Read idege 2 ỊDỊRỊHỤ 7 Bible Online

2 ỊDỊRỊHỤ 7 - idege bible

2 ỊDỊRỊHỤ 7

¹Ọọwa, Ịlayịcha-à wẹ yẹkẹẹ, “Wo ẹla ọlẹ ká Amkpaa ya lẹẹ wẹẹ. Ọ yẹkẹẹ: Ijuju ụka ọlịịlẹ, ị ka ya okolo ịta nya iwiiti ịlahịchịng lee okolo ịrwọnyẹ nya ịbali ra okpoko onyoowuru ookpokpo kẹnẹ-kẹnẹ i-ihi ịla ịSameriya.”

²Ụka ọọwa, olegbeju ọlẹ kọọ myị ẹrụ ha adịrahụ à byi Ịlayịcha yẹkẹẹ, “Ba kam lụrụ wo ẹla pyii-ì! Amkpaa lịlọmwụ-ụ́ dọmwụ ka wụrụ iwindo nya epwoohe, ya ang oriri du warị, ẹlẹwẹ ka jẹ-ẹ̀ lịnyị ẹnẹnẹhẹ myị-ị̄ị́?” Ọọwa, Ịlayịcha-à byọọ yẹkẹẹ, “Ahụ lẹ, à ka kpẹhị nya ịlọng yẹ ọ-họ jịra nya ẹlẹwẹ lẹ. Á tị ka kpa ong oriri ọọwa ka ọnụ nyang kpong-kpong ka.”

³Ụka ọọwa, alẹng angị ine ịhyẹ ká ẹdụrụ olugba nya ịnyịrọ jụ byi awụlẹ yẹkẹẹ, “Ọ-hụ am̀ hụ nyahị ẹgẹlẹ gbee kahị ka gbu tị́ ju apyobwuna nya ịyẹ-ẹ̀?

⁴Ó-ri kahị ya, ahị rụ ka epweji mẹ, imyi ọnwụnwụ lụmẹ ụ-ụwa. Ahị ka gbugbu. Áhị hụhụ am̀ ẹgẹlẹ pyịyọọ, ahị tị̀tị̀ ka gbugbu ịnyịnyị. Lẹẹlẹ, āhị kpoye kele ka ịkampụ nya ala iSiriya kaka ya ịlọhị jwaa ụ-ụbwọ mẹ. Ị́ pẹ hiihi kahị hị, ọ hiigu. Ị́ tị nwụhị nwụ ẹ̀hẹẹhẹ́, káhị lẹẹ ka gbugbu ene-ene.”

⁵Lụka nya ewu-obyi, ị hu ang kele ka ịkampụ nya ala iSiriya. Ụka kị pwụ ụwa, ị yẹ ká ọngọngọhẹ-ẹ́ juwa ka.

⁶Ọngọlahị lẹẹ họ ala iSiriya wo ịngịhyẹ lala iru okuu nya iru nya alẹwụ o-juwa wẹ lanyịrẹ bala ang ịrụnyẹ yahị daa. Ọọwa, ị me ká adịrahụ nya ala Isirẹlụ diro ịdịrịhụ nya ala iHiiti bala Ijipiti tụ angịdẹwụ nyaa warị nyọka mwẹla taa lẹlẹ.

⁷Ọọwa, ala iSiriya-à ju uhi rụnyẹ rụ kpa ịlaa be bwu ịkampụ nyaa lodu ọọwa, tụụbwọ hi ebe nya ọdụ nyaa bala anyịrẹ bala ibyiyó bala ang ịkịla wuu lẹlẹ.

⁸Ụka ka alẹng ang ine ịlẹ ká ẹdụrụ olugba nya ịnyịrọ jụ jẹ pwụ ọnụ nya ịkampụ, ị jụ ka ube nya ọdụ ọhẹ, go ang oriri ịlụwa ri, hu enyi nwa bwọọọ. Ị go okpoko onyoowuru bala okpoko ịgọm bala ang ịkụrụ-kụrụ kpa rụ kaka kpịbaa. Ị nyà tịrẹkpẹ myịmyị kele ka ẹpwang nya ọdụ ọkịla, juwa họ jaabwọ kị họ ụka nya ọgbanyẹ.

⁹Ụka ohyẹẹkpẹ kị kụ chịng lẹ, ị byi awụlẹ yẹkẹẹ, “Ahị jam họ ẹla ọtịpyọ lẹ! Áhị ka ya oja ọnyịịla ọlẹ meme la ịlọhị koo. Áhị godayị gbe alụtụrụ, ị́ ka dayi la ọ-yẹhị akama kaka. Ahị kele kaka ya jẹ alẹpwa nya adịrahụ mẹ.”

¹⁰Ọọwa, ị tịrẹkpẹ ka epweji lẹ, ị ya je angịgbeji jaabwọ kị kele ka ịkampụ nya ala iSiriya, kị yẹ ọngọnọhẹ ụ-ụwa kaka lẹlẹ. Ị ya ịwa nyị yẹ anyịrẹ bwọ eji, ebe nya ọdụ nyaa nyị juwa abwabwọ nya ịlaa, ọngọngọhẹ nyị tị ji ọnaabwọ nya ụwa kpong-kpong ka.

