Read idege 2 ỊDỊRỊHỤ 25 Bible Online

2 ỊDỊRỊHỤ 25 - idege bible

2 ỊDỊRỊHỤ 25

¹Ẹnụtụrụ okiriwo nya ọya okiriwo nya ẹka ohikichu nya adịrahụ oriri nya iSedekaya lẹ, iNebukadinesa Adịrahụ nya ala ịBabịlọn à kpa angịdẹwụ bwọọọ kaka dẹwụ ta epweji nya iJerusalẹm lẹlẹ. Ị chịkụ odehe nya epweji lẹ, ị me ugbudu ịlẹ kị ka kụ dẹwụ dagaga jwọọ lẹlẹ.

²Ị chị urwe ju iJerusalẹm gbee da ka ẹka iwo kụrụ ookpokpo nya adịrahụ oriri nya iSedekaya.

³Ụka kọ nọ gbee da ká ẹnụtụrụ ohikichu nya ọya ohene nya ẹka ọọwa lẹ, ūhi à changịrị lụmẹ-lụmẹ e-epweji la angịnyị yẹ ang ri kaka lẹlẹ.

⁴Ị chị ugulọ iwa ẹ-ẹgẹhẹ lẹ, iSededaya bala angịdẹwụ à be kpehe lodu ọọwa lẹlẹ, ịnọ ala ịBabịlọn tị kụ dagaga ju epweji wuu. Ị kpehe bwu ogirigba ọlẹga ka egwalọ imiiye ịwẹ gba chị awụlẹ o-oye nya ẹrụ nya adịrahụ lẹ, ị rụ yahị da ka Ọkpọọ nya ịJọdan lẹlẹ.

⁵Angịdẹwụ nya ala ịBabịlọn tị ku iSedekaya Adịrahụ gbee kị wọọ ẹ-ẹgẹhẹ nya ụteeji ịla iJeriko. Ọọwa, angịdẹwụ nyamwụ a nyi epepe hyọọ lẹ,

⁶ị wọọ bẹẹ lẹlẹ. Ị kpọọ kịla iNebukadinesa ka epweji nya iRibila. Ọ la iSedekaya eje lẹ, ọ ya eje wọọ lẹlẹ.

⁷Ị nwụ anyị alẹng nya iSedekaya chahị jwọọ. Ị gbọọ ọwa ayịdang egbahị, jwọọ agba nya oje ọnyọmịla lẹ, ị kpọọ rụ ka ịBabịlọn lẹlẹ.

⁸Ẹnụtụrụ ọharwiye nya ọya ọharụ nya ẹka iwo kụrụ ihikichu nya adịrahụ oriri nya iNebukadinesa ị-ịBabịlọn, iNebusaradan olegbeju nya angị gbe adịrahụ, kọ tị ri ọngọ kaa ju iNebukadinesa irya wẹ iJerusalẹm.

⁹Ọ chị Ube nya Amkpaa ila tụ ẹpwa nya adịrahụ bala ẹpwa nya ịbagọ ịla iJerusalẹm wuu. Ọ ta ebe ịlẹ kị baba lụmẹ wuu ayịreji.

¹⁰Ọọwa, olegbeju nya angịgbeji ọwẹ à kpa angịdẹwụ nya ala ịBabịlọn wuu tụrụ egwalọ nya iJerusalẹm beji lẹlẹ.

¹¹Ụka ọọwa, iNebusaradan go angị ihihi ịla iJerusalẹm tụ angịlẹ wuu ịnọ kị myị ọnụ nyọka ri anchẹ nya adịrahụ nya ala ịBabịlọn lẹ, kị hi hụ ụwa ri alụkụrwọ nya ụbwọ kpa rụ ka ịBabịlọn.

¹²Ọ tị pẹhi angịhyẹ nya alẹbyahị hụ i-iJuda kị ka juwa họ ụkụrwọ nya ẹrụ juwa kpẹhị rịrị alakọnụ ịlụwa.

¹³Ala ịBabịlọn be ịtachị nya oje ọnyọmịla ịla Ube nya Amkpaa ene yịgẹ-yịgẹ bala ang ọrụnyẹ ọ-kpa kpa olo ọlẹ kị họ loje ọnyọmịla tụ irim nya oje ọnyọmịla lẹ ị go oje ọnyọmịla ịlẹ kị kpa họ ang ịwẹ kpa rụ ka ịBabịlọn lẹlẹ.

¹⁴Ị go ịchụ bala ịja bala alẹ bala ang ị-kpa chị ebyi nya itinika bala ịja ị-ya ịwọ nya iyo ikiliya ju bala ịja nya iya nya ịtangare bala ang-abwọ ịlẹ kị họ loje ọnyọmịla kịị kpa họ ụkụrwọ u-Ube nya Amkpaa kpa wuu kpa rụ.

¹⁵Ị go ang myị ang ịlẹ kị kpa okpoko ịgọm lee okpoko onyoowuru họ kpa rụ tụ ịja ichiche bala ịja ị-kpa chụ ila ịnyịnyị.

¹⁶Ịtachị imiiye bala ang ị-kpa kpa olo bala irim ọtụka ịlẹ ká ịSolomọn kpa oje ọnyọmịla họ chajị nya Ube Ịgọgọ la ilo lụmẹ kịla ọ-ka me ori kịla.

