Read idege 2 ỊDỊRỊHỤ 3 Bible Online

2 ỊDỊRỊHỤ 3 - idege bible

2 ỊDỊRỊHỤ 3

¹Ụka ká iJehochafatị ri adịrahụ i-iJuda ẹka iwo kụrụ ineku, iJoram ọnyị nya Ehabụ à ri adịrahụ nya Isirẹlụ lẹ. Ọ hụ ị-ịSameriya ri adịrahụ ẹka iwo kụrụ imiiye gbẹgbịlẹ.

²Ọ họ ang onyobyi ba Amkpaa, ma ịnyamwụ-ụ́ tị tịpyọ wu ịnya adamwụ bala ịnya iJesebẹlụ ịnamwụ ọyị myị ka. Ọ tụrụ ajwọ nya ojiga ịBaalụ ịlẹ ká adamwụ ya yeji chịịrụ.

³Ọ tị kịnyaa juwa họ ang ịtịpyọ lala ịnya iJerobowam Adịrahụ ọnyị nya iNebatị ọlẹ kọ kpa ala Isirẹlụ kaka ju ka ẹpwụ nya ọhọbịrị ọhọhọ.

⁴Ụka ọọwa iMecha Adịrahụ nya ala iMowabụ kaa da ịkpịlọ e-eji. Ẹka myị ẹka ọ kaa nyẹ ẹpwa ha adịrahụ nya ala Isirẹlụ lịkpịlọ ụnọ ohu (100,000) bala egbii nya imilodo ụnọ ohu ịnyịnyị (100,000).

⁵Ụka Ehabụ Adịrahụ nya ala Isirẹlụ gbu kpá lẹ, iMecha Adịrahụ nya ala iMowabụ à la egbeju-ọngịrị tụ ala Isirẹlụ pyịpyị lẹlẹ.

⁶Ẹnẹhẹ lẹ, iJoram Adịrahụ à wụrụ angịdẹwụ nyamwụ dala awụlẹ lẹ, ị juwa jẹ kpehe bwu ịSameriya lẹlẹ.

⁷Ụka ọọwa, ọ dụ ẹrụ tọ iJehochafati Adịrahụ nya ala iJuda yẹkẹẹ, “Wo mẹ, adịrahụ nya ala iMowabụ jam la egbeju-ọngịrị tam lẹẹ. À ka bam kaka dam ụbwọ mm̀ dẹwụ tọọ myị-ị̄ị́?” Ọọwa, iJehochafatị à wẹ du kịlọọ yẹkẹẹ, “Ịnọọ! Ịnyam tị́ ri ịnyang. Angịdẹwụ nyam tụ anyịrẹ nyaa wuu nwụlanọ nyọka wo bwu ẹga nyang lẹ.

⁸Ụgbẹyị oyina āhị tị́ ka bwu kele?” IJoram wọọ yẹkẹẹ, “Ụgbẹyị o-bwu ugbileji nya ala Ẹdọm ahị ka bwu lẹ.”

⁹Ọọwa, iJoram Adịrahụ nya ala Isirẹlụ a bajẹ bala adịrahụ nya ala iJuda bala adịrahụ nya ala Ẹdọm tụ angịdẹwụ nyaa wuu lẹlẹ. Ụka kị jẹdịyẹ nyaa bwu ụgbẹyị ọkịnọbọọ o-bwu ugbileji lala ẹnụtụrụ irwiye lẹ, enyi à gụ angịdẹwụ bala iyo ileji nyaa myị lẹlẹ.

¹⁰Ọọwa, iJoram Adịrahụ nya ala Isirẹlụ a yụbwọ bọmwụ begbeju chị eko yẹkẹẹ, “Chahohoo! Ọọwa ri Amkpaa kpahị ahị angị ịtịta ịlẹ kaka ju iyo-ịtẹ ha adịrahụ nya ala iMowabụ lẹ-ẹ́!”

¹¹Ọọwa, iJehochafatị à tọ wo yẹkẹẹ, “Ọlọmwụ nya Amkpaa ọhẹ jam tahị ẹgẹlẹ lẹẹ-ẹẹ́? Ọ́ ri ịnyị lẹ, káhị tọọ wo jaabwọ kahị ka họ mẹ-ẹ̀.” Ọọwa, olegbeju nya angịdẹwụ nya iJoram ọhẹ à wẹ yẹkẹẹ, “Ịlayịcha ọnyị nya ịChafatị jam ẹgẹlẹ. Ọwa-à ri ọngọ ju Ịlayịja chuu kaa dọọ ụbwọ bala ọ-kpa enyi ọtabwọ họọ lẹẹ ụka ọọwa lẹ.”

¹²Ọọwa, iJehochafatị a yẹkẹẹ, “Ẹhẹẹ, ọlọmwụ nya ịlẹhị ọ ri lẹ.” Ọọwa, ịdịrịhụ ịta ịwẹ a kele kaka wo la Ịlayịcha lẹlẹ.

¹³Ọọwa, Ịlayịcha-à byi adịrahụ nya ala Isirẹlụ yẹkẹẹ, “Oyina nya ẹla nyam à tị́ gum gu-ù? Kele ka ẹga alọmwụ ịlẹ ká adang bala ịnang kaa ka ẹga nyaa mẹ-ẹ̀!” IJoram wẹ byoo yẹkẹẹ, “Ehe, ịnyị ọ la ka. Amkpaa-à kpahị ahị angị ịtịta ịlẹ warị nyọka yahị ju adịrahụ nya ala iMowabụ ụ-ụbwọ lẹ.”

