Read idege 2 ỊDỊRỊHỤ 4 Bible Online

2 ỊDỊRỊHỤ 4 - idege bible

2 ỊDỊRỊHỤ 4

¹Ẹnẹhẹ lẹ, ahụ nya ọngọhe bwu ẹpwụ nya alọmwụ nya Amkpaa-à kpa eko kaka tọ Ịlayịcha yẹkẹẹ, “Ayịbahị ee, yẹ wẹẹ, ayịbam ọrụm ọlẹ kọọ myị ẹrụ hang lẹẹ gbu lẹ, à tị jẹ kọọwa ayịdang ri ọngọ ju ihi nya Amkpaa. Ọ lẹẹ kpa ọlẹng uri. Ọlẹng ọọwa tị warị lalẹẹ nyọka go anyị alẹng imiiye nyam kpa rụ kaka ri anyịhị kwiwa nya okpoko ọọwa lẹ.”

²Ọọwa, Ịlayịcha a tọọ wo yẹkẹẹ, “Ụgbẹyị oyina m̄ tị́ ka jẹ-ẹ̀ dang ụbwọ myị? Ịịyẹ ā tị la juwa ẹ-ẹpwa nyang-ǹg wẹ ene-è?” Ọnyang ọwẹ wẹ yẹkẹẹ, “Ḿ la ịngịngịhyẹ la-à wẹẹ ka. Ichu-ọta nya ida nya olivu kẹnẹ-kẹnẹ mẹ ịnyị.”

³Ọọwa, Ịlayịcha-à byọọ yẹkẹẹ, “Kele kaka bịlẹ ehwo nya ịta bwu ẹga nya aloye-ẹpwa nyanụ jaabwọ ká ka ye bịlẹ kaka ba mẹ.

⁴Ụka ká họ ịnyị kpa lẹ, à rụ kele ka ube ká tụ ụgbẹyị ku ịlọng bala anyị nyang, ká dọmwụ nyọka ya ida yẹ ju ka ẹpwụ nya ehwo nya ịta ịwẹ iwẹ mẹ. Ọta ọnyị myị ọnyị ká ida-á myị̀ lẹ, a nwọọ rịrị ka ọka mẹ.”

⁵Ọnyang ọwẹ họ jaabwọ ka Ịlayịcha byoo. Anyị alẹng nyamwụ kpa ehwo nya ịta wọọ lẹ, ọ juwa ya ida ọla ichu-ọtụ nyamwụ ju ka ịta ịịwa lẹlẹ.

⁶Ụka ka ida myị ịta ịịwa wuu, ọ byi ọnyị ọlẹng nyamwụ yẹkẹẹ, “Hu ọta ọkịla kpa wam mẹ.” Ọọwa, ọnyị nyamwụ a byọọ yẹkẹẹ, “Ọta ọkila ọhẹ-ẹ́ hi kaka.” Ọọwa, ida-à kpụba la ọnyànya lẹlẹ.

⁷Ọnyang ọwẹ kele ka tịrọnụ ya je Ịlayịcha ọlọmwụ. Ọọwa, Ịlayịcha-à byoo yẹkẹẹ, “Kele ka ya ida ra ka ya okpoko nyamwụ nwụ uri ọlẹ ká kpa mẹ. Ọọwa lẹ, kaahụ bala anyị nyang ā kpa ohihi nya okpoko ọọwa kpa ịlọnụ mẹ.”

⁸Ẹnụtụrụ ookpokpo ọhẹ, Ịlayịcha kele ka epweji nya iChunẹm, ẹga ka ọnyang ọlụdụ ọhẹ kụ. Ọnyang ọọwa wụrwọọ ẹpwa kaka ri ang. O-bwu ụka ọọwa pyịyọọ kele kịlahị lẹ, ụka myị ụka kọ chịpwụrụ bwu epweji ọwẹ, ọ kaa pẹ ka ẹpwa nya ọnyang ọwẹ kaka ri ang.

⁹Ẹnẹhẹ lẹ, ọnyang ọwẹ à byi ọrụmwụ yẹkẹẹ, “Ayịbam ee, m̀ jẹ myị̀myịịmyị ka ọlẹng ọlẹ kọ lẹẹ pẹ wẹ ẹpwa nyahị ịnyịnyịịnyị lẹẹ ri ọlọmwụ nya Ohe Oluhye.

¹⁰Āhị nwụ ẹpwang ochiche ọhẹ chụrwẹ-chụrwẹ rịrị ẹ-ẹpwayịrẹtẹ nya ẹpwang nyahị, kahị ya ịbẹẹdị bala itebwuru bala okoji ọdahụhụ bala otinika ju ụ-ụwa mẹ. Aalẹ, ẹnụ myị ẹnụ kọ juhi ụga lẹ, kọ ka hụ ụ-ụwa mẹ.”

