Read idege 2 ỊDỊRỊHỤ 8 Bible Online

2 ỊDỊRỊHỤ 8 - idege bible

2 ỊDỊRỊHỤ 8

¹Ụka ọhẹ, Ịlayịcha lẹẹ byi ọnyang ọla iChunẹm ọlẹ ká Ịlayịcha wule ọnyị ọlẹng nyamwụ eji bwula igu yẹkẹẹ, “Kpa ugbiyegu nyang kanụ rụ kele kaka kụ ẹgẹhẹ wẹẹ mẹ, chajị Amkpaa juwa ka kpa ūhi wẹ ọpyị wẹ ẹgẹlẹ ọlẹ kọ ka jam ẹ-ẹpwụ nya ẹka irwiye lẹpwụ-lẹpwụ.”

²Ọọwa, ọ họ jaabwọ ká Ịlayịcha byọọ lẹ, ị rụ kaka kụ ọ-ọpyị nya ala iFilisitiya ẹka irwiye gbẹgbịlẹgbẹ lẹlẹ.

³Ụka ká ẹka irwiye ịịwa cheju kpá, ka ọnyang ọwẹ nyà bwu ọpyị nya ala iFilisitiya, ọ kele ka bịle adịrahụ kọ ka tịrị ẹpwa bala ịpyị nyamwụ ẹkpẹ họọ.

⁴Ụka kọ pwụ eji, adịrahụ juwa kpa ẹla ya ta iGehasi ọnchẹ nya ọlọmwụ Ịlayịcha. Adịrahụ tọ iGehasi wo yẹkẹẹ, “Ya jem jaabwọ ụkụrwọ ẹbyẹbyị ịlẹ ká Ịlayịcha kaa họ wuu wẹẹ.”

⁵IGehasi wẹẹ tịrọnụ ya je adịrahụ jaabwọ ka Ịlayịcha wule ọngọhẹ eji bwula igu. Ọọwa, ịnịna nya ọnyị ọọwa-à jụ wẹ ẹpwang nyọka kpa ọbịlẹ-bịlẹ nyamwụ kaka tọ adịrahụ lẹlẹ. Ọọwa, iGehasi à yẹkẹẹ, “Ẹhẹẹ, Agaba Idu, ọnyang ọọwa-à lẹẹ lẹlẹ. Ọnyị ọlẹng nyamwụ ọlẹ kpangga ká Ịlayịcha wuleji bwula igu à lẹẹ lẹlẹ!”

⁶Adịrahụ tọ ọnyang ọwẹ ịtọ wo yẹkẹẹ, “Ịnyịlẹhị ịnyị-ị́?” Ọọwa, ọ myị nyị lịnyị lẹ, ọ tịrọnụ je adịrahụ jaabwọ kọ la wuu lẹlẹ. Ọọwa, ọ byi ọngọhẹ nya alegbeju ịtụka yoo kọ ka tịrị ang myị ịlẹ ká ọnyang ọwẹ la ene ẹkpẹ họọ tụ okpoko ọlẹ kọ ka ri ị̀nya ang-ẹrụ ịlẹ kị kpa ọpyị nyamwụ wu wuu jịra ẹẹka irwiye ịlẹ kọ ji ẹpwa kaka-à wẹ lẹlẹ.

⁷Ụka ọhẹ juwa ka Ịlayịcha kele ka ịDamasịkọsị egbeju-ẹpwa nya ala iSiriya. ỊBẹnhadadị Adịrahụ nya ala iSiriya jụ ẹdụrụ ụka ọọwa. Ụka ọọwa, ọngọhẹ ya jọọ ya Ịlayịcha ọlọmwụ nyị warị juwa ụ-ụwa.

⁸Ọọwa, ọ byi ịHasẹlụ ọngọhẹ nya alegbeju ịtụkụ yoo yẹkẹẹ, “Kpa ẹnmẹ ụ-ụbwọ, ká kele kaka byi ọlọmwụ kọ tọ Amkpaa wo wẹẹ, m̀ ka hagụ bwu ẹpwụ nya ẹdụrụ ọlẹ myị lẹẹ wẹẹ-ẹ́?”

