Read idege 2 ỊDỊRỊHỤ 5 Bible Online

2 ỊDỊRỊHỤ 5 - idege bible

2 ỊDỊRỊHỤ 5

¹Ụka ọọwa, ịNaaman olegbeju nya angịdẹwụ nya ala iSiriya há adịrahụ nya ala iSiriya lụmẹ. Ọ la ihi-ihi ẹ-ẹga nya adịrahụ, chajị bwula ịNaaman ọwẹ Amkpaa kaa ya ọkụrụ-kụrụ ha angịdẹwụ nya ala iSiriya. Ọngọdẹwụ ọtụka ọ ri lẹ, ẹdụrụ olugba nya ịnyịrọ tị jwọọ.

²Ụka ọhẹ ká ala iSiriya be ala Isirẹlụ ẹpwa, ị wu ọnyị ọyẹẹnọ ọhẹ kpa rụ lẹ, ọ ri ọnchẹ nya ahụ nya ịNaaman lẹlẹ.

³Ẹnẹhẹ lẹ, ọnyị ọyẹẹnọ ọwẹ à byi ayaamwụ yẹkẹẹ, “Ang pyii ká ayịbam ka kele kaka yẹ ọlọmwụ ọla ịSameriya! Ọ ka họọ uda nya ẹdụrụ myamwụ myị.”

⁴Ụka ká ịNaaman wo ẹlẹwẹ, ọ kele ka ẹga nya adịrahụ lẹ, ọ tịrọnụ nya ẹla ọlẹ ká ọnyị ọyẹẹnọ ọwẹ ya lẹlẹ.

⁵Ọọwa, adịrahụ a wẹ yẹkẹẹ, “Kele mẹ-ẹ̀! M̀ ka da ileta hang kpa kịla adịrahụ nya ala Isirẹlụ.” Ọọwa, ịNaaman à hu ang nya ẹdịyẹ lẹlẹ. Ọ kpa okpoko onyoowuru ụnọ iwo ịta (30,000) bala okpoko onyoowuru ụnọ ịrwọnyẹ (6,000) bala ang ịkụrụ-kụrụ ebwo iwo ba ịlọmwụ nya ang-ahị,

⁶Ẹla ọlẹpwụ nya ileta ọlẹ kọ wẹẹ kpa kịla adịrahụ nya ala Isirẹlụ ri: “Ieta ọlẹ ri ọ-ka ya ịNaaman olegbeju nya angịdẹwụ nyam dodehe jeng. M̀ tịtọ ká ka họọ uda nya ẹdụrụ nyamwụ.”

⁷Ụka ká adịrahụ nya ala Isirẹlụ wa ụpwụ ọọwa kpa, ọ gu awụrụ nyamwụ ene ẹ-ẹpwụ nya ahịbwuu lẹ, ọ yẹkẹẹ, “Anyị tị́ ká adịrahụ nya ala iSiriya ya ọlẹng ọlẹ du wam nyọka họọ uda. Ọ me kam ri Ohe Oluhye ọ-ka ya ọhịhị ha ọngịnyị lee ọ-ka ye ọhịhị nya ọngịnyị-ị̄ị́? Ẹla ododu-ú la ịịlẹ koo, ẹla ọ wẹẹ kpa pịlahị nyam tị myịmyị-ị̀ wẹ lẹlẹ!”

⁸Ụka ka Ịlayịcha wo jaabwọ ka adịrahụ nya ala Isirẹlụ họ lẹ, ọ du ẹrụ kaka byoo yẹkẹẹ, “Ịyẹ tị́ du ká ọhụ-ụ́ bang e-eji ka ịnyị? Du ọlẹng ọwẹ wẹ ẹga nyam mẹ. Ọ ka jẹ ká ọlọmwụ nya ịlẹhị jam Isirẹlụ.”

⁹Ọọwa, ịNaaman à jẹ kele lanyịrẹ bala ang ịrụnyẹ nyamwụ kaka godayị rịrị ọ-ọnang nya ẹpwang nya Ịlayịcha lẹlẹ.