¹¹Ẹnụtụrụ ookpokpo ọhẹ ka Ịlayịcha mwẹẹkpẹ kele ka iChunẹm lẹ, ọ kele ka ube nyamwụ ọọwa kaka mwụ ịnyọ lẹlẹ.

¹²Ọọwa, Ịlayịcha a byi iGehasi ọnchẹ nyamwụ yẹkẹẹ, “Wụrụ ọnyang ọwẹ ham wẹẹ.” Ụka kọ wẹ lẹ,

¹³Ịlayịcha a byi iGehasi ọnchẹ nyamwụ yẹkẹẹ, “Byoo mẹ, ọlẹ kọ ya ịlọmwụ dẹẹchụ ya ịlọmwụ dẹja juwa họ ọbaba nyahị hahị lẹ, ọ kpụhị ịpyọ. Tọọ wo wẹẹ, ịyẹ à tị́ bọọ kam ka họ họọ? Ịngịhyẹ ji kọ tịtọ kahị ka bịlẹ bwu ẹga nya adịrahụ lee olegbeju nya angịdẹwụ họọ-ọ́?” Ọnyang ọwẹ wọọ yẹkẹẹ, “Ehe, ḿ la ọbaba ọhẹ koo. Ẹpwa-ẹpwa nya ịlọm à tị́ lẹẹ kam kụ.”

¹⁴Ọọwa, Ịlayịcha-à tọ iGehasi wo yẹkẹẹ, “Ịyẹ ā tị́ me irya kam ka họ họọ-ọ̀ wẹẹ?” IGehasi wọ byọọ yẹkẹẹ, “Ọ́ ma ọnyị ọlẹng ọhẹ ka, ọrụmwụ tị ri ọngọgbahị lẹ.”

¹⁵Ọọwa, Ịlayịcha-à byi iGehasi yẹkẹẹ, “Wụrwọọ tịrẹkpẹ wẹẹ.” Ọọwa, ọ wụrwọọ lẹ, ọ wẹ kaka godayị rịrị ọ-ọnang lẹlẹ.

¹⁶Ọọwa, Ịlayịcha-à byi ọnyang ọwẹ yẹkẹẹ, “Ihwọngkịla amachanyị ịịlẹ, à ka ma ọnyị ọlẹng hu nọ a-ata.” Ọ tị byi Ịlayịcha yẹkẹẹ, “Eheehe, ayịbahị, ā dam lụgbaa ka. Ọngịnyị nya Ohe Oluhye ā tị́ ri!”

¹⁷Ọ nọ lẹ, ọnyang ọwẹ à jẹ ẹnyị ịnyịlẹhị lẹlẹ. Ụka kọ pwụ ụka ọlịnyị kpangga nya ẹka ọkịla ọọnamwụ, ọ ma ọnyị ọlẹng jaabwọ ká Ịlayịcha ya.

¹⁸Ụka ká ọnyị ọwẹ nwa chẹẹ, ọ ba adamwụ ka ẹrụ ẹga ká alụkụrwọ juwa wụ ang-ẹrụ.

¹⁹Lụka ọmwaaa lẹ, ọ chị eko wụrụ adamwụ yẹkẹẹ, “M̀ gbu lẹẹ! M̀ gbu lẹẹ! Egbeju juwa bem ene!” Adamwụ à wụrụ ọnchẹ ọhẹ lẹ, ọ byọọ yẹkẹẹ, “Kpọọ kịla ịnamwụ mẹ.”

²⁰Ọnchẹ ọwẹ à hwọọ kpa kịla ịnamwụ lẹlẹ. Ịnamwụ kpọọ a-ata gbee da ka ẹnụ ọ-rịrị ẹ-ẹpwayịrẹtẹ lẹ, ọ gbu lẹlẹ.

²¹Ọọwa, ọ hu ogu-ọnyị nyamwụ ọwẹ lẹ, ọ kpọọ ka ube oluhye kaka nọnọ ịbẹẹdị nya Ịlayịcha ọlọmwụ lẹ, ọ tụ ụgbẹyị ku lẹ, ọ rụ kpehe lẹlẹ.

²²Ọọwa, ọ du ẹrụ tọ ọrụmwụ yẹkẹẹ, “Ya obyiyó ọhẹ du ọnchẹ ọhẹ warị wẹẹ. M̀ jam ka kele kaka yẹ Ịlayịcha ọlọmwụ lagaga. M̀ ka nya ahyaahị.”