⁹Ụka ká ịHasẹlụ ju olo nya ụma nya ang ịnyịịla datị-datị nya ala ịDamasịkọsị chụ anyịrẹ-ịkamẹlụ iwo ine lẹ, ọ kele kaka tọ Ịlayịcha lẹlẹ. Ọ kele ka ẹga nya Ịlayịcha lẹ ọ byọọ yẹkẹẹ, “Ọnchẹ ịBẹnhadadị Adịrahụ nya ala iSiriya-à dum ẹrụ lẹẹ wẹ ẹga nyang lẹ. Ọ ya nyị tọng wo wẹẹ, ọwa nyị ka hagụ bwu ẹpwụ nya ẹdụrụ nyọwa ọlẹ myị wẹẹ?”

¹⁰Ọọwa, Ịlayịcha-à wọọ yẹkẹẹ, “Amkpaa wụrụ mẹjẹm nyori ọ́ ka dayi la ogbugbu kaka, anụ tị kele kanụ byọọ mẹ, ọ juwa ka hagụ.”

¹¹Ịlayịcha mwụ ụkpụụrụ yẹ ịHasẹlụ gbee ká ịHasẹlụ-ụ́ la ịlọmwụ kaka. Ọọwa, Ịlayịcha-à da kpuu lida lẹlẹ.

¹²ỊHasẹlụ tọọ wo yẹkẹẹ, “Anyị tị́ ká juwa jida mẹ, ayịbam?” Ịlayịcha wọọ yẹkẹẹ, “Ajị nya ang onyobyi ọtụka ọlẹ ká juwa ka họ ala Isirẹlụ ịnyị. À ka jụ epweji nyaa ịlẹ kị me egwalọ ịnyịịngịrị dagaga ju ila hụrụ. À ka nwụ ikolobya nyaa, go anjwo nyaa kpa da mịla ang, ká ka bwuru anyang ịlẹnyị nyaa āpwụ̄ hurum.”

¹³ỊHasẹlụ tọ Ịlayịcha wo yẹkẹẹ, “Am ọngọ jula ịngịngịhyẹ ka ọlẹ tị́ ka họ anyị kam ka ho ang ọtụka ọlịịwẹ myị?” Ịlayịcha wọọ yẹkẹẹ, “Amkpaa wụrụ mẹjẹm nyori à juwa ka ri adịrahụ nya ala iSiriya.”

¹⁴Ụka ká ịHasẹlụ rụ bwu ẹga nya Ịlayịcha kele ka ẹpwa, adịrahụ tọọ wo yẹkẹẹ, “Ịlayịcha tị bying anyị?” ỊHasẹlụ wọọ yẹkẹẹ, “Ọ ya ahụ nyị ka la gogo.”

¹⁵Ahị ọpyẹpyẹ ọọnamwụ tị lẹ, ịHasẹlụ à hu igbagiri ọ-chị ụka kpọrị-kpọrị ẹhẹ ju enyi chwọọchwọọ lẹ, ọ hwoo kpa kaka kụrụ adịrahụ a-ahị lẹ, adịrahụ à chịpwọọ, gbu táaa lẹlẹ. Ọọwa, ịHasẹlụ à ri adịrahụ nya ala iSiriya kwiwa nya ịBẹnhadadị lẹlẹ.

¹⁶Ẹ-ẹpwụ nya ẹka ọharụ nya adịrahụ oriri nya iJoram ọnyị nya Ehabụ ụ-ụwa Isirẹlụ, iJehoram ọnyị nya iJehochafatị à dọmwụ nyọka ri adịrahụ nya iJuda lẹ.

¹⁷Ọ gu ẹka iwo ịta kụrụ imiiye ụka kọ dọmwụ nyọka ri adịrahụ. Ọ hụ i-iJerusalẹm ri adịrahụ ẹka ineku gbẹgbịlẹ.