¹⁷Ịtachị imiiye ịwẹ me awụlẹ. Ọnyọnyọọnyị nyaa la apatẹ iwo imiiye kụrụ irwiye nya uhye ọlala. Egbeju ọpapịla ọlẹ kị họ kwọọ u-uhye loje ọnyọmịla ịnyịnyị la apatẹ ine ba ẹhya nya uhye ọlala. Ị kpa egbe nya ipomegịraneti ịlẹ kị họ loje ọnyọmịla haa ịnyangga dagaga ju egbeju nyaa ịịwa.

¹⁸INebusaradan olegbeju nya angịdẹwụ wu iSeraya Olegbeju Okiliya bala ịSẹfaniya ọngọkịliya bọọ ba bala angị ịta ịgbẹgbịlẹ ịhyẹ kịị gbe ọnang nya Ube nya Amkpaa kpa rụ ịnyịnyị.

¹⁹Ẹ-ẹpwụ nya angị ihihi juwa e-epweji, ọ wu olegbeju ọlẹ kọọ kpẹhị rịrị angịdẹwụ ene-ene bala angị ịrụ ịhyẹ kịị ju adịrahụ irya. Ọ wu akịraa ọlẹ kọ ri olegbeju nya angịdẹwụ ogogo bala angị iwo ịrwọnyẹ nya angịnyị nyamwụ ịlẹ kị juwa tọọ.

²⁰INebusaradan kpa angịwẹ wuu kele kịla adịrahụ nya ala ịBabịlọn kọ juwa e-epweji nya iRibila

²¹o-oye nya ịHamatị. Ụ-ụwa iNebukadinesa Adịrahụ à ya lẹ ị nwụ angịwẹ wuu lẹlẹ. Ị go ala iJuda kpa rụ hi ọpyị nya ịlaa kaka ri anyịhị lẹ.

²²Ụka ọọwa, iNebukadinesa Adịrahụ nya ala ịBabịlọn hu iGedaliya ọlẹ ká adamwụ ochiche ri Ahikam, ká adamwụ-ọgbahị ri ịChafan nyọka ri ịgọvụnọ nya ala iJuda kọ ka kpẹhị rịrị angịlẹ wuu kị hi juwa i-iJuda.

²³Ụka ká alegbeju nya angịdẹwụ nya ala iJuda bala alekpeleji nyaa ịlẹ kị hi wo ya nyị hu iGedaliya ịgọvụnọ lẹ, ị kpehe kaka tọọ i-iMisipa lẹlẹ. Alegbeju ịịwa ri Ichimẹlụ ọnyị nya iNetaniya bala iJohanan ọnyị nya ịKarịya bala iSeraya ọnyị nya ịTanhumeti ọla iNetofa bala ịJaasaniya ọnyị nya ịMaaka bala alekpelji nyaa.

²⁴Ọọwa, iGedaliya-à nwa iro byaa yẹkẹẹ, “Ānụ chị uko nya alegbeju nya ala ịBabịlọn koo. Ọkẹnẹ-kẹnẹ ri anụ hụ lokem nyanụ, kanụ juwa myị ẹrụ ha adịrahụ nya ala ịBabịlọn mẹ aalẹ, ang wuu ka há hanụ lẹ.”

²⁵Ọ tị nọ lẹẹ pwụ ọya ọharwiye nya ẹka ọọwa lẹ, Ichimẹlụ ọlẹ ká adamwụ ochiche ri iNetaniya ká adamwụ-ọgbahị ri Elichama kọ ri olugbiyegu nya adịrahụ à kpa alẹng angị iwo dịrẹ ịlọmwụ kele ka iMisipa lẹ, ị nwụ iGedaliya ịGọvụnọ bala alẹng i-bwu iJuda bala ala ịBabịlọn ịhyẹ kị juwa tọọ lẹlẹ.

²⁶Ọọwa, ala iJuda wuu—alẹbyahị tụ alụdụ bala alegbeju nya angịdẹwụ wuu à rụnyẹ rụ ka Ijipiti chajị nyọlẹ kị ju uhi nya ala ịBabịlọn lẹlẹ.

²⁷Ẹ-ẹpwụ nya ẹka iwo ịta kụrụ irwiye nyọlẹ ká iJehoyachin juwa a-agba Ivulumerodakị à dọmwụ nyọka ri adịrahụ ị-ịBabịlọn lẹ. Ivulumerodakị yẹ ahyẹẹrwẹrwa nya iJehoyachin Adịrahụ nya ala iJuda lẹ, ọ gbọọ kpehe bwu ube nya agba lẹlẹ. Ẹnụtụrụ iwo imiiye kụrụ irwiye nya ọya iwo kụrụ imiiye nya ẹka ọọwa kpangga ọ gbọọ kpehe lẹ.

²⁸Ivulumerodakị la ọkịlẹtụ ọkpẹnẹ ẹ-ẹga nya iJehoyachin. Ọ ya iwe-ahụrụ olihi-ihi họọ gụ ịdịrịhụ ịkịla ịlẹ kị wu kpa ka agba ka ịBabịlọn balọọ.

²⁹Ọ ya ịwụrụ ịkịla ha iJehoyachin kụrụ ku ọmwakpa nya ịwụrụ nya agba nyamwụ. Bwu ụka ọwẹ kịlahị, ọ kaa ri ang ta adịrahụ gbee ẹ-ẹpwụ nya ọhịhị nyamwụ pyịyọọ.

³⁰Ẹnụ myị ẹnụ wuu, jaabwọ ka ọhihi nya iJehoyachin tata ka ba, ịị ya okpoko ọ-kpa a-amẹ-ang họọ kọ ka kpa ra ang myị ang ọlẹ kọ bọọ.