²³Ọọwa, ọrụmwụ a tọọ wo yẹkẹẹ, “Ányị tị ẹ-ẹga nyamwụ alẹ-ẹ̀? Alẹ-ẹ́ tị ri Ẹnụtụrụ Ọhịnyọ Lụkụrwọ lee Ọhụhụ nya Ọya Onyeewe ka.” Ahụ nyamwụ wọọ yẹkẹẹ, “Ee, ọọwa-á ri ẹla kaka.”

²⁴Ụka kọ hụhụ u-uhye nya obyiyó lẹ, ọ byi ọnchẹ ọọwa yẹkẹẹ, “Aa du ụnyẹ ju obyiyó kịnyaa mẹ. Ā pwuru ụnyẹ kokoo kẹnẹ-kẹnẹ ḿ bying ịnyị lẹ mẹ ịnyị.”

²⁵Ọọwa, ọ hu ang juwa ka ẹga nya Ịlayịcha ka Ọgbọdọ nya ịKamẹlụ lẹlẹ. Ịlayịcha chẹhị yọ hwẹẹ lẹ ọ byi iGehasi ọnchẹ nyamwụ yẹkẹẹ, “Chẹhị kele wẹẹ, ọnyang ọla iChunẹm à lalẹẹ warị lẹ!

²⁶Rụnyẹ kele ka tọọ, ká tọọ wo ó-ri kọọwa bala ọrụmwụ bala ọnyị nyamwụ-ụ́ juwa lokpunyi wẹẹ.” Ọọwa, ọnyang ọwẹ à wẹ byi iGehasi yẹkẹẹ, “Ee, ẹlẹlẹhẹ-ẹ́ ji ka.”

²⁷Ụka kọ tị pwụ ẹga nya Ịlayịcha u-uhye nya ọgbọdọ, ọ dahị kụrụ eji, yụbwọ chị Ịlayịcha ẹ-ẹta pyẹẹ́ẹ́. Ịnọ iGehasi juwa ka gwọọ gbaa tụkịnyaa, ma ịlayịcha byọọ yẹkẹẹ, “Ba hyọọ kem. Á yẹ jaabwọ kọ bwọ ayiji-ì wẹ ka-á? Amkpaa-á tị hi ọmwụ nya ẹla ọọwa iwa ya jem kpong-kpong ka.”

²⁸Ọọwa, ọnyang ọwẹ à ya ẹla ta Ịlayịcha yẹkẹẹ, “Ayịbam ee, ḿ bying lẹẹ ya ā dam lụgbaa ka lẹ ka-á? Ḿ tọng-ng tọ ịtọ nya ọnyị ka.”

²⁹Ọọwa, Ịlayịcha-a byi iGehasi yẹkẹẹ, “Chịmwụ jụ ahyaahị ká hu ang kele ka ẹpwa nyamwụ mẹ. Hu ọgọdọ nyam kpa ba ịlọng. Ā ya ẹla ta ọngọngọhẹ ọlẹ ká ka tọ ụ-ụgbẹyị koo. Chị agaga kele ka ya ọgọdọ nyam ọlẹ nịrọ ọnyị nyamwụ a-ahị mẹ.”

³⁰Ụka ọọwa, ọnyang ọwẹ tị byi Ịlayịcha yẹkẹẹ, “M̀ ya nya ịlẹhị-ịlẹhị lẹnyị nya Amkpaa ọlẹ kọ juwa hịhị bala jaabwọ kaahụ tịtị wẹẹ hịhị lẹ, ḿ ka hu ẹta chụtẹ rụ hing ẹgẹlẹ ka.” Ọọwa, Ịlayịcha-à yegiri bọọ rụ kele lẹlẹ.

³¹IGehasi lẹẹ chị agaga ji ịlahị kele kpa ọgọdọ ka nịrọ ọnyị a-ahị lẹ, ọnyị-ị́ tị gu achwọ lee ọ-chị ayịbwọọ ka. Ọọwa, iGehasi a nyà tịrẹkpẹ kaka tọ Ịlayịcha lẹ, ọ byọọ yẹkẹẹ, “Ọnyị-ị́ chahị koo.”

³²Ụka ka Ịlayịcha pwụ eji kele, ọ yẹ jaabwọ ka ọnyị gbu, kị yọọ nọnọ ụ-ụwa ị-ịbẹẹdị ọlẹ kọọwa ayịdang kaa nọ.

³³Ụka kọ jụ kele, ọ tụ ụgbẹyị ku lẹ, ọ raabwọ ha Amkpaa lẹlẹ.