¹⁸Ajị nyọlẹ ká iJehoram ye ọnyị nya Ehabụ ọhẹ lẹ, ọ họ ang onyobyi ba Amkpaa lala Ehabụ, juwa gbịla ang onyobyi ọhọhọ nya ịdịrịhụ nya ala Isirẹlụ.

¹⁹Amkpaa-á tị myị ta iJuda ayịreji ka ọọ-lajị nya ọnụ ọlẹ kọ myị ha iDevidi ọnchẹ nyamwụ nyori anyị ịtụma nyamwụ nyị ka kịnyaa juwa ri adịrahụ pyịyọọ.

²⁰Lụka nya adịrahụ oriri nya iJehoram, ala Ẹdọm la egbeju ọngịri tụ ala iJuda pyịpyị lẹ, ị hu adịrahụ nya ụbwọ nya ịlaa rụ kaka la ịlaa lẹlẹ.

²¹Ọọwa, iJehoram à kpa ang ịrụnyẹ ị-kpa dẹwụ nyamwụ wuu hu ang kele nyọka dẹwụ ta epweji nya ịSayii lẹlẹ. Ụka ọọwa, angịdẹwụ nya ala Ẹdọm yaa dada ụ-ụwa. Ọwa bala alegbeju ị-kụ ang ịrụnyẹ nyamwụ tị jẹ maga gbee kị be rụ lepwodu. Ọọwa, angịdẹwụ nyamwụ à nyi epepe rụ ka ẹpwa nya ịlaa lẹlẹ.

²²Ala Ẹdọm la ịlaa bwu ụbwọ nya ala iJuda bwu ụka ọwẹ kịnyaa kịlahị. Alepweji nya iLibina la egbeju-ọngịrị ta ala iJuda ụka ọwẹ ịnyịnyị.

²³Ang myị ang ịkịla ịlẹ ká iJehoram họ lẹ, ị daa ju ụ-ụpwụ nya Ego nya Ịdịrịhụ nya ala iJuda.

²⁴Ụka ká iJehoram gbu, ị jwoo eji i-iworu nya adamwụ anyị e-Epweji nya iDevidi. Ọọwa, Ahasiya ọnyị nyamwụ à ri adịrahụ kwiwa nyamwụ lẹlẹ.

²⁵Ẹ-ẹpwụ nya ẹka iwo kụrụ imiiye nya adịrahụ oriri nya iJoram ọnyị nya Ehabụ ụ-ụwa Isirẹlụ, Ahasiya ọnyị nya iJehoram à dọmwụ nyọka ri adịrahụ nya iJuda lẹ.

²⁶Ahasiya gu ẹka iwo imiiye kụrụ imiiye ụka kọ dọmwụ nya adịrahụ oriri. Ọ hụ i-iJerusalẹm ri adịrahụ ẹka ookpokpo kem. Ataliya ịnamwụ ri ọnyị ọtụma nya Omri adịrahụ nya ala Isirẹlụ.

²⁷Ahasiya Adịrahụ họ ang onyobyi ba Amkpaa gbịla ugbiyegu nya Ehabụ, chajị nyọlẹ kọ ya ahụ bwu ụwa.

²⁸Ụka ọhẹ juwa ká Ahasiya Adịrahụ ba iJoram adịrahụ nya ala Isirẹlụ kele kaka dẹwụ ta ịHasẹlụ Adịrahụ nya ala iSiriya. Alẹwụ ebwo imimiiye ịwẹ kpịla awụlẹ ị-ịRamotu-igiliyadị lẹ, ị họ iJoram ang ẹ-ẹwụ lẹlẹ.

²⁹Ọ nyà kele ka epweji nya iJesiryẹlụ kaka hụ ụ-ụwa gbe ụka kọ ka hagụ. Ọọwa, Ahasiya Adịrahụ nya ala iJuda-à kele kaka wụlọọ yẹ lẹlẹ.