¹⁰Ịlayịcha du ẹrụ kaka byọọ ya nyị kele kaka hyo enyi i-Ihu ịJọdan ugbabwọ irwiye mẹ aalẹ, ẹdụrụ nyamwụ nyị ka myị hyọọ gbanggbang lẹ.

¹¹Ma, ịNaaman yegiri juwa rụ lagbama, juwa mwala ya yẹkẹẹ, “Ang kam me kọ ka kpehe warị lịlọmwụ kọ ka wụrụ Amkpaa Ohe Oluhye nyamwụ, juwa chị ụbwọ nyamwụ kile-kile u-uhye nyam, kọ ka họm uda ịnyị-ị.

¹²Ọ́ ba ọọwẹ ka, enyi ọla Ihu nya Abana bala Ihu nya ịFaapa ịla ịDamasịkọsị nyahị á hagụ ihu ịla Isirẹlụ wuu ka-á? Ḿ hyo enyi ụ-ụwa ḿ ka hagụ ịnyịnyị ka-á?”

¹³Ọọwa, alegbeju ịtụkụ yọọ à kele kaka kwọọ kpẹẹ byọọ yẹkẹẹ, “Ayịbahị ee, ó-ri ka ọlọmwụ-ụ́ dang ehile ya ahụ nyị họ ang olujwo ọtụka ọhẹ, á ka họọ ka-á? Ee lẹ, tụtụ kele ká hyo enyi jaabwọ kọ bying-ǹg wẹ, chajị ká la gogo mẹ-ẹ̀!”

¹⁴Ọọwa, ịNaaman à kele ka Ihu ịJọdan kaka hyo enyi ugbabwẹ irwiye jaabwọ ká Ịlayịcha ọlọmwụ byoo lẹlẹ. I-ijata-ijata, ẹdụrụ olugba nya ịnyịrọ nyamwụ à myị hyoo gbanggbang. Ịnyịrọ nyamwụ la dịrẹ-dịrẹ lala ịnya onjwo ochiche.

¹⁵Ụka ọọwa, ịNaaman bala alogu-ẹdịyẹ nyamwụ wuu tịrẹkpẹ ka ẹga nya Ịlayịcha. Ọọwa ịNaaman à yẹkẹẹ, “M̀ jẹ ugbẹnyị nyori Ohe Oluhye-é ji ẹgẹgẹhẹ dala Isirẹlụ kaka. Lẹẹlẹ, ye ang-ahị ịlẹ kam kpa warị lẹẹ chẹẹ mẹ.”

¹⁶Ma, Ịlayịcha wọọ yẹkẹẹ, “M̀ kpa ẹnyị nya Amkpaa ọlẹ kọ juwa hịhị, kam kaa myị ẹrụ ha ya nya ịlẹhị-ịlẹhị nyori ḿ ka ye ang-ahị ọhẹ-lọhẹ kpong-kpong ka.” ỊNaaman kpa chị rịrọọ kọ ka ye, ọ tị pwa oyeye.

¹⁷Ọọwa, ịNaaman à yẹkẹẹ, “Ó-ri ká ye ang-ahị nyam kaka lẹ aalẹ, à ya iwe da ham kam chụ jaabwọ ká anyịrẹ imiiye ka kpa ka ba myị kpa rụ bwu ẹgẹlẹ mẹ. Bwu ọlẹẹlẹẹ kịlahị lẹ, ḿ ka ya ọhaha lee iya ọkịlaakịla ju ila ha ojiga ọhẹ-lọhẹ dala Amkpaa kaka.

¹⁸Ọkẹnẹ-kẹnẹ ri Amkpaa-ā hịnyọhi ang ookpokpo ọlẹ ga ham mẹ: Ụka kam kpa ayịbam adịrahụ chị kele ka ube nya iRimọn ojiga nya ala iSiriya, kam hirikpẹẹ kpụ eteji ụ-ụwa ịnyịnyị aalẹ, Amkpaa-ā hịnyọhi ham.”