¹¹Ọọwa, angịgbeji à kpa ẹlẹwẹ kaka ya je alẹpwa nya adịrahụ lẹlẹ.

¹²Adịrahụ nya ala Isirẹlụ wuleji lepwodu jijiiji lẹ, ọ byi alegbeju nya angịdẹwụ nyamwụ yẹkẹẹ, “Anụ ba kam ya jenu ijẹẹhị ọlẹ ká ala iSiriya wẹẹ kpa me obyi juhi mẹ. Ị jẹ ká ūhi changịrị lụmẹ am̀ e-epweji. Ọọwa, ị rụ hi ịkampụ nyaa kaka kpịbaa ẹ-ẹpwụmẹ lẹ. Irya nyaa ri ụka kahị kele ka ụwa kaka tịtọ nya ang oriri lẹ, ị ka wẹ kaka wuhi pyẹẹ-pyẹ̀ẹ-pyẹẹ lẹ, ị ka ye epweji nyahị la lẹlẹ.”

¹³Ọọwa, ọngọhẹ ẹ-ẹpwụ nya alegbeju nya angịdẹwụ nyamwụ a wẹ yẹkẹẹ, “Āhị chụ alẹng ịhyẹ kị kụ anyịrẹ ịrụ ihihi ịwẹ kele kaka wụlayẹ kị jẹ amila nya ẹlẹwẹ mẹ. Ịngịngịhyẹ-ẹ́ họhọ taa ụ-ụwa, ọ́ ka tịpyọ abwọhẹ gụ ọlẹ kị ka gbu tahị ahị ala Isirẹlụ ihihi ilepweji kaka.”

¹⁴Ọọwa, ị chụ alẹng ịhyẹ, ị kụ angị ịrụnyẹ imiiye kele lẹlẹ. Ọ byaa yẹkẹẹ, “Anụ kele kanụ jẹ ang ọlẹ kọ họ ta angịdẹwụ nya ala iSiriya wẹẹ.”

¹⁵Ị baa ata gbee pwụ Ihu ịJọdan. Ị yẹ ang ịkụrụ-kụrụ bala ang-abwọ ịlẹ ká ala iSiriya tụụbwọ hi chị páta-páta tụ ụgbẹyị-ụgbẹyị da ụka kị wẹẹ rụnyẹ rụ nyọka kpa ịlaa be. Ọọwa, ị nyà kaka tịrọnụ ya je adịrahụ lẹlẹ.

¹⁶Ọọwa, ala ịSameriya-à kpehe kutu-kutu kaka wụ ang ịla ịkampụ nya ala iSiriya wụ wuu lẹlẹ. Ang ịlẹ kị wụwụ kpa nyà lụmẹ gbee kị juwa kpa okolo ịta nya iwiiti ọlahịchịng lee okolo ịrwọnyẹ nya ịbali ra okpoko onyoowuru ookpokpo jaabwọ ká Amkpaa ya nyị ka la.

¹⁷Ụka ọọwa, adịrahụ hu olegbeju ọlẹ kọọ myị ẹrụ họọ kpẹhị rịrị ogirigba nya epweji. Okutu-kutu nya angịnyị tị lụmẹ gbee kị chị olegbeju ọọwa mịla eji, kpa ata bọọ mọọmọọmọọ gbee kọ gbu jaabwọ ká Ịlayịcha ọlọmwụ ya deeji ene.

¹⁸Ịlayịcha ọlọmwụ lẹẹ byi adịrahụ ya ụka ọlịịwẹ nya ahị ọpyẹpyẹ ọọnamwụ, okolo ịta nya iwiiti ọlahịchịng lee okolo ịrwọnyẹ nya ịbali nyị ka ri okpoko onyoowuru ookpokpo ụ-ụwa ị-ịSameriya.

¹⁹Olegbeju nya angịdẹwụ ọwẹ lẹẹ wẹ Ịlayịcha ẹla ọọwa yẹkẹẹ, “Amkpaa lịlọmwụ-ụ́ dọmwụ ka wụrụ iwindo nya epwoohe, ya ang oriri du warị, ẹlẹwẹ-ẹ́ ka jẹ-ẹ̀ lịnyị myị ka.” Ịlayịcha tịtị wọọ byọọ ụka ọọwa yẹkẹẹ, “Ahụ lẹ, à ka kpẹhị nya ịlọng yẹ ọ-họ jịra nya ẹlẹwẹ lẹ. Á tị ka kpa ong oriri ọọwa ka ọnụ nyang kpong-kpong ka.”

²⁰Ọ tị lịnyị ịnyịlẹhị, chajị angịnyị bọọ ata gbee kọ gbu kẹhị-kẹhị ọ-ọnụ nya ogirigba.