Read idege 2 ỊDỊRỊHỤ 24 Bible Online

2 ỊDỊRỊHỤ 24 - idege bible

2 ỊDỊRỊHỤ 24

¹Lụka nya adịrahụ oriri nya iJehoyakim, iNebukadinesa Adịrahụ nya ala ịBabịlọn be ọpyị nya iJuda ẹpwa. Ọọwa iJehoyakim à ri ọnụ balọọ lẹ, ọ ji ekpeleji nya ọngịrị nya iNebukadinesa ẹ-ẹpwụ nya ẹka ịta gbẹgbịlẹ lẹlẹ. Ọ tị nọ chẹẹ, iJehoyakim tị legbeju-ọngịrị ta iNebukadinesa.

²Ụka ọọwa, Amkpaa du angịdẹwụ nya ala ịBabịlọn ala iSiriya bala ala iMowabụ bala ala Amọn yahị da iJuda chajị nyọka ka ta iJuda ayịreji jaabwọ kọ ya bwula alọmwụ nyamwụ.

³Ajị nya ịhọbịrị nya ịManasẹ a du ká Amkpaa họ ká akama ịwẹ wẹ chị iJuda ọgụ kọ ka kwaa rụ hi ịlọmwụ ẹ-ẹhị jaabwọ kọ ya ene-ene lẹ.

⁴Ọgụgụ rị ajị nya angị da ẹlẹlẹhẹ-ka ịlẹ kọ nwụ timajẹ. Amkpaa-á nwụlanọ nyọka hịnyọhi họọ nya angọọwa ka.

⁵Ang myị ang ịkịla ịlẹ ká iJehoyakim họ wuu lẹ, ị daa ju u-upwụ nya Ego nya Ịdịrịhụ nya ala IJuda.

⁶Ụka ká iJehoyakim gbu, ọnyị iJehoyachin ọnyị nyamwụ à ri adịrahụ kwiwa nyamwụ lẹlẹ.

⁷Adịrahụ nya ala Ijipiti lẹ, ọwa-á myịmyị kpehe lalẹwụ nyamwụ myị kaka, chajị ọpyị ọlẹ kọ ri ịnyamwụ ene-ene lẹ, adịrahụ nya ịBabịlọn ye kụ wuu bwu Ihu iYufuretisi lalaala ka ju ka ẹtẹ ọ-Ọkpọọ nya Ijipiti.

⁸IJehoyachin gu ẹka iwo kụrụ ineku lẹ, ọ ri adịrahụ nya ala iJuda lẹlẹ. Ọ hụ iJerusalẹm ri adịrahụ ịya ịta kẹnẹ-kẹnẹ. Ẹnyị nya ịnamwụ ri iNehuchita ọnyị nya Elinatan bwu iJerusalẹm.

⁹Ọ họ ang ịtịpyọ ị-ịlahị nya Amkpaa jaabwọ ká adamwụ họ.

¹⁰Lụka nya adịrahụ oriri nya iJehoyachin, iNebukadinesa Adịrahụ nya ala ịBabịlọn du angịdẹwụ nyamwụ kaka mwẹla ta epweji nya iJerusalẹm lẹ, ị chị urwe dagaga jwọọ lẹlẹ.

¹¹INebukadinesa lịlọmwụ wẹ iJerusalẹm lụka ká angịdẹwụ chị urwe dagaga jwọọ.

¹²Ọọwa, iJehoyachin Adịrahụ tụ ịnamwụ bala anyị alẹng nyamwụ bala alegbeju nya angịdẹwụ nyamwụ bala alegbeju ịlẹpwa nyamwụ wuu à ya ịlaa ju ala ịBabịlọn ụ-ụbwọ lẹlẹ. Ẹ-ẹpwụ nya ẹka ọhaneku nya adịrahụ oriri nya iNebukadinesa lẹ, ọ du kaka wu iJehoyachin kpa rụ nya ọlagba lẹlẹ.

¹³Ụka ọọwa, iNebukadinesa go ang-ụdụ ilube nya Amkpaa bala ịlẹpwa nya Adịrahụ tụ ang-abwọ nya okpoko ịgọm ịlẹ wuu ká iSolomọn Adịrahụ họ guru u-Ube nya Amkpaa kpa rụ ka ịBabịlọn. Ẹlẹwẹ họ jaabwọ ká Amkpaa ya neeji ene.

¹⁴Angịkịla ịlẹ ká iNebukadinesa go kpa rụ nya alagba ri alegbeju nya angịdẹwụ tụ angịdẹwụ ịlahịchịng-ịlahịchịng bala alịbańg bala angị jẹ ụkụrwọ nya ụbwọ wuu. Angịlẹ kọ go wuu la angị ụnọ iwo (10,000) chiriri. Angị ri alẹbyahị ikwookwee kẹnẹ-kẹnẹ ị pẹhi hụ ụwa i-iJuda lẹlẹ.

¹⁵INebukadinesa kpa iJehoyachin Adịrahụ rụ nya ọlagba kele ka ịBabịlọn. Ọ kpa ịnịna nya iJehoyachin bala ịhụ nyamwụ bala alegbeju ịgbẹgbịlẹ tụ alegbeju ịlẹ kị ri ịbagọ-ịbagọ nya ala iJudah wuu rụ.

¹⁶INebukadinesa kpa alẹhị-alẹhị nya angịdẹwụ angị ụnọ irwiye (7,000) bala alịbańg bala angị jẹ ụkụrwọ nya ụbwọ angị ụnọ ookpokpo (1,000) tụ angị la kpịra-kpịra ka dẹwụ myị wuu rụ.

¹⁷Ọọwa, adịrahụ nya ala ịBabịlọn à ịMataniya ọnyịnịna nya adịda nya iJehoyachin ri adịrahụ nya ala iJuda kwiwa nya iJehoyachin lẹ, ọ yẹ ẹnyị nyamwụ da kaka ri iSedekaya lẹlẹ.

¹⁸ISedekaya gu ẹka iwo imiiye kụrụ ookpkpo ụka kọ dọmwụ nyọka ri adịrahụ. Ọ hụ iJerusalẹm ri adịrahụ ẹka iwo kụrụ ookpokpo. Ẹnyị nya ịnamwụ ri ịHamutal ọnyị nya iJeremaya ọla iLibina.

¹⁹Ọ họ ang ịtịpyị ị-ịlahị nya Amkpaa jaabwọ ká iJehoyakim adịrahụ họ.

²⁰Amkpaa wụ ẹjẹ ta ala iJerusalẹm bala ala iJuda gbee kọ kwaa rụ hi ịlọmwụ a-ahị ụka ohyẹẹkpẹ.