¹⁹Ọọwa, Ịlayịcha-à byi ịNaaman yẹkẹẹ, “Aa pyẹ̀ẹẹ ka ẹpwa mẹ.” Lẹ, ịNaaman à rụ lẹlẹ. Ụka ká ịNaaman-ń rụ hwẹ̀ẹ lụmẹ lẹka lẹ,

²⁰iGehasi ọnchẹ nya Ịlayịcha à ya ẹ-ẹpwụ-ẹpwụ yẹkẹẹ, “Ahyu! Ayịbam myị kwẹẹ pẹhi ọla iSiriya ọwẹ rụ lorwaahị! Ọ chịla kọọ ye ịngịhyẹ chẹẹ. M̀ kpa ẹnyị nya Amkpaa ọlẹ kọ juwa hịhị ya nya ịlẹhị-ịlẹhị ya m̀ ka bọọ kele kaka ye ịngịhyẹ bwu ẹga nyamwụ pyii.”

²¹Ọọwa, iGehasi a chị agaga pyapyaapya ba ịNaaman kele lẹlẹ. Ụka ká ịNaaman chẹhị ka yẹ ọngọhẹ kọ wẹẹ rụnyẹ bọọ, ọ hireji bwu ang ọrụnyẹ nyamwụ kele kaka tọọ lẹ, ọ tọọ wo yẹkẹẹ, “Ẹlẹhẹ ịnyị le?”

²²IGehasi wẹ yẹkẹẹ, “Ẹẹlẹhẹ koo, ayịbam à tị dum ẹrụ lẹẹ tọng lẹ. Ọ ya nyị bying mẹ, alọmwụ angị imiiye nyị ju ọwa ụga lẹẹ ịnịịnọ bwu ọpyị olikiti nya Ifurem. Ọ tịtọ kọ ka ya okpoko onyoowuru ụnọ ịta bala ebwo nya ang ịkụrụ-kụrụ imiiye haa.”

²³Ọọwa, ịNaaman a byi iGehasi yẹkẹẹ, “Ọwẹ-ẹ́ ri ẹla ka-à, dọmwụ ye okpoko onyoowuru ụnọ ịrwọnyẹ mẹ.” Ọ ya pyii iGehasi nyị ye. Ọ chị okpoko onyoowuru ori ọ-ọtụkpiri imiiye lẹ, ọ ya ha anchẹ nyamwụ kị kpa ta iGehasi rụ lẹlẹ.

²⁴Ụka kị jẹ pwụ ọgbọdọ ẹga ká Ịlayịcha kụ lẹ, iGehasi a ye ang ịwe bwu ụbwọ nyaa kpa rụ ka ẹpwang lẹ, ọ daa ọkpahị lẹ, ị rụ lẹlẹ.

²⁵Ụka kọ tịrẹkpẹ ka ẹpwang, Ịlayịcha tọọ wo yẹkẹẹ, “IGehasi ee, ale ā tị́ ka igbinọ-igbinọ-ọ̀?” Ọ wẹ byi ayịbamwụ yẹkẹẹ, “Ayịbahị, ḿ ka ẹgẹhẹ koo, ayịbam.”

²⁶Ịlayịcha tị byọọ yẹkẹẹ, “Á jẹ ká olegu nyam tụng da, yẹ ụka ká ọlẹng ọwẹ hirieji bwu ang ọrụnyẹ nyamwụ wẹ kaka tọng ụ-ụgbẹyị ka-á? Ụụka nyọka ye okpoko bala ang ịkụrụ-kụrụ bala ẹrụ nya olivu bala ịnya alakọnụ bala ịkpịlọ bala ịna bala anchẹ à lẹẹ ka.

²⁷Ajị nya ẹlẹwẹ ká họ-ọ̀ wẹ lẹ, ẹdụrụ olugba nya ịnyịrọ nya ịNaaman ka jung bala anyị nyang bala anyị ịtụma nyang gbe oyi myị oyi!” Ahyaahị ká iGehasi yegiri bwu ẹpwang lẹ, ẹdụrụ olugba nya ịnyịrọ ọlala ịnya ịNaaman à jwọọ lẹlẹ. Ugbinyịrọ nyamwụ pwo hụratataata lala ara.