¹⁴Ịlayịcha-à wẹ yẹkẹẹ, “M̀ jam kpa ẹnyị nya Amkpaa ọlẹ kọ juwa hịhị, kam kaa myị ẹrụ ha ya nya ịlẹhị-ịlẹhị ya ó-ri ajị nya iJehochafatị Adịrahụ nya ala iJuda ọlakpa nyang ka, ịnọ ḿ ka dọmwụ hu ẹhị hwaa yẹng lee ọ-dọnụ wẹng ịịlẹ ụpẹnị-ụpẹnị ka.

¹⁵Ọ tị la ịịwẹ lẹ, wụrụ ọngọ du ogum̀ ọhẹ ham wẹẹ.” Ụka ká ọngọọwa juwa kpa ogum̀ du lẹ, ọngịrị nya Amkpaa-à hwo kụ Ịlayịcha lẹ,

¹⁶ọ yẹkẹẹ, “Ịịlẹ Amkpaa-à ya lẹ: ‘Anụ wụ ẹmwụ tụ ọkpọọ ọchọhụ kịra-kịra ọlẹ da mẹ.

¹⁷Ánụ ka yẹ igbachịwụ lee enyi ododo ka, enyi tị ka myị̀ ọkpọọ ọlẹ yịlọlọọlọ kpụ anụ ayịdang bala iyo ileji nyanụ wuu ka ye nwà wunu ẹpwụ.’ ”

¹⁸Ịlayịcha ya ịnyịnyị yẹkẹẹ, “Ẹlẹwẹ la huke ẹ-ẹpwụ nya ang ịlẹ ká Amkpaa wẹẹ ka họ. Ọ juwa ka ya ọkụrụ-kụrụ hang u-uhye nya ala iMowabụ ịnyịnyị.

¹⁹Anụ ka kụrụ epweji myị epweji ịnyịịla ịlẹ kị chị ajẹ yẹ dada wuu. Anụ ka tụrụ ekeji ị-nwụ egbe nyaa, tụ ẹmwụ-enyi nyaa wuu ku bala ọ-ka bịrị ịpyị ị-há ẹrụ nyaa wuu lajwọ kị ka jẹ-ẹ̀ họ ịngịngịhyẹ ụ-ụwa kaka.”

²⁰Ahị ọpyẹpyẹ ọọnamwụ lụka ọlẹ kịị kpa kịla iya nya ụtụrụ lẹ, enyi à juwa mwụ bwu oye nya Ẹdọm yahị da wẹ ẹga nyaa lẹlẹ. Ẹga myị ẹga wuu ri enyi-enyi ahyaahị.

²¹Ụka ọwẹ, ala iMowabụ wuu wo ya ịdịrịhụ ịta ịwẹ nyị wẹ nyọka dẹwụ taa lẹ. Ọọwa, ị wụrụ ọng myị ọng ọlẹ kọ ka ka jẹ-ẹ̀ dẹwụ myị bwu anjwo ju ka angịgbahị wuu guru, ị kele kaka chịkụ u-ugume wuu lẹlẹ.

²²Ụka kị wuleji lụtụrụ nya ahị ọpyẹpyẹ ọọnamwụ, ẹnụ kpehe hụ́ jama-jama rịrị enyi ọọwa, du kọ me ịwọ.

²³Ọọwa, ala iMowabụ a juwa ya gbogboogbo yẹkẹẹ, “Ịwọ à lalẹẹ dọbá lẹ! Ịdirihu angị ịta alẹwụ nyahị jahị da awụlẹ kpụ ị nwụ awụlẹ lẹ! Anụ kẹwẹ kahị kele kaka wụ ang-ụdụ nyaa wụ mẹ oo!”

²⁴Ma, ụka ká ala iMowabụ jẹ pwụ ịkampụ nya ala Isirẹlụ lẹ, ala Isirẹlụ à họ kitim gba mịlaa mwẹla taa gbee kị jahị kpata rụnyẹ rụ lẹlẹ. Ala Isirẹlụ kịnyaa juwa kwaa gbee kaka ju ka ọpyị nya iMowabụ juwa kpaa nwụ ịnyịnyịịnyị.

²⁵Ị ta epweji nyaa ayịreji, go ajwọ chị ka ẹpwụ nya ịpyị ị-há ẹrụ nyaa bala ọ-tụ ẹmwụ-enyi nyaa wuu ku bala ọ-tụrụ ekeji ị-nwụ egbe nyaa wuu. Ụka ohyẹẹkpẹ, epweji nya iKiiri-ịharẹsẹtị ụbwọọmwụ à hi ịnọ lẹ, angịdẹwụ ị-kpa ọmẹ tị kele kaka dagaga jwọọ mwẹla ta alụwa ịnyịnyị.

²⁶Ụka ka adịrahụ nya ala iMowabụ jẹ ka ẹwụ juwa yọọ abwilo, ọ kpa angị kpa oge dẹwụ nyamwụ angị ohu irwiye (700) juwa maga kị ka be bwụụ kpoye bwu ẹga nya adịrahụ nya ala Ẹdọm, ọ́ tị chọọ jụ myị ka.

²⁷Ọọwa, ọ hu ọnyị ọlẹng nyamwụ ọgbahị ọlẹ kọ wẹẹ ka ri adịrahụ kwiwa nyamwụ lẹ, ọ nwọọ kịla iya u-uhye nya ugulọ nya epweji ha ojiga nya ala iMowabụ lẹlẹ. Ẹlẹwẹ la angịdẹwụ nya ala Isirẹlụ uhi-uhi lụme. Ọọwa, ị tịrẹkpẹ hi epweji ọwẹ, ị rụ ka ọpyị nyaa lẹlẹ.