ ẹka iwo kụrụ okpokpo gbẹgbịlẹ. Ẹnyị nya ịnamwụ a ri iSebida ọnyị nya iPedaya bwu epweji nya iRuma lẹ.

³⁷IJehoyakim ọwẹ họ ang ịtịpyọ a-ahị nya Amkpaa gbịla adamwụ igogo anyị.