³⁴Ịlayịcha hị nọnọ u-uhye nya ọnyị ọwẹ. Ọ ya ọnụ ju ọnyị ọ-ọnụ, ya ahị kụrwọọ a-ahị bala ọ-ya abwọ bala ata nyamwụ nịrọ ịnya ọnyị ịnyịnyị.

³⁵Ịlayịcha wuleji hyọọ, tụ gaaa ẹ-ẹpwang lẹ ọ tịrẹkpẹ kele kaka hịnịrọ ọnyị ọwẹ myịmyị lẹlẹ. Ọnyị chị ayịbwọọ ugbabwọ irwiye lẹ, ọ pyẹ ahị maaa lẹlẹ.

³⁶Ịlayịcha wụrụ iGehasi lẹ, ọ byọọ nyị wụrụ ịnịna nya ọnyị ọwẹ warị mẹ lẹlẹ. Ụka ká ọnyang ọwẹ pwụ ẹpwang, Ịlayịcha byọọ yẹkẹẹ, “Ye ọnyị nyang lẹẹ mẹ.”

³⁷Ọnyang ọwẹ hị kpilegede da ka eji i-ijata nya Ịlayịcha lobe ojiji. Ọọwa, ọ hu ọnyị nyamwụ lẹ, ọ kpọọ hireji bwu ube oluhye ọwẹ lẹlẹ.

³⁸Ụka ọkịla, Ịlayịcha rụ tịrẹkpẹ ka iGiligalụ. Ụka ọwẹ uhi ọtụka tị juwa e-epweji. Ụka kọ juwakpa ang mẹjẹ ogu nya alọmwụ ịlẹ kị wẹ ẹga nyamwụ lẹ, ọ byi ọnchẹ nyamwụ nyị hu ẹchụ ọtụka tọ ila kịị nyị họ ang oyiyi ha alọmwụ ịịwa mẹ lẹlẹ.

³⁹Ụka ọọwa, ọngọhẹ nya alọmwụ ịwẹ kele ka ẹpwụmẹ kaka chị apwụ lẹ, ọ yẹ onyori ọhẹ lẹ, ọ hya egbe nyamwụ jaabwọ kọ ka jụ kpa lẹlẹ. Ụka kọ kpa pwụ ẹpwa, ọ chaa eku jula ang oyiyi ọlẹ kị wẹẹ kpa họ, ọ́ tị jẹ kị ka họ ọngịnyị ang myị ka.

⁴⁰Ị ya ang oyiyi ju ẹja haa kị ka ri. Ụka kị tị kpọọ ka ọnụ, ị chị eko byi Ịlayịcha yẹkẹẹ, “Ọlọmwụ nya Ohe Oluhye ee, kẹwẹ mẹ, ang ọ-ka nwụ ọngịnyị à lẹẹ lẹ!” Ọọwa, ị ryọọ myị kaka lẹlẹ.

⁴¹Ịlayịcha a yẹkẹẹ, “Anụ kpa ọrụ nya ajẹ nya ang-ẹrụ warị wẹẹ.” Ọ chwọọ ju ka ẹpwụ nya ẹchụ nya ang oyiyi ọwẹ lẹ, ọ yẹkẹẹ, “Chụ ang oriri ju ẹja haa myịmyị mẹ.” Ọọwa, ang oriri ọwẹ à haa ang kaka lẹlẹ.

⁴²Ẹnẹhẹ juwa ká ọlẹng ọla ịBaalụ-ịchalicha kpa abẹ nya ịkaa iwo imiiye wẹ Ịlayịcha ọlọmwụ. Ịbalị inyeewe ịlẹ kị chị lụka nya ang-ẹrụ ọchịchị ị kpa họ ịkaa ịịwa lẹ. Ọ kpa ambakpa inyeewe ịlẹ kị mwụ baa ịnyịnyị. Ọọwa, Ịlayịcha-à byi ọnchẹ nyamwụ yẹkẹẹ, “Ye ang oriri ịwẹ ká ya ha alọmwụ ri mẹ.”

⁴³Ọnchẹ nyamwụ tị byọọ yẹkẹẹ, “Anyị lẹẹ, ká ang oriri ọlẹ ka kpụ angịnyị angị ohu (100) chiriri myị-ị̄ị́?” Ịlayịcha wọọ yẹkẹẹ, “Ya haa kị ri mẹ, chajị Amkpaa ya ọng myị ọng nyaa nyị ka ye ri wu ẹpwụ, nyị tị dọmwụ ka nwaa hi wẹẹ.”

⁴⁴Ọọwa, ọnchẹ nyamwụ à ya ang oriri ọwẹ haa lẹlẹ. Ịwa wuu ri yẹẹyẹẹ, ọ tị myịmyị hi jaabwọ ka Amkpaa ya deeji.